मत्ति 9 - याम्फुसोगुबा याॽमि नुबोक्पॽआ ( मरकुस २:१-१२ ; लुका ५:१७-२६ ) 1 मोबा येसु नाउबेॽ साङ्नुङ टोम्लिॽवाबाङ मेॽयरेङ खोमि सहरबेॽ टेघडा। 2 मोबेॽ याॽमिजिडे़ॽ इक्को सोगुबा याॽमि खोमि रुङ्घाकनुङ येसुमि पोम्बेॽ खिजे़डुजि। माहा याॽमिजिडे़ॽ खोबेॽ ले़ःॽपॽआ बिस्वास खाङ्नुङ टुक्खुबा याॽमि लुसु, “नानि, आट ले़टे, हे़ने़हा पाप आम्लाङ लिबेटाहा।” 3 येसुडे़ॽ इडोॽ लुबॽआ खे़म्नुङ कोहि यहुदि धारमिक नियम इःॽखुबाजि कासामि, “इगोसे़ॽको निवाहाङ्रे सिःक्चोन्डुए” 4 येसुडे़ॽ माहा यहुदि धारमिक नियम इःॽखुबाजिमि निवाबेॽहा खा लेनुङ लुसुजि, “हे़निङ इन्ढोङ टाङ्बामि निवाबेॽ मङे़हा खा मिॽइन्डानुमे ? 5 इगो सोगुबा याॽमि ‘हे़ने़हा पाप आम्लाङ लिसा’ लुमा ने़ःक्चा ले़येन्डे ‘हे़ने़ए़ रुङ्घाक खिमानुङ राप्से’ लुमा ने़ःक्चा ले़ये, लो लुघाक्सानुमे ? 6 तर याॽमिमि पसाडे़ॽ मक्खाम्डेमबेॽहा याॽमिजिमि पाप आम्लाङ पिहेमे अधिकार टुये लुनुङ लेसानुमे।” मोबा मो सोगुबा लुसु, “येपोक्नुङ, हे़ने़हा रिःॽठाम चेॽ, खाम्मा खिमानुङ खिम खडे।” 7 मोबा मो याॽमि येपोक्नुङ खोमि खिम खडा। 8 मोबेॽहा याॽमिजिडे़ॽ इडोक्मा खरिमा खा खाङ्नुङ खोजि किस्सिडामि। माहाजिडे़ॽ मो याॽमि इडोक्मा सक्ति पिघुबा निवाहाङ्मि ओहाङ ले़टुजि। येसुडे़ॽ मत्ति के़ःॽपॽआ ( मरकुस २:१३-१७ ; लुका ५:२७-३२ ) 9 येसु मोबाङ खे़ॽमे़ॽनिङ्सिमाबेॽ मत्ति निङ्मा इक्को याॽमि मे़क्चेन लाढाम ठाउँबेॽ पेम्मे़ॽनिङ्सिबॽआ खाङ्डोक्टु। खोसे़ॽ मो लुसु, “कानुङ राप्से।” मोबा मत्ति येपोक्नुङ येसुनुङ खडा। 10 येसु खोम चोङ्साजिनुङ मत्तिमि खिमबेॽ चामा चासिॽ पेम्माबेॽ बेॽलो मे़क्चेन लाखुबाजिनुङ हाइखा पापिजिसो येसुनुङ चासिॽ पेनामि। 11 इगो खा खाङ्डोक्नुङ फरिसिजिडे़ॽ येसुमि चोङ्साजि लुसुजि, “इन्ढोङ हे़निङ्मि गुरु चाहिँ मे़क्चेन लाघुबा मोबा पापिजिनुङ सोरि पेन्नुङ चाये ?” 12 माहाजिडे़ॽ लुबॽआ खा खेम्नुङ येसुडे़ॽ लुसुजि, “सन्चा ले़ःॽखुबाजिमि लागि सिडा ले़ःॽखुबा पाप्निबा, तर टुक्खुबाजिमि लागि चाहिँ सिडा ले़ःॽखुबा पाप्मिये। 13 तर इगोबाङ खे़ॽनुङ इगो खाडे़ॽ लुबॽआ इमाङ्डे लुमे खा धारमिक नेॽचिराबाङ लेसानुमे। ‘भोग पिबॽआ ने़ॽनि, हे़निङे़ॽ नम्नावा ले़ःॽपॽआ के़ॽ नेन्जानुङे।’ इन्ढोङ्होङ का धरमिजिमि लागि ने़ॽनि, तर पापिजि हिङ्मवा पिसिॽ लेङ्इटिङे।” मे़न्जारेॽ पेम्मे टुम्बेॽ इःॽपॽआ ( मरकुस २:१८-२२ ; लुका ५:३३-३९ ) 14 मोबा युहन्नामि चोङ्साजि येसुबेॽ लेन्नुङ सिप्सुजि, “कानिङ्नुङ फरिसिजि मे़न्जारेॽ पेङ्इन्डिङ्मा, तर इन्ढोङ हे़ने़हा चोङ्साजि मे़न्जारेॽ पेम्मिने ?” 15 येसुडे़ॽ माहाजि लुसुजि, “नायोङ्बा जन्तिजिनुङ सोरि टुमाबेॽ, इमा खोजि सोक ले़म्मे ? तर इडोक्मा याकसो लेङ्इये, इन्डोक्पेॽ जन्तिजिबाङ नायोङ्बा हाघे़न्डुजे, मोडोक्पेॽरेॽनोॽ माहा जन्तिजि मे़न्जारेॽ सोक ले़ःॽसाङ पेङ्इम्मे। 16 “असे़ॽसो पुरानो चेॽ चोङ चेॽमि टालोडे़ॽ रेबुनि। इन्ढोङ्होङ रेबुहोङ्सो चोङ टालो सुम्घे़ये, मोबा पुरानो चेॽ छना नाःक्पेन्डुए। 17 “असे़ॽसो पुरानो साउकमि सुपपेॽ चोङ अङ्गुरमि मद्य युक्सुजिनिबा, युक्सुजिहोङ्सो सुप नाःक्खे़येनुङ अङ्गुरमि मद्यसो ओप्खे़ये। मोडोगे़ॽ चोङ अङ्गुरमि मद्य चोङ साउकमि सुपपेॽ युङ्मा खे़ये मोबा खे़वानुङ सुप जोगा लिये।” यहुदि एप्पामि सम्समा पसानुङ इक्को मेॽनामिॽ नुबुक्पॽआ ( मरकुस ५:२१-४३ ; लुका ८:४०-५६ ) 18 येसुडे़ॽ माहा याॽमिजि इघा खा लुमे़ॽनिङ्सिमाबेॽ इक्को यहुदिजि सुम्ढाम सभाखिमबेॽए एप्पा लेस्सा। मोसे़ॽ येसु ढोग ले़ःॽसाङ बिन्ति ले़टु, “गुरु, के़ए़ सम्समा पसा ए़डे़ॽ याक्लो सिघडा, तर हे़न आप्नुङ काङ्मि पसा के़क्पेॽहोङ खो हिङ्बुक्इये।” 19 येसु येपोक्नुङ खोम चोङ्साजिनुङ सोरि मो याॽमिमि ए़ङ्गुवा ए़ङ्गुवा खडा। 20 मोडोक्पेॽनोॽ बारो निङ्बाङ हरि खे़ॽमे टुक्मवाडे़ॽ टुक्सिघे़ॽपॽआ मेॽनामिॽ येसुमि ए़ङ्गुवा लाम्बाङ लेङ्नुङ खोमि चेॽमि छेउ के़गु 21 इन्ढोङ्होङ खोमदाङ्बे़ॽ निवाबेॽ मिडु, “के़ॽ खोमि चेॽरेॽनोॽ के़गुङ्होङ्सो का नुबोक्इङे।” 22 येसु ए़ङ्गुवालाम हिङ्घे़ॽमाबेॽ मो मेॽनामिॽ खाङ्डोक्नुङ लुसु, “नानि, आट ले़टे, हे़ने़ए़ बिस्वासडे़ॽ हे़न नुबोक्इटे़।” मोबा मोडोक्पेॽनोॽ मो नुबुगा। 23 मोबा ए़क्साङ येसु मो यहुदि एप्पामि खिमबेॽ लेस्सा। मोबेॽ बासुरि टेङ्खुबाजिनुङ बेॽलो याॽमिजि खायोक मायोक कामे़ॽनिङ्सिबॽआ चुप्टुजि। 24 येसुडे़ॽ माहा याॽमिजि लुसुजि, “हे़निङ चोप पाखे़ॽयु खडानिङे, इन्ढोङ्होङ इगो नानि मे़सिघे़ॽटि इम्डिघे़टे़।” तर माहा याॽमिजिडे़ॽ येसु यिटे़गुजि। 25 मोबा येसुडे़ॽ माहा याॽमिजि पाखे़ॽयु पाङ्नुङ खो चाहिँ होङ्सिॽयु खे़ॽनुङ मो पिच्छामि हुक राःप्नुङ के़डु, मोबा मो पिच्छा सुवाक्टो पुकडा। 26 इगो खा मो मुलुकबेॽहा चोप याॽमिजिबेॽ मुक्खडा। निप्पाङ मिक मेए़खुबानुङ इक्को कुबा नुबोक्पॽआ 27 येसु मो ठाउँबाङ खे़ॽमे़ॽनिङ्सिमाबेॽ निप्पाङ मिक मे़ए़खुबाजिडे़ॽ “हे दाउदमि पसा, कानिङ नम्नावा ले़ःॽमा” कासाङ खो टिङ्बोगुजि। 28 येसु खिमहोङ्सिॽयु पे़ए़न्नुङ ए़क्साङ मिक मे़ए़खुबा निप्पाङ याॽमिजि खोबेॽ लेस्साजि। येसुडे़ॽ माहाजि लुसुजि, “के़ॽ हे़न्जिङ्मि मिक नुबोक्इनुङे लुनुङ बिस्वास ले़न्जुए ?” मोजिडे़ॽ खो लुसुजि “इँहिॽ परभु।” 29 मोबा येसुडे़ॽ मोजिमि मिक के़क्नुङ लुसुजि “हे़न्जिङे़ॽ बिस्वास ले़ःॽपॽआडोक्नोॽ लिरो।” 30 खोजिमि मिक ए़ॽपोगा। मोबा येसुडे़ॽ इडोॽ लुसुजि, “खेप्साजे, इघा खा असासो ए़लुमे़।” 31 तर खोजि खे़ॽनुङ येसुमि टुम्बेॽ मो ठाउँमि चोपराजि परचार ले़टुजि। 32 येसु खोम चोङ्साजिनुङ मो ठाउँबाङ खे़ॽमे़ॽनिङ्सिमाबेॽ, याॽमिजिडे़ॽ मोबेॽ मङे़ॽमा चाबे़ॽ कुबा टोङ्बॽआ इक्को याॽमि चिक्चे़डुजि। 33 येसुडे़ॽ मङे़ॽमा चाप यिक्मासोरोॽ मो याॽमि यामुबुगा। मो खाङ्नुङ याॽमिजि खरि मिन्साङ कासामि, “इडोक्मा खरिगो कानिङे़ॽ आयुरो इस्राएलबेॽ इन्डोक्पेॽसो मे़खाङ्डिॽटुङ्मा।” 34 तर फरिसिजि काबोगामि, “इगोसे़ॽको मङे़ॽमा चापमि हाङ्बामि सक्तिडे़ॽ मङे़ॽमा चापजि यिॽइन्डुए।” खेत्लाजि चुक्खे़ॽपॽआ ( मरकुस ६:३४ ; लुका १०:२ ) 35 येसु चोप सहरनुङ खिम्डेमबेॽहा यहुदि सुम्ढाम खिमराजि सिक्छे पिसाङ, निवाहाङ्मि राज्यमि सुसमाचार परचार ले़ःॽसाङ मोबा चोप खालहा टुक्खुबाजि नुबोगुजि। 36 तर मोबेॽ सुम्बॽआ बेॽलो याॽमिजि खाङ्नुङ येसुमि निवा नम्नावे़ॽ टिबु। इन्ढोङ्होङ माहाजि गोठ्ला मे़ॽनिङ्हा सामुजिडोॽ मोबा फोःप्सिघे़ॽपॽआनुङ टाङ्बाङ मे़ॽनिङ्हा ले़टामि। 37 मोबा येसुडे़ॽ खोमि चोङ्साजि लुसुजि, “खाक्सानुमे, सुम्मा खे़ये बालि बेॽलो टुहा, तर खेत्लाजि चुक्खे़टामे, 38 मोडोगे़ॽ बालिमि मायोङ्बानुङ ‘बालि सुम्घुबा खेत्लाजि पाङ्बेॽमाये’ लुनुङ पारथना ले़टानुमे।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.