मत्ति 5 - याम्फुयेसुडे़ॽ टोक्टोक्मे़ॽटु पिबॽआ अरति ( लुका ६:२०-२६ ) 1 मोबा बेॽलो याॽमिजि सुम्बॽआ खाङ्नुङ येसु टोक्टोक्मे़ॽटु साङ्नुङ पेना, मोबेॽनोॽ खोमि चोङ्साजिसो लेन्नुङ खोमि किॽयु मिॽयु पेनामि। 2 मोबा येसुडे़ॽ माहा याॽमिजि सिक्छे पिसाङ इडोॽ लुसुजि, 3 “निवाहाङ्मि पोम्बेॽ टाङ्बा इमाङ्सो ने़ॽनिबा मिॽखुबाजिडे़ॽ आसिस चुप्मिन्डुजे, इन्ढोङ्होङ निवाहाङ्मि राज्य खोजिमिन्नोॽ ले़ये। 4 सोक ले़ःॽखुबाजिडे़ॽ आसिस चुप्मिन्डुजे, इन्ढोङ्होङ निवाहाङ्डे़ॽ खोजि निवाबेॽ सान्तिनुङ सहास पिन्डुजे। 5 ए़डे़म्मा लिघुबाजिडे़ॽ आसिस चुप्मिन्डुजे, इन्ढोङ्होङ मक्खाम्डेमनुङ मोबेॽहा चोप थोकबेॽ अधिकार चुप्मिन्डुजे। 6 धारमिक योम्बोक ले़ःॽमा मिॽखुबानुङ मोमि वाइॽमे़ॽ सिघुबाजि आसिसित ले़म्मे, इन्ढोङ्होङ खोजिडे़ॽ उक्खारो चोडोक्इन्डुजे। 7 नम्नावा ले़ःॽखुबाजि आसिसित ले़म्मे, इन्ढोङ्होङ खोजिडे़ॽसो नम्नावा चुप्मिन्डुजे। 8 चोखो निवा खिघुबाजि आसिसित ले़म्मे, इन्ढोङ्होङ खोजिडे़ॽ निवाहाङ खाङ्डोइन्डुजे। 9 चोप याॽमिजिनुङ टोङ्जाखुबाजिडे़ॽ आसिस चुप्मिन्डुजे, इन्ढोङ्होङ खोजि निवाहाङ्मि पसाजि लुनुङ याॽमिजिडे़ॽ लेन्डुजे। 10 धरमि लिनुङ हिङ्माबेॽ याॽमिजिबाङ चुङ्जामा खेः आङ्खुबाजिडे़ॽ आसिस चुप्मिन्डुजे, इन्ढोङ्होङ थाङ्सिरिमि राज्य खोजिमिन्नोॽ ले़ये। 11 “हे़निङ याॽमिजिडे़ॽ सिःक्चामिहोङ, चुङ्जामिहोङ, हे़निङ मे़ःॽनोॽहा आप्टिक टिमिहोङ साप्थक्सानिङे। 12 मोडोक्पेॽ हाङ्हाङ ले़टानिङे, साप्थक्सानिङे, इन्ढोङ्होङ थाङ्सिरिॽटु हे़निङ्मि लागि बेॽए इनाम टुहा। इन्ढोङ्होङ इडोक्नोॽ हे़निङ्बाङ याक्लोहा अगमबक्ताजिसो याॽमिजिडे़ॽ चुङ्जोसुजे। युमनुङ जोतिबाङ सिक्छे ( मरकुस ९:५० ; लुका ११:३३ ; १४:३४-३५ ) 13 “हे़निङ मक्खाम्डेमबेॽहा युम ले़न्डानिङे, तर युममि युम लुये मे़खे़ॽहोङ फेरि इमाङेॽटे युम लुये टोङ्मे ? मो युमगो राप्खे़ये मोबा याॽमिजिमि सराङ्डे़ॽ सिॽइन्डुजे। 14 “हे़निङ्गो इगो मक्खाम्डेममि जोति ले़न्डानिङे। टोक्टोक्मे़ॽटुए सहर कुम्हेनिबा। 15 याॽमिजिडे़ॽ कुप्पि उःप्नुङ पाथिडे़ॽ टे़गुजिनि, बोरु चोपमि लागि उज्यालो लिरो लुनुङ अग्लोमा ठाउँबेॽ युङ्इन्डुजे। 16 इडोॽ हे़निङ्मि जोति चोपमि पोम्बेॽ खाङ्मुये मोबा हे़निङे़ॽ ले़ःॽपॽआ नुबा योम्बोक चोबे़ॽ खाङ्इन्डुजेनुङ थाङ्सिरिबेॽ पेङ्खुबा निवाहाङ्मि ओहाङ ले़न्डुजे। यहुदि धारमिक नियममि टुम्बेॽ सिक्छे ( लुका १६:१७ ) 17 “यहुदि धारमिक नियम नासि ले़ःॽसिॽ का लेम्बॽआ लुनुङ ए़ॽमिडानुमे। कागो नासि ले़ःॽसिॽ ने़ॽनि, तर मो पुरा ले़ःॽसिॽगोरे लेङ्इटिङे। 18 चइबानोॽ के़ॽ हे़निङ लुनिम्ने़, मक्खाम्डेमनुङ थाङ्सिरि नासि लिमा याक्लो यहुदि धारमिक नियमबेॽहा इक्को ए़डे़म्मा खासो पुरा मे़ल्लिरेॽ लेडुनिबा। 19 मोडोगे़ॽ असे़ॽ इघा आग्याबेॽ चोपबाङ ए़डे़म्मा इक्को आग्यासो पालना ले़टुने अथबा हाइखाजिसो ले़ःॽमा पाप्निबा लुन्डुजे, मो याॽमि थाङ्सिरिमि राज्यबेॽ चोपबाङ ए़डे़म्मा लिये। तर असे़ॽ खोमटाङ्बे़ॽ मो पालना ले़न्डुए मोबा याॽमिजिसो ले़ःॽमा खे़ये लुनुङ इःन्डुजे मो याॽमि थाङ्सिरिमि राज्यबेॽ चोप्पाङ बेॽए लिये। 20 मोडोगे़ॽ के़ॽ हे़निङ लुनिम्ने़, हे़निङे़ॽ यहुदि धारमिक नियम इःॽखुबाजिनुङ फरिसिजिबाङ्सो नुरोॽ आग्या पालना मे़ले़टानुमहोङ थाङ्सिरिमि राज्यबेॽ पे़खे़ॽहेसानिङ्नि। येसुडे़ॽ सुरिकमि टुम्बेॽ इःॽपॽआ 21 “इडोगे़ॽ निवाहाङ्डे़ॽ पिबॽआ आग्या कानिङ्मि टुबालाबाजिडे़ॽ इडोॽ लुसुजे, ‘याॽमि ए़ॽसेडानुमे, सेडानुमहोङ दन्डा चुप्मिन्डानुमे’। इगो खागो हे़निङे़ॽसो खेम्इटानुमे। 22 तर के़ॽ हे़निङ लुनिम्ने़, असा खोमि निसानुङ मे़ॽनोक्सो सुरकेये मोसे़ॽ दन्डा चुप्मिन्डुए, असे़ॽ खोम निसा बेजेत ले़न्डुए मोसे़ॽ यहुदि बेॽए सभामि पोम्बेॽ येःप्मा खे़ये। असे़ॽ खोम निसा चापहिन्डुए, मो याॽमि खेःलोकबेॽ सिॽइये। 23 “मोडोगे़ॽ हे़निङे़ॽ निवाहाङ भेटि चेॽटिमा याक्लो हे़ने़ए़ वावा, निसाजि हे़न्नुङ सुरके़ॽपॽआ मिॽटोगुहोङ, 24 हे़ने़ए़ भेटि, भेटि ए़न्ढाममि के़क्पेॽ याःॽयानुङ याक्लो टाङ्बामि वावानिसानुङ आम्लाङ ङागे मोबारेॽ भेटि चेॽटिसे। 25 “हे़न्नुङ मुद्दा ले़ःॽखुबानुङ अदालत खे़ॽमाबेॽ रामबेॽनोॽ खोनुङ खा टोङ्बेसे। ने़ॽनिहोङ्गो मोसे़ॽ हे़न न्यायधिसमि पोम्बेॽ येःप्मेये, मोबा मोसे़ॽ हे़न तिरिङ्गामि हुकपेॽ पियेनुङ माहाजिडे़ॽ तिरिङ्गा खिमबेॽ से़ॽइम्मे। 26 चइबानोॽ हे़निङ के़ॽ लुनिम्ने़, मोडोक्पेॽ सिॽपॽआ इक्को इक्को जरिमाना मे़म्फोङ्लो हे़निङ मोबाङ लेक्खे़ॽहेसानिङ्निबा। बेभिचार ए़ले़ःॽमे टुम्बेॽ सिक्छे 27 “निवाहाङ्मि आग्याबेॽ इडोॽ लुबॽआसो हे़निङे़ॽ खेम्इटानुमे, ‘हे़ने़ॽ बेभिचार ए़ले़टे।’ 28 तर के़ॽ लुनिम्ने़, इक्को याॽमिडे़ॽ इक्को मेॽनामिॽ मङे़ॽमा निवाडे़ॽ खाक्सुहोङ मोसे़ॽ बेभिचार ले़ःॽपेबॽआडोॽ लिये। 29 हे़ने़ए़ चुप्थिङ मिगे़ॽ हे़न पाप ले़ःॽमाराप्मिहोङ मो मिक चाङ्नुङ राप्पेसे। मोसे़ॽ ले़ःॽमे़ॽ हे़ने़ए़ हिङा खेःलोकपेॽ सिॽमाहोङ्गो मो मिक राप्पेमानोॽ चुये। 30 मोडोक्नोॽ हे़ने़ए़ चुप्थिङ हुगे़ॽ हे़न पाप ले़ःॽमेयेहोङ मो हुक चेन्नुङ राप्पेसे। मोसे़ॽ ले़ःॽमे़ॽ हे़ने़ए़ हिङानोॽ खेःलोकपेॽ सिॽइयेहोङ्गो मो हुक राप्पेमानोॽ चुये। छोडपत्रामि टुम्बेॽ येसुमि सिक्छे ( मत्ति १९:९ ; मरकुस १०:११-१२ ; लुका १६:१८ ) 31 “निवाहाङ्मि आग्याडे़ॽ इडोक्सो लुबॽआ ले़ये, ‘बनिमा लेॽमाबेॽ छोडपत्रा पिनुङ लेॽमा खे़ये’। 32 तर के़ॽ लुनिम्ने़, बेभिचार ले़ःॽपॽआ आप्टिकबाङ हाइखा खाडे़ॽ ले़ःॽमे़ॽ टाङ्बामि बनिमा लेॽपेखुबे़ॽ खो बेभिचार ले़ःॽमेन्डुए। मोबा लेॽपेबॽआ मेॽनामिॽनुङ फुङ्सया ले़ःॽखुबे़ॽसो बेभिचार ले़न्डुए। किरिया हे़क्मा फे़न्निबा 33 “निवाहाङ्मि इडोक्मा आग्या उहिलेहा याॽमिजि लुबॽआ हे़निङे़ॽ खेम्इटानुमे, ‘हे़ने़ॽ रेम्डेॽनुङ किरिया ए़हे़क्मे। तर निवाहाङ्नुङ ले़ःॽपॽआ हेन्ज्रुङ पुरा ले़ःॽमे।’ 34 तर के़ॽ हे़निङ लुनिम्ने़, किरिया हे़क्मानोॽ फे़न्निबा। थाङ्सिरिमि निङ्बेॽ किरिया ए़हे़गानुमे, इन्ढोङ्होङ मोगो निवाहाङ्मि पेन्ढाम ले़ये। 35 मक्खाम्डेममि निङ्बेॽ किरिया ए़हे़क्मे, इन्ढोङ्होङ मोगो निवाहाङ्मि सराङ युङ्ढाम ले़ये। यरुसलेममि निङ्बेॽसो किरिया ए़हेगानुमे इन्ढोङ्होङ मो सहरगो थाङ्सिरिमि हाङ्बामि सहर ले़ये। 36 मोबा टाङ्बामि निन्डवाँ के़क्नुङ्सो किरिया ए़हेगानुमे इन्ढोङ्होङ हे़निङे़ॽ इक्को टाङ मक्खुइक्मा अथबा उथ्रिॽमा टोङ्हेसानुम्नि। 37 हे़निङे़ॽ लुमे खा चाहिँ, ‘इँहिॽऐ’ होङ, ‘इँहिॽऐ’ लुसानुमे ‘ने़ॽनि’ होङ ‘ने़ॽनि’ लुसानुमे। इगोबाङ बेॽलो खा लुमा चाहिँ मङे़ॽमा चापबाङ लेङ्इये। साटो ए़ॽलामे टुम्बेॽ सिक्छे ( लुका ६:२९-३० ) 38 “निवाहाङ्मि आग्याबेॽ इडोक लुबॽआसो हे़निङे़ॽ खेम्इटानुमे, मिकमि साटो मिक, के़ङ्मि साटो के़ङ, 39 तर के़ॽ हे़निङ लुनिम्ने़, हे़निङ मङे़ॽमा बेबहार ले़ःॽखुबा असासो हे़निङे़ॽ मङे़ॽमा बेबहार ए़ले़टानुमे। याॽमिडे़ॽ हे़ने़ए़ चुप्थिङ नाम्दाङ्बेॽ फे़ःक्मिहोङ, हाइको नाम्दाङ्सो टाप्पेॽमे। 40 असा हे़नबेॽ लेङ्नुङ हे़ने़ए़ लाॽलिङ लाघे़ॽमा योगुहोङ, खो ओप्ताङ्सो पिहाक्से। 41 असे़ॽ हे़न इक घन्टामि राम चिॽखे़ॽहोङ निच्चि घन्टामि राम खे़ॽपिॽटे। 42 मोडोक्नोॽ हे़निङ्नुङ ङाःक्खुबाजि पिसानुमे, सिङि ङाःक्खुबाजि सिङि पिसानुमे। सतुरजिसो नम्नम ले़टानुमे ( लुका ६:२७-२८ , ३२-३६ ) 43 “हे़निङे़ॽ निवाहाङ्मि आग्याबेॽ इडोॽ लुबॽआसो खेम्इटानुमे, हे़ने़हा पेन्लागाम नम्नम ले़टानुमे, मोबा सतुरजि चाहिँ सिॽचासानुमे। 44 तर के़ॽ चाहिँ हे़निङ इडोॽ लुनिम्ने़, टाङ्बामि सतुरजि नम्नम ले़टानुमे, हे़निङ चुङ्जाखुबामि लागि पारथना ले़टानुमे। 45 इडोॽ ले़टानुमहोङ हे़निङ थाङ्सिरिमि पाबामि पसा लिन्डानिङे। इन्ढोङ्होङ निवाहाङ्डे़ॽ नुबानुङ मङे़ॽमा निप्पाङ्मि लागिनोॽ नम पिन्डुजे। मोबा पापिनुङ धरमि निप्पाङ्मि लागिनोॽ वारि पिये। 46 इन्ढोङ्होङ हे़निङे़ॽ टाङ्बा नम्नम ले़ःॽखुबारेॽ नम्नम ले़न्डानुमेहोङ्गो हे़निङे़ॽ इनाम चुप्टानुम्नि ? आक्टोक्मा नम्नमगो पापिजिडे़ॽसो ले़न्डुजे। 47 हे़निङे़ॽ टाङ्बाङ्जिरेॽनोॽ नुरोॽ ले़न्डानुमेहोङ्गो, हाइखा याॽमिजिडे़ॽ ले़ःॽपॽआबाङ बेॽए योम्बोक मे़ले़टानुम, मोडोॽको निवाहाङ्बेॽ बिस्वास मे़ले़ःॽखुबा याॽमिजिडे़ॽसो ले़न्डुजे। 48 मोडोगे़ॽ थाङ्सिरिबेॽ पेङ्खुबा हे़निङ्मि निवाहाङ पाबा चोप थोकबेॽ परिपक्का लिडिडोॽ, हे़निङ्सो आक्टोॽनोॽ लिसानिङे।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.