मत्ति 25 - याम्फुइक्पोङ राङ्मिॽचि 1 येसुडे़ॽ हागोसो लुबेॽटुजि, “थाङ्सिरिमि राज्य चाहिँ नायोङ्बा चुप्सिॽ खे़ॽखु इक्पोङ राङ्मिॽचिडोॽ ले़ये। माहाजिडे़ॽ टाङ्बा टाङ्बामि कुप्पि याङ्मानुङ नायोङ्बा चुप्सिॽ खडामि। 2 माहाजिबेॽ ङाःबाङ चाहिँ चेन्दुबा, ङाःबाङ चाहिँ निवा मे़ॽनिङ्हाजि ले़टामि। 3 माहा निवा मे़ॽनिङ्हा राङ्मिॽचिडे़ॽ खोजिनुङ कुप्पिगो लाघे़ॽटुजि, तर खोजि पाप्मिहा केवा चाहिँ मे़याङ्घे़ॽटुजि। 4 तर चेन्दुबा राङ्मिॽचिडे़ॽ चाहिँ कुप्पिनुङ पाप्मिहा केवासो याङ्घे़ॽटुजि। 5 नायोङ्बा ढिलो लेम्बॽआसे़ॽ माहा चोप राङ्मिॽचि इम्मे़ॽ टुम्मिक्टुम्मिक लिनुङ इम्डिघडामि। 6 “तर सेन्डा ‘खाक्सानुमे, नायोङ्बा लेन्सिॽपोरोगा, खो चुप्सिॽ आबानिङे’ लुबॽआ खेम्मुसा। 7 मोबा माहा चोप राङ्मिॽचि हुम्बोगामि, मोबा खोजि टाङ्बा टाङ्बामि कुप्पि पोरोगुजि। 8 माहा निवा मे़ॽनिङ्हा राङ्मिॽचिडे़ॽ चेन्दुबा राङ्मिॽचि लुसुजि, ‘हे़निङ्मि केवा कानिङ्सो ए़डेॽवा पिमाना, इन्ढोङ्होङ कानिङ्मि कुप्पिबेॽ केवा रुक्खे़ॽपॽआसे़ॽ सिघे़ॽसिॽ पोरोगा।’ 9 तर चेन्दुबा राङ्मिॽचिडे़ॽ इडोॽ लुसुजि, ‘हे़निङ पिमा के़ॽलो केवा कानिङ्नुङ माॽआहा, बोरु इन्जाढामबेॽ खे़ॽनुङ आम्निमि लागि केवा इन्जासानुमे।’ 10 “माहाजि केवा इन्सिॽ खे़ॽमाबेॽ नायोङ्बा लेम्बेसा। पोरोक्नुङ पेम्बॽआ ङाबाङ राङ्मिॽचि खोनुङ फुङ्सयामि भत्तेरबेॽ होङ्सिॽयु पे़ए़नामि मोबा राम्डेम से़क्चुम्घडा। 11 “इॽछोॽ ए़क्साङ माहा केवा इन्सिॽ खे़ॽखुबा राङ्मिॽचि लेन्नुङ काबोगामि, ‘परभु, परभु, कानिङ्मि लागि राम्डेम हेम्बिॽमाना!’ 12 तर नायोङ्बे़ॽ खोजि लुसुजि, ‘चइबानोॽ के़ॽ हे़निङ लेनोॽ लेनिम्नानि।’ 13 “मोडोगे़ॽ हे़निङ चङ्खो पेनानिङे, इन्ढोङ्होङ मो याकनुङ मो बेला हे़निङे़ॽ लेसानुम्ने।” सुम्बाङ सेउतेजि ( लुका १९:११-२७ ) 14 मोबा येसुडे़ॽ लुसु, “याॽमिमि पसा लेम्मा बेलाबेॽ चाहिँ इक्को याॽमि हाइको देस खे़ॽनुङ टेजाबॽआ बेलाडोक्नोॽ लिये। मो मायोङ्बाडे़ॽ परदेस खे़ॽमाबेॽ खोमि सेउतेजि के़ःॽनुङ खोमि याङ्सरावा माहाजि जिम्मा पिओसुजि। 15 खोसे़ॽ माहाजि खोजिमि योम्बोक ले़ःॽमे निवाडोॽ इक्को सेउते सुनामि ङाउम मुन्डा, हाइको सेउते निच्चि मुन्डा, मोबा हाइको चाहिँ इक्को मुन्डा पिआनुङ हाइको देस खे़ॽपेसा। 16 मोबा सुनामि ङाउम मुन्डा चुप्खुबाडे़ॽ लामासोरोॽनोॽ खे़ॽनुङ मो याङ्बाङ बेपार ले़ःॽनुङ हाइखा ङाउम मुन्डा याङ टोक्सु। 17 मोडोक्नोॽ निच्चि मुन्डा चुप्खुबे़ॽसो हाइखा निच्चि मुन्डा टोक्सु। 18 तर इक्को मुन्डा चुप्खुबे़ॽ चाहिँ लाघे़ॽनुङ भुइ टोनुङ खोमि मायोङ्बामि याङ मोबेॽ चुम्युक्सु। 19 “बेॽलो निङ ए़क्साङ माहा सेउतेजिमि मायोङ्बा लेस्सा मोबा खोसे़ॽ माहा सेउतेजिनुङ हिसाब ङागु। 20 मोबा ङाउम सुनामि मुन्डा चुप्खुबे़ॽ मो मायोङ्बामि पोम्बेॽ लेन्नुङ लुसु, ‘मायोङ्बा, हे़ने़ॽ का पिबॽआ ङाउम सुनामि मुन्डाबाङ हाइखा ङाउम मुन्डा टोङ्इटुङ्हा।’ 21 मायोङ्बाडे़ॽ खो लुसु, ‘हे़न ओहाक, नुबानुङ बिस्वासि सेउते! हे़न ए़डे़ॽवा खाबेॽ बिस्वासनुङ्मा लिसा, हागो हे़न बेॽलो खामि जिम्मा पिन्ने़, हे़न कानुङ सोरि साप्थाक्से।’ 22 निच्चि मुन्डा चुप्खुबे़ॽसो आप्नुङ लुसु, ‘मायोङ्बा, हे़ने़ॽ पिबॽआ निच्चि मुन्डाबाङ के़ॽ हाइखा निच्चि मुन्डा टोङ्इटुङ्हा।’ 23 मोमि मायोङ्बाडे़ॽ खो लुसु, ‘हे़न ओहाक, नुबानुङ बिस्वासि सेउते, हे़न ए़डेॽवा खाबेॽ बिस्वासनुङ्मा लिसा, हागो हे़न बेॽलो खामि जिम्मा पिन्ने़, हे़नसो कानुङ साप्थाक्से।’ 24 “इक्को सुनामि मुन्डा चुप्खुबासो मोबेॽ लेन्नुङ लुसु, ‘मायोङ्बा, हे़न मे़रिॽपॽआ ठाउँबाङ अन्न हे़क्खुबानुङ मे़न्टुप्पॽआ ठाउँबाङ सुम्घुबा, निवा छॽइये याॽमि ले़ये लुनुङ के़ॽ लेसुङ। 25 मोडोगे़ॽ का किस्सिडिङ, मोबा हे़ने़ॽ पिबॽआ सुनामि मुन्डा आक्खामा होङ्सिॽयु चुम्नुङ युक्सुङ, हे़ने़ॽ पिबॽआ सुनामि मुन्डा इगोबेॽ टुये टाबे।’ 26 मोमि मायोङ्बाडे़ॽ मो लुसु, ‘होउ दुस्ट, पाङ्सुखुबा सेउते, का मे़रिॽपॽआ ठाउँबाङ हे़क्खुबानुङ मे़न्टुप्पॽआ ठाउँबाङ सुम्घुबा लुनुङ हे़ने़ॽ लेसिङाहोङ, 27 हे़ने़ॽ काङ्मि याङ ब्याजबेॽ पिमा खडे। मोडोॽ ले़ःपॽआ ले़टाहोङ का लेम्माबेॽ काङ्मि याङ ब्याजनुङ लाजाडोक्टुङ। 28 मोडोगे़ॽ मोनुङ टुहा इक्को मुन्डा ङाप्नुङ असानुङ इक्पोङ मुन्डा टुहा खो पिसानुमे। 29 इन्ढोङ्होङ असानुङ टुहा खोसे़ॽ हाइखा चुप्मिन्डुएनुङ मोनुङ छना बेॽलो लिहा, तर असानुङ आडे़ॽवा टुहा मोसो खोबाङ ङाप्खे़हा। 30 मो योम्बोक मे़ॽनिङ्मा सेउते पाखे़ॽयु सेन्जुगुप्पेॽ राप्हेक्सानुमे, मोबेॽ याॽमिजि हाःप्मिम्मेनुङ के़ङ यिइम्मे।’ ए़क्साङ्ए न्याय 31 “इन्डोक्पेॽ याॽमिमि पसा थाङ्सिरि दुतजिनुङ बेॽए महिमाबेॽ उङ्इये, मोबा खो टाङ्बामि महिमानुङ्मा हाङ्पेन्ढामबेॽ पेङ्इये। 32 मोडोक्पेॽ मक्खाम्डेमबेॽहा चोप जातिजि खोमि पोम्बेॽ सुम्इम्मेनुङ गोठ्लाजिडे़ॽ सामुनुङ यासुबाजि खोरो खोरो फाक्टिडोॽ, माहा याॽमिजिसो फाॽइन्डुजे। 33 खोसे़ॽ सामुजि खोमि चुप्थिङ्लाम मोबा यासुबाजि ए़ङ्सिङ्लाम युङ्इन्डुजे। 34 मोबा हाङ्बाडे़ॽ टाङ्बामि चुप्थिङ्लामबेॽहाजि लुन्डुजे, ‘आबानिङे, के़ए़ पाबाबाङ आसिस चुप्खुबाजि! मक्खाम्डेम सिरिस्टि लिबॽआबाङ हे़निङ्मि लागि पोरोक्नुङ युङ्बॽआ राज्यबेॽ अधिकार ले़टानुमे। 35 इन्ढोङ्होङ का सगे़ॽ सिबॽआ ले़टिङ, हे़निङे़ॽ का चामा पिसानिङ। का वाइॽमे़ॽसिमाबेॽ योङा पिसानिङ, का परदेसि ले़टिङा खिमबेॽ स्वागत ले़टानिङ। 36 का उक्चुङ्रे़क ले़टिङ, हे़निङे़ॽ चेॽ चाङ्बेॽटानिङ, का टुक्माबेॽ हे़निङ खाङ्सिॽ लेस्सानिङ, का तिरिङ्गा खिमबेॽ से़क्सिघे़ॽमाबेॽ हे़निङ चुप्सिॽ लेस्सानिङ।’ 37 “मोबा धरमिजिडे़ॽ खो लुन्डुजे, ‘हे परभु, इन्डोक्पेॽ कानिङे़ॽ हे़न सगे़ॽ सिमाबेॽ चामा पिसुङ्मे ? अथबा वाइॽमे़ॽसिमाबेॽ योङा पिसुङ्मे ? 38 इन्डोक्पेॽ कानिङे़ॽ हे़न परदेसि खाङ्नुङ पोप्मा पिसुङ्मे, अथबा इन्डोक्पेॽ हे़न उक्चुङ्रे़ॽ खाङ्डोक्नुङ चे़ॽ चाङ्बेॽटुङ्मे ? 39 इन्डोक्पेॽ कानिङे़ॽ हे़न टुक्पॽआ लेडोक्नुङ खाङ्सिॽ अथबा से़क्सिघे़ॽमाबेॽ हे़न चुप्सिॽ लेस्सिङ्मे ?’ 40 मोबा हाङ्बाडे़ॽ हे़निङ लुये, ‘चइबानोॽ, के़ॽ हे़निङ लुनिम्ने़, हे़निङे़ॽ इघा के़हा निसाजिबेॽ चोप्पाङ ए़डे़म्मा निसारेॽनोॽ इन्डोक सेवा ले़टानुम, माहा चोप हे़निङे़ॽ कानोॽ ले़टानुम।’ 41 “मोबा ए़क्साङ खोसे़ॽ ए़ङ्सिङ्लामबेॽहा याॽमिजि लुन्डुजे, ‘होउ चापहिबॽआ याॽमिजि! काबाङ ओः खे़ॽपेसानिङे, सैताननुङ मोमि दुतजिमि लागि पोरोक्युङ्बॽआ इन्डोक्पेॽसो सिघे़ॽनिये मिबेॽ खडानिङे। 42 इन्ढोङ्होङ का सगे़ॽ सिबॽआ ले़टिङ, हे़निङे़ॽ चामा मे़म्पिसानिङ, वाइॽमे़ॽ सिबॽआ ले़टिङ, हे़निङे़ॽ योङा उङ्मा मे़म्पिसानिङ। 43 का परदेसि ले़टिङ, हे़निङे़ॽ बास मे़म्पिसानिङ, का उक्चुङ्रे़क ले़टिङ हे़निङे़ॽ चाङ्जिरा चेॽ मे़म्पिसानिङ, तिरिङ्गा खिमबेॽ से़क्सिघे़ॽपॽआ ले़टिङ चुप्सिॽ मे़लेस्सानिङ, टुक्पॽआ ले़टिङ का खाङ्सिॽ हे़निङ मे़लेस्सानिङ।’ 44 “मोबा खोजिडे़ॽसो इडोॽ लुसाङ सिम्इन्डुजे, ‘परभु, इन्डोक्पेॽ कानिङे़ॽ हे़न सगे़ॽ सिबॽआ, वाइॽमे़ॽ सिबॽआनुङ परदेसि लिबॽआ, उक्चुङ्रे़क ले़ःॽपॽआ, तिरिङ्गा खिमबेॽ से़क्सिघे़ॽपॽआ खाङ्नुङ्सो हे़न ले़ख्खो मे़ले़टुङ्मे़ ?’ 45 मोडोक्पेॽ खोसे़ॽ माहाजि लुन्डुजे, ‘चइबानोॽ, के़ॽ हे़निङ लुनिम्ने़, इघा चोप्पाङ ए़डे़म्मा निसाजिबेॽ इक्कोमि लागिसो इमाङ मे़ले़टानुम, मो कानोॽ हे़निङे़ॽ मे़ले़टानिङ।’ 46 मोबा इघाजि इन्डोक्पेॽसो सिघे़ॽनिबा मिबेॽ सिॽइम्मे, तर धरमिजिडे़ॽ इन्डोक्पेॽसो सिघे़ॽनिये हिङ्मवा चुप्मिन्डुजे।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.