मत्ति 22 - याम्फुफुङ्सयामि भत्तेर ( लुका १४:१५-२४ ) 1 मोबा येसुडे़ॽ माहाजि हाइको इडोक्मा खानवा इःबेॽटुजि, 2 “निवाहाङ्मि राज्यगो इक्को हाङ्बाडोॽ मिॽहे़ये, खोसे़ॽ खोमि पसामि फुङ्सयामि भत्तेर ले़ःॽमामि पोरोइन्डुए। 3 मो हाङ्बाडे़ॽ भत्तेरमि लागि ला लेॽपॽआजि के़ःॽसिॽ खोमि सेउतेजि पाक्सु। तर याॽमिजि आप्मा मे़ङ्खासिडामि। 4 फेरि खोसे़ॽ हाइखा सेउतेजि माहा ला लेॽपॽआ याॽमिजि इडोॽ लुसानुमे लुनुङ पाक्सुजि, खेप्सानुमे, ‘के़ॽ चायुङ्बॽआ जिवातजि सेॽनुङ भत्तेर पोरोइटुङे, हागो चोप थोक उघे़टहा चासिॽ आबानिङे’।” 5 “तर माहाजिडे़ॽ मो खा मे़ङ्खेम्डिडोॽ ले़ःॽनुङ आढाजि खोजिमि रोपाबेॽ खडामि, आढाजि खोजिमि बेपारबेॽ खडामि। 6 आढाजिडे़ॽको खोमि सेउतेजि राःप्नुङ मङे़हा बेबहार ले़टुजि मोबा ए़क्साङ खोजि सेॽनेसुजि। 7 मो हाङ्बा सारोनोॽ सुरकडा मोबा खोमि तिरिङ्गाजि पाङ्नुङ खोमि सेउतेजि सेॽनेखुबाजि सेॽनेमेॽनुङ माहाजिमि सहरसो हिप्पेबेॽटुजि। 8 “मोबा खोमि सेउतेजि फेरि लुसुजि, फुङ्सयामि भत्तेरबेॽ चोप थोक उघे़टहा, तर ला लेॽपॽआजि भत्तेर चामारोहाजि माॽआम्मि। 9 मोडोगे़ॽ हे़निङ रामराजि खे़ॽनुङ मोबेॽ चुप्पॽआ याॽमिजि चोप फुङ्सयामि भत्तेरबेॽ के़आप्टानुमे। 10 मोबा माहा सेउतेजि रामराजि खडामि मोबेॽ चुप्पॽआ दुस्टनुङ नुबा चोप याॽमिजि सुम्नुङ फुङ्सया खिम इॽठुप लिसामि। 11 “तर हाङ्बा मोबेॽ सुम्बॽआ याॽमिजि खाङ्सिॽ होङ्सिॽयु आबा, मोडोक्पेॽ फुङ्सयामि चेॽ मे़न्चाङ्बॽआ इक्को याॽमि खाङ्डोक्टु। 12 हाङ्बे़ॽ, मो याॽमि सिप्सु, ‘लङ्गाम, फुङ्सयामि चेॽ मे़न्चाङ्रेॽ हे़न इन्डोक्टे होङ्सिॽयु पे़आबे़ ?’ तर मोसे़ॽ इमाङ्सो मे़लुहेसु। 13 मोबा हाङ्बाडे़ॽ खोमि सेउतेजि लुसुजि, ‘इगोमि हुक सराङ हिःक्नुङ पाखे़ॽयु सेन्जुगुप्पेॽ राप्हेक्सानुमे, मोबेॽ याॽमिजि हाःप्मिम्मेनुङ के़ङ यिइम्मे।’ 14 “इन्ढोङ्होङ के़ॽपॽआजि बेॽलो टुम्मे, तर से़म्बॽआजि ए़डे़ॽवा टुम्मे।” मे़क्चेन फोङ्मा नुयेन्डे फे़न्निबा लुमे टुम्बेॽ खा ( मरकुस १२:१३-१७ ; लुका २०:२०-२६ ) 15 मोबा फरिसिजि खे़ॽनुङ येसु इन्डोॽ रेम्एम्मे लुनुङ मोत्ता इःसुजि। 16 माहाजिडे़ॽ टाङ्बामि चोङ्साजि हेरोद हाङ्बामि याॽमिजि येसुबेॽ पाक्सुजि। माहाजिडे़ॽ लुसुजि, “हे गुरु, कानिङे़ॽ लेन्डुङ्मे़ हे़न चाइबमा खा इःन्डुएनुङ निवाहाङ्मि चाइबमा राम नुरोॽ इःॽइये, हे़ने़ॽ इघा खा इःॽमाबेॽ याॽमिजिडे़ॽ इमा लुम्मे लुनुङ असानुङ्सो किस्सिनिबा। इन्ढोङ्होङ हे़ने़ॽ याॽमिजिमि याबुक खाङ्नुङ योम्बोक ले़टुनिबा। 17 मोडोगे़ॽ लुमाना, कानिङे़ॽ बेॽए हाङ्बा कैसर मे़क्चेन फोङ्मा नुयेन्डे फे़न्निबा ?” 18 तर येसुडे़ॽ माहाजिमि मङे़ॽमा निवा लेडोक्नुङ लुसुजि, “कप्टिजि, का इन्ढोङ रेम्एम्मा योॽइन्डानिङे ? 19 खोइ खोइ मे़क्चेन फोङ्ढाम मुन्डा लाआप्टानुमे।” मोबा माहाजिडे़ॽ इक्को मुन्डा येसु पिसुजि। 20 येसुडे़ॽ माहाजि सिप्सुजि, “इगो मुन्डाबेॽ असामि छापनुङ निङ टुये ?” 21 माहाजिडे़ॽ येसु लुसुजि, “इगोबेॽको हाङ्बा कैसरमि छापनुङ निङ टुये” मोबा येसुडे़ॽ माहाजि लुसुजि, “मोडोगे़ॽ इमाङ कैसरमि ले़हा, माहा खोनोॽ पिसानुमे, इमाङ निवाहाङ्मि ले़हा माहा निवाहाङ्नोॽ पिसानुमे।” 22 इडोक्मा खा खे़म्नुङ खोजि खरि मिन्नुङ मोबाङ खे़प्पेसामि। सिबॽआबाङ हिङ्बोक्मे टुम्बेॽ खा ( मरकुस १२:१८-२७ ; लुका २०:२७-४० ) 23 याॽमि सिबॽआबाङ हिङ्मिने काखुबा सदुकिजि, मो याकनोॽ येसुबेॽ लेन्नुङ इडोक्मा खा सिप्सुजि, 24 “गुरु, मोसाडे़ॽ लुबॽआ ले़ये, इक्को याॽमि पसा मे़लिरेॽ सिघे़ॽहोङ खोमि निसाडे़ॽ मो किॽना फुङ्सया ले़ःॽनुङ वावामि लागि पसा टोङ्बेॽमा खे़ये। 25 कानिङ्मि रुम्बेॽ एच्चि जना सानुङ्उ टुसामे, टुम्मिडे़ॽ फुङ्सया ले़टु खोमि पसा मे़लिरेॽ सिघडा, मोबा मो किॽना सरुम्बा निसाडे़ॽ फुङ्सया ले़टु। 26 मोडोक्नोॽ माहा चोप सानुङ्उजिडे़ॽ पालै पालो मो राङ्मिॽमा किॽनानुङ फुङ्सया ले़टुजि, तर टुम्मिडोक्नोॽ इक्को पसा मे़लिरेॽ सिघडामि। 27 मोबा ए़क्साङ मो मेॽनामिॽसो सिघडा। 28 मोडोगे़ॽ माहा सिघे़ॽपॽआजि हिङ्बोक्माबेॽ माहा एच्चि जनाजिबेॽ मो मेॽनामिॽ असामि बनिमा लिये ? इन्ढोङ्होङ खो माहाजि चोबे़ॽ फुङ्सया ले़ःॽपॽआ ले़टा।” 29 येसुडे़ॽ माहाजि लुसुजि, “हे़निङ फाङ्सिघे़टानिङे, इन्ढोङ्होङ हे़निङे़ॽ धारमिक नेॽचिरामि खानुङ निवाहाङ्मि सक्ति लेसानुम्नि। 30 इन्ढोङ्होङ याॽमिजि सिबॽआबाङ हिङ्बोक्नुङ फुङ्सया ले़ःॽमिने, मोबा हाइखाजिमिसो फुङ्सया ले़ःॽपेॽटुजिने, माहाजि थाङ्सिरिबेॽ पेङ्घुबा थाङ्सिरिदुतजिडोॽ लिम्मे। 31 तर सिघे़ॽपॽआबाङ हिङ्बोक्खुबाजिमि टुम्बेॽ धारमिक नेॽचिराबेॽ निवाहाङ्डे़ॽ इडोॽ लुटे़ हे़निङे़ॽ मे़नेडानुमे ? 32 ‘का अब्राहाममि, इसहाकमिनुङ याकुबमि निवाहाङ ले़ङे’ खो सिबॽआजिमि निवाहाङ ने़ॽनि, तर हिङ्गिरिकजिमि निवाहाङ ले़ये।” 33 येसुमि इडोक्मा सिक्छे खे़म्नुङ मोबेॽ सुम्बॽआ याॽमिजि खरि मिनामि। चोप्पाङ बेॽए आग्या ( मरकुस १२:२८-३४ ; लुका १०:२५-२८ ) 34 येसुडे़ॽ सदुकिजि योङ उक्मेॽटुजि लुमे खा खेम्नुङ फरिसिजि सुम्नुङ येसु टुढामबेॽ लेस्सामि। 35 माहाजिबाङ इक्को यहुदि धारमिक नियम इःॽखुबाडे़ॽ येसुमि जाँच ले़ःॽमामि खो सिप्सु, 36 “गुरुज्यु, कानिङ्मि धारमिक नियममि बेॽए आग्या चाहिँ हाम्बेन्डे ?” 37 येसुडे़ॽ लुसु, “हे़ने़ॽ टाङ्बामि परमपरभु निवाहाङ टाङ्बामि चोप हिङ्मवाडे़ॽ, टाङ्बामि चोप सोःक्माडे़ॽनुङ चोप होङ्निवाडे़ॽ नम्नम ले़ॽमे। 38 चोप्पाङ याक्लोमानुङ महान आग्या इगोनोॽ ले़ये। 39 हाइकोसो मोडोक्मानोॽ ले़ये, ‘हे़ने़ॽ आम्मि पेन्लागाम टाङ्बा नम्नम ले़टिडोक्नोॽ नम्नम ले़ःॽमे।’ 40 मोसाडे़ॽ पिबॽआ यहुदि धारमिक नियमनुङ अगमबक्ताजिमि सिक्छेमि चोप्पाङ बेॽए खानोॽ इघा निच्चि आग्या ले़न्जे।” खिरिस्टमि टुम्बेॽ सङ्क ( मरकुस १२:३५-३७ ; लुका २०:४१-४४ ) 41 येसुडे़ॽ मोबेॽ सुम्बॽआ फरिसिजि इक्को खा सिप्सुजि, 42 “खिरिस्टमि टुम्बेॽ हे़निङे़ॽ इमाङ मिॽइन्डानुमे ? खो असामि पसाडे ?” माहा फरिसिजिडे़ॽ लुसुजि, “दाउदमि पसा।” 43 येसुडे़ॽ माहाजि लुसुजि, “मोडोक्होङ दाउदडे़ॽ होङ्निवामि बोल चुप्नुङ खो ‘परभु’ लुनुङ इन्डोक्टे लुहेन्डुए ? खोसे़ॽ इडोॽ लुटुए, 44 ‘परमपरभुडे़ॽ काङ्मि परभु लुसु, “के़ॽ हे़ने़हा सतुरजि हे़ने़ए़ सराङ्फे़क्माहोङ्बेॽ मे़युङ्सेॽलो, हे़न के़ए़ चुप्थिङ्लाम पेने”।’ 45 “दाउद खोमदाङ्बे़ॽ खिरिस्ट ‘परभु’ लुन्डुएहोङ, खिरिस्ट इन्डोक्टे दाउदमि पसा लिहेये ?” 46 मोबा खो असे़ॽसो इमाङ्सो मे़लुहेसुजि। मो याकबाङ येसुनुङ असे़ॽसो इमाङ खासो मे़सिम्हेसुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.