मत्ति 18 - याम्फुचोप्पाङ एप्पा असाडे ? ( मरकुस ९:३३-३७ ; लुका ९:४६-४८ ) 1 मोडोक्पेॽनोॽ चोङ्साजि येसुबेॽ लेन्नुङ सिप्सुजि, “निवाहाङ्मि राज्यबेॽ चोप्पाङ एप्पा असाडे ?” 2 येसुडे़ॽ इक्को पिच्छा के़ःॽनुङ खोमि चोङ्साजिमि पोम्बेॽ येःप्मेॽनुङ लुसु, 3 “चइबानोॽ हे़निङ लुनिम्ने़, टाङ्बामि निवा फेन्नुङ हे़निङ इगो पिच्छाडोॽ ए़डे़म्मा मे़लिसानिङ्होङ इन्डोक ले़ःॽनुङ्सो थाङ्सिरिमि राज्यबेॽ पे़खे़ॽहेसानिङ्नि। 4 असा इगो एडे़ॽमा पिच्छाडोॽ टाङ्बा ए़डे़म्मा लिहेये, मोनोॽ थाङ्सिरिमि राज्यबेॽ चोप्पाङ एप्पा लिहेये। 5 असे़ॽ काङ्मि लागि इक्को ए़डे़म्मा याॽमि नुबा ले़न्डुए, मोसे़ॽ कानोॽ नुबा ले़न्डुए। पापबेॽ रेम्ए़ङ्घुबा खा ( मरकुस ९:४२-४८ ; लुका १७:१-२ ) 6 “तर असे़ॽ कासोक्पेॽ बिस्वास ले़ःॽखुबा इघा पिच्छाजिबाङ इक्को पिच्छा पाप ले़ःॽमेन्डुहोङ, मो याॽमि निवाहाङ्मि दन्डाबेॽ सिॽमाबाङ नुबा चाहिँ खोमि बेॽलाबेॽ लघे हिःक्नुङ माहोङ्माबेॽ राप्एम्मा नुबा लिये। 7 इनामा इगो मक्खाम्डेमबेॽहा याॽमिजि! इन्ढोङ्होङ पापबेॽ रेम्ए़ङ्घुबा खागो इगोबेॽ बेॽलो टुहा। इडोक्हा खागो याॽमिमि हिङ्मवाबेॽ लेङ्इहानोॽ, तर इनामा मो याॽमि, असे़ॽ हाइखा याॽमिजि पाप ले़ःॽमेन्डुजे! 8 “हे़ने़हा हुक अथबा सराङेॽ हे़न पाप ले़ःॽमेयेहोङ मो हुकनुङ सराङ चेन्नुङ राप्पेसे। निच्चि हुक सराङ्नुङ खेःलोकपेॽ खे़ॽमाबाङ नुबागो निच्चि हुक सराङ मे़ॽनिङ थाङ्सिरि खे़ॽमानोॽ चुये। 9 हे़ने़ए़ मिगे़ॽ हे़न पाप ले़ःॽमाराप्मिहोङ मो रिक्नुङ राप्पेसे। निच्चि मिकनुङ खेःलोकपेॽ खे़ॽमा सिॽमाबाङ नुबागो इक्को मिक मे़ॽनिङ थाङ्सिरिबेॽ खे़ॽमानोॽ चुये। मे़ःखे़ॽपॽआ सामु ( लुका १५:३-७ ) 10 “अडिॽयो, हे़निङे़ॽ इघा ए़द्रिहाजिबेॽ, इक्कोसो हेला ए़ले़टानुमे, के़ॽ हे़निङ लुनिम्ने़, माहाजि खाङ्खुबा थाङ्सिरिदुतजि सानिङ थाङ्सिरिबेॽ पेङ्खुबा निवाहाङ पाबामिन्नोॽ पोम्बेॽ टुम्मे। 11 [इन्ढोङ्होङ याॽमिमि पसा मे़ॽखे़ॽपॽआजिनोॽ योक्सिॽ लेङ्इटे़।] 12 “हे़निङ इमाङ मिङ्इन्डानिङे ? इक्को याॽमिमि सये गोटा सामुजि टुसामे, इक्को चाहिँ सामु मे़खडाहोङ खोसे़ॽ उनान्सये गोटा सागुजि मोबेॽनोॽ याःॽयानुङ मो इक्को सामु योक्सिॽ खे़ॽनेन्डे ? 13 चइबानोॽ हे़निङ लुनिम्ने़, मोसे़ॽ मो सामु चुप्नुङ ए़क्साङ माहा उनान्सये गोटा सामुजिबाङ्सो, बेॽलो मो इक्कोमि लागि साप्थाङ्इये। 14 इडोक्नोॽ थाङ्सिरिबेॽ पेङ्घुबा काङ्मि पाबे़ॽसो इघा ए़द्रिहाजिबेॽ इक्कोसो नासि मे़लिमिरो लुनुङ मिॽइन्डुहा। अपराध ले़ःॽखुबा निसा ( लुका १७:३ ) 15 “इक्को बिस्वासि निसाडे़ॽ हे़ने़ए़ बिरोधबेॽ पाप ले़टुहोङ हे़न्जिङ्रेॽनोॽ पेन्नुङ मो निसामि बिरोङ इःबेॽमे। खोसे़ॽ हे़ने़ए़ खा खेप्सुहोङ, हे़ने़ॽ मो निसामि निवा टेआप्मिन्डुए। 16 तर मो निसाडे़ॽ हे़ने़ॽ लुबॽआ खा मे़ङ्खेप्सुहोङ, हाइखा इक्को निप्पाङ याॽमिजि युङ्नुङ मो निसा नुरोॽ लुमे। इन्ढोङ्होङ धारमिक नेॽचिराडे़ॽ लुये खिमा चुमामि खा टोङ्माबेॽ निप्पाङ अथबा सुम्बाङ साक्छिजिमि पोम्बेॽ ले़ःॽपॽआ खा पक्का लिये। 17 मो निसाडे़ॽ माहाजिमि खासो मे़ङ्खेप्सुहोङ, मन्डलिबेॽहा याॽमिजिमि पोम्बेॽ लुसे, मोसे़ॽ मन्डलिमिसो खा मे़ङ्खेप्सुहोङ, खो निवाहाङ्बेॽ बिस्वास मे़ले़ःॽखुबानुङ मे़क्चेन लाघुबा पापि याॽमिडोॽ मिॽनुङ योङ्मेॽटे। 18 “चइबानोॽ, के़ॽ हे़निङ लुनिम्ने़, हे़निङे़ॽ इगो मक्खाम्डेमबेॽ इमाङ हिःक्इन्डानुमे, मो थाङ्सिरिबेॽसो हिःक्इये। मोबा हे़निङे़ॽ इगो मक्खाम्डेमबेॽ इमाङ हेङ्इन्डानुमे, मो थाङ्सिरिबेॽसो हेङ्इये। 19 मोबा के़ॽ हे़निङ लुनिम्ने़, माक्खामडेमबेॽ निप्पाङे़ॽ इक्को निवा टोङ्नुङ इमाङ थोक ङाःगानुमहोङ्सो, मो थोक थाङ्सिरिबेॽ पेङ्घुबा के़ए़ पाबाडे़ॽ हे़निङ पिये, 20 इन्ढोङ्होङ हाम्बेॽ निप्पाङ अथबा सुम्बाङ के़ए़ निङ्बेॽ सुम्इम्मे, मोबेॽ का टुङे।” आम्लाङ मे़म्पिघुबा सेउते ( लुका १७:४ ) 21 मोबा पत्रुस येसुबेॽ लेन्नुङ सिप्सु, “परभु, काङ्मि बिरोधबेॽ पाप ले़टुङ्घे़ॽखुबा निसा के़ॽ इन्डोकखेॽ आम्लाङ पिमे़ ? इमाङ एच्चि खेॽटोक ?” 22 येसुडे़ॽ खो लुसु, “हे़न के़ॽ लुन्ने़, एच्चि खेपरेॽ ने़ॽनि, एच्चिबोङ गुना एच्चि खेपठोक आम्लाङ पिमा खे़ये। 23 “मोडोगे़ॽ थाङ्सिरिमि राज्य लुबॽआ चाहिँ इक्को हाङ्बाडोॽ ले़ये, मो हाङ्बे़ॽ टाङ्बामि सेउतेजिनुङ हिसाब लामा मिॽटु। 24 मोबा खोसे़ॽ हिसाब लामाबेॽ, इक्पोङ हजार सुनामि भे़क सिङि लाघुबा इक्को याॽमि खोमि पोम्बेॽ चिक्चे़डु। 25 तर मो याॽमिडे़ॽ सिङि मे़म्फोङ्हेबॽआसे़ॽ मायोङ्बाडे़ॽ लुसु, ‘हे़ने़ॽ आमटाङ्बा, बनिमानुङ पसाजि, मोबा हे़ने़हा चोप खा इन्जानुङ सिङि फोक्से।’ 26 मोबा मो सेउतेडे़ॽ मायोङ्बामि सराङ्बेॽ उःक्युसाङ लुसु, ‘मायोङ्बा, के़ॽ हे़न्नुङ लाबॽआ चोप सिङि इन्डोॽहोङ्सो फोङ्इनुङे इक्याक, नियाक हुङ्बेॽमाना।’ 27 मोबा मो मायोङ्बाडे़ॽ नम्नम मिॽनुङ मो सेउतेमि चोप सिङि फोङ्मा पाप्नि लुनुङ आम्लाङ पिसु। 28 “मोबा मो सेउते मोबाङ खडा। खो खे़ॽमे़ॽनिङ्सिमाबेॽ खोनुङ सोरि योम्बोक ले़ःॽखुबा इक्को लङ्गाम चुप्टु, मो लङ्गामडे़ॽ खोनुङ माना इक्को सिसे़ङ्मि याङ सिङि लाबॽआ ले़टे़। मो लङ्गाममि बेॽलाबेॽ राःप्नुङ मोसे़ॽ लुसु, ‘हे़ने़ॽ काबाङ लाबॽआ सिङि फोङ्बेसे।’ 29 खोमि लङ्गामडे़ॽ खो सराङ्बेॽ राःप्साङ बिन्ति ले़ःॽनुङ लुसु, ‘इक्याक नियाक हुङ्बेॽमाना, के़ॽ फोङ्इनुङे।’ 30 तर मो मे़ङ्खसिडा, मोबा खोमि लङ्गामडे़ॽ सिङि मे़म्फोङ्लो तिरिङ्गा खिमबेॽ से़गु। 31 “खोसे़ॽ ले़ःॽपॽआ माहा बेबहार खाङ्नुङ खोमि लङ्गामजिमि निवा सारो टुगा। मोबा माहाजिडे़ॽ खोमि माहा चोप खा खोजिमि मायोङ्बा लुबेॽटुजि। 32 मोबा मायोङ्बाडे़ॽ मो सेउते के़ःॽनुङ लुसु, ‘होउ मङे़ॽमा निवानुङ्बा सेउते, हे़ने़ॽ कानुङ बिन्ति ले़टु, के़ॽ हे़ने़हा चोप सिङि आम्लाङ पिसुङ। 33 के़ॽ हे़न सोक्पेॽ नम्नावा ले़टिडोक्नोॽ हे़ने़ॽसो हे़ने़हा लङ्गामजि ले़ःॽमा खडे़ ने़ॽनेन्डे ?’ 34 मोबा मोमि मायोङ्बा सुरके़ॽनुङ मो सेउते खोमि सिङि मे़म्फोङ्से़ॽलो तिरिङ्गा खिमबेॽ से़क्मेॽटुजि।” 35 मोबा ए़क्साङ येसुडे़ॽ टाङ्बामि चोङ्साजि लुसुजि, “हे़निङ्मि बिस्वासि निसाजि निवाबाङ्नोॽ आम्लाङ पिसानुम्निहोङ, थाङ्सिरिॽटु पेङ्खुबा के़ए़ पाबाडे़ॽसो हे़निङ मोडोक्नोॽ ले़ये।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.