लुका 3 - याम्फुबप्तिस्मा पिघुबा युहन्ना ( मत्ति ३:१-१२ ; मरकुस १:१-८ ; युहन्ना १:१९-२८ ) 1 रोमि एप्पा हाङ्बा तिबेरियसडे़ॽ राज्य ले़ःॽपॽआ इक्पोङ ङाउम निङ याक्पॽआ ले़टे़। मोडोक्पेॽ पन्तियस पिलातस यहुदिया छेत्राबेॽए एप्पा मायोङ्बा ले़टे़। मोडोक्पेॽ हेरोद एन्टिपास गालिल छेत्राबेॽ सासक ले़टे़, खोमि निसा फिलिपडे़ॽ इतुरियाबेॽनुङ तारखोनितिस छेत्राबेॽ सासन ले़टुए। लुसानियासडे़ॽ अबिलेने छेत्राबेॽ सासन ले़टुए। 2 मोडोक्पेॽ निवाहाङ्मि चोप्पा एप्पा याडाङ्बाजि हन्नासनुङ कैयाफा ले़टाजे। मोडोक्पेॽनोॽ रे़क्रे़क्मा ठाउँबेॽ निवाहाङ्मि बचन जकरियामि पसा युहन्नाबेॽ लेस्सा। 3 युहन्नाडे़ॽ यरदन होङ्मामि इगिॽयु मिॽयुहा खिम्डेमराजिहा याॽमिजि इडोॽ लुबुगुजि, “टाङ्बा टाङ्बामि पापि योम्बोक लेप्पेनुङ बप्तिस्मा लासानुमे। मोबा निवाहाङ्डे़ॽ हे़निङ आम्लाङ पिये।” 4 इडोॽ यसैया अगमबक्तामि नेॽचिराबेॽ साप्पॽआ युहन्नमि टुम्बेॽहा खा पुरा लिजासा- “खेप्सानुमे, रे़क्रे़क्मा ठाउँबेॽ इक्को याॽमि बेॽए सेम्ले़ॽ इडोॽ कामे़ॽनिङ्सिये, ‘परभु निवाहाङ लेङ्इये राम पोरोगानुमे, खोमि राम सोझो टोक्सानुमे। 5 चोप खोल्सा खोल्सि रुप्चुम्मा खे़ये, सुम्लाखानुङ टोक्टोक्मा सेमेमे लिहा, एॽलिक खोक्लिकहा राम सोझो टोङ्मा खे़ये, आप्ठेरो राम सम्ठेरो लिहा। 6 मोबा निवाहाङ्डे़ॽ पाङ्बॽआ खोमि मुक्ति चोप याॽमिजिडे़ॽ खाङ्डोक्इन्डुजे’।” 7 मोडोगे़ॽ बेॽलो याॽमिजि युहन्नाबेॽ बप्तिस्मा लासिॽ लेस्सामि। तर युहन्नाडे़ॽ माहाजि लुसुजि, “हे़निङ सिक्चानुङ्हा पुसे़ॽमि पसाजि! ‘निवाहाङ्मि न्यायबाङ चिॽखे़ॽहेन्डिङ्मा’ लुनुङ हे़निङ आसे़ॽटे इःडानिङे ? 8 हे़निङे़ॽ चइबानोॽ टाङ्बा टाङ्बामि पाप मिॽनुङ निवाहाङ्बेॽ टेआप्मिटानिङेहोङ मोडोक्मानोॽ हिङ्मवा हिक्सानिङे। तर ‘कानिङ अब्राहाममि सन्तानजि ले़ःॽपॽआसे़ॽ’ लेक्खे़न्डिङ्मा लुनुङ आसा ए़ले़टानिङे। के़ॽ हे़निङ लुनिम्ने, निवाहाङ्डे़ॽ अब्राहाममि सन्तानजिगो रुङ्गोॽवाबाङ्सो टोङ्हेन्डुए। 9 चोप सिङ्बुमि राडाङ्बेॽ ए़न्ढि सिॽपेटे़। चा मे़ङ्किङ्घुबा चोप डाङ टे़ःक्नुङ मिबेॽ राप्पेहा।” 10 याॽमिजिडे़ॽ युहन्ना सिप्सुजि, “मोडोक्होङ कानिङे़ॽ इमाङ्डे ले़ःॽमा खे़ये ?” 11 खोसे़ॽ माहाजि लुसुजि, “असानुङ निच्चि लॽलिङ टुहा मोसे़ॽ इक्को लॽलिङ, इक्को मे़ङ्काप्खुबा पिसुरो। मोडोक्नोॽ चामा उङ्मा काप्खुबे़ॽ मे़ङ्काप्खुबा पिसुरो।” 12 मे़क्चेन लाखुबाजिसो बप्तिस्मा लासिॽ लेन्नुङ युहन्ना सिप्सुजि, “गुरु, कानिङे़ॽ चाहिँ इमाङ्डे ले़ःॽमे ?” 13 माहाजि खोसे़ॽ लुसुजि, “हाङ्बाडे़ॽ लुबॽआबाङ बेॽलो ए़ॽलासानुमे।” 14 तिरिङ्गाजिडे़ॽसो सिप्सुजि, “कानिङे़ॽ इमाङ्डे ले़ःॽमा खे़ये ?” युहन्नाडे़ॽ माहाजि लुसुजि, “येॽयेॽ ले़ःॽनुङ अथबा मे़ले़ःॽपॽआ खामि आप्टिक टिनुङ असानुङ्सो याङ ए़ॽलासानुमे। टाङ्बामि नमयाकपेॽनोॽ सोन्तोक ले़टानिङे।” 15 मुक्ति पिघुबा हाङ्बा खिरिस्ट लेङ्इये लुनुङ याॽमिजिडे़ॽ आसा ले़ःॽपॽआ ले़टे़। मोडोगे़ॽ खोजिडे़ॽ युहन्नानोॽ खिरिस्ट ले़येन्डे लुनुङ मिॽमे़ॽनिङ्सिडुजे। 16 मोडोगे़ॽ युहन्नाडे़ॽसो चोप लुसुजि, “के़ॽको हे़निङ योङेॽ बप्तिस्मा पिनिम्ने़। तर काबाङ्सो बेॽएम्मा लेम्मे़ॽनिङ्सिये। कागो खोमि राङ्सुपमि तुना हेम्मारोमासो ले़ॽङानि। खोसे़ॽ हे़निङ पबित्रा होङ्निवाडे़ॽनुङ मिडे़ॽ बप्तिस्मा पिये। 17 खाक्सानुमे, खोसे़ॽ चाम ठाःप्मामि नाङ्ग्रो हुकपेॽ लाबेटुए। हागो ठाःप्नुङ सिचाम चाहिँ भकारिबेॽ युङ्इन्डुहा, तर भुसु चाहिँ इन्डोक्पेॽसो सिघे़ॽनिये मिःबेॽ हिॽटिन्डुए।” 18 युहन्नाडे़ॽ इडोक्हा हाइखासो बेॽलो अरति पिसाङ याॽमिजि सुसमाचार खेम्मेॽटुजि। 19 हाङ्बा हेरोदडे़ॽ खोम निसामि बनिमा खोसे़ॽ फुङ्सया ले़ःॽपॽआसे़ॽ युहन्नाडे़ॽ खो योबु। मोबा खोमि हाइखासो बेॽलो पाप खाङ्मुबेॽटु। 20 मोडोगे़ॽ हेरोद एन्टिपासडे़ॽ युहन्ना राःप्नुङ तिरिङ्गा खिमबेॽ से़क्नुङ छना हाइको इक्को माङे़ॽमा योम्बोक ले़टु। येसुडे़ॽ बप्तिस्मा लाबॽआ ( मत्ति ३:१३-१७ ; मरकुस १:९-११ ; युहन्ना १:३२-३४ ) 21 चोप याॽमिजिडे़ॽ बप्तिस्मा लामे़ॽनिङ्सिमाबेॽ येसुडे़ॽसो बप्तिस्मा लानुङ पारथना ले़ःॽमे़ॽनिङ्सिमाबेॽ थाङ्सिरि हेम्बोगा। 22 मोबा पबित्रा होङ्निवा उख्रिॽवाडोॽ खो सोक्पेॽ लेस्सा, मोबा थाङ्सिरिबाङ इडोॽ काबॽआ खेम्मुसा, “हे़न के़ए़ नेन्जाबॽआ पसा ले़ये, हे़न्नुङ का बेॽलो साप्थाङ्इटिङे।” येसु खिरिस्टमि टुबालाबाजि ( मत्ति १:१-१७ ) 23 येसुडे़ॽ टाङ्बामि योम्बोक तरिक्माबेॽ खोमि उमेर तिस निङ्डोक याक्पॽआ ले़टे़। याॽमिजिडे़ॽ योसेफनोॽ येसुमि पाबा मिॽटुजे। योसेफमि पाबा एलि ले़टे़, 24 एलिमि पाबा मत्तात, मत्तातमि पाबा लेबि, लेबिमि पाबा मल्कि, मल्किमि पाबा यान्ना, यान्नामि पाबा योसेफ, 25 इडोक्नोॽ योसेफमि पाबा मत्ताथियास, मत्ताथियासमि पाबा आमोस, आमोसमि पाबा नहुम, नहुममि पाबा इसलि, इसलिमि पाबा नग्गै। 26 नग्गैमि पाबा माथ माथमि पाबा मत्ताथियास, मत्ताथियासमि पाबा सेमैन, सेमैनमि पाबा योसेफ, योसेफमि पाबा योदा ले़टे़। 27 योदामि पाबा योआनननुङ योआननमि पाबा रेसा, रेसामि पाबा यरुबाबेल, यरुबाबेलमि पाबा सालतिएल, सालतिएलमि पाबा नेरि, 28 नेरिमि पाबा मल्कि, मल्किमि पाबा अद्दि, अद्दिमि पाबा कोसाम, कोसाममि पाबा एलमादम, एलमादममि पाबा एर, 29 एरमि पाबा यहोसु, यहोसुमि पाबा एलिएजर एलिएजरमि पाबा योरिम, योरिममि पाबा मत्तात, मत्तातमि पाबा लेबि, 30 लेबिमि पाबा सिमियोन, सिमियोनमि पाबा यहुदानुङ यहुदामि पाबा योसेफ, योसेफमि पाबा योनान, योनानमि पाबा एल्याकिम ले़टे़। 31 एल्याकिममि पाबा मलेआनुङ मलेआमि पाबा मिन्ना ले़टे़। मिन्नामि पाबा मत्ताथा, मत्ताथामि पाबा नातान, नातानमि पाबा दाउद, 32 दाउदमि पाबा यिसै, यिसैमि पाबा ओबेद, ओबेदमि पाबा बोअज, बोअजमि पाबा सल्मोन, सल्मोनमि पाबा नहसोन, 33 नहसोनमि पाबा अम्मिनादाब, अम्मिनादाबमि पाबा आराम ले़टे़। आराममि पाबा हेस्रोन, हेस्रोनमि पाबा फारेस, फारेसमि पाबा यहुदा। 34 यहुदामि पाबा याकुब, याकुबमि पाबा इसहाक, इसहाकमि पाबा अब्राहाम, अब्राहाममि पाबा तेरह, तेरहमि पाबा नाहोर ले़टे़। 35 नाहोरमि पाबा सरुग, सरुगमि पाबा रउ, रउमि पाबा पेलेगनुङ पेलेगमि पाबा एबेर, एबेरमि पाबा सेलह, 36 सेलहमि पाबा केनान, केनानमि पाबा अरपछेदनुङ अरपछेदमि पाबा सेम, सेममि पाबा नोआ, नोआमि पाबा लेमेख, 37 लेमेखमि पाबा मतुसेलह, मतुसेलहमि पाबा हनोक, हनोकमि पाबा येरेद, येरेदमि पाबा महलालेल, महलालेलमि पाबा केनान, 38 केनानमि पाबा एनोस, एनोसमि पाबा सेत, सेतमि पाबा आदम ले़टे़ मोबा आदममि पाबा निवाहाङ ले़टे़। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.