लुका 23 - याम्फुयेसु रोमि एप्पा मायोङ्बा पिलातसमि पोम्बेॽ ( मत्ति २७:१-२ , ११-१४ ; मरकुस १५:१-५ ; युहन्ना १८:२८-३८ ) 1 मोबा ए़क्साङ एप्पा यहुदिजि सुम्ढाम खिमबेॽहा चोप याॽमिडे़ॽ येसु रोमि एप्पा मायोङ्बा पिलातसमि पोम्बेॽ से़ॽखे़ॽटुजि। 2 माहाजिडे़ॽ येसु आप्टिक टिसाङ लुसुजि, “इगो खोमटाङ्बे़ॽ ‘कानोॽ खिरिस्ट ले़ङे’ लुबॽआनुङ ‘रोमि हाङ्बा मे़क्चेन फोङ्मा पाप्नि’ लुसाङ कानिङ्मि देसबेॽहा याॽमिजिमि निवा फेम्बॽआ कानिङे़ॽ चुप्टुङ्मा।” 3 माहाजिमि खा खेम्नुङ पिलातसडे़ॽ येसु सिप्सु, “चइबानोॽ हे़न यहुदिजिमि हाङ्बानोॽटे ?” येसुडे़ॽ लुसु, “मोगो हे़ने़ॽनोॽ लुमे़ॽनिङ्सिन्डुए।” 4 पिलातसडे़ॽ एप्पा याडाङ्बानुङ मोबेॽ सुम्बॽआ याॽमिजि लुसुजि, “इगो याॽमिबेॽ के़ॽ इमाङ्सो आप्टिक मे़न्चुप्टुङ।” 5 तर माहाजिडे़ॽ वोसाङ लुसुजि, “इगोसे़ॽ गालिलबाङ तरिक्नुङ इगो यरुसलेमठोक चोप यहुदियाबेॽहा याॽमिजिमि निवा फेम्मे़ॽनिङ्सिन्डुए।” येसु हेरोद हाङ्बामि पोम्बेॽ 6 इघा खा खेम्नुङ पिलातसडे़ॽ सिप्सुजि, “इगो याॽमि गालिल बेॽएन्नोॽ ले़ये ?” 7 पिलातसडे़ॽ येसु हेरोद हाङ्बामि ठाउँ गालिलबेॽए लुनुङ लेडोक्नुङ हेरोदबेॽनोॽ पाङ्हाक्सु। मोडोक्पेॽ हेरोद यरुसलेमबेॽनोॽ टुसे़। 8 हेरोदडे़ॽ येसु खाङ्डोक्नुङ बेॽलो साप्थाक्सा, इन्ढोङ्होङ हेरोदडे़ॽ येसुमि टुम्बेॽ याक्लोएम्बाङ खेम्बॽआसे़ॽ खाङ्मा मिॽटुए। येसुडे़ॽ ले़ःॽपॽआ खरिहा योम्बोक खाङ्डोक्मे आसा ले़ःॽपॽआ ले़टे़। 9 खोसे़ॽ बेॽलो खा येसु सिप्सु, तर येसुडे़ॽ इमाङ्सो मे़लुसु। 10 निवाहाङ्मि एप्पा याडाङ्बानुङ यहुदि धारमिक नियम इःॽखुबाजि येःॽपुक्नुङ बेॽलोनोॽ ने़ॽनिहा आप्टिक टिसुजि। 11 मोबाङ हेरोदनुङ खोसे़हा याॽमिजिडे़ॽ येसु सिःक्चासाङ बेजेत ले़टुजि। मोबा नेम्मा टोङ्मामि हाङ्बाजिडे़ॽ चाङ्मे चे़ॽ चाङ्डिबेॽनुङ पिलातसबेॽनोॽ टेहाक्सु। 12 याक्लो हेरोदनुङ पिलातस मे़न्टोक्साजे, तर मो याकबाङ खोजि टोङ्बोगाजि। येसु सेॽनेमे टुम्बेॽ ( मत्ति २७:१५-२६ ; मरकुस १५:६-१५ ; युहन्ना १८:३९–१९:१६ ) 13 मोबाङ पिलातसडे़ॽ एप्पा याडाङ्बाजि, यहुदि अगुवाजिनुङ हाइखा याॽमिजि के़ःॽनुङ लुसुजि, 14 खोसे़ॽ “याॽमिजिमि निवा फेङ्इन्डुए लुनुङ हे़निङे़ॽ इगो के़ए़ पोम्बेॽ चिक्चे़ॽपॽआसे़ॽ के़ॽ हे़निङ्मिनोॽ पोम्बेॽ इगोनुङ बेॽलो सिप्सुङ, तर हे़निङे़ॽ लुबॽआडोॽ मङे़हा खा इगोनुङ मे़न्चुप्टुङ। 15 हेरोदडे़ॽसो इगोमि टुम्बेॽ इमाङ्सो आप्टिक मे़न्चुप्पॽआसे़ॽ काबेॽनोॽ टेहाक्सु। मोडोगे़ॽ खेप्सानुमे, सेॽनेमे दन्डा पिमारोमा मङे़ॽमा योम्बोक इगोसे़ॽ इमाङ्सो मे़ले़ःॽटिॽटु। 16 हागो के़ॽ इगो कोरराडे़ॽ मोःक्नुङ लेॽहाङ्इनुङे।” 17 [मोबेॽए चलनडोॽ छुट्कारामि चाडबेॽ इक्को कैदि पिलातसडे़ॽ लेॽपेबेॽमा खडे़।] 18 तर मोबेॽ चोप याॽमिजि इडोॽ वोसाङ कासामि, “इगो याॽमि चाहिँ सेॽनेमानोॽ खे़ये, कानिङ्मि लागि बारब्बा लेॽपेबेॽमा खे़ये।” 19 बारब्बा निङ ले़ःॽखुबा याॽमि चाहिँ सरकारमि बिरोध ले़ःॽपॽआसे़ॽनुङ याॽमि से़ॽपॽआसे़ॽ तिरिङ्गा खिमबेॽ से़क्सिघे़ॽपॽआ ले़टे़। 20 पिलातसडे़ॽ येसु लेॽहाङ्मा मिॽपॽआसे़ॽ याॽमिजि फेरिसो सम्झबा ले़टुजि। 21 तर माहाजि चोप इक्को सेम्लाबेॽ वोसाङ कासामि, “आक्को काप्सिङ्बेॽ किङ्नुङ सेॽनेसे, काप्सिङ्बेॽ किङ्नुङ सेॽनेसे!” 22 फेरि सुम्घेॽपेॽसो पिलातसडे़ॽ माहा याॽमिजि लुसुजि, “इगोसे़ॽ मोडोक्मा मङे़ॽमा योम्बोक मे़ले़टिॽ, के़ॽको सेॽनेमारो आप्टिक इगोबेॽ इमाङ्सो मे़न्चुप्टुङ। मोडोगे़ॽ हागो इगो कोरराडे़ॽ मोःक्नुङ लेॽहाङ्इनुङे।” 23 तर माहाजि बेॽए सेम्ले़ॽ वोसाङ कासामि इगो येसु काप्सिङ्बेॽ किङ्नुङ सेॽमानोॽ खे़ये। इडोॽ वोमानुङ येॽयेॽ माहाजिडे़ॽ हेजोसुजि। 24 मोबा माहाजिडे़ॽ लुबॽआडोक्नोॽ पिलातसडे़ॽ फैसला ले़ःॽपेॽटुजि। 25 मोबा खोसे़ॽ मो सरकार बिरोध ले़ःॽखुबा, याॽमि सेॽखुबा बारब्बा चाहिँ लेॽपेबेॽटुजि। तर येसु चाहिँ माहाजिडे़ॽ लुबॽआडोक्नोॽ ले़ःॽमामि पिहाक्सुजि। येसु काप्सिङ्बेॽ किङ्नेबॽआ ( मत्ति २७:३२-४४ ; मरकुस १५:२१-३२ ; युहन्ना १९:१७-२७ ) 26 माहाजिडे़ॽ येसु खोमि काप्सिङ खिमेॽनुङ चिक्खे़ॽमे़ॽनिङ्सिडुजे, मोडोक्पेॽनोॽ कुरेनि ठाउँबेॽए सिमोन निङ ले़ःॽखुबा याॽमि रामबेॽ चुप्टुजि। खो खिम्डेमबाङ सहर आप्मे़ॽनिङ्सिडे़। माहाजिडे़ॽ मो राःप्नुङ येसुमि काप्सिङ खिमेॽटुजि। 27 बेॽलो याॽमिजि येसुमि ए़ङ्गुवा ए़ङ्गुवा खडामि। माहाजिबेॽ मेॽनामिॽचिसो टुसामि खोजि बेॽलो हाःप्मानुङ खडामि। 28 तर येसुडे़ॽ खोजि खाङ्नुङ लुसुजि, “ए यरुसलेमबेॽहा मेॽनामिॽ पिच्छाजि, के़ए़ लागि ने़ॽनि, हे़निङ्मि लागिनुङ हे़निङ्मि पिच्छाजिमि लागि हाःबानिङे! 29 खाक्सानुमे, हागो ले़ङ्इये याकपेॽ याॽमिजिडे़ॽ, पसा मे़न्डोक्खुबा मेॽनामिॽनुङ डुडु मे़उङ्मेॽखुबा मेॽनामिॽचि आसिसनुङ्मा मेॽनामिॽ लुन्डुजे। 30 मोडोक्पेॽ याॽमिजिडे़ॽ सुम्लाखा ‘कानिङ सोक्पेॽ हेॽनुङ चिम्नेमा’, ‘टोक्टोक्मे़ॽ कानिङ रुप्नेमा’ लुन्डुजे। 31 सिङ्बु डाङ हिङ्रिक लिमाबेॽनोक्सो इघाजिडे़ॽ इडोॽ ले़म्मिहोङ, सिङ्बु हेघे़ॽमाबेॽ छना इन्डोॽ ले़म्मि होला ?” 32 माहाजिडे़ॽ निप्पाङ अपराधिजिसो येसुनुङ सेॽमामि चिक्खेॽमे़ॽनिङ्सिडुजे। 33 माहाजि खप्परे लुये ठाउँबेॽ लेस्सामि। मोबेॽ माहाजिडे़ॽ येसु काप्सिङ्बेॽ किक्सुजि, मोबा निप्पाङ अपराधिजिसो येसुमि चुप्थिङ्नुङ ए़ङ्सिङ्लाम किक्सुजि। 34 मोडोक्पेॽ येसुडे़ॽ लुसु, [“हे के़ए़ पाबा! इघाजि आम्लाङ पिसाजे इन्ढोङ्होङ इघाजिडे़ॽ इमाङ ले़ःॽमे़ॽनिङ्सिन्डुजे मो लेसुजिने।”] येसु राप्खुबाजिडे़ॽ खोमि चे़ॽ चिट्ठा ए़न्नुङ हासुजि। 35 याॽमिजि येःप्नुङ मोबेॽहा खा खाङ्मे़ॽनिङ्सिडुजे, मोडोक्पेॽ यहुदि अगुवाजिडे़ॽ सिःक्चासाङ इडोॽ लुसुजि, “इगोसे़ॽ हाइखाजिगो हिङ्मेॽटुजि। इगो चइबानोॽ निवाहाङ्बाङ्ए खिरिस्ट ले़येहोङ खोमटाङ्बा हिङ्जारो।” 36 मोबेॽ टुबॽआ तिरिङ्गाजिडे़ॽसो येसु सेम्जासाङ अङ्गुरमि खिॽइये खे़ँवा पिनुङ लुसुजि, 37 “हे़न्नोॽ यहुदिजिमि हाङ्बा ले़येहोङ आमटाङ्बा हिङ्जाये।” 38 येसुमि निन्डवाँसोङ्बेॽ “यहुदिजिमि हाङ्बा” लुनुङ साप्पॽआ इक्को फले़क किङ्बॽआ ले़टा। 39 येसुनुङ्नोॽ सोरि किङ्बॽआ इक्को अपराधिडे़ॽ सिःक्चासाङ येसु लुसु, “हे़न गो खिरिस्ट ने़ॽने ? खिरिस्ट ले़येहोङ आमटाङ्बासो हिङ्जाये मोबा काजिङ्सो हिङ्मे़ॽमा!” 40 हाइको अपराधिडे़ॽ चाहिँ मो योप्साङ लुसु, “हे़न निवाहाङ्नुङ किस्सिनिबा ? हे़ने़ॽसो खोसे़ए़न्डोक्मानोॽ दन्डा आङ्मे़ॽनिङ्सिन्डुए मोडोक्सो निवाहाङ्नुङ किस्सिनिबा ? 41 काजिङे़ॽको मङे़ॽहा योम्बोक ले़ःॽपॽआसे़ॽ मोमि दन्डा आङ्मे़ॽनिङ्सिन्जुङे, तर खोसे़ॽको इमाङ्सो मङे़ॽमा योम्बोक मे़ले़ःॽलेॽसो दन्डा आङ्मे़ॽनिङ्सिन्डुए।” 42 मोबाङ ए़क्साङ मोसे़ॽ येसु लुसु, “हे येसु, हे़न हे़ने़ए़ राज्यबेॽ पे़एम्माबेॽ कासोङ मिॽमायो!” 43 येसुडे़ॽ मो याॽमि लुसु, “के़ॽ हे़न लुन्ने़ आइनोॽ हे़न कानुङ थाङ्सिरिॽटु खे़ॽए़ये।” येसु सिघे़ॽपॽआ ( मत्ति २७:४५-५६ ; मरकुस १५:३३-४१ ; युहन्ना १९:२८-३० ) 44 नमलेलुमबाङ सुमबोङ्ठोक मो देसबेॽ सेन्जुगुप लिसा। 45 मोडोक्पेॽ नम मे़निसा, मन्दिरमि परदा रुम्बाङ निफे़ङ नाःक्खडा। 46 मोबा येसु बेॽए सेम्लाडे़ॽ इडोॽ वोसा, “हे के़ए़ पाबा, के़ए़ होङ्निवा हे़ने़ए़ हुकपेॽ युङ्इनुङे” लुनुङ खोमि सोःक्मा खडा। 47 इडोॽ लिबॽआ चोप खा खाङ्नुङ एप्पा तिरिङ्गाडे़ॽ निवाहाङ्मि ओहाङ ले़ःॽसाङ लुसु, “चइबानोॽ इगो याॽमिगो धरमि ले़टे़ ले़ः।” 48 मोबेॽ खाङ्सिॽ लेम्बॽआ चोप याॽमिजिडे़ॽ मोबेॽ लिबॽआ खा खाङ्नुङ दुःखि लिमानुङ हाःप्साङ खोजिमि खिम टेघडामि। 49 येसु लेघुबाजि, मोबा गालिलबाङ खोमि ए़ङ्गुवा ए़ङ्गुवा लेम्बॽआ मेॽनामिॽचि ए़डे़ॽ मेॽयोङ येःप्नुङ चोप खा खाङ्मे़ॽनिङ्सिडुजे। येसु येःॽमाबेॽ युङ्बॽआ ( मत्ति २७:५७-६१ ; मरकुस १५:४२-४७ ; युहन्ना १९:३८-४२ ) 50-51 योसेफ निङ ले़ःॽखुबा इक्को इमान्दारनुङ धरमि याॽमि यहुदियाबेॽए अरिमाथिया सहरबाङ लेम्बॽआ ले़टे। खो यहुदि सुम्ढाम बेॽए खिममि इक्को सदस्यासो ले़टे़। खोसे़ॽ याक्लो खोजिमि सभाबेॽ येसु सेॽमे मोत्ता इःमाबेॽ इडोॽ ले़ःॽमा फे़न्निबा लुबॽआ ले़टे़। खोसे़ॽ निवाहाङ्मि राज्य ले़ङ्इये लुनुङ हुङ्मे़ॽनिङ्सिडुए। 52 खोसे़ॽ पिलातसबेॽ खे़ॽनुङ येसुमि सिगुयाक येःॽमाबेॽ युङ्मामि ङाःगु। 53 मोबा खोसे़ॽ येसुमि सिगुयाक काप्सिङ्बाङ रिओक्नुङ नुबा मलमलमि चेॽटे़ॽ यिप्नुङ रुङ्गोॽवा टोनुङ टोङ्बॽआ चोङ येःॽमाबेॽ युक्सु। 54 मो याक नाजामे याकमि याक्लोए याक ले़टे़। 55 गालिलबाङ येसुनुङ सोरि आप्खुबा मेॽनामिॽचि योसेफनुङ सोरि खे़ॽनुङ खो येःॽमाबेॽ युङ्बॽआ खाक्सुजि। 56 मोबाङ ए़क्साङ माहाजि टेघे़ॽनुङ सिगुयाकपेॽ सिःॽमे नुबा नाम्जानुये के़वा पोरोगुजि। मोबा वागियाराम यहुदि धारमिक नियाम अनुसार नाजामे याक सिॽपॽआसे़ॽ खोजि नाजासामि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.