लुका 21 - याम्फुराङ्मिॽमामि भेटि ( मरकुस १२:४१-४४ ) 1 येसुडे़ॽ मन्दिरबेॽ खाङ्माबेॽ टाङायोङ्बाजि मन्दिरबेॽ भेटि चेॽटिमे़ॽनिङ्सिबॽआ खाङ्डोक्टुजि। 2 येसुडे़ॽ मोडोक्पेॽनोॽ इक्को इमा मे़ङ्काप्खुबा राङ्मिॽमाडे़ॽसो निच्चि पैसा भेटि चेॽटिबॽआ खाङ्डोक्टु 3 इगो खाङ्नुङ येसुडे़ॽ लुसु, “चइबानोॽ के़ॽ हे़निङ लुनिम्ने़, इगो इमा मे़ङ्काप्खुबा राङ्मिॽमाडे़ॽ हाइखा चोप याॽमिजिबाङ बेॽलो भेटि चेॽटिसु। 4 इन्ढोङ्होङ हाइखाजिडे़ॽको चानुङ, उङ्नुङ एम्बॽआबाङ ए़डे़ॽवा चेॽटिटुजे, तर इमाङ्सो मे़ङ्काप्खुबा राङ्मिॽमाडे़ॽको खोमि चामे, उङ्मे चोपनोॽ भेटि चेॽटिटुहा।” यरुसलेमबेॽए मन्दिरमि खा ( मत्ति २४:१-१४ ; मरकुस १३:१-१३ ) 5 इक्खेॽ येसुमि इक्को निप्पाङ चोङ्साजि, “नुबा नुबा रुङ्गोॽवाडे़ॽ टोङ्बॽआनुङ भेटिमि याङ्डे़ॽ इम्बॽआ खाडे़ॽ चाक्पॽआ मन्दिर इमाङ नुबा लुसाङ खा इःमे़ॽनिङ्सिडामि।” मोडोक्पेॽनोॽ येसुडे़ॽ लुसु, 6 “इडोक्मा बेला लेङ्इये, इघा खाङ्मुहा खिमबेॽ टुहा रुङ्गोॽवासोक्पेॽ इक्को मे़ॽनिङ योबेन्डुजे!” 7 माहाजिडे़ॽ लुसुजि, “गुरुज्यु, इगो इन्डोक्पेॽटे लिये ? मोबा आक्टोॽ लिसिॽपोरोक्पॽआ कानिङे़ॽ इन्डोक्टे लेमे ?” 8 येसुडे़ॽ लुसुजि, “होसियार पेनानिङे, आसे़ॽसो हे़निङ मे़रेम्हेमिरो, इन्ढोङ्होङ बेॽलो याॽमिजि के़ए़ निङ्बेॽ ‘कानोॽ खिरिस्ट ले़ङे’ लुनुङ लेङ्इम्मे मोबा ‘बेला के़क्पेॽ लेङ्इटे़’ लुम्मे, तर अक्खाजिमि खा बिस्वास ए़ले़ःॽमे। 9 हे़निङे़ॽ ङे लिबॽआनुङ इक्कोनुङ हाइको काक्पॽआ खा खेम्नुङ ए़क्किसिमे़, इन्ढोङ्होङ इघा चोप खा याक्लो लिमानोॽ खे़हा तर इघा चोप लिमासोरोक्नोॽ मक्खाम्डेम नासि लिघे़ॽपेनिबा।” 10 येसुडे़ॽ फेरि लुसुजि, “जाति जातिजिमि रुम्बेॽ काक्खुसे़ॽचुम्मे। इक्को राज्य हाइको राज्यसोक्पेॽ पेडिघे़ये। 11 बेॽहा बेॽहा रुॽमि लेङ्इये, हाम्बेॽको हाम्बेॽ सकआङ्सा लिहानुङ, राम्आ लेङ्इये। नान्द्रुङ्माबेॽ किॽमारोहा खा लिहानुङ बेॽहा बेॽहा खरिहा चिङ्गा खाङ्मुहा। 12 “इघा चोप खा लिमा याक्लो याॽमिजिडे़ॽ हे़निङ का बिस्वास ले़ःॽपॽआसे़ॽ राःप्इम्मे, चुङ्जाम्मे, यहुदि सुम्ढाम खिमबेॽ लाघे़ॽनुङ मुद्द टिम्मे मोबाङ तिरिङ्गा खिमबेॽ से़क्इम्मे। हागोसो माहाजिडे़ॽ हे़निङ हाङ्बानुङ एप्पा मायोङ्बामि पोम्बेॽ चिॽखे़म्मे। 13 मोडोक्पेॽ हे़निङे़ॽ के़ए़ टुम्बेॽ साक्छि पिडोक्इन्डानुमे। 14 तर मोडोक्पेॽ हे़निङे़ॽ इमाङ लुमे लुनुङ सुरता ए़ले़टानुमे। 15 इन्ढोङ्होङ हे़निङे़ॽ खा इमे़ निवा के़ॽ हे़निङ पिन्निम्ने़। हे़निङ्मि सत्तुरजिबेॽ इक्कोसे़ॽसो हे़निङ्मि खा टेहेसुजिने, मोबाङ इमाङ्सो आप्टिक टिहेसुजिने। 16 हे़निङ्मिनोॽ पाबा मामा, वावानिसा, टाङ्बाङ्जिनुङ लङ्गामजिडे़ॽसो हे़निङ राःप्मेम्मे। माहाजिडे़ॽ हे़निङ्बेॽ कोहि कोहिगो सेॽनेन्डुजे। 17 के़ॽ ले़ःॽमे़ॽ चोबे़ॽ हे़निङ सिःक्चाम्मे। 18 तर हे़निङ्मि निन्डवाँबाङ इक्को टाङ्सो योघे़ॽनिहा। 19 हे़निङे़ॽ इघा चोप योङ आक्सानुमे इन्डोक्पेॽसो सिघे़ॽनिए हिङ्मवा चुप्मिन्डानुमे।” यरुसलेम सहरमि खा ( मत्ति २४:१५-२१ ; मरकुस १३:१४-१९ ) 20 “यरुसलेम सहर बेॽलो तिरिङ्गाजिडे़ॽ खिरिरि से़क्चुम्बॽआ खाङ्डोक्येम्बाङ सहर नासि लिमे बेला लेङ्इटा” लुनुङ हे़निङे़ॽ लेसानुमे। 21 मोडोक्पेॽ यहुदिया ठाउँबेॽ टुघुबाजि सुम्लाखाराजि चिःॽखे़म्मे, सहरबेॽ टुघुबाजि सहर याःॽयानुङ खे़ॽपेसानिङे, मोबा खिम्डेमराजि टुघुबाजि सहरबेॽ ए़ॽखे़ॽमे़। 22 इन्ढोङ्होङ निवाहाङ्मि बचनबेॽ साप्पॽआ खा चोप लिरो लुनुङ्नोॽ इगो दन्डा आङ्मे बेला ले़ङ्इये। 23 मोडोक्पेॽ उक्खाइसुम्मानुङ पस्ताङ्माजि बेॽलोनोॽ सारो सिॽइम्मे। याॽमिजिडे़ॽ किस्सिमारोहा खेः आङ्मा खे़हा, निवाहाङ्मि सुरिक इघा याॽमिजिबेॽ सिॽइहा। 24 माहाजिबेॽ कोहि कोहिजि फेयाडे़ॽ चेन्नेन्डुजे, मोबा कोहिजि चाहिँ राःप्नुङ हाइखा-हाइखा देसबेॽ हिःक्खे़न्डुजे। अयहुदिजिमि बेला मे़रुक्खे़ॽलो माहाजिडे़ॽ यरुसलेम खोजिमि अधिनबेॽ युङ्इन्डुजे। याॽमिमि पसा ले़ङ्इये खा ( मत्ति २४:२९-३१ ; मरकुस १३:२४-२७ ) 25 “नम, ला, साङ्गेजिबेॽ खरिहा चिङ्गा खाङ्मुहा। टोम्लिॽवामि बेॽहा फे़ङ्ले़ॽवा मुक्पॽआ खाडे़ॽ मक्खाम्डेमबेॽहा चोप जातिहा याॽमिजि बेॽलोनोॽ किस्सिम्मे। 26 मक्खाम्डेमबेॽ लेङ्इहा खरिहा खा खाङ्नुङ याॽमिजि माङ्माङ टोक्टिखे़म्मे इन्ढोङ्होङ नाम्दुरुङ्मे़ॽटुहा चोप सक्ति सोङ्इहा। 27 मोबा ए़क्साङ का याॽमिमि पसा खिम्मिॽवाबेॽ बेॽए सक्तिनुङ महा महिमानुङ उङ्मे़ॽसिबॽआ खाङ्डोक्इम्मे। 28 मोडोक्हा खा लिमाबेॽ मे़ङ्किस्सिरेॽ साप्थाक्साङ येःबानिङे इन्ढोङ्होङ हे़निङ्मि छुट्कारा चान्डोनोॽ लिये।” वेॽलाभुमि डाङ्बाङ चिम्मे खा ( मत्ति २४:३२-३५ ; मरकुस १३:२८-३१ ) 29 मोबाङ ए़क्साङ येसुडे़ॽ माहाजि इक्को खानवा लुबेॽटुजि, “वेॽलाभुमि डाङ्नुङ हाइखा सिङ्बु डाङ खाक्सानुमे, 30 माहाजिबेॽ ङोःॽवा के़ॽपॽआ खाङ्नुङ हे़निङे़ॽ बरखायाम लेङ्इटा लुनुङ लेन्डानुमे। 31 मोडोक्नोॽ के़ॽ हे़निङ इघा खा लुबॽआ लिमे़ॽनिङ्सिबॽआ खाङ्माबेॽ निवाहाङ्मि राज्य लेन्सिॽपोरोइटे़ लुनुङ लेन्डानुमे 32 चइबानोॽ के़ॽ हे़निङ लुनिम्ने़ इघा चोप खा मे़लिसेॽलो इगो पुस्ताबेॽहा याॽमि रुक्खे़ॽनिहाजि। 33 नान्द्रुङ्मानुङ मक्खाम्डेम मे़खे़ये, तर के़ॽ लुबॽआ बचन पुरा मे़लिरेॽ मे़खे़ॽनिबा। चङ्खो पेम्मे 34 “चङ्खो लिनुङ पेनानिङे, चामा उङ्मामि लागि बेॽलो ए़पिन्डुसानिङे, सेॽखे़ॽमानुङ ए़राप्सानिङे इमाङ चामे इमाङ चाङ्मे लुनुङ हे़निङ्मि हिङ्मवामिरेॽनोॽ ले़ख्खो ए़ले़टानुमे। माहा चोपपेॽ हे़निङ फोसिघे़ॽमाबेॽ सोङा यिम्माङ्बेॽ सिॽपॽआडोॽ हे़निङ्सोक्पेॽ हाजोक्टोॽ मो रुक्खे़ये याक लेङ्इये। 35 इन्ढोङ्होङ मो याक मक्खाम्डेमबेॽहा चोप याॽमिजिबेॽ लेङ्इये। 36 मोडोगे़ॽ चङ्खो पेनानिङे। माहा चोप किस्सिमारोहा खाबाङ हिङ्नुङ याॽमिमि पसामि पोम्बेॽ मे़ङ्किस्सिरेॽ साप्थाङ्मानुङ येःप्हेमामि लागि सानिङ पारथना ले़टानिङे”। 37 लेन्डा येसुडे़ॽ मन्दिरबेॽ याॽमिजि सिक्छे पिसुजि, तर सेन्डा चाहिँ जैतुन लुमे टोक्टोक्माबेॽ पोप्सिॽ खडे़। 38 चोप याॽमिजि माक्मिसेल्लाम खोमि बचन, खेम्सिॽ मन्दिरबेॽ लेस्सामे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.