लुका 16 - याम्फुबन्दोबस्तो ले़ःॽखुबा चेन्दुबा याॽमि 1 येसुडे़ॽ टाङ्बामि चोङ्साजि लुसुजि, “इक्को काङायोङ्बा याॽमिमि इक्को बन्दोबस्तो ले़ःॽखुबा याॽमि टुसे़। ‘मोसे़ॽ खोम मायोङ्बामि याङ्सरावा माङ्माङ फे़ॽमे़ॽनिङ्सिन्डुए’ लुनुङ याॽमिजिडे़ॽ ओक्मावा ओक्टिबेॽटुजि। 2 मोबा मायोङ्बाडे़ॽ मो याॽमि के़ःॽनुङ सिप्सु, ‘के़ॽ हे़ने़ए़ टुम्बेॽ इमाङ्डे खा खेम्मे़ॽनिङ्सिनुङे ? याङ इन्डोक रुक्खडा, इन्डोक टुहा चोप हिसाप का पिमा। हागोएम्बाङ हे़ने़ॽ बन्दोबस्तो ले़ःॽमे योम्बोक ले़ःॽटोक्टुनिबा।’ 3 मोबा बन्दोबस्तो ले़ःॽखुबे़ॽ निवे़ॽयु मिडु, ‘हागो के़ॽ इमाङ ले़ःॽमे, के़ए़ मायोङ्बाडे़ॽ योम्बोकबाङ राप्पेसिॽ पोरोक्पेटे़। का ओःक्मे, चेॽमे योम्बोक ले़ःॽचाहेङानि, ङाःक्चामासो ङेसिमा लुये। 4 इॽछोॽ मिॽनुङ कासा, ए हागो के़ॽ इडोॽ ले़नुङे़! के़ए़ योम्बोक लेक्खे़ॽसो लङ्गामजि टोङ्युक्सुङ्होङ्गो खोजिडे़ॽसो खाङ्इम्मेन्डे!’ 5 मोबा ए़क्साङ मोसे़ॽ खोमि मायोङ्बाबाङ सिङि लाघुबाजि इक्को इक्को ले़ःॽसाङ के़डुजि। मोसे़ॽ याक्लोए सिङि लाघुबा सिप्सु, ‘के़ए़ मायोङ्बामि सिङि हे़ने़ॽ इन्डोक्टे लाटुए ?’ 6 मोसे़ॽ लुसु ‘जैतुनमि केवा हजार पाथि।’ बन्दोबस्तो ले़ःॽखुबाडे़ॽ लुसु, ‘लो, हे़ने़ए़ तमासुकबेॽ ङाउम सय पाथिरेॽ साबे।’ 7 मोबा हाइके सिङि लाघुबा सिप्सु, ‘हे़ने़ॽ इन्डोक फोङ्मा टुहा ?’ मोसे़ॽ लुसु, ‘इक हजार बोरा गहु टुहा।’ बन्दोबस्तो ले़ःॽखुबाडे़ॽ लुसु, ‘लो हे़ने़ए़ तमासुकबेॽ आक्चि सय बोरारेॽनोॽ साबे।’ 8 “इडोक्मा खा लेडोक्नुङ मायोङ्बाडे़ॽ मो याॽमिमि चेन्दुबा निवा खाङ्नुङ ओहाङ ले़टु, इन्ढोङ्होङ मोसे़ॽ चेन्दुबा लिनुङ योम्बोक ले़ःॽपॽआ ले़टे़। इडोक्नोॽ इगो मक्खाम्डेमबेॽहा याॽमिजि टाङ्बामि लङ्गामजिनुङ बेबहार ले़ःॽमाबेॽ बिस्वासिजिबाङ्सो बेॽलो चेन्दुबा ले़म्मे। 9 “के़ॽ हे़निङ लुनिम्ने़, इगो मक्खाम्डेमबेॽहा याङ्सरावा सानिङ टुडुङ्घे़ॽनिहा मोडोगे़ॽ इघा याङ्सरावाडे़ॽ बेॽलो लङ्गामजि टोक्सानुमे। मोबा हे़निङ थाङ्सिरि खे़ॽमाबेॽ सानिङ टुडुङ्घे़ये खिमबेॽ हे़निङ स्वागत ले़म्मे।” 10 येसुडे़ॽ फेरि लुसु, “ए़डे़ॽवा खाबेॽ भरोसा ले़ःॽहेघुबा याॽमि बेॽलो खाबेॽसो भरोसा ले़ःॽहेये। मोडोक्नोॽ ए़डे़ॽवा खाबेॽ भरोसा मे़ॽनिङ्मा याॽमि बेॽलो खाबेॽसो भरोसा ले़ःॽहेनिबा। 11 मोडोगे़ॽ इगो मक्खाम्डेमबेॽहा याङ्सरावाबेॽ भरोसा मे़ले़ःॽहेघुबाजिनुङ थाङ्सिरिमि याङ्सरावाबेॽ इन्डोक्टे भरोसा ले़ःॽहेम्मे ? 12 हे़निङे़ॽ हाइखाजिमि याङ्सरावा नुरोॽ मे़युङ्बेॽटानुमहोङ हे़निङ असे़ॽ खोजिमि याङ्सरावा खाङ्मे योम्बोक पिम्मे ? 13 “इक्को सेउतेडे़ॽ निच्चि मायोङ्बामि सेवा ले़ःॽहेसुनिबा। मोसे़ॽ इक्को नम्नम ले़न्डुए हाइके सिॽचोन्डुए, इक्कोसे़ॽ लुबॽआ खसिये, हाइकोसे़ॽ लुबॽआ खसिनिबा। मोडोक्नोॽ हे़निङे़ॽसो निवाहाङ्नुङ याङ्सरावा निच्चिमिन्नोॽ सेवा ले़ःॽहेसानुम्ने।” येसुमि हाइखा खा ( मत्ति ११:१२-१३ ; ५:१८ , ३२ ) 14 इघा चोप खा खेम्नुङ फरिसिजिडे़ॽ येसु सिःक्चोसुजि। इन्ढोङ्होङ माहाजिमि लागि याङ्नोॽ बेॽए ले़टे़। 15 मोबा येसुडे़ॽ माहाजि लुसुजि, “हे़निङ याॽमिजिमि पोम्बेॽ नुबा रे़ङ्इन्डानिङे तर निवाहाङ्डे़ॽ हे़निङ्मि निवा लेन्डुए। इन्ढोङ्होङ याॽमिडे़ॽ बेॽए मिप्पॽआ खा निवाहाङ्डे़ॽ सिॽचोन्डुहा। 16 “बप्तिस्मा पिघुबा युहन्नामि बेलाडोक्लो मोसाडे़ॽ पिबॽआ नियमनुङ अगमबक्ताजिमि खा याॽमिजिडे़ॽ ले़ःॽमे़ॽनिङ्सिडुजे। मोबाङ इगिॽयु चाहिँ निवाहाङ्मि राज्यमि सुसमाचार खेम्मेॽमे़ॽनिङ्सिये, मोबा चोप मोबेॽ येॽयेॽ पे़खे़ॽमा योॽइम्मे। 17 नान्द्रुङ्मानुङ मक्खाम्डेम मे़खे़हा तर निवाहाङ्मि बचन इक्कोसो मे़खे़ॽनिहा। 18 इक्को याॽमिडे़ॽ टाङ्बामि बनिमा याःॽयानुङ हाइको मेॽनामिॽ फुङ्सया ले़टुहोङ मोसे़ॽ पाप ले़न्डुए, मोबा मो याःॽयाबॽआ मेॽनामिॽ हाइको याॽमिडे़ॽ फुङ्सया ले़टुहोङ मो याॽमिडे़ॽसो पाप ले़न्डुए।” टाङायोङ्बा याॽमिनुङ लाजरस 19 येसुडे़ॽ फेरि लुसु, “याक्लो इक्को टाङायोङ्बा याॽमि टुसे़। खोसे़ॽ सानिङ्नोॽ नुबा चेॽ चाक्सुहानुङ सुख सान्तिनुङ हिक्से़। 20 तर खोमि राम्बडेमबेॽ चाहिँ इक्को लाजरस निङ ले़ःॽखुबा याॽमि पेने़ खोमि हिङाइॽठुप हुवा टुसाहा खो गरिब ले़टे़। 21 मो टाङायोङ्बा याॽमिडे़ॽ चामा चामाबेॽ सुःॽखे़ॽपॽआ चजिॽवा कुःप्चानुङ लाजरस उक्खामा मिने़। हुःॽवाजिडे़ॽ खोमि हुवा रे़ःक्पेॽटुजे। 22 “इक्याक मो गरिब लाजरस सिघडा। मोबा इक्को निप्पाङ थाङ्सिरिदुतजिडे़ॽ खो योङ्घे़ॽनुङ अब्राहाममि के़क्पेॽ हुप्सुजि। मोबा इक्याक नियाक ए़क्साङ मो टाङायोङ्बासो सिघडा। 23 मोबा खो खेःलोकपेॽ बेॽलोनोॽ खेः आङ्मे़ॽनिङ्सिमाबेॽ टाङायोङ्बाडे़ॽ थाङ्सिरिॽटु खाङ्माबेॽ अब्राहामनुङ सोरि लाजरस खाङ्डोक्टु। 24 खोसे़ॽ वोसाङ लुसु, ‘होउ पाबा अब्राहाम, का नम्नावा ले़ःॽमाना। का इगो मिबेॽ खेःडे़ॽ सिसिॽपोरोगिङ। मोडोगे़ॽ लाजरस इगोबेॽ उङ्नुङ खोमि हुक्खे़ॽवासिडे़ॽ के़ए़ याबुकपेॽ योङा ठे़ए़म्बेॽसिॽ पाङ्बेॽमाना।’ 25 तर अब्राहामडे़ॽ मो याॽमि लुसु, ‘पसा इक्खेॽ मिॽखाक्से, हे़न मक्खाम्डेमबेॽ टुमाबेॽ हे़ने़ॽ सुखनुङ सान्ति चुप्टु, तर लाजरसडे़ॽ खेःरेॽ आक्सु। आयु लाजरसडे़ॽ सुखनुङ सान्ति चुप्मिटुए, हे़ने़ॽ खेःलोकपेॽ खेःआङ्मे़ॽनिङ्सिन्डुए। 26 आक्टोक्रेॽ ने़ॽनि हे़न्नुङ कानिङ केॽए़रे़ङ मेॽए़रे़ङ ले़टोक्हेसिङ्मानिबा इन्ढोङ्होङ हे़ने़ए़नुङ कानिङ्मि रुम्बेॽ बेॽए खाडोलोम्बा टुये।’ 27 मो टाङायोङ्बा याॽमिडे़ॽ लुसु, ‘मोडोक्होङ होउ पाबा, बिन्ति ले़न्ने़, आक्को लाजरस के़ए़ पाबामि खिमबेॽ पाङ्बेॽमा। 28 खो खे़ॽनुङ के़हा ङाबाङ वावानिसाजि खेःलोकबेॽ आङ्मा खे़हा चोप खा खेम्मेॽपेॽटुजिरो। इन्ढोङ्होङ ए़क्साङ खोजिसो इगो खेःलोकबेॽ काडोॽ खेः आङ्मा मे़न्सिॽरो।’ 29 अब्राहामडे़ॽ लुसु, ‘खोजिनुङ्गो मोसानुङ अगमबक्ताजिडे़ॽ साप्पॽआ नेॽचिरानोॽ टुहाडि, हे़ने़हा वावानिसाजिडे़ॽ मो नेॽचिराडे़ॽ लुडिॽडोॽ ले़टुजिहोङ नुये!’ 30 टाङायोङ्बाडे़ॽ लुसु, ‘ने़ॽनि पाबा अब्राहाम, खोजि आक्टोगे़ॽ के़ॽटुजिनि। तर सिघे़ॽपॽआजिबाङ इक्को याॽमि हिङ्बोक्नुङ माहाजिबेॽ खे़ॽमिहोङ्रेॽ पाप ले़ःॽमा लेॽएन्डुजे।’ 31 तर अब्राहामडे़ॽ लुसु, ‘मोसानुङ अगमबक्ताजिमि खाबेॽ बिस्वास मे़ले़ॽखुबाजिडे़ॽ सिघे़ॽपॽआबाङ हिङ्बोक्पॽआ याॽमिनोॽ खे़ॽहोङ्सो बिस्वास ले़टुजिने’।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.