लुका 12 - याम्फुयेसुडे़ॽ फरिसिजिमि माङे़ॽमा खाबाङ होसियार लिमे लुबॽआ ( मत्ति १०:२६-२७ ) 1 मोडोक्पेॽ बेॽलो बेॽलो याॽमिजि सुम्बॽआसे़ॽ घुइँचो लिनुङ सिक्खुसे़ॽ चुबॽआ ले़टामे। येसुडे़ॽ याक्लो खोमि चोङ्साजि लुसुजि, “हे़निङ फरिसिजिमि खमिरडोक्मा मङे़ॽमा खाबाङ होसियार पेनानिङे! इगो खाबाङ लेमा खे़ये खा चाहिँ, फरिसिजिमि कप्टि निवाबाङ होसियार ले़टानिङे लुबॽआ ले़टे़। 2 इन्ढोङ्होङ टे़क्युङ्बॽआ खा इन्डोक टुहा माहा चोप हेङ्ओक्इहानुङ चुम्बॽआ खा इन्डोक टुहा माहा चोप लेडोक्इहा। 3 हे़निङे़ॽ सेन्जिगुप्पेॽ इःबॽआ खा लेन्डा खाङ्मुहा। खिमहोङ्सिॽयु खुस्रिङ इःबॽआ खा खिममि धुरिबाङ बेॽए सेम्लाडे़ॽ चोप खेम्मुहा।” असानुङ किस्सिमा खे़ये लुमे खा ( मत्ति १०:२८-३३ ; १२:३२ ) 4 येसुडे़ॽ फेरि लुसु, “होउ के़हा लङ्गामजि, के़ॽ हे़निङ लुनिम्ने़, याॽमिजिबाङ ए़ॽकिसिसानिङे खोजिडे़ॽको हे़निङ्हा हिङारेॽनोॽ सेॽहेन्डुजे। तर हे़निङ्हा पबित्रा होङ्निवागो खोजिडे़ॽ इमाङ्सो ले़ःॽहेसुजिने। 5 असानुङ किस्सिमा खे़ये लुमे खा के़ॽ हे़निङ लुनिम्ने़, सिघे़ॽयेम्बाङ खेःलोकपेॽ पाङ्हेघुबा निवाहाङ्नुङ चाहिँ किस्सिमा खे़ये। 6 तर खाक्सानुमे, ङाउम ओॽवा निच्चि मुन्डाबेॽ इन्जान्डानुमे, ने़ॽने़न्डे ? ओॽवा ए़डे़ॽवा याङ्बेॽ इन्जाहोङ्सो निवाहाङ्डे़ॽ माहाजि इक्कोसो मिन्डेडुजिने। 7 हे़निङ्मिगो छना निवाहाङ्डे़ॽ इक्को टाङ्सो नेॽयुङ्इटुहा। मोडोगे़ॽ ए़ॽकिसिसानिङे, ओॽवाजिबाङ हे़निङ बेॽलोनोॽ मोलनुङ्हाजि ले़न्डानिङे। चोप याॽमिजिमि पोम्बेॽ येसु बिस्वास ले़ःॽमे ( मत्ति १०:३२-३३ ; १२:३२ ; १०:१९-२० ) 8 “के़ॽ हे़निङ लुनिम्ने़, आसे़ॽ का याॽमिजिमि पोम्बेॽ के़ए़ परभु लुहेन्डुए, का याॽमिमि पसे़ॽसो खो निवाहाङ्मि थाङ्सिरिदुतमि पोम्बेॽ के़ए़ याॽमि लुनुङ ले़नुङे। 9 तर असे़ॽ का याॽमिजिमि पोम्बेॽ लेसुङ्नि लुये, मोसो के़ॽ निवाहाङ्मि दुतजिमि पोम्बेॽ इगो याॽमि लेसुङ्नि लुनुङे। 10 का याॽमिमि पसामि टुम्बेॽ ले़ःॽपॽआ बिरोधमि आम्लाङ चुप्मिहा, तर पबित्रा होङ्निवामि टुम्बेॽ ले़ःॽपॽआ बिरोधमि आम्लाङ चुप्निहा। 11 “याॽमिजिडे़ॽ हे़निङ राःप्नुङ यहुदि सुम्ढाम खिमबेॽहा एप्पाजिनुङ न्याय ले़ःॽखुबाजिबेॽ लाघे़म्मे। मोडोक्पेॽ इमा लुमे लुनुङ हे़निङ सुरता ए़ले़टानुमे। 12 इन्ढोङ्होङ मोडोक्पेॽ हे़निङे़ॽ इमा लुमा खे़ये पबित्रा होङ्निवाडे़ॽनोॽ हे़निङ इःन्डानिङे।” उम्बरिङ टाङायोङ्बामि खानवा 13 मोबा मो घुइँचो होङ्सिॽयुराम इक्को याॽमिडे़ॽ येसु लुसु, “गुरुज्यु, ‘के़ए़ वावा लुबेॽमा, हे़ने़ए़ निसा अङ्स बन्डो हाःबेॽटे’।” 14 तर येसुडे़ॽ मो याॽमि इडोॽ लुसु, “हे़न्जिङ्मि अङ्स बन्डो ले़ःॽमामि का असे़ॽ पाक्सिङे ?” 15 मोबा मोबेॽ सुम्बॽआ याॽमिजि लुसुजि, “होसियार ले़टानिङे! चोप खालहा खा के़ङ्गे़ङ ए़मिॽटानुमे इन्ढोङ्होङ याङ्सरावा बेॽलोनोॽ टुहोङ्सो मोसे़ॽ याॽमिजि चाइबमा हिङ्मवा पिहेसुनिबा।” 16 मोबा ए़क्साङ येसुडे़ॽ इक्को खानवा इःबेॽटुजि, “इक्को टाङायोङ्बामि रोपाबेॽ बेॽलोनोॽ अन्न किक्सा। 17 मोबा मोसे़ॽ निवाहोङ्सिॽयु मिॽटु, ‘इघा चोप अन्ना हाम्बेॽ युङ्मे ? इढे़ॽलो युङ्ढाम ठाउँनोॽ माॽआ, हागो इमाङ ले़ःॽमे ?’ 18 मोबा खोसे़ॽ निवाबेॽ मिॽटु, ‘हागो इडोॽ ले़नुङे, ए़द्रेहा अन्ना युङ्ढाम भकारि योबेनुङ बेॽहा बेॽहा टोङ्नुङ मोबेॽनोॽ इघा चोप अन्नानुङ कोक्नाम युङ्इनुङ्हा। 19 मोबा काङ्दाङ्बा काङे, हागो हे़न्नुङ बेॽलो निङ्ठोक के़ॽए़ये अन्ना, याङ्सरावा टुहा, चोसे, उक्से हाङहाङ पेने।’ 20 “तर निवाहाङ्डे़ॽ मो याॽमि लुसु, ‘होउ उम्बरिङ याॽमि, आइ सेन्डानोॽ हे़ने़ए़ सोःक्मा खे़ॽए़ये, मोबा हे़ने़ॽ सुमयुङ्बॽआ याङ्सरावा असे़ॽ चोन्डुहा’ ?” 21 मोबा येसुडे़ॽ मो खानवा इडोक्पेॽनोॽ येॽसाङ लुसु, “टाङ्बामि लागि याङ्सरावा सुम्युङ्घुबा, तर निवाहाङ्मि लागि याङ्सरावा मे़सुम्खुबा याॽमिजिमि दसा इडोक्नोॽ लिये।” सुरता ए़ले़ःॽमे ( मत्ति ६:२५-३४ ) 22 मोबा ए़क्साङ येसुडे़ॽ चोङ्साजि लुसुजि, “मोडोगे़ॽ हिङ्मामि लागि पाप्मिये चामे, उङ्मे खामि टुम्बेॽ सुरता ए़ले़टानिङे। 23 चामे खाबाङ चुरोक हिङ्मवानोॽ बेॽएम्मा ले़ये, चेॽबाङ चुरोक कानिङ्मि हिङानोॽ मुल्यनुङ्मा ले़ये। 24 अराॽवाजि खाक्सानुमे! अक्खाजिडे़ॽ रोपासो रिडुजिने, अन्नासो सुम्मिने, खोजिमि अन्ना युङ्ढाम भकारिसो माॽआ, मोडोक्सो निवाहाङ्डे़ॽनोॽ खोजि हिङ्इन्डुजे। हे़निङ्गो अक्खा सोङाबाङ्गो बेॽलो मुल्यनुङ्हा ले़न्डानिङे। 25 “हे़निङ्बेॽ असे़ॽटे सुरता ले़ःॽनुङ टाङ्बामि आयु इक्याक येॽहेन्डानुमे ? 26 इडोक्सो ले़ःॽहेसानुम्निहोङ हाइखा खामि लागि इन्ढोङ सुरता ले़न्डानुमे ? 27 नाम्फुङ्लाबेॽ काम्नुमानुङ फे़क्पॽआ लिलि सेम्फुङ खाक्सानुमे, खोजि योम्बोकसो ले़ःॽमिनि, चेॽसो आक्मिनि। तर के़ॽ हे़निङ लुनिम्ने़, सोलोमान हाङ्बा मोढे़ॽलो टाङायोङ्बा ले़ःॽनुङ्सो खो माहा सेम्फुङ्डोॽ चाक्पॽआ मे़ले़टा। 28 आयु काम्नुहा वागियानोॽ हेघे़ॽनुङ हिक्खे़हा याॽवानोक्सो निवाहाङ्डे़ॽ मोढे़ॽलो चाॽइन्डुहोङ इमा हे़निङ छना चाङ्मे चेॽ पिनिबा ? खोइ हे़निङ्मि बिस्वास ? 29 मोडोगे़ॽ इमाङ चामे, इमाङ उङ्मे़ लुनुङ सुरता ए़ले़टानिङे। 30 निवाहाङ मे़लेघुबाजिडे़ॽगोरे सुरता ले़न्डुजे। इघा चोप खा हे़निङ पाप्मिहा लुनुङ निवाहाङ्डे़ॽ लेन्डुहा। 31 याक्लो निवाहाङ्मि राज्य योगानुमे मोबा इघा चोप खा निवाहाङ्डे़ॽ हे़निङ पिये।” थाङ्सिरिॽटु याङ्सरावा सुम्मा ( मत्ति ६:१९-२१ ) 32 येसुडे़ॽ फेरिसो लुसु, “होउ के़हा चोङ्साजि, हे़निङ ए़डे़म्मा बगालडोॽ ले़न्डानिङे, हे़निङ ए़ॽकिसिसानिङे! इन्ढोङ्होङ निवाहाङ्डे़ॽ खोमि राज्य हे़निङ पिमा मिॽइटुए। 33 हे़निङे़ॽ टाङ्बामि याङ्सरावा इन्जानुङ माहा याङ इमाङ मे़ङ्काप्खुबाजि पिसानुमे। टाङ्बामि लागि सानिङ्नोॽ टुढुङ्घे़ये भकारि टोङ्नुङ इन्डोक्पेॽसो रुक्खे़ॽनिहा याङ्सरावा थाङ्सिरिॽटु सुप्सानुमे। मोबेॽको खुसुबाङे़ॽसो खुसुजिनि, पुजिकडे़ॽसो चोसुजिनि। 34 इन्ढोङ्होङ हाम्बेॽ हे़निङ्मि याङ्सरावा टुहा, मोबेॽनोॽ हे़निङ्मि निवासो पेङ्इये।” चङ्खो ले़ःॽनुङ पेम्मा खे़ये ( मत्ति २४:४५-५१ ) 35 मोबा ए़क्साङ येसुडे़ॽ लुसु, “टाङ्बामि सुम्रिक हिःक्नुङ पोरोगानिङे, कुप्पि उःप्युक्सानुमे। 36 हे़निङ फुङ्सयामि भत्तेरबाङ टेआप्खुबा मायोङ्बामि राम खाङ्साङ पेङ्घुबा सेउतेडोॽ चङ्खो ले़टानिङे। चङ्खो पेङ्घुबाडे़ॽरेॽ मायोङ्बा लेन्नुङ राम्डेम रोःक्मा सोरोॽ राम्डेम हेम्बेन्डुए। 37 मायोङ्बा लेम्माबेॽ मे़इम्रेॽ पेङ्घुबा सेउतेजिडे़ॽनोॽ ओहाक चुप्मिन्डुजेनुङ माहाजि साप्थाङ्डोक्इम्मे। चइबानोॽ के़ॽ हे़निङ लुनिम्ने़, मो मायोङ्बाडे़ॽ खोम सेउतेजि चाबाङ्जिडोक्नोॽ ले़ःॽनुङ चामा खे़ङ चुङ्नुङ नुरोॽ हिङ्इन्डुजे। 38 तर मायोङ्बा ढिलो ले़ःॽनुङ सेन्डा अथबा माक्मिॽ लेम्माबेॽ सेउतेजि मे़इम्लेॽ पेम्बॽआ चुप्टुजिहोङ खोजिमि मायोङ्बाडे़ॽ छना बेॽलो ओहाक पिन्डुजेनुङ माहा योम्बोक ले़ःॽखुबाजिसो बेॽलो साप्थाङ्इम्मे। 39 “तर इडोॽ मिॽखाक्सानुमे, खुसुबाङ इन्डोक्पेॽ लेङ्इये लुनुङ खिमदाङ्बे़ॽ लेडोक्पॽआ ले़टाहोङ्गो मो खिमदाङ्बे़ॽ खुसुबाङ्जि खिमहोङ्सिॽयु मे़म्पे़ॽखे़ॽमेॽटुजि होला। 40 मोडोगे़ॽ हे़निङ्सो चङ्खो ले़ःॽनुङ पेनानिङे। का याॽमिमि पसा हे़निङे़ॽ मे़मिॽपॽआ बेलाबेॽ लेङ्इङे़।” 41 मोबा पत्रुसडे़ॽ येसु सिप्सु, “परभु, हे़ने़ॽ इगो खा कानिङ्मि लागिरेॽ लुटे़न्डे हाइखाजिमि लागिसो ?” 42 परभुडे़ॽ लुसु, “निवादाङ्बानुङ भरोसानुङ्मा भन्डारे चाहिँ इन्डोक्मा याॽमिडे लिये ? मायोङ्बाडे़ॽ खोमि खिमबेॽहा चोप योम्बोकमि जिम्मा पियेम्बाङ निवादाङ्बानुङ भरोसानुङ्मा भन्डारेडे़ॽ चाहिँ हाइखा योम्बोक ले़ःॽखुबाजि माक्मि, लेन्डानुङ युडा नुरोॽ चामा उङ्मामि टुङ्गो ले़ःॽपेन्डुजे। 43 मायोङ्बा खिम टेजामाबेॽ मो भन्डारे नुरोॽ योम्बोक ले़ःॽटिङ्बॽआ चुप्माबेॽ खोसे़ॽ बेॽलो ओहाक चुप्मिन्डुए। 44 चइबानोॽ के़ॽ हे़निङ लुनिम्ने़, मायोङ्बाडे़ॽ मो भन्डारेनोॽ खोमि चोप याङ्सरावामि जिम्मा पिओन्डुए। 45 तर मो भन्डारेडे़ॽ ‘के़ए़ मायोङ्बा चान्डोनोॽ टेजानि’ लुनुङ उङ्मानुङ अले़ःखो ले़ःॽसाङ हाइखा योम्बोक ले़ःॽखुबाजि मोक्पोगुजिहोङ 46 मोमि मायोङ्बा खोसे़ॽ मे़मिॽपॽआ बेलाबेॽ लेङ्इये, मोबा खोसे़ॽ बेॽए दन्डा चुप्मिन्डुए। मोमि दसा निवाहाङ्मि खा मे़ङ्खेम्खुबामिडोक्नोॽ लिये। 47 “मायोङ्बामि निवामि खा लेनुङ्सो ले़ःॽमा खे़ये योम्बोक मे़ले़ःॽखुबा भन्डारेडे़ॽ खोमि मायोङ्बाबाङ बेॽएम्मा दन्डा चुप्मिन्डुए। 48 “तर मायोङ्बामि निवामि खा मे़ल्लेरेॽ मङे़ॽमा योम्बोक ले़ःॽखुबा सेउते चाहिँ मायोङ्बाडे़ॽ ए़डे़ॽ चुक्लो सजाय पिन्डुए। असे़ॽ बेॽलो चुप्मिटुए मोसे़ॽ बेॽलोनोॽ पिमा खे़ये। मोडोक्नोॽ असा बेॽलो जिम्मा पिबॽआ ले़ये मोसे़ॽ छना बेॽलोनोॽ फोङ्मा खे़ये।” खिमहोङ्सिॽयु बिरोधमि खा ( मत्ति २६:२-३ ; ५:२५-२६ ) 49 येसुडे़ॽ लुसु, “का मक्खाम्डेमबेॽ मि टिसिॽ लेङ्इटिङे तर मो मि याक्लोनोॽ हाङ्बुक्पेबॽआहोङ नुडे़! 50 के़ॽ इक्को खेःमि बप्तिस्मा लामा खे़ये। मो बप्तिस्मा मे़ल्लारेॽ के़ए़ निवाबेॽ सान्तिनोॽ लिनिबा। 51 इमाङ हे़निङे़ॽ का इगो मक्खाम्डेमबेॽहा याॽमिजि सान्ति पिसिॽ लेङ्इटे़ मिॽइन्डानिङे ? ने़ॽनि, कागो आम्निमि रुम्बेॽ फाक्सिॽ चाहिँ लेङ्इटिङे। 52 हागोएम्बाङ इक्को खिमबेॽहा ङाबाङ्मिसो खा टोङ्निहा। सुमबाङ्मि बिरोधबेॽ निप्पाङ, निप्पाङ्मि बिरोधबेॽ सुम्बाङ पुःॽइम्मे। 53 पाबे़ॽ पसामि, पसे़ॽ पाबामि, मामाडे़ॽ पसामि, पसे़ॽ मामामि, मोडोक्नोॽ नाम्मे़ॽ नाम्मिॽमि मोबा नाम्मिॽडे़ॽ नाम्मामि बिरोध ले़न्डुजे।” बेलामि चिङ्गा ( मत्ति २६:२-३ ) 54 मोबा येसुडे़ॽ माहा बेॽलो याॽमिजि लुसुजि, “हे़निङे़ॽ नमथालाम खिम्मिॽवा खाङ्मुयेबाङ ‘हागो वारि लेङ्इये’ लुन्डानुमे, मोबा मोडोक्नोॽ वारिसो लेङ्इये। 55 लाङ्गेतबाङ हिॽवाबा लेङ्होङ हे़निङे़ॽ हुरुॽवा लुये लुन्डानुमे मोबा मोडोक्नोॽ लिये। 56 होउ कप्टिजि! मक्खाम्डेमनुङ नान्द्रुङ्मा खाङ्नुङ वारि लेङ्इयेन्डे लेन्निबा लुनुङ लेन्डानुमे, तर इगो बेलाबेॽ लिसिॽपोरोक्पॽआ खामि चिङ्गा चाहिँ इन्ढोङ लेसानुम्ने ? मुद्दा टिघुबानुङ खा टोङ्बेमे़ ( मत्ति ५:२५-२६ ) 57 “हागो इमाङ ले़ःॽमा खे़ये लुनुङ हे़निङे़ॽ इन्ढोङ लेसानुम्ने ? 58 असे़ॽहोङ्सो हे़नबेॽ मुद्दा ए़न्नुङ न्याय ले़ःॽसिॽ चिक्खे़ॽहोङ रामबेॽनोॽ हे़न मुद्दा टिखुबानुङ खा टोङ्बेमे। आक्टोॽ मे़ले़टुहोङ हे़न न्याय ले़ःॽखुबामि पोम्बेॽ येःप्मेये मोबा मोसे़ॽ तिरिङ्गामि हुकपेॽ जिम्मा पिये। मोबा मो तिरिङ्गाडे़ॽ तिरिङ्गा खिमबेॽ हे़न से़ॽइये। 59 के़ॽ हे़निङ लुनिम्ने़, हे़निङे़ॽ फोङ्मे दन्डा चोप मे़म्फोङ्लो हे़न लेॽमिने!” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.