लुका 11 - याम्फुयेसुडे़ॽ पारथना ले़ःॽमा इःॽपॽआ ( मत्ति ६:९-१३ ; ७:७-११ ) 1 इक्याक येसु इक्को ठाउँबेॽ पारथना ले़ःॽमे़ॽनिङ्सिडा। इडोॽ खो पारथना ले़सेॽमाबेॽ खोमि इक्को चोङ्साडे़ॽ लुसु, “परभु, युहन्नाडे़ॽ खोमि चोङ्साजि इःॽपॽआडोक्नोॽ कानिङ्सो पारथना ले़ःॽमा इःॽमाना।” 2 येसुडे़ॽ माहाजि लुसुजि, “हे़निङे़ॽ इडोॽ पारथना ले़टानुमे ‘हे निवाहाङ पाबा’ हे़ने़ए़ निङ पबित्रा लिरो, हे़ने़ए़ राज्य चान्डो लेङ्रो, 3 सानिङ्डोक्नोॽ कानिङ पाप्मिये चामे खा पिमायो। 4 कानिङे़ॽ कानिङ्मि सतुरजि आम्लाङ पिडिडोक्नोॽ कानिङ्मि पापमि आम्लाङ पिमायो। कानिङ जाँचबेॽ ए़सिॽमेॽमायो।” 5 मोबा ए़क्साङ येसुडे़ॽ चोङ्साजि लुसुजि, “मिॽखाक्सानुमे, हे़निङ्मि इक्को लङ्गाम टुसे़। इक्याक सेन्डा चोप इम्घे़ॽपॽआ बेलाबेॽ खे़ॽनुङ लुन्डुए, ‘होउ लङ्गाम, का सुम्जि चरेपा रोक्मा पिमाना। 6 इन्ढोङ्होङ के़ए़ खिमबेॽ ओःबाङ इक्को चाबाङ लेङ्इटे़। तर कानुङ इमाङ्सो चामे खा माॽआ’। 7 खोमि लङ्गामडे़ॽ खिमहोङ्सिॽयुबाङ्नोॽ लुसु, ‘का दुःख ए़प्पिमे। राम्बडेमसो से़क्पेटुङे, ओङे़कजिनुङ इम्घे़टिङे। हागो का पुके़ॽनुङ हे़न इमाङ्सो पिहेनानि’।” 8 इडोॽ लुसेॽनुङ येसुडे़ॽ माहाजि लुसुजि, “के़ॽ हे़निङ लुनिम्ने़, खोसे़ॽ लङ्गाम मिॽनुङ ने़ॽनि तर मोसे़ॽ एकोहोरो ङाःक्टुङ्घे़ॽपॽआसे़ॽ खो पुके़ॽनुङ ङाःक्पॽआडोक्नोॽ पिन्डुए। 9 “मोडोगे़ॽ के़ॽ हे़निङ लुनिम्ने़, ङाःगानुमहोङ पिये, योगानुमहोङ चुप्मिन्डानुमे, राम्डेम ढक्ढक रोःगानुमहोङ हे़निङ्मि लागि हेम्बोॽइये। 10 इन्ढोङ्होङ ङाःक्खुबाडे़ॽ चुप्मिन्डुए, योक्खुबाडे़ॽ योक्टोक्इन्डुएनुङ ढकढक रोःक्खुबामि लागि राम्डेम हेम्बोक्इये। 11 हे़निङ्मि रुम्बेॽ असामि पाबा टुये, खोम पसे़ॽ ङा ङाःक्माबेॽ पुसे़ॽ पिन्डुए, 12 वाइङ ङाःक्माबेॽ बिच्छि पिन्डुए ? 13 हे़निङ पापि ले़न्डानिङ्होङ्सो टाङ्बामि पसाजि नुबा खा पिलेन्डानुमहोङ छना थाङ्सिरिॽटु पेङ्घुबा हे़निङ्मि निवाहाङ पाबे़ॽ खोनुङ ङाःक्खुबाजि इन्डोक बेॽलो पबित्रा होङ्निवा पिये।” येसुनुङ मङे़ॽमा चापजिमि हाङ्बा सैतान ( मत्ति १२:२२-३० , ४३-४५ ; मरकुस ३:२०-२७ ) 14 इक्को याॽमि मङे़ॽमा चाबे़ॽ कुबा टोङ्बॽआ ले़टे़। मो कुबा होङ्सिॽयुबाङ येसुडे़ॽ मङे़ॽमा चाप यिक्पेनुङ ए़क्साङ मो याॽमि यामुबुगा। इगो खाङ्नुङ चोप याॽमिजि खरि मिनामि। 15 तर माहाजिबेॽ इक्को निप्पाङे़ॽ लुसुजि, “इगोसे़ॽको मङे़ॽमा चापजिमि हाङ्बा सैतानमि सक्तिडे़ॽ मङे़ॽमा चाप यिॽइन्डुए।” 16 इन्डोगे़ॽ चाहिँ येसु जाँच ले़ःॽमामि लुसुजि, “इगो योम्बोक निवाहाङ्मि सक्तिडे़ॽनोॽ ले़ःॽपॽआहोङ कानिङ थाङ्सिरिबाङ्ए इक्को चिङ्गा खाङ्मेॽमा।” 17 माहाजिमि निवामि खा लेडोक्नुङ येसुडे़ॽ लुसुजि, “इक्को देसबेॽहा याॽमिजि खोजि टाङ्बा टाङ्बानोॽ खिमिहोङ खोजिनोॽ नासि लिम्मे। मोडोक्नोॽ खिमबेॽसो टाङ्बा टाङ्बानोॽ खिमिहोङ मो खिमसो नासि लिये। 18 मोडोक्नोॽ सैतानमिसो खोमि टाङ्बाङ्नुङ निवा मे़न्टोङ्होङ खोसे़ॽ इन्डोॽ राज्य ले़ःॽहेन्डुए ? इन्ढोङ्होङ हे़निङे़ॽ का मङे़ॽमा चापमि हाङ्बा सैतानमि सक्तिडे़ॽ चाप यिॽइन्डुए लुन्डानिङे। 19 के़ॽनोॽ सैतानमि सक्तिडे़ॽ मङे़ॽमा चाप यिॽइनुङेहोङ हे़निङ्हा चोङ्साजिडे़ॽ चाहिँ असामि सक्तिडे़ॽ मङे़ॽमा चाप यिॽइन्डुजे ? हे़निङ्मि चोङ्साजिडे़ॽनोॽ हे़निङे़ॽ ले़ःॽपॽआ मङे़हा योम्बोक खाङ्मुन्डुजे। 20 तर के़ॽ निवाहाङ्मि सक्तिडे़ॽ मङे़ॽहा चापजि यिॽइनुङेहोङ निवाहाङ्मि राज्य हे़निङ्मि रुम्बेॽ लेम्बेटे़यो। 21 टोङ्इरानुङ ताब्या सिप्खुबा इक्को छॽइये याॽमिडे़ॽ खिम हुक्सुहोङ इमाङ्सो कोक्नाम मे़खे़ॽनिहा। 22 तर खोबाङ छॽइये हाइके याॽमि लेङ्होङ खो हेजोबेन्डुए मोबा खोसे़ॽ याङ्बॽआ टोङ्इरा, ताब्या नाप्नुङ चोप कोक्नामसो नाप्खे़ॽनुङ खोमि लङ्गामजिनुङ हाःजोन्डुहा। 23 कानुङ मे़न्टोङ्घुबा याॽमि के़ए़ टेडिघरिक याॽमि ले़ये। कानुङ सुप्सुनिहा मोसे़ॽ सुम्बॽआसो टुप्पेबेये। मङे़ॽमा चाप टेजाबॽआ ( मत्ति १२:४३-४५ ) 24 “इक्को याॽमिबाङ मङे़ॽमा चाप खे़ॽपेनुङ ए़क्साङ रे़क्रे़क्मा ठाउँबेॽ नाजाढाम योक्साङ राम्इये। इडोॽ योक्माबेॽ हाम्बेॽसो पेन्ढाम ठाउँ मे़न्चुप्टुहोङ ‘याक्लो पेम्बॽआ ठाउँबेॽनोॽ खे़ए़ङे मिॽनुङ टेजाये’। 25 मोबेॽ लेम्माबेॽ खोसे़ॽ याक्लोए खिम नुरोॽ सेबोक्नुङ चाक्पॽआ चुप्मिन्डुए। 26 इगो खाङ्डोक्नुङ मोसे़ॽ हाइखा एच्चि गोटा मङे़ॽहा चापजि चिक्चे़न्डुजे मोबा माहा चोप मो याॽमिबेॽ पे़ःॽयुम्मे, मोबा मो याॽमि याक्लोएबाङ्सो बेॽलो नासि लिये।” चाइबानोक्मा सुख 27 येसुडे़ॽ खा इःमे़ॽनिङ्सिमाबेॽ याॽमिजिमि रुम्बाङ इक्को मेॽनामिॽडे़ॽ वोसाङ लुसु, “हे़न टोक्खुबानुङ डुडु हिङ्खुबा मामा इन्डोक आसिसित ले़ये!” 28 इगो खेम्नुङ येसुडे़ॽ लुसु, “आक्टोक ने़ॽनि, निवाहाङ्मि खा खेम्नुङ मोडोक्नोॽ ले़ःॽखुबा याॽमिजिडे़ॽ छना चुरोक आसिस चुप्मिन्डुजे!” योनामि चिङ्गा ( मत्ति १२:३८-४२ ) 29 याॽमिमि बेॽलो घुइँचो लिबुगा। मोडोक्पेॽनोॽ येसुडे़ॽ लुसुजि, “आयुहा याॽमिजि इन्डोक दुस्ट ले़म्मे! माहाजिडे़ॽ निवाहाङ्बाङ्ए सक्तिनुङ्मा चिङ्गा खाङ्मा योॽइन्डुजे। तर अगमबक्ता योना निङ ले़ःॽखुबा याॽमिमि हिङ्मवाबेॽ लिबॽआडोक्हा चिङ्गाबाङ हाइखा इमाङ्सो चिङ्गा खाङ्डोक्टुजिने। 30 योना निनबे सहरमि याॽमिजिमि लागि चिङ्गा लिडिडोक्नोॽ आयुहा याॽमिजिमि लागि का याॽमिमि पसानोॽ चिङ्गा ले़ङे। 31 न्याय ले़ःॽमे यिडे़ॽ लाङ्गेतमि सेबा निङ ले़ये देसबेॽए हाङ्मा येःप्नुङ आयुहा याॽमिजि आप्टिक टिन्डुजे इन्ढोङ्होङ मो हाङ्मा सोलोमान हाङ्बामि निवामि नुबा खा खेम्सिॽ बेॽलो ओः देसबाङ लेम्बॽआ ले़टे़। खाक्सानुमे, आयु हे़निङ्मि रुम्बेॽ सोलोमानबाङ्सो बेॽएम्मा याॽमि टुये तर खोमि खा हे़निङे़ॽ मे़ङ्खे़प्सानुम। 32 न्याय ले़ःॽमे यिडे़ॽ निनबे सहरबेॽहा याॽमिजि येःप्नुङ आयुहा याॽमिजि आप्टिक टिन्डुजे, इन्ढोङ्होङ निनबेबेॽहा याॽमिजिडे़ॽको योनाडे़ॽ निवाहाङ्मि खा खेम्मेॽमाबेॽ माहाजिडे़ॽ पापि योम्बोक लेॽपेनुङ टेआबामि। तर खाक्सानुमे, आइ इगोबेॽ योनाबाङ्सो बेॽएम्मा इक्को याॽमि टुये हे़निङे़ॽ खोमि खा मे़ङ्खेप्सानुम। हिङ्मवामि उज्यालो ( मत्ति ५:१५ ; ६:२२-२३ ) 33 “कुप्पि उःप्नुङ असे़ॽसो पाथिडे़ॽ टे़गुजिनि। बोरु होङ्सिॽयु आप्खुबा याॽमिजिमि लागि उज्यालो लिरो लुनुङ चोबे़ॽ खाङ्डोक्ठाम अग्लोमा ठाउँबेॽ युङ्इन्डुजे। 34 हे़ने़ए़ हिङामि उज्यालो चाहिँ हे़ने़हा मिक ले़ये। हे़ने़हा मिक नुरोॽ ए़ःॽहोङ चोप हिङासो उज्यालो लिये। तर मिकनोॽ मे़न्ठाहोङ चोप हिङानोॽ सेन्जुगुप लिये। 35 मोडोगे़ॽ होसियार ले़ःॽचासानिङे, हे़निङ्बेॽ टुबॽआ उज्यालो चइबानोॽ सेन्जुगुप मे़ल्लिरो। 36 हे़ने़ए़ हिङामि चोप अङ्गबेॽनोॽ उज्यालो टुहोङ्नुङ मोबेॽ सेन्जुगुप माॽआहोङ मो उज्यालोडे़ॽ चोप हिङानोॽ पोॽइये, कुप्पिमि उज्यालो हे़नबेॽ सिॽनुङ पोक्टिडोक्नोॽ मो पोॽइये।” फरिसिनुङ यहुदि धारमिक नियम इःॽखुबाजि येसुडे़ॽ योप्पॽआ ( मत्ति २३:१-३६ ; मरकुस १२:३८-४० ) 37 येसुडे़ॽ इगो खा इःसेॽनुङ ए़क्साङ इक्को फरिसिडे़ॽ येसु खोमि खिमबेॽ चामा चासिॽ के़डु। येसु खोमि खिमबेॽ खे़ॽनुङ चासिॽ पेना। 38 येसु खोमि हुक मे़वासोक्लेॽ चासिॽ पेङ्युबॽआ खाङ्नुङ येसु के़ॽखुबा फरिसि खरि मिना। 39 मोबा परभु येसुडे़ॽ खो लुसु, “हे़निङ फरिसिजि थालानुङ खोरियामि पाखे़ॽयुरेॽ पे़ङ्डिडोॽ हाइखाजि खाङ्मेॽमामि नियमरेॽनोॽ पुरा ले़न्डानुमे तर हे़निङ्मि निवाहोङ्सिॽयु चाहिँ मङे़ॽहा दुस्टा खाडे़ॽ टिॽपॽआ ले़हा। 40 हे़निङ उम्बरिङ्जि, हे़निङे़ॽ लेसानुम्ने़, हे़निङ्मि हिङा टोङ्खुबा निवाहाङ्डे़ॽनोॽ हे़निङ्मि होङ्सिॽयुए निवासो टोङ्बॽआ ने़ॽनेन्डे ? 41 हे़निङ्नुङ टुहा खा इमाङ मे़ङ्काप्खुबाजि पिसानुमे मोबा हे़निङ्मि लागि चोप चोखो लिहा। 42 “हे़निङ फरिसिजि सरापितजि! मे़रचु, सम्फिडोक्मा ए़द्रिहा खामिसो इक्पोङ्मि इक्भागा निवाहाङ पिलेन्डानुमे, तर न्यायमि याकनुङ निवाहाङ नम्नम ले़ःॽमे खामि ले़ख्खोनोॽ ले़टानुम्ने। हे़निङ्मि बालिबाङ इक्पोङ्मि इक भागारेॽ ने़ॽनि मोनुङ सोरि हे़निङे़ॽ न्यायनुङ नम्नमसो ले़ःॽमा खे़ये। 43 “हे़निङ फरिसिजि सरापितजि! यहुदिजि सुम्ढाम सभा खिमबेॽ बेॽहा पेन्ढाम ठाउँ योॽइन्डानुमे, हाटाराजि चोबे़ॽ हे़निङ सेवा मुबॽआ नेन्जान्डानुमे। 44 हे़निङ सरापितजि! हे़निङ्गो खाङ्माबेॽ लेडोक्हेनिबा येःॽमाडोॽ ले़न्डानिङे, याॽमिजि मो येःॽमा लुनुङ मे़लेरेॽ मोसोक्बाङ राम्इम्मे।” 45 इक्को यहुदि धारमिक नियम इःॽखुबाडे़ॽ येसु लुसु, “गुरुज्यु, इघा खा लुनुङ हे़ने़ॽको कानिङ्मिसो बेजेत ले़ःॽमे़ॽनिङ्सिन्डुए।” 46 येसुडे़ॽ माहाजि लुसुजि, “हे़निङ यहुदि धारमिक नियम इःॽखुबा सरापितजि! हे़निङे़ॽ हाइखा याॽमिजि चाहिँ धारमिक खामि बेॽहा कोक खिमेन्डानुमे। तर हे़निङ टाङ्बे़ॽ चाहिँ माहा कोक हुकखे़ॽवासिडे़ॽसो के़गानुम्ने। 47 “हे़निङ सरापितजि! हे़निङ्मिनोॽ टुबालाबजिडे़ॽ सेॽनेबॽआ अगमबक्तजिमि लागि हे़निङे़ॽ नुबा नुबा येःॽमा टोङ्इन्डानुमे । 48 इडोक्नोॽ हे़निङे़ॽ हे़निङ्मि टुबालाबाजिडे़ॽ अगमबक्तजि सेॽनुङ नुबा ले़टुजि मिॽइन्डानुमे। खोजिडे़ॽ सेॽनेबॽआ अगमबक्ताजिमि लागि हे़निङे़ॽ येःॽमा टोङ्इन्डानुम। 49 मोडोगे़ॽ निवाहाङ्डे़ॽ टाङ्बामि निवाडे़ॽ इडोॽ लुसु, ‘के़ॽ माहाजिबेॽ के़हा अगमबक्ताजिनुङ एप्पा चोङ्साजि पाङ्इनुङ्हाजि। तर माहाजिडे़ॽ इन्डोक जनाजि चुङ्जान्डुजेनुङ इन्डोक जनाजिगो सेॽनेन्डुजे।’ 50 मोडोगे़ॽनोॽ मक्खाम्डेमबेॽ उहिलेबाङ आयुरो सेॽनेबॽआ अगमबक्ताजिमि हरिमि भारा इगो पुस्ताबेॽहा याॽमिजिडे़ॽनोॽ फोङ्मा खे़ये। 51 के़ॽ लुनिम्ने़, हाबिल सेॽनेबॽआ बेलाबाङ मन्दिरनुङ थानामि रुम्बेॽ सेॽनेबॽआ जकरिया मोबा अगमबक्ताजिमि हरिमि चोप आप्टिक इघा पुस्ताबेॽहा याॽमिजि सोक्पेॽनोॽ सिॽइहा। 52 “हे़निङ यहुदि धारमिक नियम इःॽखुबा सरापितजि! इन्ढोङ्होङ हे़निङ्नुङ निवाहाङ लेमे नुबा निवामि साचो टुये। तर हे़निङ टाङ्बे़ॽसो निवाहाङ मे़लेसानुम मोबा हे़निङे़ॽ हाइखाजिसो मे़लेमेॽटानुम।” 53 मोबा मो ठाउँबाङ येसु खे़ॽपेनुङ ए़क्साङ यहुदि धारमिक नियम इःॽखुबाजिनुङ फरिसिजिडे़ॽ येसुमि बेॽलोनोॽ बिरोध ले़ःॽपोगुजि, मोबा खोनुङ बेॽलो खा सिम्बोगुजि। 54 इडोॽ येसुडे़ॽ माहाजिनुङ खा इःमाबेॽ टेडिघरिक लुबॽआ चुप्होङ येसु ने़ःक्चा राःप्टोॽइये लुनुङ माहाजिडे़ॽ दाउ खाङ्बोगुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.