यहुदा 1 - याम्फु1 का याकुबमि निसा, मोबा येसु खिरिस्टमि सेउते यहुदा ले़ङे। निवाहाङ पाबाडे़ॽ के़ःप्पॽआनुङ नम्नम मिॽपॽआजि, मोबा येसु खिरिस्टडे़ॽ रच्छे ले़ःॽपॽआजि इगो पत्रा साप्हाङ्मे़ॽसिनुङे। 2 हे़निङ निवाहाङ्डे़ॽ बेॽलो नम्नम ले़ःॽरो, बेॽलो सान्ति पिरो मोबा के़ॽलो नम्नावा ले़ःॽरो। मे़ॽनोक्हा सिक्छे इःॽखुबाजि 3 लङ्गामजि, कानिङ चोबे़ॽ चुप्पॽआ मुक्तिमि टुम्बेॽए खा हे़निङ साप्हाङ्मा बेॽलो मिॽटुङ। तर मोमि साटो निवाहाङ्मि भक्ति ले़ःॽखुबाजि सानिङ्मि लागि पिबॽआ बिस्वास जोगा ले़ःॽयुङ्मा खे़ये लुनुङ साप्हाङ्मा चाहिँ छना नुबा मिॽटुङ। 4 इन्ढोङ्होङ बेॽलो याक्लोनोॽ आप्टिकनुङ्मा लिनुङ दन्डामि भागिदार लिबॽआ इक्को निप्पाङ याॽमिजि खुस्रिङमु हे़निङ्मि रुम्बेॽ पे़ए़म्बेटामे। इघाजिडे़ॽ निवाहाङ्मि खा खेप्सुजिने, इघाजिडे़ॽ निवाहाङ्डे़ॽ पिबॽआ अनुग्रहा चाहिँ पाप योम्बोक ले़ःॽमे मराम टोङ्इटुजे। मोबा कानिङ्मि इक्कोमा डायोङ्बानुङ परभु येसु खिरिस्ट इन्कार ले़न्डुजे। 5 हे़निङ चोबे़ॽ इक्खेॽ लेबॽआ खानोॽ ले़ये तरसो माहा खा हे़निङे़ॽ मिडानुमे लुनुङ के़ॽ मिॽइनुङे। परमपरभुडे़ॽ खोमि याॽमिजि मिस्रा देसबाङ चिॽआप्टुजि, तर माहाजिबेॽ निवाहाङ्बेॽ बिस्वास मे़ले़ःॽखुबा याॽमिजि चाहिँ ए़क्साङ निवाहाङ्डे़ॽ नास ले़टुजि। 6 मोबा थाङ्सिरिदुतजिडे़ॽ टाङ्बे़ॽ चुप्पॽआ अधिकारमि ले़क्खो मे़ले़ःॽलेॽ, टाङ्बामि पेन्ढामसो लेॽखुबा माहा थाङ्सिरिदुतजि पातालमि सेन्जुगुप्पेॽ न्यायमि याकठोक निवाहाङ्डे़ॽ सानिङ्मि लागि से़क्नुङ युङ्इटुए। 7 मोडोक्नोॽ सदोमनुङ गमोरा, मोबा मोजिमि किॽयु मिॽयुहा हाइखा सहरबेॽहा याॽमिजिडे़ॽ इक्कोबाङ हाइको ले़ःॽसाङ चिक्चिमिॽमारोहा मङे़हा बेभिचार ले़टुजि। ए़क्साङ माहाजि इन्डोक्पेॽसो सिनिबा मिबेॽ दन्डा आङ्घुबाजिमि नमुना लिटामे। 8 निवाहाङ्मि खा मे़ङ्खे़म्खुबा माहा सेम्माङ मक्खुबा याॽमिजिडे़ॽ खोजिमि हिङाडे़ॽ ले़ःॽमा मिॽपॽआ बेभिचारडोॽहा पाप ले़ःॽनुङ टाङ्बा असुद्ध टोङ्इन्डुजे। परभुबाङ्हा अधिकार इन्कार ले़न्डुजे मोबा थाङ्सिरिदुतजि सिःक्चोन्डुजे। 9 तर एप्पा थाङ्सिरिदुत मिखाएलडे़ॽसो मोसामि सिगुयाकमि टुम्बेॽ सैताननुङ खा इःमाबेॽ खो इःजानुङ आप्टिक मे़म्पिसु। इडोॽरेॽनोॽ लुटुए “परभुडे़ॽ हे़न योप्मिये”। 10 तर इघा याॽमिजि टाङ्बे़ॽ लेनोॽ मे़लेबॽआ खामि निन्दा ले़ःॽनुङ आप्टिक टिन्डुजे। इघाजिमि लेमे निवा, निवा मे़ॽनिङ्हा जिवातजिमिडोॽ ले़हा, मोबा माहा निवाडे़ॽ ले़ःॽपॽआ मङे़हा योम्बोकबाङ्नोॽ खोजि नास लिम्मे। 11 माहाजिमि लागि इगो खा बेॽलोनोॽ किस्सिमारोमा ले़ये। इन्ढोङ्होङ माहाजि टाङ्बामिनोॽ निसा सेॽनेघुबा कयिनमि चालबेॽ राम्इम्मे, याङ्सरावामि लोभबेॽ सिॽनुङ बालामडे़ॽ ले़टिडोॽ ने़ॽनिहा खाबेॽ फाङ्सिघे़म्मे, मोबा कोरहडे़ॽ ले़टिडोॽ बिरोध ले़ःॽपॽआसे़ॽ खोजि नास लिम्मे। 12 हे़निङ्मि पिरति भत्तेर इडोक्हा याॽमिजिडे़ॽ ले़ःॽमे़ॽ असुद्ध लिये। इन्ढोङ्होङ इघाजिडे़ॽ टाङ्बामिरेॽ ले़ख्खो ले़ःॽनुङ चाहेरो रोप्मिम्मे, होम्हेरो होम्इम्मे। माहाजि हिॽवाबाडे़ॽ येप्खे़ॽहेयेनुङ योङा मे़ॽनिङ्मा खिम्मिॽवाडोॽहाजि ले़म्मे। माहाजि चा मे़ॽनिङ्मा सामबाङ्नोॽ रोङ्घे़ॽनुङ हेघे़ॽपॽआ डाङ्डोॽहा ले़म्मे। 13 माहाजि माहोङ्मामि किस्सिमारोहा फेङ्ले़ॽवाडोॽहाजि ले़म्मे, माहाजिडे़ॽ ङेसिमा मे़ॽनिङ चिक्चिमिॽमारोहा खा माहोङ्मामि चेःॽमाडोॽ खाङ्मुन्डुजे। माहाजि योम्बोक मे़ॽनिङ वाइसुरया साङ्गेडोॽहाजि ले़म्मे, इघाजिमि लागिनोॽ खेःलोकमि सेन्जुगुप सानिङ्मु युङ्बॽआ ले़हा। 14 आदमबाङ ए़क्साङ्ए एच्चिमा पुस्ताबेॽए हनोकडे़ॽ इघा याॽमिजिमि टुम्बेॽ इडोक्मा अगमबानि इःबॽआ ले़टे़, “खाक्सानुमे, परमपरभु टाङ्बामि नेॽमाबेॽ नेॽहेनिहा पबित्रा दुतजिनुङ लेङ्इये। 15 मोबा इडोक्हा याॽमिजि चोप खोसे़ॽ दन्डा पिन्डुजे मोबा इघाजिडे़ॽ ले़ःॽपॽआ मङे़हा योम्बोकमि बिरोधबेॽ इःबॽआ चोप खामि खोसे़ॽ दन्डा पिन्डुजे।” 16 कुनु कुनुॽ काघुबाजि, बिसोन्तोकिजि, टाङ्बामि मङे़ॽमा निवाडे़ॽ लुबॽआ रामबेॽ राम्घुबाजि, काङायोङ्बा खा इःघुबाजिनुङ टाङ्बामि योम्बोकमि लागि नेदवा रे़ङ्घुबाजि इघाजिनोॽ ले़म्मे। चेतावनिनुङ सिक्छे 17 तर के़ॽ नम्नम ले़ःॽपॽआ लङ्गामजि, हे़निङे़ॽ चाहिँ कानिङ्मि परभु येसु खिरिस्टमि एप्पा चोङ्साजिडे़ॽ याक्लोएम्बाङ इःॽपॽआ खा मिडानुमे। 18 माहाजिडे़ॽ इडोॽ लुटामे, “ए़क्साङ्ए बेलाबेॽ माहाजि निवाहाङ्मि खा सिःक्चाघुबा लिम्मे। माहाजिडे़ॽ टाङ्बामि पापि निवाडे़ॽ इमा-इमा मङे़हा योम्बोक ले़ःॽमा मिॽइन्डुजे माहानोॽ ले़न्डुजे।” 19 हे़निङ्मि रुम्बेॽ खिमवा पुःक्मेॽखुबा याॽमिजि इघाजिनोॽ ले़म्मे। माहाजि मक्खाम्डेमबेॽहा याॽमिजिमिडोॽ निवा खिम्मेनुङ इघाजिबेॽ पबित्रा होङ्निवा पेन्निबा। 20 तर के़ॽ नम्नम ले़ःॽपॽआ के़हा लङ्गामजि, हे़निङ चाहिँ पबित्रा बिस्वासबेॽ बोलियो लिसानिङे। पबित्रा होङ्निवामि सक्तिबेॽ पारथना ले़टानुमे। 21 हे़निङ निवाहाङ्डे़ॽ ले़ःॽपॽआ नम्नमबेॽ सानिङ हिक्सानिङे, मोबा परभु येसुमि अनुग्रहाबाङ चुप्मिये ए़स्सिमे हिङ्मवा हुक्सानुमे। 22 दोधारबेॽ सिॽपॽआजि नम्नावा ले़टानुमे। 23 खेःलोकमि मिबेॽ सिॽसिॽपोरोक्पॽआजि मोबाङ से़ॽआप्टानुमे। हाइखा पापि याॽमिजि नम्नावा ले़टानुमे, तर माहाजिमि पापडे़ॽ हे़निङ मे़ङ्के़क्लो लुनुङ होसियार पेनानिङे। ए़क्साङ्ए पारथना 24 हागो असे़ॽ हे़निङ पापबेॽ सिॽमाबाङ जोगाबा ले़ःॽहेये, मोबा असे़ॽ हे़निङ आप्टिक मे़ॽनिङ्हा चोखोनुङ हाङ्हाङ टोङनुङ खोमिनोॽ महिमामि पोम्बेॽ चिॽखे़हेये। 25 खोनोॽ इक्कोमा निवाहाङ, कानिङ्मि मुक्तिदाङ्बा येसु खिरिस्ट कानिङ्मि परभु ले़ये। खोबेॽ आदर, महिमा, सक्ति, अधिकार याक्लोएबाङ आयुठोकनुङ सानिङ टुडुङ्घे़ॽरो। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.