युहन्ना 17 - याम्फुयेसुमि पारथना 1 इघा खा लुसेॽनुङ येसुडे़ॽ थाङ्सिरिलाम खाङ्मानुङ लुसु, “हे पाबा, हागो बेला लेम्बेटे़, हे़ने़ए़ पसामि महिमा खाङ्मुसे, पसाडे़ॽ हे़ने़ए़ महिमा खाङ्मुहेसुरो लुनुङ खो महिमा पिसे। 2 इन्ढोङ्होङ हे़ने़ॽ खो पिबॽआ चोप याॽमिजि खोसे़ॽ ए़ॽसिमे हिङ्मवा पिहेसुजिरो लुनुङ चोप याॽमिजिसोक्पेॽ खो अधिकार पिटुए। 3 ए़ॽसिमे हिङ्मवा लुबॽआ चाहिँ हे़न इक्कोरेॽ चाइबमा निवाहाङ लुनुङ लेमा, मोबा हे़ने़ॽ पाङ्बॽआ येसु खिरिस्ट लेमानोॽ ले़ये। 4 हे़ने़ॽ का जिम्मा पिबॽआ योम्बोक येॽनुङ हे़ने़ए़ निङ मक्खाम्डेमबेॽ महिमित टोङ्इटुङे। 5 हागो हे पाबा, मक्खाम्डेममि सिरिस्टि लिमा याक्लो हे़न्नुङ टुमाबेॽ कानुङ महिमानोॽ हे़ने़ए़ पोम्बेॽ टुमाबेॽ का पिमा। 6 “हे़ने़ॽ का पिबॽआ मक्खाम्डेमबेॽहा याॽमिजि के़ॽ माहाजि हे़ने़ए़ टुम्बेॽ नुरोॽ इःॽपेॽटुङ्हाजि। माहाजि हे़ने़हाजिनोॽ ले़टामे मोबा हे़ने़ॽ माहाजि का पिसा। माहाजिडे़ॽ हे़ने़ए़ बचन पालना ले़ए़टुजे। 7 काबेॽ टुहा चोप खा हे़ने़ॽनोॽ पिबॽआ लुनुङ हागो खोजिडे़ॽ लेबेटुजे। 8 इन्ढोङ्होङ हे़ने़ॽ का पिबॽआ सिक्छेनोॽ के़ॽ खोजि पिटुङ्हाजि, मोबा मो सिक्छेबेॽ खोजिडे़ॽ बिस्वास ले़ए़टुजे। का चइबानोॽ हे़नबाङ लेम्बॽआ लुनुङ खोजिडे़ॽ लेटुजे, मोबा हे़ने़ॽनोॽ का पाङ्बॽआ लुनुङ खोजिडे़ॽ बिस्वास ले़ए़टुजे। 9 “के़ॽ माहाजिमि लागि पारथना ले़ःॽमे़ॽनिङ्सिनुङे, मक्खाम्डेमबेॽहा चोप याॽमिजिमि लागिगो ने़ॽनि, तर हे़ने़ॽ का पिबॽआ याॽमिजिमि लागिरेॽ ले़नुङे। इन्ढोङ्होङ माहाजि हे़ने़हाजि ले़म्मे। 10 कानुङ टुहा चोप हे़ने़हानोॽ ले़ये, हे़ने़हा चोप के़हानोॽ ले़हा मोबा के़हा महिमा माहाजिबेॽ खाङ्मुटुङ्हा। 11 हागो का हे़नबेॽ आप्मे़ॽनिङ्सिङे। का बेॽलो मक्खाम्डेमबेॽ पेङ्ङानि, तर इघाजिगो मक्खाम्डेमबेॽनोॽ पेङ्इम्मे। पाबा हे़न्नुङ का इक्को लिडिडोॽ हे़ने़ॽ का पिबॽआ हे़ने़हा याॽमिजिसो इक्को निवानुङ्हाजि लिमिरो लुनुङ हे़ने़ए़ निङ्मि सक्तिडे़ॽ जोगा ले़टाजे। मो निङ हे़ने़ॽ का पिबॽआ ले़टे़। 12 का खोजिनुङ टुसिङारो के़ॽ हे़ने़ॽ पिबॽआ हे़ने़ए़ निङ्बेॽ खोजि जोगा ले़टुङ। माहाजिबेॽ नासि लिमानोॽ खडे़ याॽमिबाङ हाइखाजि असासो नासि मे़लिमेॽटुङ्जिङ। इगोगो धारमिक नेॽचिराबेॽ साप्पॽआ खा पुरा लिमा खडे़। 13 “तर हागो का हे़ने़ए़म्बेॽ के़ॽमे़ॽनिङ्सिङे। मोबा माहाजिमि निवा के़ए़ हाङ्हाङ्डे़ॽ टिबुरो लुनुङ के़ॽ इघा खा मक्खाम्डेमबेॽ का टुमाबेॽनोॽ लुमे़ॽनिङ्सिनुङे। 14 के़ॽ हे़ने़हा बचन खोजि पिटुङ्हाजि, तर खोजिसो काडोक्नोॽ मक्खाम्डेमबेॽहा याॽमिजि ने़ॽनिहाजि मोडोगे़ॽ मक्खाम्डेमबेॽहा याॽमिजिडे़ॽ खोजिसो सिॽचोन्डुजे। 15 माहाजि मक्खाम्डेमबाङ लाघे़ॽटे लुनुङ्गो बिन्ति ले़ःॽटुङ्नि, तर खोजि दुस्टा सैतानबाङ जोगा ले़टे लुनुङे। 16 का मक्खाम्डेमबेॽए ने़ॽनि, मोडोक्नोॽ खोजिसो इगो मक्खाम्डेमबेॽहाजि ने़ॽनिहाजि। 17 हे़ने़ए़ बचन चाइबमा ले़ये, मोडोगे़ॽ चाइबमा बचनबेॽ खोजि पबित्रा टोक्साजे। 18 हे़ने़ॽ का मक्खाम्डेमबेॽ पाङ्बॽआडोक्नोॽ के़ॽसो खोजि मक्खाम्डेमबेॽ पाङ्इटुङ्हाजि। 19 मोबा हे़ने़ए़ चाइबमा बचनडे़ॽ खोजि पबित्रा लिहेमिरो लुनुङ के़ॽ खोजिमि लागि के़ए़ हिङ्मवा बलिदान पिनुङे़। 20 “का इघाजिमि लागिरेॽनोॽ पारथना ले़टुङ्नि, तर इघाजिडे़ॽ खेम्बॽआ बचन खेम्नुङ काबेॽ बिस्वास ले़ःॽखुबाजिमि लागिसो पारथना ले़नुङे। 21 माहाजि चोप इक्को निवा लिमिरो लुनुङ बिन्ति ले़न्ने़। हे पाबा, का हे़नबेॽनुङ, हे़न काबेॽ टुनुङ कानिङ इक्को लिडिडोॽ, खोजिसो कानिङ्बेॽ टुनुङ इक्कोनोॽ लिमिरो। मोबा हे़ने़ॽनोॽ का इगो मक्खाम्डेमबेॽ पाङ्इटिङे लुनुङ मक्खाम्डेमबेॽहा याॽमिजिडे़ॽसो बिस्वास ले़टुजिरो। 22 कानिङ इक्कोनोॽ लिडिडोक्नोॽ खोजिसो इक्कोनोॽ लिमिरो लुनुङ हे़ने़ॽ का पिबॽआ महिमानोॽ के़ॽसो खोजि पिटुङ्हाजि। 23 का माहाजिबेॽ मोबा हे़न काबेॽ टुङे, मोडोक्नोॽ माहाजिसो चोप इक्को लिहेमिरो। इगो खाबाङ्नोॽ हे़ने़ॽ का इगो मक्खाम्डेमबेॽ पाङ्इटे़नुङ हे़ने़ॽ का नम्नम ले़ःॽटिडोक्नोॽ खोजिसो नम्नम ले़न्डुए लुनुङ मक्खाम्डेमबेॽहा याॽमिजिडे़ॽ लेसुजिरो। 24 “पाबा, के़ॽ मिॽइनुङे, हे़ने़ॽ का पिबॽआजि कानुङ्नोॽ सोरि टुमिरो, मोबा हे़ने़ॽ का पिबॽआ के़ए़ महिमा खोजिडे़ॽ खाङ्डोक्टुजिरो। मो महिमा चाहिँ मक्खाम्डेम सिरिस्टि लिमा याक्लोएबाङ्नोॽ हे़ने़ॽ का नम्नम ले़ःॽपॽआसे़ॽ पिबॽआ ले़टे़। 25 “हे धारमिक पाबा, मक्खाम्डेमबेॽहा याॽमिजिडे़ॽ हे़न लेमिनिबा, तर के़ॽ हे़न लेन्ने़। मोबा हे़ने़ॽ का पाङ्बॽआ लुनुङ इघा चोङ्साजिडे़ॽ लेन्डुजे। 26 हे़ने़ॽ का ले़ःॽपॽआ नम्नम इघाजिबेॽ टुरो मोबा का खोजिनुङ सानिङ टुडोक्मा लुनुङ हे़ने़ए़ निङ इघाजि के़ॽ लेमेॽटुङ्जि मोबा हागोसो सानिङ लेमाराप्मिनुङ्हाजि।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.