युहन्ना 10 - याम्फुनुबा गोठ्ला 1 येसुडे़ॽ लुसुजि, “सामु गोठाबेॽ ए़ङ्गुवालामबाङ पे़खे़ॽखुबा चाहिँ खुसुबाङ्नुङ डाकु ले़ये। 2 चाइबमा गोठ्लागो राम्बडेमबाङ होङ्सिॽयु पे़खे़ये। 3 राम्बडेमबेॽ पेङ्घुबाडे़ॽ खोमि लागि राम्बडेम हेङ्इन्डुएनुङ सामुजिडे़ॽ टाङ्बामि गोठ्लामि सेम्ला लेन्डुजे, मोबा गोठ्लाडे़ॽ टाङ्बामि सामुजिमि निङ्बाङ के़न्डुजे, मोबा माहाजि पाखे़ॽयु चिक्खे़न्डुजे। 4 खोसे़ॽ टाङ्बामि चोप सामुजि पाखे़ॽयु आप्मेन्डुजे मोबा गोठ्ला चाहिँ सामुजिमि पोम्बेॽ पोम्बेॽ राम्इये, सामुजि खोमि ए़ङ्गुवा ए़ङ्गुवा खे़ए़म्मे, इन्ढोङ्होङ माहा सामुजिडे़ॽ खोजिमि गोठ्लामि सेम्ला लेन्डुजे। 5 तर मे़लेबॽआ याॽमिजि ए़ङ्गुवा ए़ङ्गुवा टिक्सुजिने, बोरु सामुजि चिःॽखे़म्मे, इन्ढोङ्होङ खोमि सेम्ला लेसुजिने।” 6 येसुडे़ॽ इडोॽ खानवाबेॽ लुसु, तर खोसे़ॽ लुबॽआ इगो खानवा माहाजिडे़ॽ मे़लेसुजि। चाइबमा राम्बडेम 7 मोडोगे़ॽ येसुडे़ॽ माहाजि फेरि लुसुजि, “चइबानोॽ के़ॽ हे़निङ लुनिम्ने, सामुजि गोठाहोङ्बेॽ पे़खे़ॽठाम राम्बडेम कानोॽ ले़ङे। 8 काबाङ याक्लो लेङ्घुबाजि चोप खुसुबाङ्नुङ डाकुजि ले़म्मे, तर सामुजिडे़ॽ माहाजिमि खा मे़ङ्खेप्सुजि। 9 गोठाबेॽ पे़खे़ॽठाम राम्बडेम कानोॽ ले़ङे, काबाङ होङ्सिॽयु खे़ॽखुबाजि चोप हिङ्इम्मे, मोबा खोजि होङ्सिॽयु पे़खे़म्मेनुङ पाखे़ॽयु आप्मिम्मे मोबा खरकाबेॽ चरबा लिडोक्इम्मे। 10 खुसुबाङ्गो खुसिॽ, सेॽनेसिनुङ नास ले़ःॽसिरेॽ लेङ्इये। तर कागो माहाजिडे़ॽ हिङ्मवा चुप्टुजिरो, मोसो बेॽलोनोॽ चुप्टुजिरो लुनुङ लेस्सिङा। येसु चाइबमा नुबा गोठ्ला 11 “नुबा गोठ्ला कानोॽ ले़ङे। चाइबानोक्मा नुबा गोठ्लाडे़ॽ खोमि सामुजिमि लागि सिमासो पोरोक्इये। 12 तर सामु कुसिॽ युङ्बॽआ गोठ्ला चाहिँ एभाजि लेम्बॽआ खाङ्डोक्टुहोङ सामुजि याःॽयानुङ चिःॽपेये। इन्ढोङ्होङ माहा सामु खोमि ने़ॽनिहाजि। मोबा एभाजिडे़ॽ सामुजि हाम्बेॽको हाम्बेॽ यिक्पेन्डुजे। 13 खो नमयाक पिनुङ युङ्बॽआ याॽमि ले़ये, खोसे़ॽ सामुजिमि ले़ख्खो ले़टुजिनि। मोडोगे़ॽ खो चिःॽखे़ये। 14 “नुबा गोठ्ला का ले़ङे, के़ॽ काङ्मि सामुजि लेनुङ्हाजि, मोबा के़हा सामुजिडे़ॽसो का लेम्मे। 15 “काङ्मि पाबाडे़ॽ का लुडिडोॽ के़ॽ काङ्मि पाबा लेनुङे़, मोबा काङ्मि सामुजिमि लागि के़ए़ हिङ्मवा पिमा सिॽहोङ्सो के़ॽ पिनुङे़। 16 के़हा हाइखासो सामुजि टुम्मे, माहाजि इगो गोठाबेॽहाजि ने़ॽनिहाजि। माहाजिसो के़ॽ लाःआप्मा खे़म्मे, माहाजिडे़ॽ काङ्मि सेम्ला खेम्इन्डुजे मोबा चोप इक्कोनोॽ बगाल लिम्मेनुङ माहाजिमि गोठ्ला इक्कोनोॽ लिये। 17 “काङ्मि पाबाडे़ॽ का नम्नम ले़ङे, इन्ढोङ्होङ काङ्मि हिङ्मवा पिनुङे़ मोबा फेरि लाप्मिनुङे। 18 असे़ॽसो काङ्मि हिङ्मवा काबाङ नाप्खे़ॽहेसुनि, तर के़ॽ काङ्दाङ्बे़ॽ काङ्मि हिङ्मवा पिनुङे़। काङ्मि हिङ्मवा हाइखाजिमि लागि पिमे हक कानुङ टुये, मोबा फेरि लामे अधिकारसो कानुङ टुये। काङ्मि पाबाडे़ॽ पिबॽआ आग्या इगोनोॽ ले़ये।” 19 इगो बचन खेम्नुङ यहुदि डायोङ्बाजिमि रुम्बेॽ फेरि खा मे़न्टोक्सा। 20 माहाजिबेॽ बेॽलोजिडे़ॽ लुसुजे, “इगो याॽमि मङे़ॽमा चापडे़ॽ राःप्मिटुए, इगो नाङ्बोॽइटे़, हे़निङे़ॽ इगोमि खा इन्ढोङ खेम्इन्डानुमे ?” 21 तर आढाजिडे़ॽ लुसुजे, “मङे़ॽमा चापडे़ॽ राःप्पॽआ याॽमिडे़ॽ इडोक्मा खा इःसुनिबा। इमा मङे़ॽमा चापडे़ॽ राःप्पॽआ याॽमिडे़ॽसो टोक्माबेॽनोॽ मिक मे़ए़ॽखुबा याॽमिमि मिक ए़ॽमेॽहेन्डुए ?” यहुदि अगुवाजिडे़ॽ येसुबेॽ बिस्वास मे़ले़ःॽपॽआ 22 यरुसलेमबेॽए मन्दिर निवाहाङ पियेॽमे चाड ले़टे़। मो बेला चुङ महिना ले़टे़। 23 येसु मन्दिरमि सोलोमन लुमे दलानबेॽ वाइमे़ॽनिङ्सिडा। 24 यहुदिजि येसुमि खिरिरि सुम्नुङ लुसुजि, “हे़ने़ॽ इन्डोॽरोडे कानिङ फोःॽसेये ? हे़न्नोॽ मुक्ति पिघुबा खिरिस्ट ले़येहोङ लो कानिङ छे़ङ्गै लुबेॽमा।” 25 येसुडे़ॽ माहाजि लुसुजि, “के़ॽ असिॽनोॽ हे़निङ लुबेनिम्ने़, तर हे़निङे़ॽ बिस्वास ले़टानुम्नि। निवाहाङ पाबामि अधिकारबाङ ले़ःॽपॽआ खरिमा योम्बोकडे़ॽनोॽ का असा ले़ङे लुमे खा लुन्डुए। 26 तर हे़निङ के़हा सामुजि ने़ॽनिहाजि, मोडोगे़ॽ हे़निङे़ॽ का बिस्वास ले़टानिङ्ने। 27 के़हा सामुजिडे़ॽ काङ्मि सेम्ला खेम्इन्डुजे, के़ॽ खोजि लेनुङ्हाजि। मोबा माहाजि कानुङ आप्मिम्मे। 28 माहाजि के़ॽ ए़ॽसिमे हिङ्मवा पिनुङ्हाजि। मोबा खोजि इन्डोक्पेॽसो नासि लिमिनेनुङ असे़ॽसो काबाङ खोजि ङाप्खे़ॽहेसुजिने। 29 माहाजि काङ्मि पाबाडे़ॽ का पिटिङे, खो चोप्पाङ बेॽए ले़ये, पाबामि हुकबाङ्गो छना असे़ॽसो माहाजि ङाप्खे़ॽहेसुजिने। 30 पाबानुङ का इक्कोनोॽ ले़न्जिङे।” 31 येसुमि खा खेम्नुङ यहुदिजिडे़ॽ फेरिसो खो रुङ्गोॽवाडे़ॽ फे़ङ्नेमा योगुजि। 32 येसुडे़ॽ माहाजि लुसुजि, “काङ्मि पाबाबाङ्हा बेॽलो नुबा योम्बोक हे़निङ्मि पोम्बेॽ ले़ःॽनुङ खाङ्मुसुङ, माहा योम्बोकपेॽ हाम्बे योम्बोकमि साटोबेॽ का रुङ्गोॽवाडे़ॽ फे़ङ्मा योॽइन्डानिङे ?” 33 माहा यहुदिजिडे़ॽ येसु लुसुजि, “कानिङे़ॽ हे़ने़हा नुबा योम्बोकमि लागि रुङ्गोॽवाडे़ॽ फे़ङ्मा योक्पॽआ ने़ॽनि। तर हे़ने़ॽ आमटाङ्बा का निवाहाङ लुनुङ खोमि बेजेत ले़ःॽपॽआसे़ॽ रुङ्गोॽवाडे़ॽ फे़ङ्मा योक्पॽआ। इन्ढोङ्होङ हे़न याॽमि लिनुङ्सो टाङ्बा निवाहाङ ले़ङे काये।” 34 येसुडे़ॽ माहाजि लुसुजि, “इमा हे़निङ्मि यहुदि धारमिक नियमबेॽ इडोॽ साप्पॽआ ले़ये ने़ॽने ? ‘के़ॽ लुसुङ, हे़निङ देउताजि ले़न्डानिङे’ इडोॽ साप्पॽआ ले़ये ने़ॽनेन्डे ? 35 असाबेॽ निवाहाङ्मि बचन लेस्सा, माहाजि देउताजि लिम्मेहोङ (धारमिक नेॽचिराबेॽ मे़ॽनोक्हा खा माॽआहा)। 36 तर का चाहिँ पाबाडे़ॽ पबित्रा टोङ्नुङ खोमि योम्बोक पुरा ले़ःॽसिॽ इगो मक्खाम्डेमबेॽ पाङ्इटिङे। मोबा ‘का निवाहाङ्मि पसा ले़ङे’ लुमाबेॽ इन्डोक्टे निवाहाङ सिःक्चाबॽआ लुन्डानिङे ? 37 लो के़ॽ ले़ःॽपॽआ योम्बोक काङ्मि पाबामि ने़ॽनि लुन्डानुमहोङ काबेॽ बिस्वास ए़ले़टानुमे। 38 तर काबेॽ बिस्वास ले़टानुम्नेहोङ्सो के़ॽ ले़ःॽपॽआ योम्बोक खाङ्नुङ्गो बिस्वास ले़टानुमे। माहा योम्बोकबाङ्सो पाबा काबेॽ टुयेनुङ का पाबाबेॽ टुङे लुमे खा हे़निङे़ॽ लेहेन्डानुमे।” 39 इडोक्मा खा खेम्नुङ फेरि येसु राःप्मा योगुजि, तर खो माहाजिमि हुकबाङ लेक्खडा। 40 मोबा येसु फेरि याक्लो युहन्नाडे़ॽ बप्तिस्मा पिढाम ठाउँ यरदन होङ्मा मे़ॽए़रेङ खडा, मोबा खो मोबेॽनोॽ पेना। 41 मोबेॽ बेॽलो याॽमिजि लेस्सामि। माहाजि खोजि टाङ्बा इडोॽ कासामि, “युहन्नाडे़ॽ खरिहा योम्बोकको इमाङ्सो मे़ले़टु, तर इगो याॽमिमि टुम्बेॽ खोसे़ॽ लुबॽआ खा चाहिँ चइबानोॽ ले़येले़।” 42 मोबा मोबेॽ बेॽलो याॽमिजिडे़ॽ खोबेॽ बिस्वास ले़टुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.