याकुब 5 - याम्फुटाङायोङ्बाजि चेतावनि 1 टाङायोङ्बा याॽमिजि! खेप्सानुमे, हे़निङ्मि हिङ्मवाबेॽ लेङ्इहा दुःखनुङ खेः मिॽनुङ हाःप्साङ बिलाप ले़टानिङे। 2 हे़निङ्मि सक्चाङ योम्बोक मे़ॽनिङ्हा लिघे़टहा। हे़निङ्मि चेॽ पुजिगे़ॽ चोबेटुहा। 3 हे़निङ्मि सुनानुङ सिसे़ङ कसडे़ॽ चोबेटुहा। माहा कसनोॽ हे़निङ्मि बिरोधबेॽ साक्छि लिहानुङ मिडे़ॽ हिॽटिडोक्नोॽ मोसे़ॽ हे़निङ्मि हिङा नासि ले़न्डुहा। हे़निङे़ॽ ए़क्साङ्ए याकपेॽ साक्छि पिमामि सक्चाङ सुम्इटानुमे। 4 हे़निङ्मि रोपाबेॽ योम्बोक ले़ःॽखुबाजि हे़निङे़ॽ पिमे नमयाक मे़म्पिडिॽटानुमे। माहाजिमि बिलौना खेप्सानुमे। माहा योम्बोक ले़ःॽखुबाजिमि बिलौना चोप्पाङ सक्तिदाङ्बा परमपरभु निवाहाङ्मि ने़ए़कपेॽ रुॽइटुहा। 5 हे़निङे़ॽ इगो मक्खाम्डेमबेॽ टाङ्बे़ॽ चामा मिप्पॽआ चामाया चानुङ ले़ःॽमा मिप्पॽआ चोप मङे़हा योम्बोक ले़ःॽमानुङ भोग पिमामि जिवात चायुङ्डिडोॽ टाङ्बा चायुङ्मे़ॽनिङ्सिन्डानुमे। 6 हे़निङ बिरोधनोॽ मे़ले़ःॽखुबाजि आप्टिक टिनुङ हे़निङे़ॽ सेॽनेसानुम। हुङ्जाहेमेनुङ पारथना ले़ःॽमे 7 मोडोगे़ॽ वावानिसानुङ नानुसाजि, परभु मे़लेङ्रो हुङ्जाहेमे लिनुङ पेनानिङे। खाक्सानुमे खेति ले़ःॽखुबे़ॽ अन्न चे़ःॽमामि इन्डोक हुङ्इन्डुए बरखानुङ हिउँदोमि वारि आङ्इन्डुए। 8 हे़निङ्सो मोडोक्नोॽ हुङ्जाहेघुबा लिनुङ पेनानिङे। टाङ्बे़ॽ ले़ःॽपॽआ आसाबेॽ बोलियो लिसानिङे परभु लेम्मे याक के़क्पेॽनोॽ टुये। 9 वावानिसानुङ नानुसाजि इक्कोसे़ॽ हाइकोमि बिरोधबेॽ कुनुक कुनुक ए़क्कासानिङे। आक्टोॽ ले़टानुमहोङ हे़निङ आप्टिकनुङ्मा लिन्डानिङे। खाक्सानुमे, न्याय ले़ःॽखुबा के़क्पेॽनोॽ लेम्बेटे़। 10 वावानिसानुङ नानुसाजि, खेः अक्सानुमेनुङ हुङ्जाहेघुबा लिसानिङे, मोमि लागि परभुमि निङ्बेॽ सिक्छे पिघुबा अगमबक्ताजि खाक्सानुमे। 11 खाक्सानुमे, हुङ्जाहेघुबाजि ओहाक लुन्डुङ्मे। हे़निङे़ॽ अय्युबडे़ॽ ले़ःॽपॽआ हुङ्जाहेमे खामि टुम्बेॽ खेम्इटानुमे, मोबा परभुडे़ॽ खो आसिस पिबॽआ खासो लेन्डानुमे। परभु नम्नावानुङ्मा ले़ये। 12 के़हा वावानिसानुङ नानुसाजि, चोप थोकबाङ याक्लो थाङ्सिरिमि, मक्खाम्डेममि अथबा हाइखा इमाङ खामि निङ्बेॽ किरिया ए़हे़क्मे, तर हे़निङे़ॽ चइबाहोङ चाइबमा लुमे़, ने़ॽनिहोङ ने़ॽनि लुमे। मोडोॽ ले़टानुमहोङ निवाहाङ्डे़ॽ हे़निङ आप्टिक टिनिबा। 13 इमा हे़निङ्बेॽ असा इमाङ खाँचो सिॽइटे़होङ, खोसे़ॽ पारथना ले़टुरो, मोबा असा हाङ्हाङ्बेॽ टुये खोसे़ॽ निवाहाङ्मि ओहाङ ले़ःॽसाङ सेम इःसुरो। 14 हे़निङ्मि रुम्बेॽ असा टुॽइये ? खोसे़ॽ मन्डलिबेॽहा अगुवाजि के़डुजिरो। मोबा माहाजिडे़ॽ परभुमि निङ्बेॽ केवाडे़ॽ अभिसेक ले़ःॽनुङ मोमि लागि पारथना ले़टुजिरो। 15 चाइबमा बिस्वासनुङ ले़ःॽपॽआ पारथनाडे़ॽ टुक्खुबा हिङ्मेन्डुए, मोबा परभुडे़ॽ नुबोॽइये। मोसे़ॽ पाप ले़ःॽपॽआ टुहोङ्सो खोसे़ॽ आम्लाङ चुप्मिन्डुए। 16 मोडोगे़ॽ हे़निङ्मि रुम्बेॽ इक्कोसे़ॽ हाइकोमि बिरोधबेॽ ले़ःॽपॽआ पाप टुहोङ आम्लाङ ङाःक्खुसे़ॽचुसानिङे। हे़निङ नुबुक्मामि लागि इक्कोसे़ॽ हाइकोमि लागि पारथना ले़टानुमे। धारमिक याॽमिमि पारथना सक्तिनुङ्मा ले़ये, मोबाङ बेॽए योम्बोक लिहेये। 17 एलियासो कानिङ्डोॽमानोॽ याॽमि ले़टे़। खोसे़ॽ वारि ए़लेस्से लुनुङ भक्तिनुङ्मा पारथना ले़टु, मोबा सुम निङ चुक्चि महिना मक्खाम्डेमबेॽ वारि मे़लेस्सा। 18 फेरि खोसे़ॽ पारथना ले़टु मोबा वारि लेस्सा, मोबा भुमिबेॽ चरि के़ॽनुङ अन्न किक्सा। 19 के़हा वावानिसानुङ नानुसाजि, हे़निङ्बेॽ कोहि याॽमि चाइबमा सिक्छेबाङ हाइको सिक्छेलाम खे़ॽहोङ खो टेआप्टानुमे। 20 खोसे़ॽ लेसुरो, असे़ॽ इक्को याॽमि मोमि पापि योम्बोकबाङ टेआप्मिन्डुए मो याॽमिडे़ॽ मो याॽमि सिमाबाङ हिङ्माराप्मिटुए, मोबा खोमि बेॽलो पाप आम्लाङ लिहा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.