याकुब 4 - याम्फुनिवाहाङमि लङ्गाम 1 हे़निङ्मि रुम्बेॽ खिमाचुमानुङ काक्मा हाम्बाङ लेङ्इहा ? इमा इघा चोप खालहा खागो हे़निङ्मि निवाहोङ्बेॽहा मङे़हा खामि मोजमज्जामि वाइॽमे़ॽ लेम्बॽआ ने़ॽनिबा ? 2 हे़निङे़ॽ इमाङ इमाङ चुप्मा मिॽइन्डानुमे, तर माहा चुप्टानुम्नि। हे़निङ मो खा चुप्मामि लागि याॽमि सेॽएन्डानुमे, लोभ ले़न्डानुम, खिमानुङ चुमा ले़न्डानुम तर हे़निङे़ॽ इमाङ्सो चुप्टानुम्नि, इन्ढोङ्होङ हे़निङे़ॽ निवाहाङ्नुङ ङागानुम्नि। 3 हे़निङे़ॽ ङाःइन्डाडानुमे तर चुप्टानुम्नि, इन्ढोङ्होङ टाङ्बामि मङे़ॽमा निवाडे़ॽ ङाःइन्डानुमे। 4 होउ बेभिचार ले़ःॽखुबा याॽमिजि, मक्खाम्डेमबेॽहा थोकनुङ लङ्गाम ले़ःॽमा लुबॽआ चाहिँ, निवाहाङ्नुङ सतुर लिबॽआ लुमे खा हे़निङे़ॽ लेसानुम्ने ? मोडोगे़ॽ असे़ॽ मक्खाम्डेमबेॽहा मङे़हा योम्बोकनुङ लङ्गाम ले़न्डुए, मोसे़ॽ खोमटाङ्बा निवाहाङ्मि सतुर लिये। 5 “निवाहाङ्डे़ॽ कानिङ्बेॽ युङ्बेॽपॽआ होङ्निवामि लागि सारोनोॽ चेजेवा ले़न्डुए” लुमे खा धारमिक नेॽचिराबेॽ इमा मे़नोॽ साप्पॽआ ए़मिडानुमे। 6 तर निवाहाङ्डे़ॽ हागोसो बेॽलो अनुग्रहा ले़ये। मोडोगे़ॽ पबित्रा धरमिक नेॽचिराबेॽ इडोॽ साप्पॽआ ले़ये, “निवाहाङ्डे़ॽ काङायोङ्बाजिमि बिरोध ले़न्डुए, तर ए़डे़म्मा लिघुबाजि अनुग्रहा ले़न्डुजे।” 7 मोडोगे़ॽ टाङ्बा निवाहाङ्मि अधिनबेॽ युक्सानुमे, सैतानमि बिरोध ले़टानुमे, मोबा मो हे़निङ्बाङ चिॽखे़ये। 8 हे़निङ निवाहाङ्मि के़क्पेॽ आबानिङे मोबा निवाहाङ्सो हे़निङ्मि के़क्पेॽ आप्मिये। पापिजि हे़निङ्मि निवा चोखो टोक्सानुमे। कप्टि याॽमिजि हे़निङ्मि निवा सुद्ध टोक्सानुमे। 9 हे़निङ दुःखि लिसानिङे, सोक ले़टानिङेनुङ हाःबानिङे। हे़निङ्मि यिचामा सोकपेॽ, हे़निङ्मि साप्थाङ्मा दुःखबेॽ फेङ्घे़ॽलो। 10 परभुमि पोम्बेॽ टाङ्बा ए़डे़म्मा टोक्सानुमे, मोबा खोसे़ॽ हे़निङ मिन्डु ठेॽपुक्इये। निसा ए़इःजामे 11 वावानिसाजि, हे़निङ असे़ॽसो इक्कोसे़ॽ हाइकोमि बिरोधबेॽ मङे़ॽमा खा ए़इःसानुमे। बिस्वासि निसामि बिरोधबेॽ मङे़ॽमा खा इःघुबे़ॽ अथबा बिस्वासि निसा आप्टिक टिघुबे़ॽ निवाहाङ्मि नियममि बिरोधबेॽ यामुयेनुङ मोसे़ॽ मो नियम आप्टिक टिन्डुए। हे़ने़ॽ नियममि बिरोध ले़टुहोङ हे़न नियममि पालना ले़ःॽखु ने़ॽनि तर नियममि न्याय ले़ःॽखु लिये। 12 निवाहाङ्रेॽनोॽ नियम पिघुबानुङ न्याय ले़ःॽखुबा ले़ये। हिङ्मेॽखुबानुङ नासि ले़ःॽहेघुबा खोरेॽ ले़ये। तर टाङ्बामि पेन्लागाम आप्टिक टिघुबा हे़न असाडे ? काङायोङ्बा ए़ॽलिमे़ 13 “वागिया सिङ्आ कानिङ इक्को सहर खे़ॽनुङ मोबेॽ इक्निङ पेन्नुङ बेपार ले़ःॽनुङ बेॽलो याङ्सरावा टोङ्मा” लुनुङ काघुबाजिडे़ॽ के़ए़ खा खेप्सानुमे। 14 वागिया इमाङ लिये हे़निङे़ॽ लेसानुम्नि। हे़निङ्मि हिङ्मवा इमाङ्डे ? हे़निङ्गो इॽछोॽ खाङ्मुये मोबा मे़खे़ये मे़क्खुडोॽरेॽ ले़न्डानिङे। 15 हे़निङे़ॽको इडोॽ लुमा खे़ये, “निवाहाङ्डे़ॽ नम्नम ले़ःॽनुङ हिङ्रिक युक्साहोङ कानिङ हिङ्नुङ इडोक्मा योम्बोक ले़ःॽमा मोडोक्मा योम्बोक ले़ःॽमा।” 16 तर हे़निङ्गो सेखि ले़न्डानिङे। इडोॽ सेखि ले़ःॽमा नुबा ने़ॽनि। 17 मोडोगे़ॽ असे़ॽ भलाइ ले़ःॽमा खे़ये लुमे खा लेनुङ्सो ले़टुनिबा, मोसे़ॽ पाप ले़न्डुए। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.