याकुब 3 - याम्फुटाङ्बामि लेम अधिनबेॽ युङ्मे 1 के़हा वावानिसानुङ नानुसाजि, हे़निङ बेॽलो जना सिक्छे इःक्खुबा लिमामि बोल ए़लिसानिङे। इन्ढोङ्होङ हे़निङे़ॽ लेन्डानुमे, न्यायमि यिडे़ॽ इःॽखुबाजिमि छना बेॽलो नम्नावा मे़ॽनिङ न्याय लिये। 2 इन्ढोङ्होङ कानिङ चोबे़ॽ बेॽलो बिरोङ ले़न्डुङ्मा, तर हाम्बे याॽमिडे़ॽ टाङ्बे़ॽ इःबॽआ खाबेॽ गल्ति ले़टुनिबा मो याॽमि परिपक्कामा ले़येनुङ मोसे़ॽ टाङ्बामि हिङा अधिनबेॽ युङ्हेन्डुए। 3 टाङ्बे़ॽ मिॽपॽआ ठाउँबेॽ राम्मेॽमामि लागि घोडामि याबुकबेॽ लगाम टिनुङ घोडा लाघे़ॽमा मिॽपॽआ ठाउँबेॽ लाघे़ॽहेये। 4 मिॽखाक्सानुमे, बेॽहा बेॽहा योङा जाहाज बेॽए हिॽवाबामि बलबेॽ राम्इम्मे, माहाजि बेॽहा ले़म्मिरोसो इक्को ए़डे़म्मा करनधारमि सहायताडे़ॽ जहाज खिःक्खुबाडे़ॽ खोसे़ॽ मिॽपॽआलाम लाघे़ॽहेन्डुए। 5 याॽमिमि लेमसो इडोक्नोॽ ले़ये। इडोॽ ए़डे़म्मा ले़ःॽनुङ्सो बेॽहा बेॽहा काङायोङ्बा खा इःन्डुहा। इक्को ए़डे़म्मा मिमि मिजुॽवाडे़ॽ बेॽहा बेॽहा नाम्भुङ्ला हिप्पेन्डुहा। 6 याॽमिमि लेमसो मिडोॽमानोॽ ले़ये। कानिङ्मि हिङामि अङ्गजिबेॽ इगो लेम चाहिँ चोप्पाङ दुस्ट ले़ये। इगोसे़ॽ हिङानोॽ असुद्ध टोङ्इन्डुएनुङ हिङ्मवाबेॽ मि हाङ्डिन्डुए मोबा खेःलोकमि मिबेॽ सिॽइये। 7 याॽमिडे़ॽ मक्खाम्डेमबेॽहा चोप खालहा जन्तुजि, पेरसे़ॽवा से़ॽखु जन्तुजिनुङ माहोङ्माबेॽहा जिबजन्तुजि अधिनबेॽ युङ्हेन्डुजे मोबा याॽमिडे़ॽ अधिनबेॽ युङ्इटुजे। 8 तर लेम चाहिँ याॽमिडे़ॽ अधिनबेॽ मे़युङ्हेडिॽ। इगो किस्सिमारो सिक्चानुङ्मा ले़येनुङ इगो अधिनबेॽ युङ्हेनिबा। 9 मोबा कानिङे़ॽ इगो लेमडे़ॽनोॽ परभुनुङ पाबामि ओहाक ले़न्डुङ्मा, इगो लेमडे़ॽनोॽ निवाहाङ्मि नरिङ्बेॽ सिरिस्टि लिबॽआ याॽमि चापहिन्डुङ्मा। 10 के़हा वावानिसानुङ नानुसाजि, इमा इक्को याबुकबाङ आसिसनुङ चापहिमा पिमा नुबा लिये ? इडोक्को लिमा फे़न्नि। 11 इमा इक्को योङाजाबाङ चानुयेनुङ खिॽइये योङा पिॽहेनिबा। 12 के़हा वावानिसानुङ नानुसाजि, वेॽलाभुमि डाङ्बेॽ जैतुन किङ्निबा, मोबा अङ्गुरमि डाङ्बेॽ वेॽलाभु किङ्निबा। खिॽइये पिमबाङ चानुये योङा पिॽनिबा। थाङ्सिरिबाङ्ए निवा 13 हे़निङ निवादाङ्बानुङ बुजाकि ले़न्डानिङ्होङ हे़निङे़ॽ नुबा चाल चलन मोबा निवादाङ्बानुङ ए़डे़म्मा लिनुङ याॽमिजिमि रुम्बेॽ नुबा योम्बोक ले़ःॽमा खे़ये। 14 तर हे़निङ्मि निवाबेॽ चेजेवानुङ स्वारथा खिमानुङ टाङ्बामि निवामि काङायोङ्बा लिसाङ चाइबमा खा मे़ॽनोक्मा ए़ॽटोक्सानुमे। 15 इडोक्मा निवागो थाङ्सिरिबाङ लेम्बॽआ ने़ॽनिबा, इगोगो मक्खाम्डेमबाङ्नुङ सैतानबाङ लेम्बॽआ निवा ले़ये। 16 इन्ढोङ्होङ चेजेवा निवानुङ टाङ्बामि लागिरेॽ नुबा मिॽखुबा याॽमिजि टुढामबेॽ खिमाचुमानुङ चोप खालहा मङे़हा खा लिहा। 17 तर थाङ्सिरिबाङ्ए निवागो चोखो ले़ये, सान्ति पिघुबा, सोझो, चोपनुङ टोङ्जाये। इडोक्मा निवा नम्नावानुङ्मा, मोबा नुबा योम्बोक ले़ःॽयाङ ले़ये। इडोक्मा निवा कप्टि ले़ःॽनिबानुङ पक्छेपात मे़ॽनिङ्मा ले़ये। 18 सान्ति लाजे़ॽखुबा निवाडे़ॽ चोप याॽमिजिनुङ टोङ्जामे योम्बोक ले़ःॽनुङ धारमिक खामि चा चे़न्डुए। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.