याकुब 2 - याम्फुपक्छेपातमि टुम्बेॽ चेतावनि 1 के़हा वावानिसानुङ नानुसाजि, हे़निङ परभु येसु खिरिस्ट, महिमित परभुबेॽ बिस्वास ले़ःॽखुबाजि लिबॽआसे़ॽ हे़निङे़ॽ असासो पक्छेपात ए़ले़टानुमे। 2 हे़निङ सुम्बॽआ ठाउँबेॽ इक्को टाङायोङ्बा याॽमि सुनामि मुन्रि वे़ःॽमानुङ, नुबा नुबा चेॽ चाङ्मानुङ लेस्सा मोबा हाइको याॽमि चाहिँ थोत्रो चेॽ चाङ्मानुङ इमाङ मे़ॽनिङ्मा लेस्साहोङ, 3 मोडोक्पेॽ मो नुबा चेॽ चाङ्खुबा चाहिँ आदर ले़ःॽनुङ नुबा ठाउँबेॽ के़ःॽनुङ “इगो ठाउँबेॽ पेने” लुन्डानुमे, मोबा मो गरिब चाहिँ “हे़न आक्कोबेॽनोॽ येबे” अथबा “के़ए़ सराङ के़क्पेॽ पेने” लुन्डानुमे। 4 इडोॽ ले़टानुमहोङ्गो हे़निङ टाङ्बामि रुम्बेॽनोॽ पक्छेपात ले़ःॽपॽआनुङ मङे़ॽमा निवानुङ्बा न्याय ले़ःॽखुबा मे़लिसानिङे ? 5 के़हा वावानिसानुङ नानुसाजि खेप्सानुमे, निवाहाङ्डे़ॽ इगो मक्खाम्डेमबेॽहा गरिबजि बिस्वासबेॽ टाङायोङ्बा टोङ्मामि, मो राज्यमि उत्तराधिकारि लिमामि सेङ्इटुजे ने़ॽने ? खोसे़ॽ इगो राज्यनोॽ खो नम्नम ले़ःॽखुबाजि पिनुङ्हाजि लुनुङ चुप्लाङ हे़म्बॽआ ने़ॽनेन्डे ? 6 तर हे़निङे़ॽको माहा गरिबजि हेला ले़टानुम। इमा माहा टाङायोङ्बाजिडे़ॽनोॽ हे़निङ हेला, अत्याचार ले़ःॽनुङ अदालतबेॽ लाघे़म्मे ने़ॽने ? 7 हे़निङे़ॽ पिबॽआ आदरनुङ्मा निवामि बेजेत माहाजिडे़ॽनोॽ मे़ले़टुजेन्डे ? 8 “टाङ्बामि पेन्लागामजि टाङ्बा नम्नम ले़टिडोक्नोॽ नम्नम ले़टानुमे” लुनुङ पबित्रा धारमिक नेॽचिराबेॽ साप्पॽआ निवाहाङ्मि राज्यमि नियमडे़ॽ लुडिडोॽ ले़टानुमहोङ्गो नुबानोॽ लिये। 9 तर हे़निङे़ॽ याॽमिजि पक्छेपात ले़न्डानुमहोङ्गो पाप ले़न्डानुमे, मोबा नियमडे़ॽ लुडिडोॽ मे़ले़ःॽपॽआ आप्टिक सिॽइये। 10 इक्को याॽमिडे़ॽ नियमबेॽहा इक्कोरेॽ खामि टेडिगरिक ले़न्डुहोङ खो चोप नियममि आप्टिकनुङ्मा लिये। 11 इन्ढोङ्होङ “बेभिचार ए़ले़टे” लुघुबाडे़ॽनोॽ “याॽमि ए़सेॽमेसो” लुटे़। इक्को याॽमिडे़ॽ बेभिचार मे़ले़टु तर याॽमि सेडुहोङ खो नियममि आप्टिकनुङ्मा लिये। 12 याॽमि फुक्का ले़ःॽखुबा यहुदि धारमिक नियमडे़ॽ पाको लिबॽआ याॽमिडे़ॽ यामुडिडोॽनुङ ले़टिडोॽ हे़निङे़ॽ ले़टानुमे। 13 इन्ढोङ्होङ याॽमिजि नम्नम मे़ले़ःॽखुबा याॽमि निवाहाङ्डे़ॽसो नम्नम मे़ले़ःॽलेॽ न्याय ले़न्डुए। तर नम्नम ले़ःॽखुबे़ॽ न्याय हेजोन्डुए। बिस्वासनुङ योम्बोक 14 के़ए़ निसाजि, इमा इक्को याॽमिडे़ॽ “के़ॽ बिस्वास ले़नुङे” काये, तर योम्बोकडे़ॽ चाहिँ बिस्वास खाङ्मुसुनिहोङ इमाङ फाइदा लिये ? इमा खोमि बिस्वासडे़ॽ खो हिङ्मेन्डुए ? 15 इक्को याॽमिमि चामा माॽआ, चाङ्मासो माॽआ, 16 तर हे़निङे़ॽ चाहिँ खो लुन्डानुमे, “नुरोॽ सान्तिनुङ खडे, कुहा चाक्से, उक्खरो चासे” तर खो पाप्मिहा खा चाहिँ इमाङ्सो पिसानुम्निहोङ हे़निङ्मि बिस्वासनुङ योम्बोक खोइ ? 17 इडोक्मा योम्बोक मे़ॽनिङ्मा बिस्वासगो सिघे़ॽपॽआ बिस्वास लिये। 18 तर याॽमिडे़ॽ लुन्डुए, “हे़न्नुङ बिस्वास टुये, कानुङ चाहिँ योम्बोक टुहा” लु लु योम्बोक मे़ॽनिङ्मा हे़ने़ए़ बिस्वास खाङ्मुघै, मोबा योम्बोक ले़ःॽनुङ के़हा बिस्वास हे़न खाङ्मुनुङे। 19 निवाहाङ इक्कोरेॽनोॽ टुये लुनुङ हे़ने़ॽ बिस्वास ले़न्डुए, इगो नुबा खा ले़ये। तर मङे़हा चापटे़ॽसो निवाहाङ टुये लुनुङ्गो बिस्वास ले़न्डुए, खो थुर थुर योङ्इये। 20 उम्बरिङ याॽमिजिओ, इमा योम्बोक मे़ॽनिङ्मा बिस्वास इनामा ले़ये लुमे खामि परमान योॽइन्डानुमे ? 21 कानिङ्मि टुबा अब्राहाममि टुम्बेॽ मिॽखाक्सानुमे। खोसे़ॽ टाङ्बामि इक्कोमा पसा इसहाक थानाबेॽ चेॽटिनुङ मो योम्बोकबाङ खो धरमि खाङ्मुबॽआ ने़ॽने ? 22 खोमि बिस्वासनुङ योम्बोक सोरि खाङ्मुनुङ मोबा खोमि योम्बोकबाङ इन्डोक खोमि बिस्वास पुरा लिसा, मो हे़निङे़ॽ खाक्सानुम्ने। 23 पबित्रा धारमिक नेॽचिराबेॽ इडोॽ लुनुङ साप्पॽआ खा पुरा लिसा, “अब्राहामडे़ॽ निवाहाङ्बेॽ बिस्वास ले़टु, मोनोॽ खोमि लागि खो धरमि टोङ्खुबा खा लिसा” मोबा खो निवाहाङ्मि लङ्गाम लिसा। 24 हागो हे़निङे़ॽ लेसानुमे, बिस्वासडे़ॽरेॽनोॽ ने़ॽनि तर खोसे़ॽ ले़ःॽपॽआ योम्बोकबाङ याॽमि धरमि लिये। 25 मोडोक्नोॽ राहाब निङ ले़ःॽखुबा बेस्याडे़ॽसो जासुसि ले़ःॽखुबा इस्राएलिजि नुरोॽ स्वागत ले़ःॽनुङ हाइको रामबाङ पाङ्नुङ जोगा ले़टुजि मोबा खो खोमि योम्बोकबाङ धरमि लिसा। 26 इन्डोॽ हिङा सोःक्मा मे़ॽनिङ सिबॽआ लिये, मोडोक्नोॽ योम्बोक मे़ॽनिङ्मा बिस्वाससो सिबॽआ लिये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.