याकुब 1 - याम्फु1 निवाहाङ्नुङ परभु येसु खिरिस्टमि योम्बोक ले़ःॽखुबा का याकुबबाङ इस्राएलबेॽहा इक्पोङ निच्चि कुलबेॽहा याॽमिजि इगो पत्रा साप्मे़ॽनिङ्सिनुङे, मोबा हे़निङ चोपजिबेॽ काङ्मि सेवायो। 2 निसाजि, हे़निङे़ॽ खाल खालहा खेः आङ्मा सिॽमाबेॽ हे़निङ साप्थाक्सानिङे। 3 इन्ढोङ्होङ हे़निङे़ॽ लेन्डानुमे, हे़निङ्मि बिस्वासमि जाँच लिमाबेॽ मोसे़ॽ हे़निङ खेः आङ्मे सक्ति पिये। 4 तर इमाङ खाबेॽसो मे़याःक्चाघे़ॽखुबाजि, बोलियोनुङ पक्का लिमामि माहा जाँच आङ्साङ इगिॽयु मिॽयु निवा मे़ले़ःॽलेॽ चिनानुमे। 5 हे़निङ असासो निवा पाप्मिहोङ निवाहाङ्नुङ ङागानुमे, मोबा खोसे़ॽ हे़निङ पिये, इन्ढोङ्होङ निवाहाङ चाहिँ मे़सुरके़ॽलेॽ पिघुबा ले़ये। 6 तर ङाःक्माबेॽ सङ्क मे़ले़ःॽलेॽ ङाःक्मा खे़ये। सङ्क ले़ःॽखुबा याॽमिगो हिॽवाबाडे़ॽ किॽयु मिॽयु हिॽटिन्डुए माहोङ्मामि फे़ङ्ले़ॽवाडोॽ ले़ये। 7 मोडोक्हा याॽमिडे़ॽको परभुबाङ इमाङ्सो चुप्टुनिबा। 8 इडोक्मा याॽमि निच्चि निवानुङ्मानुङ इमाङ खाबेॽसो बिस्वास मे़ॽनिङ्मा ले़ये। 9 इमाङ मे़ॽनिङ्हा निसाजि हे़निङ बेॽलो साप्थाक्सानिङे। इन्ढोङ्होङ निवाहाङ्डे़ॽ हे़निङ मान पिये। 10 मोबा टाङायोङ्बाजि इमाङ मे़ॽनिङ्हा लिमा सिॽमाबेॽसो साप्थाक्सानिङे इन्ढोङ्होङ याॽमिगो उङ्डोॽ इक्याक नासि लिघे़ये। 11 इन्ढोङ्होङ नम चरको निमाबेॽ घासामि डाङ हेघे़ये। मोबा उङ हेॽखे़येनुङ मोडोक्पेॽ खाङ्मुये काम्नुयेसो नासि लिये। मोडोक्नोॽ टाङायोङ्बा याॽमिसो खोमि योम्बोकमि धावाबेॽ हिङ्मवा रुक्खे़ये। 12 आपद बिपद आङ्हेघुबा याॽमिडे़ॽनोॽ आसिस चुप्मिन्डुए। दुःख आङ्हेखुबाडे़ॽनोॽ निवाहाङडे़ॽ पिमामि हे़न्ज्रुङ हे़म्बॽआ हिङ्मवामि मुकुट चुप्मिन्डुए। 13 आपद बिपद आङ्मा सिॽमाबेॽ असे़ॽसो “का निवाहाङ्डे़ॽ जाँच ले़टा” लुनुङ ए़ॽमिम्मे। इन्ढोङ्होङ निवाहाङ्डे़ॽ इन्डोक्पेॽसो मङे़हा खाबाङ जाँचबेॽ सिॽमेॽनिबा मोबा खोमदाङ्बे़ॽसो असासो जाँच ले़ःॽनिबा। 14 तर याॽमिजिनोॽ खोजिमि मङे़ॽमा निवाडे़ॽ ले़ःॽमे़ॽ जाँचबेॽ सिॽइम्मे। 15 मोडोगे़ॽ मङे़ॽमा निवाबाङ पाप टोॽइये। मोनोॽ वाबोक्नुङ मोसे़ॽ सिमवा लाजे़न्डुए। 16 के़ॽ नम्नम ले़ःॽपॽआ के़हा वावानिसानुङ नानुसाजि, हे़निङे़ॽ आम्निटाङ्बा धोका ए़ॽपिमे़। 17 चोप्पाङ नुबानुङ पक्कामा चोप बरदान थाङ्सिरिॽटुबाङ लेङ्इये। इघा चोप नान्द्रुङ्माबेॽहा जोति टोङ्खुबा पाबाबाङ लेङ्इहा। खोगो सानिङ्नोॽ टुये, खो लावाडोॽ फोरेन फोरेन्नोॽ फेन्निबा। 18 खोसे़ॽ टाङ्बे़ॽ मिॽपॽआडोॽ चाइबमा बचनबाङ कानिङ सिरिस्टि ले़टा। कानिङ खोमि सिरिस्टिमि याक्लो किङ्बॽआ चाडोक्नोॽ लिहेसिरो। खेम्मेनुङ ले़ःॽमे 19 के़हा वावानिसानुङ नानुसाजि, इघा खा हे़निङ्मि निवाबेॽ नुरोॽ युक्सानुमे। हे़निङ खेम्माबेॽ चङ्खो, नुरोॽ मिॽनुङ यामुमा खे़ये मोबा टाःम सुरके़ॽमा खे़ये। 20 इन्ढोङ्होङ याॽमि सुरके़ॽमे खाडे़ॽ निवाहाङ्मि धारमिक योम्बोकपेॽ बाधा पिये। 21 मोडोगे़ॽ इडोक्हा चोप मङे़हा खाबाङ्नुङ दुस्ट निवा हे़निङे़ॽ लेॽपेसानुमे। ए़डे़म्मा लिनुङ हे़निङ्मि निवाबेॽ युङ्बॽआ निवाहाङ्मि बचनडे़ॽ लुडिडोॽ ले़टानुमे मोसे़ॽनोॽ हे़निङ हिङ्मवा पिये। 22 बचन खेम्नुङ नुरोॽ पालना ले़ःॽखुबा लिसानिङे। तर इघा बचन खेम्नुङ्सोरोॽ मिन्डेॽनुङ टाङ्बा धोका पिघुबा ए़ॽलिसानिङे। 23 बचन खेम्नुङ पालना मे़ले़ःॽखुबा याॽमि चाहिँ टाङ्बामि नजिक मिक्चे़रेङ्बेॽ खाङ्घुबाडोॽ ले़ये। 24 मोसे़ॽ टाङ्बामि नजिक मिक्चे़रेङ्बेॽ खाङ्इन्डुए मोबा इॽछोॽपेॽ खोमि नजिक इन्डोक ले़टे़ लुमे खा मिन्डेॽपेन्डुए। 25 तर असे़ॽ याॽमिजि छुट्कारा पिहेखुबा सुद्ध नियम खेम्नुङ निवाबाङ पालना ले़न्डुए। खोसे़ॽ खोमि चोप योम्बोकपेॽ आसिस चुप्मिन्डुए। 26 टाङ्बा धरमि ले़ङे लुनुङ मिॽखुबे़ॽ खोमि रेम अधिनबेॽ मे़युक्सुहोङ, खोसे़ॽ टाङ्बानोॽ धोका पिन्डुए मोबा खोमि धरमि योम्बोक इनामा लिये। 27 निवाहाङ पाबाडे़ॽ नेन्जाबॽआ चाइबमा धरमि लुबॽआ चाहिँ दुःखबेॽ सिॽपॽआ राङ्मिॽमाजिनुङ टाङ्बाङ मे़ॽनिङ्हा नानिजि खाङ्मा, मोबा मक्खाम्डेमबेॽहा मङे़हा खाबाङ ओः पेम्मानोॽ नुबा लिये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.