हिब्रु 9 - याम्फुमक्खाम्डेमबेॽनुङ थाङ्सिरिबेॽ ले़ःॽमे ओहाङ 1 याक्लोमा हे़न्ज्रुङ्बेॽ निवाहाङ्मि भक्ति ले़ःॽमे खामि टुम्बेॽ नियम युङ्बॽआ ले़टहा। मोबा याॽमिजिडे़ॽनोॽ टोङ्बॽआ भक्ति ले़ःॽठाम इक्को पबित्रा थानासो टुसा। 2 निच्चि कोठानुङ्मा पबित्रा ठाउँ टोङ्बॽआ ले़टे़, मोमि याक्लोमा कोठाबेॽ सामदान, इक्को टेबुलनुङ निवाहाङ चेॽटिबॽआ चरेपा टुसाहा। मो ठाउँनोॽ पबित्रा ठाउँ लुसुजे। 3 मो होङ्सिॽयु इक्को चेॽमि परदा टुसे़, मोमि होङ्सिॽयु हाइको कोठा टुसे़ मो कोठा चाहिँ चोप्पाङ पबित्रा ठाउँ लुसुजे। 4 मोबेॽ चाहिँ धुपा इक्ठाम सुनामि धुपौरोनुङ सुनाडे़ॽ मोम्बॽआ हेन्ज्रुङमि सन्दुक टुसा। मो सन्दुक होङ्सिॽयु सुनामि खोङ्बेॽ मन्न युङ्बॽआ ले़टा। कोपिला के़ॽपॽआ हारुनमि टोङ्इरानुङ निवाहाङ्डे़ॽ मोसा पिबॽआ खोमि आग्या साप्पॽआ रुङ्गोॽवामि निच्चि पाटि टुसा। 5 मो सन्दुक सोक्पेॽ महिमानुङ्हा करुब लुमे निप्पाङ थाङ्सिरिदुत टुसाजे, मोजिमि लाप्खे़ॽवाडे़ॽ पाप आम्लाङ पिमे ठाउँबेॽ टे़क्पॽआ ले़टे़। तर आयु कानिङे़ॽ माहा खामि टुम्बेॽ चोप नुरोॽ लुहेसुङ्मानि। 6 इडोक्हा चोप खा युङ्बॽआ ले़टे़। याडाङ्बाजि पिबॽआ नियमडे़ॽ लुडिडोॽ सानिङ पाखे़ॽयुए पबित्रा ठाउँबेॽ धुपा इक्सिॽ पे़ए़नामे। 7 तर होङ्सिॽयुए महा पबित्रा ठाउँबेॽ चाहिँ इक्निङ्बेॽ इक्खेॽ चोप्पाङ एप्पा याडाङ्बा हुकपेॽ हरिमि खोरिया याङ्मानुङ मो चेॽटिसिॽ खडे़। खोसे़ॽ मो हरि खोमि पापमि लागिनुङ हाइखा याॽमिजिमि पापमि आम्लाङ ङाःक्सिॽ खे़ॽमाबेॽ चेॽटिसुए। 8 इगोबाङ पबित्रा होङ्निवाडे़ॽ खाङ्मुये, पाखे़ॽयुए पबित्रा ठाउँ टुडुङ्घे़ॽलो होङ्सिॽयुए चोप्पाङ पबित्रा ठाउँ हेम्बोक्निबा। 9 इगोगो आयुहा याॽमिजि खाङ्मेॽमामि लागि इक्को नमुनारेॽनोॽ ले़ये। निवाहाङ चेॽटिबॽआ भेटिनुङ बलिडे़ॽ माहा चेॽटिखुबा याॽमिमि निवा चोखो लिनिबा लुनुङ खाङ्मुये। 10 इघा चोप योम्बोकको चामे उङ्मेनुङ पाखे़ॽयु चोखो लिढाम बिधिरेॽनोॽ ले़हा। निवाहाङ्बाङ इक्को चोङ हेन्ज्रुङ इन्डोक्पेॽ लेङ्इये मोडोक्रोमि लागि इगो बिधि पिबॽआ ले़ये। 11 तर खिरिस्टगो इगो मक्खाम्डेमबेॽ टुहा चोप नुबा थोकमि चोप्पाङ एप्पा याडाङ्बा लिनुङ लेम्बेटे़। खो छना बेॽएम्मानुङ चोखो मन्दिरमि याडाङ्बा ले़ये। मो ठाउँ याॽमिमि हुगे़ॽ टोङ्बॽआ ने़ॽनि, मोबा सिरिस्टि ले़ःॽपॽआ खासो ने़ॽनि। 12 खो बोकामिनुङ पिक पसामि हरि याङ्मानुङ ने़ॽनि, तर खोम टाङ्बामिनोॽ हरि याङ्मानुङ कानिङ चोप याॽमिजि पापबाङ छुट्कारा पिमामि लागि, सानिङ्मि लागि इकखेॽपेॽ मो पबित्रा ठाउँबेॽ पे़ए़ना। 13 बोकानुङ पिक पसामि हरि, मोबा कोरोलिमि खरानि असुद्ध याॽमिजिबेॽ टुप्माबेॽ माहाजि चोखो लिम्मिहोङ, 14 खिरिस्टमि हरिडे़ॽको छना इन्डोक बेॽलो हे़निङ्मि पापडे़ॽ सिबॽआ निवानुङ, असुद्ध योम्बोकबाङ चोखो टोङ्इन्डुहा। इडोॽ लिमाबेॽ हे़निङे़ॽ हिङ्रिक निवाहाङ्मि ओहाङ ले़ःॽहेसानुमे लुनुङ खिरिस्टडे़ॽ खोम्दाङ्बा चोखो बलि लिनुङ निवाहाङ्मि हुकपेॽ चेॽटिसु। 15 मोडोगे़ॽ निवाहाङ्डे़ॽ हेन्ज्रुङ हे़म्बॽआ सानिङ टुडुङ्घे़ये आसिस खोसे़ॽ के़ॽपॽआ याॽमिजिडे़ॽ चुप्टुजिरो लुनुङ इगो चोङ हेन्ज्रुङ टोङ्खुबा खिरिस्ट ले़ये। याक्लोए हेन्ज्रुङ टुमाबेॽ याॽमिजिडे़ॽ ले़पॽआ पापबाङ छुट्कारा चुप्मिये, इन्ढोङ्होङ इगोमि लागिनोॽ खो सिघे़टे़। 16 इन्ढोङ्होङ कोहि याॽमिडे़ॽ खोमि इच्छा पत्रामि नियम खाङ्माहोङ मो इच्छा पत्रा पक्का ले़ःॽमामि मो साप्खुबा याॽमि सिघे़ॽपेटे़ लुनुङ याक्लो खाङ्मुमा खे़ये। 17 खो सिनुङ ए़क्साङ्रेॽनोॽ मो इच्छा पत्रामि योम्बोक पुरा लिये। खो हिङ्रोगो मो इच्छा पत्रा पुरा लिनिबा। 18 मोडोगे़ॽ याक्लोए हे़न्ज्रुङ्सो हरि मे़ॽनिङ पक्का मे़लिसा। 19 मोसाडे़ॽ निवाहाङ्बाङ चुप्पॽआ आग्या याॽमिजि खेम्मेॽसेॽनुङ ए़क्साङ बोकानुङ पिक पसामि हरि योङाबेॽ ठुनुङ हररामा उनिनुङ हिसप लुमे सिङ्बुमि हक्काम्बाडे़ॽ चोप याॽमिजिबेॽ, मोबा धारमिक नेॽचिरासोक्पेॽ इडोॽ लुसाङ हिसु, 20 “निवाहाङ्डे़ॽ हे़निङ आग्या पिबॽआ हेन्ज्रुङ्मि हरि चाहिँ इगोनोॽ ले़ये।” 21 मोडोक्नोॽ मोसाडे़ॽ निवाहाङ्मि पबित्रा ठाउँसोक्पेॽनुङ पुजा ले़ःॽठाम चोप खोङ्खोरियाबेॽसो हरि हिसु। 22 चइबानोॽ धारमिक नेॽचिराडे़ॽ लुडिडोॽ बलि पिबॽआ हरिडे़ॽ चोप थोक चोखो टोङ्इन्डुहा, बलिमि हरि मे़ॽनिङ पापबाङ आम्लाङ लिहेनिबा। खिरिस्टमि बलिडे़ॽ पाप वासोक्इन्डुए 23 थाङ्सिरिमि नक्कल ले़ःॽपॽआ चोप थोकमि लागिनोक्सो इडोॽ चोखो टोङ्मा खडे़। तर थाङ्सिरिबेॽहा चोप थोक चोखो टोङ्मामि लागि छना बेॽलो नुबा बलिमि खाँचो सिॽटे़। 24 खिरिस्ट याॽमिमि हुगे़ॽ टोङ्बॽआ पबित्रा थानाहोङ्सिॽयु खे़ॽपॽआ ने़ॽनि, मोगो चाइबमा पबित्रा थानामि नक्कलरेॽनोॽ ले़टा, तर खोगो थाङ्सिरिहोङ्सिॽयुनोॽ पे़खडा, खो आयु कानिङ्मि लागि निवाहाङ्मि पोम्बेॽ टुये। 25 इस्राएलिजिमि चोप्पाङ एप्पा याडाङ्बागो टाङ्बामि हरि ने़ॽनि जिवातजिमि हरि याङ्मानुङ इक्निङ्बेॽ इक्खेॽ महा पबित्रा थानाबेॽ खडे़। तर येसु खिरिस्ट चाहिँ मो याडाङ्बाडोॽ इक निङ्बेॽ इकखेॽ बलि लिसिॽ खे़ॽमा पाप्निबा। 26 इडोॽ सानिङ खे़ॽमाहोङ्गो मक्खाम्डेम सिरिस्टि लिबॽआबाङ आयुरो हागोसो हागोसो खोसे़ॽ खेः आङ्मा खडे़, तर इगो रुक्खे़ॽमे याकपेॽ खिरिस्ट सानिङ्मि लागि इक्खेॽपेॽ लेस्सा मोबा याॽमिजि पापबाङ छुट्कारा ले़ःॽमामि टाङ्बा बलि लिसा। 27 याॽमिजि इक्खेॽ सिमा खे़ये, मोबा निवाहाङ्बाङ खोमि न्याय लिये। 28 मोडोक्नोॽ बेॽलो याॽमिजिमि पाप नास ले़ःॽमामि खिरिस्टसो इक्खेॽ बलि लिसा। खो फेरि लेम्माबेॽ पापबाङ आम्लाङ पिमामि ने़ॽनि, तर खोमि राम खाङ्नुङ हुङ्घुबाजि मुक्ति पिसिॽ लेङ्इये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.