हिब्रु 8 - याम्फुचोङ हेन्ज्रुङ्मि चोप्पाङ एप्पा याडाङ्बा 1 हागो कानिङे़ॽ लुमायोक्पॽआ खा चाहिँ इगो ले़ये, कानिङ्मि इडोक्मा चोप्पाङ एप्पा याडाङ्बा टुये, खो थाङ्सिरिबेॽ महान निवाहाङ पेन्ढाममि चुप्थिङ्लाम पेङ्इटे़। 2 याॽमिडे़ॽ टोङ्बॽआ ने़ॽनि, तर परमपरभु निवाहाङ्डे़ॽनोॽ टोङ्बॽआ चाइबमा पबित्रा ठाउँबेॽ चोप्पाङ एप्पा याडाङ्बा लिनुङ खोसे़ॽ योम्बोक ले़न्डुए। 3 इन्ढोङ्होङ चोप्पाङ एप्पा याडाङ्बा याॽमिजिमि भेटिनुङ बलि चेॽटिबेॽमामि लागि सेम्बॽआ ले़ये, मोडोगे़ॽ कानिङ्मि चोप्पाङ एप्पा याडाङ्बाडे़ॽसो इमाङ ना इमाङ्गो चेॽटिमानोॽ खे़ये। 4 खो इगो मक्खाम्डेमबेॽनोॽ टुसाहोङ्गो याडाङ्बा मे़लिहेसा, इन्ढोङ्होङ धारमिक नियमडे़ॽ लुबॽआडोॽ भेटि चेॽटिखुबा याडाङ्बाजिगो याक्लोनोॽ टुसामे। 5 माहा याडाङ्बाजिडे़ॽ सेवा ले़ःॽपॽआ ठाउँगो थाङ्सिरिबेॽए पबित्रा ठाउँमि नक्कलनुङ लावारेॽ ले़ये। इन्ढोङ्होङ मोसाडे़ॽ पबित्रा ठाउँ टोङ्मा पोरोक्माबेॽ निवाहाङ्डे़ॽ इडोॽ लुसु, “के़ॽ हे़न सुम्लाखाबेॽ खाङ्मुबॽआडोॽमा चोप थोक टोङ्मे।” 6 याडाङ्बा येसु ले़ःॽमेॽपॽआ योम्बोक चाहिँ माहा हाइखा चोप्पाङ एप्पा याडाङ्बाजिडे़ॽ ले़ःॽपॽआ योम्बोकबाङ्सो महान ले़ये। मोडोक्नोॽ निवाहाङ्नुङ खोमि याॽमिजिमि रुम्बेॽए याॽमि येसु लिनुङ ले़ःॽपॽआ चोङ हेन्ज्रुङ चाहिँ याक्लोमा हे़न्ज्रुङ्बाङ महान ले़ये, इन्ढोङ्होङ इगो हेन्ज्रुङमि जग नुबा हेन्ज्रुङ्बेॽ टुये। 7 याक्लोमा हेन्ज्रुङ खोट मे़ॽनिङ्मा ले़टाहोङ्गो हाइके हेन्ज्रुङ टोङ्मा मे़म्पाप्टा। 8 तर निवाहाङ्डे़ॽ टाङ्बामि याॽमिजिमि आप्टिक चुप्नुङ लुसुजि, “इडोक्हा याक लेम्मे़ॽनिङ्सिहा, इस्राएलनुङ यहुदामि खिमबेॽहाजिनुङ के़ॽ इक्को चोङ हेन्ज्रुङ हुप्मिनुङे।” 9 “इगो हेन्ज्रुङ चाहिँ खोजिमि टुबालाबाजिनुङ के़ॽ ले़ःॽपॽआडोॽमा ने़ॽनिबा। के़ॽ माहाजिमि टुबालाबाजि हुकपेॽ राःप्नुङ मिस्रा देसबाङ कोआप्मिटुङ्हाजि। परमपरभुडे़ॽ लुये, माहाजिडे़ॽ मो हे़न्ज्रुङ्डे़ॽ लुबॽआ खा पालना मे़ले़टुजि। मोडोगे़ॽ के़ॽ माहाजिमि ले़ख्खो मे़ले़टुङ्जिङ।” 10 परमपरभुडे़ॽ लुये, हागो लेङ्इहा याकपेॽ इस्राएलिजिनुङ इडोक्मा हेन्ज्रुङ हिःक्इनुङे, माहाजिमि निवाहोङ्बेॽ काङ्मि नियम युङ्बेनुङ्हाजि, मोबा खोजिमि निवाहोङ्बेॽ काङ्मि नियम साप्टिबेनुङ्हाजि। का खोजिमि निवाहाङ लिङे, मोबा माहाजि काङ्मि जनता लिम्मे। 11 मोडोक्पेॽ असे़ॽसो टाङ्बामि वावानिसानुङ पेन्लागामजि, “निवाहाङ लेसानुमे” लुनुङ इःॽमा पाप्मिने। इन्ढोङ्होङ ए़डेम्माबाङ बेॽहा याॽमिजिडे़ॽसो का लेम्मे। 12 “इन्ढोङ्होङ माहाजिमि पापमि आम्लाङ पिनुङ्हाजि, माहाजिमि पाप फेरि इन्डोक्पेॽसो के़ॽ मिॽटुङ्निबा।” 13 इगो हेन्ज्रुङ “चोङ” लुबॽआसे़ॽनोॽ याक्लोएगो पुरानो लिये। याक्लोमा पुरानो लियेनुङ चान्डोनोॽ मो चाहिँ नासि लिघे़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.