हिब्रु 7 - याम्फुयाडाङ्बा मल्किसेदेक 1 इगो माल्किसेदेक चाहिँ सालेम ठाउँमि हाङ्बानुङ चोप्पाङ मिॽटु पेङ्घुबा निवाहाङ्मि याडाङ्बा ले़टे़। अब्राहामडे़ॽ रिबाङ हाङ्बाजि हेजानुङ टेआप्मे़ॽनिङ्सिमाबेॽ मल्किसेदेकडे़ॽ अब्राहाम आसिस पिसु। 2 मोबा अब्राहामडे़ॽ हाङ्बाजि हेजानुङ लाजे़ॽपॽआ चोप याङ्सरावामि इक्पोङ्मि इक्भागा मल्किसेदेक पिसु। मल्किसेदेक लुबॽआ चाहिँ “धारमिक खामि हाङ्बा” ले़येनुङ खो सालेममि हाङ्बा ले़ःॽपॽआसे़ॽ खोमि निङ “सान्तिमि हाङ्बा” लुनुङ्सो ले़ये। 3 इगो मल्किसेदेकमि पाबा मामानुङ खोमि टुबा लाबामि टुम्बेॽ इमाङ्सो मे़लुडिॽ। खो इन्डोक्पेॽ टोगा इन्डोक्पेॽ सिसा मोसो मे़लुडिॽ, तर खो निवाहाङ्मि पसाडोक्नोॽ सानिङ्मि लागि याडाङ्बा लिसा। 4 हागो मिॽखाक्सानुमे, इगो याॽमि इन्डोक महान ले़टे़ ? कानिङ्मि टुबालाबा अब्राहामडे़ॽसो हाङ्बाजि हेजानुङ लाजे़ॽपॽआ थोकबाङ इक्पोङ भागामि इक भागा खो पिसु। 5 लेबि बङ्समि याडाङ्बाजिडे़ॽ खोजिमिन्नोॽ इस्राएलि वावानिसाजिबाङ इक्पोङ्मि इक्भागा लान्डुजे। इगोगो खोजिमिन्नोॽ यहुदि धारमिक नियमडे़ॽ लुबॽआ ले़ये। लेबिजिमि बङ्सनुङ इस्राएलिजि चोपनोॽ अब्राहाममि बङ्सबेॽहा ले़म्मे। 6 याडाङ्बा मल्किसेदेकको लेबि बङ्सबाङ्ए मे़ले़टा। तरसो खोसे़ॽ याडाङ्बाजिमि टुबालाबा अब्राहाममि हुकबाङ इक्पोङ्मि इक्भागा लासु, मोबा निवाहाङ्मि हेन्ज्रुङ चुप्पॽआ अब्राहाम खोसे़ॽ आसिस पिसु। 7 इगो खाबेॽ खरि मिॽमा पाप्निबा, टाङ्बाबाङ टुम्मिजिबाङ पाक्लोक्हाजिडे़ॽ आसिस चुप्मिन्डुजे। 8 सिघे़ॽखुबा लेबि याडाङ्बाजिडे़ॽ इक्पोङ्मि इक भागा लान्डुजे, तर खोजिबाङ मल्किसेदेक महान ले़ये। इन्ढोङ्होङ खो सानिङ हिङ्इये लुनुङ धारमिक नेॽचिराबेॽ साप्पॽआ ले़ये। 9 याॽमिजिडे़ॽ इडोक्सो लुन्डुजे, इक्पोङ्मि इक भागा चुप्खुबा लेबिजिडे़ॽसो अब्राहामडे़ॽ मल्किसेदेक इक्पोङ्मि इक भागा पिसुजि। 10 इन्ढोङ्होङ मल्किसेदेकडे़ॽ अब्राहाम चुप्माबेॽको लेबि बङ्सगो टोक्नोॽ मे़न्टोक्पॽआ ले़टा। 11 लेबिमि बङ्सजिबाङ याडाङ्बा लिमा खे़ये लुनुङ धारमिक नेॽचिराडे़ॽ लुसा। तर हारुन बङ्सहा याडाङ्बाजिमि योम्बोकबाङ धरमि लिबॽआहोङ्गो मल्किसेदेकडोॽ योम्बोक ले़ःॽखुबा इक्को हाइको याडाङ्बा लेम्मा मे़म्पाप्टे़। 12 याडाङ्बा फेम्माबेॽ यहुदि धारमिक नियमसो फेम्मानोॽ खे़ये। 13 कानिङ खिरिस्टमि टुम्बेॽ खा इःमे़ॽनिङ्सिन्डुङ्मे खोगो हाइकोनोॽ बङ्सबाङ्ए ले़ये। खोमि बङ्सबाङ असे़ॽसो याडाङ्बामि योम्बोक मे़ले़टिॽटुजि। 14 इन्ढोङ्होङ इगो खा छे़ङ्गैनोॽ टुये, कानिङ्मि परभुगो यहुदामि बङ्सबाङ्ए ले़ये। मोसाडे़ॽ याडाङ्बामि टुम्बेॽ लुमाबेॽ इगो बङ्समि टुम्बेॽ इमाङ्सो मे़लुडिॽ। मल्किसेदेकडोॽमा हाइको याडाङ्बा 15 मल्किसेदेकडोॽमा हाइको याडाङ्बा लेम्माबेॽ कानिङ्मि धारमिक नियमसो फेङ्इये लुमे खा कानिङे़ॽ नुरोॽ लेन्डुङ्मे़। 16 खो लेबि टुबाजिडे़ॽ पिबॽआ आग्यानुङ नियमबाङ याडाङ्बा लिबॽआ ने़ॽनि, तर इन्डोक्पेॽसो नास लिनिबा हिङ्मवामि सक्तिबाङ लिबॽआ याडाङ्बा ले़ये। 17 धारमिक नेॽचिराडे़ॽ इडोॽ लुये, “मल्किसेदेकडोक्नोॽ हे़न सानिङ्मि लागि याडाङ्बा ले़ये।” 18 मो याक्लोमा नियम चाहिँ थोःप्थोप्मानुङ योम्बोक मे़ॽनिङ्मा ले़टे़न्से़ॽ लेप्पेमा सिॽटा। 19 मोसाडे़ॽ पिबॽआ धारमिक नियमडे़ॽ इमाङ्सो पक्का मे़न्टोङ्हेसु। तर हागोगो नुबा आसा पिटे़, मो आसाडे़ॽनोॽ कानिङ निवाहाङ्मि के़क्पेॽ चिक्खे़ये। 20 हाइखाजिगो निवाहाङ्डे़ॽ हेन्ज्रुङ मे़ले़ःॽलेॽनोॽ याडाङ्बा टोक्सुजि। 21 तर खिरिस्टगो हेन्ज्रुङ हेन्नुङ याडाङ्बा टोङ्बॽआ ले़ये। धारमिक नेॽचिराडे़ॽ इडोॽ लुबॽआ ले़ये, “परमपरभुडे़ॽ हेन्ज्रुङ हे़न्नुङ लुटुए, खोमि निवा फेनुनिबा, ‘हे़न सानिङ्मि लागि याडाङ्बा ले़ये’।” 22 मोडोगे़ॽनोॽ इगो हेन्ज्रुङ्डे़ॽ, येसु चाहिँ याक्लोए हेन्ज्रुङ्बाङ्सो चोप्पाङ नुबा हेन्ज्रुङ टोङ्इटुए। 23 याक्लोहा याडाङ्बाजि बेॽलो टुसामे, इन्ढोङ्होङ खोजि सिघडामिनुङ खोजिडे़ॽ सानिङ्मि लागि याडाङ्बामि योम्बोक मे़ले़ःॽहेसुजि। 24 तर येसुमि याडाङ्बा योम्बोक चाहिँ सानिङ्मि ले़ये, इन्ढोङ्होङ खो सिनिबा। 25 मोडोगे़ॽ येसुबेॽ बिस्वास ले़ःॽनुङ निवाहाङ्बेॽ आप्खुबाजि खोसे़ॽ सानिङ्मि लागि हिङ्मेॽहेन्डुजे, इन्ढोङ्होङ याॽमिजिमि लागि निवाहाङ्नुङ पारथना ले़ःॽपेॽमामि खो सानिङ टुडुङ्घे़ये। 26 खोडोॽमानोॽ इक्को चोप्पाङ एप्पा याडाङ्बा कानिङ्मि लागि पाप्मिये। खो पबित्रा ले़ये, आप्टिक मे़ॽनिङ्मा ले़ये, खोट मे़ॽनिङ्मा ले़ये, खो पापि याॽमिजिबाङ खोरोमा ले़ये, मोबा खो चोप्पाङ मिॽटु थाङ्सिरिबेॽ युङ्इटुए। 27 हाइखा चोप्पाङ एप्पा याडाङ्बाजिडे़ॽ याक्लो टाङ्बामि लागि मोबा ए़क्साङ हाइखा याॽमिजिमि पापमि साटो बलि चेॽटिन्डुजे। तर येसुडे़ॽ माहाजिडे़ॽ चेॽटिबॽआडोॽ सानिङ बलि चेॽटिमा पाप्निबा। इन्ढोङ्होङ खोसे़ॽ याॽमिजिमि पाप सानिङ्मि लागि आम्लाङ लिरो लुनुङ खो इक्खेॽपेॽ बलि लिसा। 28 कमजोर याॽमि ले़ःॽनुङ्सो धारमिक नियमडे़ॽ मो से़न्नुङ चोप्पाङ एप्पा याडाङ्बा टोङ्इन्डुए, तर मोसाबाङ धारमिक नियम पिनुङ ए़क्साङ खोमि पसा येसु सानिङ्मु टुडुङ्घे़येनुङ चोप ले़ःॽहेघुबा महान याडाङ्बा से़म्मामि निवाहाङ्डे़ॽ हेन्ज्रुङ हे़नु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.