हिब्रु 4 - याम्फुनाजामे याकमि हेन्ज्रुङ 1 मोडोगे़ॽ निवाहाङ्डे़ॽ नाजामे ठाउँबेॽ पे़खे़ॽमेॽनिम्ने़ लुबॽआ हेन्ज्रुङ हागोरोसो टुये। होसियार ले़ःॽमा खे़ये, मो ठाउँबेॽ हे़निङ चोपनोॽ पे़खे़ॽटोक्खुबा लिसानिङे। 2 इन्ढोङ्होङ टुबालाबाजि खेम्मेॽपॽआडोॽमा सुसमाचार कानिङ्सो खेम्मेॽपॽआ ले़ये। तर माहाजिडे़ॽ खेम्बॽआ मो सुसमाचार के़न्डिॽखडा, इन्ढोङ्होङ माहाजिडे़ॽ मो खाबेॽ बिस्वास मे़ले़टुजि। 3 तर कानिङ खोबेॽ बिस्वास ले़ःॽखुबाजि चाहिँ निवाहाङ्डे़ॽ बाचा ले़ःॽपॽआ मो नाजामे ठाउँबेॽ पे़खे़न्डिङ्मा। निवाहाङ्डे़ॽ इडोॽ लुसु, “मोडोगे़ॽ के़ॽ काङ्मि सुरिकपेॽ इगो हेन्ज्रुङ हे़नुङ, ‘काङ्मि नाजामे ठाउँबेॽ माहाजि इन्डोक्पेॽसो पे़खे़ॽटोक्मिने।’” तर खोमि नाजामे ठाउँगो सिरिस्टि लिबॽआबाङ्नोॽ टोङ्बेबॽआ ले़टे़। 4 इन्ढोङ्होङ धारमिक नेॽचिरामि इक ठाउँबेॽ एच्चिमा याकमि टुम्बेॽ इडोॽ साप्पॽआ ले़ये, “निवाहाङ्डे़ॽ चोप योम्बोक ले़ःॽसेॽनुङ एच्चिमा याकपेॽ नाजासा।” 5 मोबा फेरि खोसे़ॽ हाइको ठाउँबेॽ लुटुए, “अक्खाजि काङ्मि नाजामे ठाउँबेॽ इन्डोक्पेॽसो पे़खे़ॽटोक्मिने।” 6 याक्लो सुसमाचार खेम्खुबा इन्डोक याॽमिजिडे़ॽ लुबॽआ मे़खेम्बॽआसे़ॽ खोमि नाजामे ठाउँबेॽ मे़पे़खे़ॽटोगामि। तर हागोसो इन्डोक जनाजि मो नाजामे ठाउँबेॽ पे़एन्डोक्इम्मे। 7 मोबा निवाहाङ्डे़ॽ फेरि हाइको इक्को याक “आयु” लुनुङ पक्का ले़टु। मो याक्लो लुबॽआ खा बेॽलो निङ ए़क्साङ निवाहाङ्डे़ॽ दाउद हाङ्बा लुमेॽटु “आयु हे़निङे़ॽ निवाहाङ्मि बचन खेप्सानुमहोङ हे़निङ छॽइये निवानुङ्हाजि ए़लिसानिङे।” 8 इन्ढोङ्होङ यहोसुडे़ॽ माहाजि नाजामा पिबॽआहोङ्गो निवाहाङ्डे़ॽ ए़क्साङ हाइको याकमि टुम्बेॽ लुमा मे़पाप्टे़। 9 मोडोगे़ॽ निवाहाङ्मि याॽमिजिमि लागि नाजामे याक लेम्मे़ॽनिङ्सिये। 10 इन्ढोङ्होङ निवाहाङ टाङ्बामि योम्बोक येॽनुङ एच्चिमा याकपेॽ नाजाडिडोॽ निवाहाङ्मि नाजामे याकपेॽ खे़ॽखुबाजिसो टाङ्बामि योम्बोकबाङ नाजाम्मे। 11 मोडोगे़ॽ कानिङ मो नाजामे ठाउँबेॽ पे़खे़ॽमामि बोल ले़ःॽमा, मोबा निवाहाङ्मि खा मे़ङ्खेम्खुबा इस्राएलिजि नास लिडिडोॽ कानिङ असासो नासि ए़ॽलिमा। 12 निवाहाङ्मि बचनगो हिङ्रिक ले़येनुङ सानिङ्नोॽ योम्बोक ले़न्डुए। खोमि बचन निच्चिलामनोॽ धारनुङ्मा फेयाबाङ्सो बेॽलो वे़ङ्इये। इगोसे़ॽ होङ्सिॽयु खे़ॽनुङ सोःक्मानुङ होङ्निवा हान्डुए, मोबा जोरनिनुङ से़ॽकोॽवा खोरो खोरो टोङ्इन्डुए, निवा होङ्सिॽयुनुङ निवे़ॽ मिॽपॽआ खा जाँच ले़ःॽहेन्डुए। 13 निवाहाङ्डे़ॽ टोङ्बॽआ इमाङ खासो खोबाङ कुम्हेनिहा। खोमि नजिकपेॽ चोप खा खाङ्मुहानुङ छे़ङ्गै लिहा। खोनोॽ कानिङे़ॽ ले़ःॽपॽआ चोप खामि लेखा पिमा खे़ये। येसु चोप्पाङ एप्पा याडाङ्बा 14 थाङ्सिरि खे़ॽपॽआ निवाहाङ्मि पसा येसुनोॽ कानिङ्मि चोप्पाङ महान एप्पा याडाङ्बा लिसा। मोडोगे़ॽ कानिङे़ॽ ले़ःॽपॽआ बिस्वास नुरोॽ जोगा ले़ःॽयुङ्मा। 15 इन्ढोङ्होङ कानिङ्मि चोप्पाङ एप्पा याडाङ्बा कानिङ्मि कमजोरि लेहेघुबा ले़ये। कानिङ्मि चोप्पाङ एप्पा याडाङ्बा कानिङ्डोक्नोॽ जाँचबेॽ सिॽटा, तरसो खोसे़ॽ इक्कोसो पाप मे़ले़टु। 16 मोडोगे़ॽ कानिङ मे़ङ्किस्सिरेॽ अनुग्रहा पिघुबा हाङ्बा पेन्ढाम ठाउँबेॽ खे़ॽमा। कानिङ खाँचोबेॽ सिॽमाबेॽ निवाहाङ्डे़ॽ मोबेॽ अनुग्रहानुङ सहायता ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.