हिब्रु 3 - याम्फुमोसाबाङ्सो येसु महान 1 मोडोगे़ॽ निवाहाङ्डे़ॽ से़म्बॽआ पबित्रा वावानिसानुङ नानुसाजि, निवाहाङ्डे़ॽ पाङ्बॽआ पसानुङ चोप्पाङ एप्पा याडाङ्बा लुनुङ कानिङे़ॽ बिस्वास ले़ःॽपॽआ येसुबेॽ निवा टिसानुमे। 2 मोसा मन्दिरबेॽ भरोसानुङ्मा सेवा ले़ःॽखुबा लिडिडोक्नोॽ येसुसो निवाहाङ्मि भरोसानुङ्मा सेवा ले़ःॽखुबा लिसा। 3 खिमबाङ्सो बेॽलो खिम टोङ्खुबा आदरनुङ्मा लिडिडोॽ मोसाबाङ्सो येसु छना बेॽलो महान ले़ये। 4 इन्ढोङ्होङ हाम्बे खिमहोङ्सो याॽमिडे़ॽनोॽ टोङ्बॽआ ले़ये, तर चोप थोक टोङ्खुबागो निवाहाङ्नोॽ ले़ये। 5 मोसागो लेङ्इये बेलाबेॽ इन्डोक यामुमा खे़ये लुनुङ खो निवाहाङ्मि खिमबेॽहा याॽमिजिबेॽ बिस्वासनुङ्मा सेउते ले़टा। 6 तर खिरिस्ट चाहिँ मन्दिरबेॽए भरोसानुङ्मा पसा ले़ये। मोडोक्नोॽ कानिङे़ॽसो टाङ्बामि आसामि खाबेॽ ए़क्साङ्ठोक भरोसानुङ बिस्वास ले़ःॽमाहोङ कानिङ्सो खोमि खिमबेॽहा याॽमिजि लिन्डिङ्मा। निवाहाङ्बेॽ बिस्वास ले़ःॽमाबेॽ चुप्मिये नाजामा 7 मोडोगे़ॽ पबित्रा होङ्निवाडे़ॽ लुये, “आयु हे़निङे़ॽ खोमि सेम्ला खेप्सानुमहोङ, 8 हे़निङ्मि टुबालाबाजिडे़ॽ निवाहाङ्मि टेडिघरिक ले़टिडोॽ निवा छाॽखुबाजि ए़लिसानिङे। खोजिडे़ॽ रे़क्रे़क्मा ठाउँबेॽ जाँचबेॽ सिॽपॽआ बेलाबेॽ निवाहाङ्मि बिरोध ले़टुजि। 9 मोबेॽ हे़निङ्हा टुबालाबाजिडे़ॽ रिक्पोङ निङ्ठोक के़ॽ ले़ःॽपॽआ योम्बोक खाङ्नुङ्सो काबेॽ बिस्वास मे़ले़टुजि बोरु काङ्मि जाँच ले़टुजि। 10 मोडोगे़ॽ माहा याॽमिजिनुङ का सुरके़ॽनुङ लुसुङ्जिङ, ‘अक्खाजि बिस्वासनोॽ मे़ॽनिङ्हा लिसामि, अक्खाजि के़ए़ मरामबेॽ मे़राप्सामि’ 11 मोडोगे़ॽ के़ॽ सुरिकपेॽ इडोक्मा बाचा ले़ःॽनुङ लुसुङ, ‘के़ए़ नाजामे ठाउँबेॽ अक्खाजि इन्डोक्पेॽसो पे़खे़ॽटोक्मिने।’” 12 वावानिसानुङ नानुसाजि, हे़निङ असासो बिस्वास मे़ॽनिङ्मा पापि निवानुङ्हाजि लिनुङ हिङ्रिक निवाहाङ्बाङ ओः ए़लिसानिङे। 13 तर धारमिक नेॽचिराबेॽ “आयुए याक” लुबॽआ बेला टुडुङ्रो सानिङ इक्कोसे़ॽ हाइको हौसला पिघुसे़ॽचुसानिङे। इडोॽ पापि रेम्सिङ निवानुङ्मा लिनुङ हे़निङ्मि निवा छॽइये ए़टोक्सानुमे। 14 कानिङे़ॽ याक्लो बिस्वास ले़ःॽमाबेॽ खोबेॽ भरोसा ले़टिडोॽ ए़क्साङ्ठोक बिस्वासनुङ्मा लिन्डिङ्माहोङ कानिङ खिरिस्टनुङ हकदार लिन्डिङ्मा। 15 धारमिक नेॽचिराडे़ॽ लुये, “आयुनोॽ हे़निङे़ॽ निवाहाङ्मि सेम्ला खेप्सानुमहोङ, हे़निङ्मि टुबाजिडे़ॽ निवाहाङ्मि बिरोध ले़ःॽपॽआडोॽ छॽइये निवानुङ्हा ए़लिसानिङे।” 16 असाजिडे़ॽ निवाहाङ्मि खा खेम्नुङ्सो खोमि बिरोध ले़टुजे ? मोसाडे़ॽ मिस्रा देसबाङ चिॽअप्पॽआ याॽमिजिडे़ॽनोॽ ने़ॽने ? 17 असाजिनुङ निवाहाङ रिक्पोङ निङ्ठोक सुरकाडे़ ? इमा माहा पाप ले़ःॽखुबाजिनुङ्नोॽ ने़ॽने ? माहाजिनोॽ मो रे़क्रे़क्मा ठाउँबेॽ सिघडामि। 18 काङ्मि आग्या मे़ङ्खेम्खुबाजि काङ्मि नाजामे ठाउँबेॽ इन्डोक्पेॽसो पे़खे़ॽटोक्मिने लुनुङ निवाहाङ्डे़ॽ बाचा ले़ए़टुए ने़ॽनिबा ? 19 मोडोगे़ॽ कानिङे़ॽ लेन्डुङ्मे़, माहा बिस्वास मे़ले़ःॽखुबाजि नाजामे ठाउँबेॽ मे़म्पे़खे़ॽटोगामि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.