हिब्रु 2 - याम्फुचोप्पाङ बेॽएम्मा छुट्कारा 1 मोडोगे़ॽ कानिङे़ॽ इमा खेम्इटुङ्मे मो चाइबमा खाबेॽ बेॽलो निवा टिमा खे़ये, ने़ॽनिहोङ कानिङ ने़ॽनिबा राम खे़ॽए़न्डिङ्मा। 2 उहिले थाङ्सिरिदुतजिडे़ॽ कानिङ्मि टुबालाबाजि खेम्मेॽपॽआ निवाहाङ्मि बचन चाइबमा ले़टा, मोबा माहा खा मे़ङ्खेम्खुबा, मो खाडे़ॽ लुबॽआ मे़ङ्खसिखुबाजिडे़ॽ दन्डा चुप्टुजि। 3 इडोक बेॽए छुट्कारामि खानोॽ ले़ख्खो मे़ले़ःॽटुङ्माहोङ्गो इन्डोक्टे न्यायबाङ ले़ःॽखे़ॽहेन्डिङ्मा ? इगो छुट्कारा याक्लो परभुडे़ॽनोॽ परचार ले़टु। खोमि परचार खेम्घुबाजिडे़ॽ इगो चाइबमा ले़ये लुनुङ कानिङ परमान पिसामि। 4 निवाहाङ्डे़ॽसो बेॽलो चिङ्गा, खरिहा योम्बोकनुङ सक्तिनुङ्हा योम्बोक ले़ःॽनुङ खोमि निवाबाङ्नोॽ पबित्रा होङ्निवामि बरदान पिनुङ इगो छुट्कारा चाइबमा ले़ये लुनुङ साक्छि पिसु। मुक्ति पिघुबा खिरिस्ट 5 कानिङे़ॽ लुबॽआ मो लेन्सिॽपोरोक्पॽआ मक्खाम्डेम निवाहाङ्डे़ॽ थाङ्सिरि दुतजिमि अधिनबेॽ मे़युक्सु। 6 धारमिक नेॽचिरामि इक्को ठाउँबेॽ इडोॽ साप्पॽआ ले़ये, “याॽमि इमाङ्डे, खो हे़ने़ॽ मिॽयुङ्इन्डुए ? अथबा याॽमिमि पसा इमाङ्डे ? हे़ने़ॽ खोमि ले़ख्खो ले़न्डुए ? 7 निवाहाङ हे़ने़ॽ इॽछोॽमि लागि याॽमिमि पसा थाङ्सिरिदुतजिबाङ्सो ए़डेम्मा टोक्सु। खो महिमानुङ आदरमि मुकुट ओम्एम्बेॽटु। 8 हे़ने़ॽ चोप थोक खोमि अधिनबेॽ युङ्बेॽटु।” निवाहाङ्डे़ॽ चोप खा याॽमिमि अधिनबेॽ युङ्बॽआसे़ॽ खोमि अधिन मे़ॽनिङ्हा खा इमाङ्सो माॽआहा। तर आइ कानिङे़ॽ खाङ्माबेॽ चोप थोक याॽमिमि अधिनबेॽ लेम्बॽआ खाङ्डोक्टुङ्मानि। 9 तर कानिङे़ॽ थाङ्सिरिदुतजिबाङ येसु इॽछोॽमि लागि ए़डेम्मा लिबॽआ लेटुङ्मे़। निवाहाङ्मि अनुग्रहाडे़ॽ येसु चोप याॽमिजिमि लागि सिसा। खो चोपमि लागि बलि लिबॽआसे़ॽ खोसे़ॽ महिमानुङ आदरमि मुकुट चुप्टु। 10 चोप थोक निवाहाङ्मि ले़हा, मोबा चोप थोक खोमि सक्तिबाङ्नोॽ टोङ्बॽआ ले़ये। मोडोगे़ॽ बेॽलो पसाजि खोमि महिमाबेॽ लाप्मामि लागि येसु दुःख आङ्मेॽनुङ खोसे़ॽ इगो योम्बोकबाङ येसु मुक्तिमि मुल टोक्सु। 11 इन्ढोङ्होङ पबित्रा टोङ्घुबानुङ पबित्रा लिघुबाजि चोप इक्को खिमबेॽहाजिनोॽ ले़म्मे। मोडोगे़ॽ खोजि निसा लुमामि येसु ङेसिनिबा। 12 खोसे़ॽ लुये, “के़हा वावानिसानुङ नानुसाजिमि रुम्बेॽ हे़ने़ए़ निङ खेम्मेनुङे, के़ॽ मन्डलिमि रुम्बेॽ हे़ने़ए़ स्तुति ले़नुङे।” 13 फेरि खोसे़ॽ लुये, “के़ॽ निवाहाङ्बेॽ भरोसा ले़नुङे।” मोबा फेरि खोसे़ॽ लुये, “खाक्सानुमे, का निवाहाङ्डे़ॽ पिबॽआ इघा पसाजिनुङ टुङे।” 14 इन्ढोङ्होङ पसाजि हिङानुङ्हा ले़ःॽपॽआसे़ॽ माहाजिडोक्नोॽ येसुसो सानुङ हरिनुङ्मा याॽमि लिनुङ लेस्सा। खो बलि लिनुङ सिमवामि सक्तिनुङ्मा सैतान नास ले़टु। 15 मोबा इक्याक सिमा खे़ये लुनुङ हिङ्रो किस्सिमामि सेउते लिमे खाबाङ याॽमिजि खोसे़ॽ छुट्कारा पिसुजि। 16 इगो योम्बोक चाहिँ थाङ्सिरि दुतजिमि लागि ले़ःॽपेॽपॽआ ने़ॽनि, तर अब्राहाममि पसाजिमि लागिनोॽ ले़ःॽपॽआ ले़ये। 17 मोडोगे़ॽ चोप खाबेॽ खो टाङ्बामि वावा निसाजिडोक्नोॽ लिमा खडा। मोबा याॽमिजिमि पापमि लागि आम्लाङ ङाःक्मामि भरोसानुङ्मानुङ नम्नावानुङ्मा चोप्पाङ एप्पा याडाङ्बा लिसा। 18 खोमदाङ्बे़ॽ बेॽलो खालहा जाँचबेॽ सिॽनुङ दुःखनुङ खेः आङ्बॽआसे़ॽ खोसे़ॽ चोप खालहा खेःबेॽ सिॽखुबाजिमि सहायता ले़ःॽहेन्डुए। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.