हिब्रु 13 - याम्फुनिवाहाङ इन्डोक्टे साप्थाङ्मेॽमे़ 1 टाङ्बामि वावानिसानुङ नानुसाडोक्नोॽ इक्कोसे़ॽ हाइको नम्नम ले़ःॽखुसे़ॽचुसानिङे। 2 चबाङ्जिमि नुरोॽ सेवा सत्कार ले़टानुमे, इन्ढोङ्होङ इडोॽ चबाङ्मि सेवा सत्कार ले़ःॽमाबेॽ कोहि कोहिडे़ॽ लेनोॽमे़लेरेॽ थाङ्सिरिदुतमि सेवा सत्कार ले़ए़टुजे। 3 तिरिङ्गा खिमबेॽ से़क्सिघे़ॽखुबाजिमि नुरोॽ ले़ख्खो ले़टानुमे। खोजिडे़ॽ आङ्बॽआ खेः टाङ्बे़ॽसो आङ्बॽआडोॽ मिडानुमे। इन्ढोङ्होङ हे़निङ टाङ्बासो हिङाबेॽ टुन्डानिङ। 4 फुङ्सयामि बन्धन चाहिँ चोपमि पोम्बेॽ आदरनुङ्मा टुमा खे़ये। बनिबानुङ बनिमामि रुम्बेॽ इक्कोसे़ॽ हाइकोमि बिस्वासबेॽ पेम्मा खे़ये। इन्ढोङ्होङ छाडा याॽमि लिनुङ हाइखामि बनिमा बनिबाजिनुङ बेभिचार ले़ःॽखुबाजि निवाहाङ्डे़ॽ दन्डा पिन्डुजे। 5 याङ्सरावामि लोभबाङ हे़निङ ओः पेनानिङे, टाङ्बानुङ इन्डोक टुहा, टाङ्बे़ॽ इन्डोक चुप्इटानुमे मोडोक्पेॽ हे़निङ साप्थक्सानिङे। इन्ढोङ्होङ निवाहाङ्डे़ॽ लुटे़, “के़ॽ हे़निङ इन्डोक्पेॽसो याःॽयानिम्नानि, ‘के़ॽ हे़निङ इन्डोक्पेॽसो लेॽआनिम्नानि’।” 6 मोडोगे़ॽ कानिङे़ॽ मे़ङकिसिरेॽ लुहेन्डुङ्मे़। “परभु का सहायोग ले़ःॽखुबा ले़ये, का किस्सिङानि। याॽमिजिडे़ॽ का इमाङ्सो ले़ःॽहेमिने।” 7 याक्लो हे़निङ निवाहाङ्मि बचन इःॽखुबा अगुवाजि मिडानुमे। बिस्वासबेॽ हिङ्मानुङ खोजिडे़ॽ ले़ःॽपॽआ नुबा खा मिडानुमे, मोबा खोजिडे़ॽ इन्डोक इगो मक्खाम्डेम याःॽयासुजे। हे़निङे़ॽसो मोडोक्नोॽ ले़टानुमे। 8 येसु खिरिस्टगो असेॽङा, आयु, वागिया इन्डोक्पेॽसो इक्कोनोॽ ले़ये। 9 बेॽलो खाल खालहा सिक्छे लेङ्इहा माहा खेम्नुङ ए़फाङ्सिघडानिङे। चामे उङ्मे खामि नियमबाङ ने़ॽनि, निवाहाङ्मिनोॽ अनुग्रहाडे़ॽ हे़निङ्मि निवा बोलियो टोङ्मा चाहिँ नुबा लिये। चामे, उङ्मे नियम पालना ले़ःॽखुबाजिमि भलो असामिसो आयुरो मे़लिडिॽ। 10 कानिङ्मि इक्को थाना टुये, मोबेॽ चेॽटिबॽआ बलिदानमि खा, महा पबित्रा ठाउँबेॽ सेवामि योम्बोक ले़ःॽखुबा याडाङ्बाजिडे़ॽ चामे अधिकार माॽआडे़। 11 चोप्पाङ एप्पा याडाङ्बाडे़ॽ पापमि आम्लाङ ङाःक्मामि लागि जिवातमि हरि महा पबित्रा ठाउँबेॽ लाजे़न्डुए। तर मो जिवातमि हिङा चाहिँ मोबाङ पाखे़ॽयु लाघे़ॽनुङ हिॽइन्डुजे। 12 मोडोक्नोॽ येसुडे़ॽसो खोमटाङ्बामि हरिडे़ॽ याॽमिजिमि पाप वासोक्नुङ पबित्रा टोङ्मामि लागि सहरबाङ पाखे़ॽयुनोॽ सिमा सिॽटा। 13 मोडोगे़ॽ कानिङ्सो टाङ्बामि ठाउँबाङ पाखे़ॽयु खोमि के़क्पेॽ खे़ॽमा, खोसे़ॽ आङ्बॽआ बेजेत कानिङे़ॽसो आङ्मा। 14 इन्ढोङ्होङ इगो मक्खाम्डेमबेॽ कानिङ्मि सानिङ टुडुङ्घे़ये सहर माॽआये। कानिङ्गो ए़क्साङ लेङ्इये सहरमि आसाबेॽ पेङ्इटिङ्मे। 15 मोडोगे़ॽ कानिङे़ॽ येसुमि निङ्बेॽ सानिङ्मु निवाहाङ ओहाङ्मि बलि चेॽटिमा। इगो ओहाङ चाहिँ खोमि निङ लाघुबाजिडे़ॽ चेॽटिबॽआ याबुकमि भेटि ले़ये। 16 इक्कोसे़ॽ हाइकोमि लागि भलाइमि योम्बोक ले़ःॽमा ए़लेडानुमे, मोबा टाङ्बानुङ टुहा खा हाःजासानुमे, इन्ढोङ्होङ निवाहाङ्डे़ॽ नेन्जाबॽआ बलिदान इगोनोॽ ले़ये। 17 हे़निङ्मि अगुवाजिडे़ॽ लुबॽआ खा खेप्सानुमे, मोबा खोजिमि अधिनबेॽ पेनानिङे। माहाजिडे़ॽ हे़निङ्मि रेखदेख ले़न्डुजे। इन्ढोङ्होङ माहाजिडे़ॽ हे़निङ्मि रेखदेख ले़न्डुजेनुङ हे़निङे़ॽ ले़ःॽपॽआ योम्बोकमि लेखा माहाजिडे़ॽ निवाहाङ पिमा खे़ये। माहाजिडे़ॽ लुबॽआ खा खेप्सानुमहोङ माहाजिडे़ॽ साप्थाङ्मानुङ सेवा ले़न्डुजे, निवा टुक्मेॽटानुमहोङ्गो हे़निङ इमाङ्सो नुबा लिनिबा। 18 कानिङ्मि लागि पारथना ले़टानुमे। कानिङे़ॽ बिस्वास ले़न्डुङ्मे, कानिङ्मि होङ्सिॽयुए निवा चोखो ले़ये, इन्ढोङ्होङ कानिङे़ॽ सानिङ नुबा योम्बोक ले़ःॽमारेॽ मिॽइन्डुङ्मे़। 19 निवाहाङ्डे़ॽ का चान्डोनोॽ हे़निङ्नुङ चुप्मेॽरो लुनुङ हे़निङे़ॽ पारथना ले़पेॽमाजे। 20 हागो सामुजिमि महान गोठ्लानुङ टाङ्बामि हरिडे़ॽ सानिङ टुडुङ्घे़ये हेन्ज्रुङ पुरा ले़ःॽखुबा कानिङ्मि परभु येसु सिबॽआबाङ सान्तिदाङ्बा निवाहाङ्डे़ॽ, 21 हे़निङ चोप खालहा नुबा खाबेॽ पक्का लिमामि सहायात ले़ःॽरो, मोबा निवाहाङ्डे़ॽ नेन्जोन्डुए खा येसु खिरिस्टबाङ खोसे़ॽ हे़निङ्बेॽ पुरा लिरो। खोमि महिमा युग युगठोक लिरो। आमेन। 22 वावानिसानुङ नानुसाजि, के़ॽ हे़निङ बिन्ति ले़निम्ने़, हे़निङे़ॽ इघा अरति खेप्सानुमे, इन्ढोङ्होङ के़ॽ हे़निङ्मि लागि इगो ने़क्ने़क्मा पत्रा साप्मिटुङे। 23 कानिङ्मि निसा तिमोथि से़क्सिघे़ॽपॽआबाङ लेॽपेबॽआ खा हे़निङ लुनिम्ने़। तिमोथि चान्डोनोॽ इगोबेॽ लेङ्होङ खोसो कानुङ्सोरि हे़निङ्बेॽ चिॽआप्मिनुङे। 24 मन्डलिबेॽहा चोप अगुवाजिनुङ निवाहाङ्मि पबित्रा सेवाकजि कानिङ्मि सेवा लुबेॽमाजे। इटालिया देसबेॽहा वावानिसानुङ नानुसाजिडे़ॽसो हे़निङ सेवा लुहाङ्इटामे। 25 निवाहाङ्मि अनुग्रहा हे़निङ चोपनुङ सानिङ टुडुङ्घे़ॽरो। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.