हिब्रु 12 - याम्फुनिवाहाङ्मि चेतावनि 1 खिम्मिॽवाडे़ॽ टे़क्डिडोॽ कानिङ्मि खिरिरि बेॽलो साक्छिजि टुम्मे। मोडोगे़ॽ कानिङ्मि राम्बेॽ लेङ्इहा खाल खालहा रिहानुङ हाप्सेॽखुबा पाप कोसेॽनुङ निवाहाङ्डे़ॽ कानिङ पिबॽआ योम्बोक नुरोॽ पुरा ले़ःॽमा खे़ये। 2 कानिङ्मि बिस्वास तरिक्खुबानुङ मो पुरा ले़ःॽखुबा येसुलाम खाङ्मा। खोसे़ॽ खोमि पोम्बेॽ युङ्बेॽपॽआ काप्सिङ्मि खेः खाङ्नुङ ए़ङ्गुवालाम मे़न्सेना। मोमि साटो खेः आङ्नुङ ए़क्साङ चुप्मिये हाङ्हाङ्मि लागि काप्सिङ्बेॽ बेजेत आङ्सिॽ पोरोगा। आइ खो निवाहाङ्मि पेन्ढाममि चुप्थिङ्लाम पेङ्इटे़। 3 माहा पापि याॽमिजिबाङ मोढे़ॽलो बिरोधनुङ खेः आङ्खुबा येसु मिॽखाक्सानुमे, मोबा हे़निङ याःक्चाघडानिङ्निनुङ हरेस चासानुम्नि। 4 हे़निङे़ॽ पापमि बिरोधबेॽ ङे ले़ःॽमाबेॽ सिमानोॽको मे़न्सिॽटि। 5 निवाहाङ्डे़ॽ हे़निङ खोमि पसाजि लुडिडोॽ लुनुङ इडोॽ अरति पिबॽआ हे़निङे़ॽ मिन्डेडानुमे ? “होउ के़हा पसाजि, परमपरभु निवाहाङ्मि अरति हेला ए़ले़टानुमे, खोसे़ॽ योप्माबेॽ हरेस ए़च्चासानुमे। 6 इन्ढोङ्होङ खोसे़ॽ नम्नम मिप्पॽआ याॽमिजि खोसे़ॽ योप्सो योप्इन्डुजे, मोबा खोसे़ॽ पसाजि मिॽपॽआ दन्डासो पिन्डुजे।” 7 खेः आङ्मा सिॽमाबेॽ पाबाडे़ॽ कानिङ नुबा मरामबेॽ लाघे़ॽमामि लागि इडोॽ ले़ःॽपॽआ लुनुङ मिडानुमे। निवाहाङ्डे़ॽ हे़निङ खोमि पासजिडोॽ बेबहार ले़ये। इक्को पाबाडे़ॽ खोमि पसाजि तहबेॽ टिसुजिनेन्डे ? 8 खोसे़ॽ हे़निङ टाङ्बामि पसाजिडोॽ तहबेॽ मे़न्डिसानिङ्होङ्गो हे़निङ खोमि पसाजि ले़टानिङ्नि, तर हाइखाजिमि पसाजि ले़न्डानिङे। 9 मक्खाम्डेमबेॽए कानिङ्मि पाबा मामाडे़ॽ कानिङ तहबेॽ युङ्इयेनुङ कानिङे़ॽ खोजि आदर ले़न्डुङ्मा। कानिङ्मि आत्मिक पाबा निवाहाङ्मि अधिनबेॽको छना बेॽलो पेम्मा खे़ये। 10 कानिङ्मि पाबाजिडे़ॽ खोजिडे़ॽ नुबा मिॽपॽआडोॽ कानिङ इक्याक नियाकमि लागि तहबेॽ युक्सा, तर निवाहाङ पाबाडे़ॽ कानिङ सानिङ्मि भलाइमि लागि मोबा खोडोक्नोॽ पबित्रा लिहेसिरो लुनुङ्नोॽ कानिङ तहबेॽ युङ्इये। 11 कानिङ तहबेॽ टिमाबेॽ बेॽलो दुःख आङ्मा खे़ये। तर इगोसे़ॽ कानिङ तहबेॽ पेङ्घुबाजि निवाहाङ्मि पोम्बेॽ नुबा टोङ्इयेनुङ धारमिक सान्तिनुङ्हा टोङ्इये। अरतिनुङ चेतवानि 12 मोडोगे़ॽ याःक्चाघे़ॽपॽआ हुक ठेडानुमे। थुरुरु योङ्मे़ॽनिङ्सिहा टुम्रुक बोलियो टोङ्मा। 13 सोझो मरामबेॽ सानिङ राप्सानिङे, मोबाङ थोप्थोप्मा टुम्रुक बोलियो टोक्सानुमे। 14 चोप याॽमिजिनुङ सान्तिबेॽ पेनानिङेनुङ पबित्रा लिनुङ हिङ्मामि बोल ले़टानिङे। पबित्रा मे़लिरेॽ असे़ॽसो परमपरभु खाङ्डोक्टुनिबा। 15 चङ्खो पेनानिङे, असे़ॽसो निवाहाङ्बाङ चुप्पॽआ अनुग्रहा मे़चोबेमा मे़न्सिॽरो, हे़निङ्मि रुम्बेॽ निवा टुक्मेॽखुसे़ॽ चुनुङ खिमावा मे़म्पुक्लो, टुक्पॽआ निवाबेॽ युम ए़ॽटिमे, मोसे़ॽ हाइखा याॽमिजि असुद्ध टोङ्इन्डुजे। 16 हे़निङ असासो छाडा ए़लिसानिङे, मोबा एसाबडोॽ निवाहाङ्मि ले़ख्खो मे़ले़ःॽखुबा ए़लिसानिङे, इन्ढोङ्होङ खोसे़ॽ इक्छाक चामाबेॽ खोमि टुम्मि अधिकार इन्जोबेसु। 17 हे़निङे़ॽ लेन्डानुमे ए़क्साङ खोसे़ॽ आसिस चुप्मा योक्माबेॽसो खोसे़ॽ मे़न्चुप्हेसु। इन्ढोङ्होङ खोसे़ॽ पस्चातापसो मे़ले़ःॽटोक्टु। खोसे़ॽ इन्जाबॽआ अधिकार बेॽलो हाःप्मानुङ टेमा योक्माबेॽसो मे़न्चुप्टु। 18 हे़निङ्गो हुगे़ॽ के़क्हेये सिनै सुम्लाखाबेॽ लेम्बॽआ ने़ॽनिबा, हे़निङ मिमि अघेटि हाङ्ढाम, मक्खुइक्मा सेन्जुगुपनुङ किस्सिमारोमा फुइक्सुमामि के़क्पेॽ मे़लेन्डिॽटानिङ। 19 तुरहिमि बेॽए सेम्लामि के़क्पेॽ, मोबा इक्को बेॽए सेम्ला मे़खेम्डिॽटानुमे, मो सेम्ला खेम्खुबाजिडे़ॽ “हागो इगोबाङ बेॽलो इक्कोसो बचन मे़इःसुरो” लुनुङ बिन्ति ले़टुजि। 20 इन्ढोङ्होङ “मो सुम्लाखा जिवातजिडे़ॽसो के़गुजिहोङ रुङ्गोॽवाडे़ॽ फेङ्नेमे” लुमे आग्या माहाजिडे़ॽ मे़आङ्हेसुजि। 21 मो खाङ्माबेॽ किस्सिमारोमा ले़टे़। मोडोगे़ॽ मोसाडे़ॽसो इडोॽ लुटुए, “कागो किस्सिमे़ॽ योङ्मे़ॽनिङ्सिङे।” 22 तर हे़निङ्गो सियोन सुम्लाखाबेॽ लेङ्इटानिङे, हिङ्रिक निवाहाङ्मि सहरबेॽ लेङ्इटानिङे, थाङ्सिरिडोॽमा यरुसलेमबेॽनुङ बेॽलो थाङ्सिरि दुतजिमि रुम्बेॽ लेङ्इटानिङे। 23 हे़निङ निवाहाङ्मिनोॽ टुम्मि हक चुप्खुबाजिमि मन्डलिबेॽ लेङ्इटानिङे, खोमि निङ थाङ्सिरिबेॽसो साप्पॽआ ले़ये। हे़निङ चोप याॽमिजिमि न्याय ले़ःॽखुबा निवाहाङ्बेॽ लेङ्इटानिङे। परिपक्का टोङ्बॽआ धारमिक याॽमिजिमि रुम्बेॽ लेङ्इटानिङे। 24 याॽमिनुङ निवाहाङ्मि रुम्बेॽ चोङ हेन्ज्रुङ हे़न्खुबा येसुमि पोम्बेॽ लेङ्इटानिङे। हे़निङ हाबिलडे़ॽ चेॽटिबॽआ हरिबाङ्सो बेॽलो नुबा हेन्ज्रुङ हे़न्खुबा येसुमि हरिबेॽ लेङ्इटानिङे। 25 होसियार पेनानिङे, असा यामुमे़ॽनिङ्सिये, खो हेला ए़ले़टानुमे। इन्ढोङ्होङ मक्खाम्डेमबेॽ चेतावनि खा पिघुबाजि हेला ले़ःॽखुबाजि लेॽखे़ॽहेमिनेहोङ थाङ्सिरिबाङ होसियार ले़टानिङे लुबॽआ खा हेला ले़टुङ्माहोङ कानिङ इन्डोक्टे लेक्खे़ॽहेन्डिङ्मा ? 26 सिनै सुम्लाखाबेॽ निवाहाङ यामुमाबेॽ मक्खाम्डेमनोॽ योक्सा। हागोगो खोसे़ॽ इडोॽ लुनुङ हेन्ज्रुङ हे़न्इटुए, “के़ॽ इगो मक्खाम्डेमरेॽनोॽ ने़ॽनि थाङ्सिरिनोॽ योङ्रो हागोसो इक्खेॽ इगिॽयुनुङ मिॽयु हिॽइनुङे।” 27 “हागोसो इक्खेॽ” लुबॽआ खाडे़ॽ सिरिस्टि ले़ःॽपॽआ खा नासि लिहा, तर मे़सोङ्घुबा खा चाहिँ टुडुङ्घे़हा। 28 मोडोगे़ॽ इगिॽयुनुङ मिॽयु हिॽहेनिबा राज्य चुप्पॽआ खामि लागि कानिङ साप्थाङ्मानुङ निवाहाङ ओहाङ पिमा, मोबा कानिङ भक्तिनुङ आदरनुङ निवाहाङ्मि ओहाङ ले़ःॽमा। 29 इन्ढोङ्होङ कानिङ्मि निवाहाङ्गो हिॽनुङ खरानि टोङ्खुबा मिडोॽ ले़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.