हिब्रु 11 - याम्फुबिस्वासमि नमुना 1 बिस्वास ले़ःॽमा लुबॽआ चाहिँ आसा ले़ःॽपॽआ खाबेॽ ढुक्का लिमानुङ मे़ङ्खाङ्बॽआ खाबेॽ पुरा भरोसा ले़ये। 2 याक्लोहा कानिङ्मि टुबालाबाजि खोजिडे़ॽ ले़ःॽपॽआ बिस्वासडे़ॽ ले़ःॽमे़ॽनोॽ निवाहाङ्डे़ॽ नेन्जोसुजि। 3 बिस्वासबाङ्नोॽ कानिङे़ॽ ले़ःॽहेन्डुङ्मे, निवाहाङ्मि बचनबाङ्नोॽ मक्खाम्डेम सिरिस्टि लिसा। कानिङे़ॽ खाङ्बॽआ खा चोप थोक खाङ्मुनिहा खाबाङ सिरिस्टि लिसा। 4 इगो बिस्वासमि भोरडे़ॽनोॽ कयिनडे़ॽ चेॽटिबॽआ बलिदानबाङ्सो नुबा बलिदान हाबिलडे़ॽ निवाहाङ चेॽटिसु। मो बिस्वासडे़ॽनोॽ खो निवाहाङ्मि पोम्बेॽ धरमि लिहेसा। हबिल सिघे़टे़ तरसो आयु खोमि नुबा बिस्वासमि खाडे़ॽ कानिङ सिक्छे पिये। 5 बिस्वासडे़ॽनोॽ हनोक लुमे याॽमि मे़सिरेॽनोॽ निवाहाङ्डे़ॽ थाङ्सिरिॽटु चिॽखे़ॽटु, खो असे़ॽसो इगो मक्खाम्डेमबेॽ मे़न्चुप्टुजि। धारमिक नेॽचिराडे़ॽ इडोॽ लुये, “खोमि बिस्वासडे़ॽनोॽ निवाहाङ्डे़ॽ खो नेन्जोसु, मोबा निवाहाङ्डे़ॽ लाघे़ॽटु।” 6 बिस्वास मे़ले़ःॽलेॽ असे़ॽसो निवाहाङ साप्थाङ्मेॽहेसुनिबा, इन्ढोङ्होङ निवाहाङ्बेॽ लेङ्घुबाजिबेॽ बिस्वास टुमानोॽ खे़ये। निवाहाङ टुये, मोबा खो योक्खुबाजि खोसे़ॽ इनाम पिन्डुजे लुनुङ बिस्वास ले़ःॽमा खे़ये। 7 बिस्वास ले़ःॽनुङ्नोॽ नोआडे़ॽ निवाहाङ्मि चेतावनि खेप्सु। खाङ्नोॽ मे़ङ्खाङ्बॽआ तर ए़क्साङ लिये खामि टुम्बेॽ निवाहाङ्डे़ॽ खो लुबॽआ ले़टे़। खोसे़ॽ निवाहाङ्डे़ॽ लुबॽआ खा खेम्नुङ इक्को बेॽएम्मा सिङ्बुमि योङा जाहाज टोक्सु, मोबा मो होङ्सिॽयु खोमि जहानजि युङ्नुङ जोगबा ले़टुजि। इडोॽ खोसे़ॽ मक्खाम्डेममि आप्टिक खाङ्मुसु। टाङ्बा चाहिँ निवाहाङ्मि पोम्बेॽ धरमि याॽमि ठहरबा लिसा। 8 बिस्वास ले़ःॽनुङ्नोॽ निवाहाङ्डे़ॽ लुबॽआडोॽ अब्राहामडे़ॽ ले़टु। निवाहाङ्डे़ॽ हेन्ज्रुङ हे़म्बॽआ देसबेॽ खडे लुनुङ खो लुसु। मो ठाउँ मे़लेरेॽ खो खडे लुबॽआ ठाउँबेॽ खो राम्बुगा। 9 बिस्वासमि भोरडे़ॽनोॽ अब्राहाम खडा मोबा इक्को परदेसिडोॽ गोठा आङ्नुङ पेना। मो देसबेॽ इसहाकनुङ इसहाकमि पसा याकुबसो खोम्बाडोक्नोॽ गोठाबेॽ पेना। खोजिसो अब्राहामनुङ्सोरि मोनोॽ हेन्ज्रुङ्मि हकदार ले़टामे। 10 इन्ढोङ्होङ खोसे़ॽको ए़क्साङ्ठोक नासि लिनिबा बोलियो जगनुङ्मा सहर हुङ्मे़ॽनिङ्सिडुए। सहर टोङ्खुबागो निवाहाङ्नोॽ ले़ये। 11 बिस्वासमि भोरबेॽनोॽ साराडे़ॽ मोढे़ॽलो ठाॽमा लिबेमाबेॽसो पसा टोक्मे सक्ति चुप्हेसु। इन्ढोङ्होङ निवाहाङ्डे़ॽ लुबॽआ खाबेॽ अब्राहामडे़ॽ बिस्वास ले़ःॽपॽआ ले़टे़। 12 मोडोगे़ॽ सिसिॽपोरोक्पॽआ इक्को ठाॽपा याॽमि अब्राहामबाङ नान्द्रुङ्माबेॽहा साङ्गेजिडोक्नोॽ बेॽलोनुङ माहोङ्मामि के़क्पेॽहा नेॽनोनेॽहेनिहा रुङ्गुवासे़ॽवाडोॽ पसाजि लिसामि। 13 इघा चोप याॽमिजिगो निवाहाङ्डे़ॽ पिनुङे़ लुनुङ हेन्ज्रुङ हे़म्बॽआ खा मे़न्चुप्लेॽ बिस्वास ले़ःॽमारोनोॽ सिघडामि। तरसो खोजिडे़ॽ मो खा चुप्पॽआनोॽ मिॽनुङ बिस्वास ले़टुजि। खोजि टाङ्बा इगो मक्खाम्डेमबेॽ नियाकमि चाबाङ ले़टामे। 14 इडोक्हा खा इःघुबा याॽमिजिडे़ॽको टाङ्बामिनोॽ इक्को देस योक्मे़ॽनिङ्सिडुजे लुमे खा लेहेये। 15 खोजिडे़ॽ याःॽयाबॽआ खोजिमि देस खोजिडे़ॽ सानिङ मे़मिडुजि। मो देसनोॽ सानिङ मिॽपॽआ ले़टाहोङ्गो खोजि टेघे़ॽहेसामि। 16 तर खोजिडे़ॽको मो देसबाङ्सो थाङ्सिरि देसबेॽ खे़ॽमा मिनामे। मोडोगे़ॽ निवाहाङ्डे़ॽ माहाजिमि निवाहाङ ले़ङे लुमासो मे़ङेसिडा, इन्ढोङ्होङ खोसे़ॽको माहाजि पिमे सहर पोरोक्युङ्बॽआ ले़टे़। 17 निवाहाङ्डे़ॽ अब्राहाममि बिस्वासमि जाँच लिमाबेॽ अब्राहामडे़ॽसो टाङ्बामि बिस्वासबाङ्नोॽ खोमपसा इसहाक बलि पिमामि लागि पोरोगु। निवाहाङ्डे़ॽ खो खोमि पसा इसहाकबाङ्नोॽ हे़ने़हा पसाजि लिम्मे लुनुङ हेन्ज्रुङ हे़म्बॽआ ले़टारोसो, अब्राहामडे़ॽ खोमि इक्कोमा पसा बलि पिमा पोरोगा। 18 निवाहाङ्डे़ॽ अब्राहाम इडोॽ लुनुङ हेन्ज्रुङ हे़म्बॽआ ले़टा, “इसहाकबाङ्नोॽ हे़ने़हा पसाजि लिम्मे।” 19 निवाहाङ्डे़ॽ इसाहाक सिबॽआबाङ्सो हिङ्बुक्हेन्डुए लुमे खाबेॽ अब्राहामडे़ॽ बिस्वास ले़टु, मोबा चइबानोॽ निवाहाङ्डे़ॽ लुबॽआडोॽ बलि पिसिॽपोरोक्माबेॽ सिघे़ॽपॽआबाङ हिङ्बोक्पॽआडोॽ अब्राहामडे़ॽ खोमपसा चुप्टु। 20 बिस्वासबाङ्नोॽ इसहाकडे़ॽ खोमि पसाजि याकुबनुङ एसाबमि टुम्बेॽ ए़क्साङ लिहा खामि लागि आसिस पिसुजि। 21 बिस्वासमि भोरबेॽनोॽ सिमा बेलाबेॽ याकुबडे़ॽ टोङ्इराबेॽ ने़न्नुङ निवाहाङ्मि ओहाङ ले़टु, मोबा योसेफमि चोप पसाजि आसिस पिसुजि। 22 बिस्वासमि भोरडे़ॽनोॽ योसेफडे़ॽ टाङ्बा सिसिॽपोरोक्माबेॽ इस्राइलिजि मिस्रा देस लेॽआमे खामि टुम्बेॽ लुबॽआ ले़टे़। ए़क्साङ हे़निङ टेघे़ॽमाबेॽ काङ्मि सिगुयाकसो लाघे़ॽमे लुओसुजि। 23 बिस्वासमि भोरबेॽ, मोसामि पाबा मामाडे़ॽ मोसा टोक्नुङ्सो सुम महिनाठोक चुम्नुङ युक्सुजि। मोसा खाङ्माबेॽ रिङ्घिबा ले़टे़न्से़ॽ हाङ्बामि हुकुमबाङ्सो मे़ङ्किस्सिडामि। 24 मोसा वेन्जा लिनुङ ए़क्साङ बिस्वासमि भोरबेॽनोॽ हाङ्बा फारोमि सम्समपसामि पसा लिमा मे़ङ्खसिडा। 25 इॽछोॽमि लागि पापि सुखबेॽ साप्थाङ्माबाङ नुबा निवाहाङ्मि याॽमिजिनुङ दुःख आङ्मानोॽ खोसे़ॽ नेन्जोसु। 26 मिस्रा देसबेॽहा याङ्सरावाबाङ नुबा खा चाहिँ खिरिस्टमि लागि सिॽचामा खेः आङ्मानोॽ नुबा मिॽटु। इन्ढोङ्होङ मोसाडे़ॽ खोमि निवा ए़क्साङ चुप्मे इनामबेॽ टिबॽआ ले़टे़। 27 बिस्वासमि भोरबेॽनोॽ फारो हाङ्बामि सुरिकमिसो ले़क्खो मे़ले़ःॽलेॽ मोसाडे़ॽ मिस्रा देससो याःॽयानुङ निवाहाङ्नोॽ चुप्टिडोॽ भरोसा ले़ःॽनुङ ए़ङ्गुवालाम मे़न्टेसा। 28 नास ले़ःॽखुबाडे़ॽ टुम्मि पसाजि मे़ङ्के़क्हेसुरो लुनुङ बिस्वासमि भोरबेॽनोॽ मोसाडे़ॽ छुट्कारामि चाडमि बिधि पालन ले़ःॽनुङ राम्डेमबेॽ हरि टिसु। 29 बिस्वासमि भोरबेॽनोॽ इस्राएलिजि हररामा माहोङ्मामि रुम्बाङ ओबानो भुइबाङ मेए़रेङ खडामि। तर मिस्रा देसबेॽहा याॽमिजि चाहिँ मोबाङ्नोॽ मेए़रेङ खे़ॽमाबेॽ माहाजि चोप माहोङ्माबेॽ हुम्सिघडामि। 30 बिस्वास ले़ःॽपॽआसे़ॽनोॽ साता इक्कोठोक यरिहोमि परखाल खिरिरि वेङ्माबेॽ मो परखाल योघडा। 31 बिस्वास ले़ःॽपॽआसे़ॽनोॽ बेस्या योम्बोक ले़ःॽखुबा राहाब लुमे मेॽनामिॽडे़ॽ खुस्रिङ्मु खा खुसिॽ लेङ्खुबा इस्राएलिजि हिङ्माराप्टुजि मोबा खोमदाङ्बासो हिक्सा। 32 इगोबाङ बेॽलो हागो के़ॽ इमाङ लुमे ? इन्ढोङ्होङ गिदोन, बाराक, यिप्ता, सिमसोन, दाउद सामुएलनुङ अगमबक्ताजिमि टुम्बेॽ लुयाक्हेसुङ्नि। 33 बिस्वासमि भोरडे़ॽनोॽ माहाजिडे़ॽ बेॽलो देस हेजानुङ राज्य ले़टुजि। निवाहाङ्डे़ॽ पिनिम्ने़ लुनुङ हेन्ज्रुङ हे़म्बॽआ खा चुप्टुजि। बिस्वासडे़ॽनोॽ माहाजिडे़ॽ किबामि याबुक हिप्चुम्बेॽटुजि। 34 माहाजिडे़ॽ मि राप्लवा सेडुजि, फेयामि धारबाङ लेक्खडामि, थोःप्थोप्हाजि बोलियो लिसामि, ङे ले़ःॽमाबेॽ साहस लिनुङ हाइको देसबेॽहा तिरिङ्गाजि हेजोसुजि। 35 बिस्वासडे़ॽनोॽ मेॽनामिॽचिडे़ॽ सिबॽआ टाङ्बाङ्जि हिङ्बोक्पॽआ चुप्टुजि। हाइखा इन्डोक जनाजिडे़ॽ चाहिँ सिनुङ ए़क्साङ फेरि हिङ्बोक्नुङ्सो छना नुबा हिङ्मवा चुप्मामि लागि खेः आङ्साङ सिमा मिनामि। 36 इन्डोक जनाजिडे़ॽ सिःक्चामा खेः आक्सुजि, कोररामि मोःक्मा खेः आक्सुजि, मोबा हाइखाजिडे़ॽ चाहिँ हिःक्मा खेःनुङ तिरिङ्गा खिमबेॽ से़क्सिघे़ॽमा सिॽटामि। 37 याॽमिजिडे़ॽ खोजि रुङ्गोॽवाडे़ॽ फे़ङ्नेसुजि, आराडे़ॽ चिसुजि, फेयाडे़ॽ चेनुजि। माहाजिडे़ॽ गरिब लिनुङ सामुनुङ यासुबाजिमि साउकडे़ॽ हिङा टे़गुजि, मोबा थिचोमिचोबेॽ सिॽनुङ दुःख आङ्साङ वइडुमा सिॽटा। 38 मक्खाम्डेम खोजिमि लागि पेम्मारोमा मे़लिसा। माहाजि रे़क्रे़क्मा ठाउँराजि, सुम्लाखाराजि, रुम्मुकराजि, गुफा राजि पेन्डुमा सिॽटा। 39 माहाजि चोपमि बिस्वास खाङ्नुङ निवाहाङ साप्थक्सा, तर निवाहाङ्डे़ॽ पिनिम्ने़ लुबॽआ खा चाहिँ मे़न्चुप्टुजि। 40 निवाहाङ्डे़ॽ कानिङ्मि लागि इगोबाङ्सो बेॽलो नुबा खामि बोन्दो बस्तो ले़ःॽपॽआ ले़टा। कानिङ्नुङ्नोॽ माहाजिसो पक्का लिमिरो लुनुङ मिॽपॽआ ले़टा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.