हिब्रु 10 - याम्फुचोप याॽमिजिमि लागि खिरिस्ट इक्खेॽपेॽ बलि लिसा 1 इन्ढोङ्होङ यहुदि धारमिक नियम हागो लेङ्इये नुबा खामि चाइबमा नरिङ ने़ॽनिबा, तर मोमि लावारेॽनोॽ ले़ये। मोडोगे़ॽ सानिङ बलि लामानुङ निवाहाङ्मि के़क्पेॽ लेङ्घुबा याॽमिजिसो मो बलिडे़ॽ चोखो टोङ्हेसुनिबा। 2 माहा जिवातमि हरिडे़ॽ याॽमिमि पाप वासोक्हेसुहोङ्गो इन्ढोङ फोरेन फोरेन बलि चेॽटिमा पाप्टे़ ? माहा चेॽटिखुबा याॽमिजिमि पाप बलिमि हरिडे़ॽ वासोक्खडाहोङ्गो माहाजिमि पाप इकखेॽपेॽनोॽ वासोक्खडे़न्डि, मोबा ए़क्साङ खोजिमि निवाबेॽ पापनोॽ मे़लेम्मा खडे़न्डि ? 3 तर माहा बलिडे़ॽको याॽमिजि सानिङ्मु पाप मिॽमा राप्मिये। 4 इन्ढोङ्होङ पिक पसानुङ बोकामि हरिडे़ॽ याॽमिजिमि पाप वासोक्हेसुनिबा। 5 मोडोगे़ॽ मक्खाम्डेमबेॽ खिरिस्ट उङ्माबेॽ खोसे़ॽ निवाहाङ इडोॽ लुसु, “हे़न भेटिनुङ बलि चाहिँ मे़म्पाप्टा, तर हे़ने़ॽ के़ए़ हिङा बलिमि लागि का पिटिङे। 6 हिॽनुङ पिबॽआ बलिनुङ पापबाङ चोखो लिमामि पिबॽआ बलिबेॽ हे़न साप्थाङ्निबा।” 7 मोडोगे़ॽ के़ॽ इडोॽ लुसुङ, “हे निवाहाङ, का हे़ने़ए़नोॽ पोम्बेॽ टुङे, मो धारमिक नेॽचिराबेॽ काङ्मि टुम्बेॽ साप्पॽआडोक्नोॽ हे़ने़ॽ मिॽपॽआ खा पुरा ले़ःॽसिॽ लेङ्इटिङे।” 8 याक्लो खिरिस्टडे़ॽ लुसा, “हिॽनुङ चेॽटिबॽआ बलिडे़ॽ हे़न साप्थाङ्निबा।” इघागो यहुदि धारमिक नियमडे़ॽ लुबॽआ बिधिरेॽनोॽ ले़हा। 9 मोबा ए़क्साङ खिरिस्टडे़ॽ लुसु, “हे निवाहाङ, का हे़ने़ॽ ले़ःॽमा मिॽपॽआ योम्बोक पुरा ले़ःॽसिॽ लेङ्इटिङे।” निवाहाङ्डे़ॽ याक्लोमा नियमबेॽहा बलि नास ले़ःॽनुङ मो नियममि साटोबेॽ खिरिस्टमि बलि युङ्बेॽटा। 10 निवाहाङ्डे़ॽ मिॽपॽआ मो योम्बोक येसु खिरिस्टमि इकखेॽ चेॽटिबॽआ बलिबाङ पुरा लिसा। खोमि मो बलिबाङ कानिङ चोप पापबाङ पबित्रा टोक्सा। 11 चोप याडाङ्बाजिडे़ॽ इक्कोनोॽ खालमा बलि मन्दिरबेॽ फोरेन फोरेन चेॽटिनुङ खोमि सेवामि योम्बोक ले़न्डुजे, तर इडोक्हा बलिडे़ॽ याॽमिजिमि पाप वासोक्हेसुनि। 12 तर खिरिस्टडे़ॽको पाप वासोक्मामि इकखेॽपेॽ सानिङ्मि लागि बलि चेॽटिसु, मोबा खो निवाहाङ्मि चुप्थिङ्लाम पेङ्इटे़। 13 हागो निवाहाङ्डे़ॽ खोमि सतुरजि खोमि सराङ्फे़क्माहोङ्बेॽ मे़युङ्सेॽलो खोसे़ॽ मोबेॽनोॽ हुङ्इन्डुए। 14 पापबाङ चोखो टोङ्बॽआजि चोप खोमि इक्को बलिडे़ॽ सानिङ्मि लागि चोखो लिनुङ पक्का लिमामि टोङ्इटुजे। 15 पबित्रा होङ्निवाडे़ॽसो कानिङ साक्छि पिसाङ लुये, 16 “परमपरभु निवाहाङ्डे़ॽ लुये, ‘लेङ्इहा याकपेॽ माहाजिनुङ काङ्मि चोङ हेन्ज्रुङ चाहिँ इगोनोॽ ले़ये। काङ्मि इगो चोङ हेन्ज्रुङ माहाजिमि निवाबेॽ युङ्बेनुङ्हाजि। मोबा इगोबेॽहा खा माहाजिमि निवाबेॽ साप्टिबेनुङ्हाजि’।” 17 मोबा निवाहाङ्डे़ॽ हागोसो लुये, “खोजिडे़ॽ ले़ःॽपॽआ पापनुङ मङे़हा योम्बोक इन्डोक्पेॽसो मिॽटुङ्निहा।” 18 मोडोगे़ॽ इघा चोप पाप आम्लाङ लिसेॽनुङ फेरि पाप वासोक्मामि लागि हाइको बलि पाप्निबा। 19 मोडोगे़ॽ वावानिसानुङ नानुसाजि, येसुमि हरिडे़ॽ ले़ःॽमे़ॽ चोप्पाङ पबित्रा ठाउँबेॽ कानिङ मे़ङ्किस्सिरेॽ खे़ॽहेन्डिङ्मा। 20 परदा हेन्नुङ महा पबित्रा ठाउँहोङ्सिॽयु पे़ए़म्मामि लागि कानिङ चोङ हिङ्मवानुङ हिङ्रिक मराम पिटे़, मो परदा चाहिँ येसु खिरिस्टमि हिङा ले़ये। 21 निवाहाङ्मि खिमबेॽ कानिङ्मि इक्को चोप्पाङ एप्पा याडाङ्बा टुयेन्से़ॽ, 22 कानिङ्मि निवाहोङ्सिॽयुहा मङे़हा खा चोखो लिटहा, मोबा खिरिस्टमि हरिडे़ॽ कानिङ्मि हिङा वासोक्इटुए, मोडोगे़ॽ चोखो निवा, चाइबमा बिस्वासडे़ॽ ढुक्का लिनुङ कानिङ निवाहाङ्मि पोम्बेॽ खे़ॽमा। 23 कानिङे़ॽ आसा युङ्बॽआ खाबेॽ बोलियो लिमा, इन्ढोङ्होङ निवाहाङ्डे़ॽ ले़ःॽपॽआ बाचा खोसे़ॽ इन्डोॽहोङ्सो पुरा ले़न्डुए। 24 कानिङे़ॽ इक्कोसे़ॽ हाइको नम्नम ले़ःॽमा, मोबा भलाइमि योम्बोक ले़ःॽमामि लागि हौसला पिघुसे़ॽचुमा। 25 इन्डोक जनामि सङ्गति खे़ॽमे बानि माॽआये, तर कानिङ चाहिँ सानिङ सङ्गति खे़ॽमा। बोरु परभुमि याक लेङ्सिॽपोरोइटे़ लेनुङ इक्कोसे़ॽ हाइको छना बेॽलो हौसला पिघुसे़ॽचुमा। 26 कानिङे़ॽ चाइबमा खा नुरोॽ लेनुङ्सो फोरेन फोरेन पाप ले़न्डुङ्माहोङ्गो मो पापबाङ आम्लाङ चुप्मामि लागि हाइको बलिनोॽ माॽआये। 27 तर मोडोक्मा किस्सिमारोमा न्यायमिनुङ निवाहाङ्मि सतुर दन्डा पिढाम खेःलोकरेॽ ए़ङ्इये। 28 मोसामि धारमिक नियमडे़ॽ लुडिडोॽ मे़ले़ःॽखुबा याॽमि निप्पाङ अथबा सुम्बाङ साक्छिजिमि खाडे़ॽ लुबॽआडोॽ नम्नावा मे़ले़ःॽलेॽ सेॽनेमा खे़ये। 29 हे़निङे़ॽ मिॽखाक्सानुमे, निवाहाङ्मि पसामि बिरोध ले़ःॽखुबा, पापबाङ आम्लाङ पिघुबा हेन्ज्रुङ पुरा ले़ःॽखुबा खिरिस्टमि हरि सिॽचाघुबा, मोबा टाङ्बा अनुग्रहा ले़ःॽखुबा पबित्रा होङ्निवामि अपमान ले़ःॽखुबा याॽमिडे़ॽ इन्डोक बेॽएम्मा दन्डा चुप्मिन्डु होला ? 30 इन्ढोङ्होङ “इघाजिनुङ साटो लामे योम्बोक के़ॽ ले़नुङे” लुघुबा कानिङे़ॽ लेन्डुङ्मे़। इडोक्सो लुबॽआ ले़ये, “परमपरभुडे़ॽ खोमि याॽमिजिमि न्याय ले़न्डुजे।” 31 हिङ्रिक निवाहाङ्मि हुकपेॽ सिॽमा लुबॽआ चाहिँ चुरोक्नोॽ किस्सिमारोमा खा ले़ये। 32 हे़निङे़ॽ खिरिस्टमि जोति चुप्नुङ ए़क्साङ बेॽलो खेः आक्सानुम, तरसो हे़निङ निरास मे़लिसानिङ। माहा याक मिॽखाक्सानुमे। 33 इन्डोक खेपको हे़निङ याॽमिजिमि रुम्बेॽ चुङ्जासामि, मोबा बेजेत ले़टानिङ, इन्डोकखेॽ हे़निङ्डोॽ चुङ्जामा खेः आङ्घुबाजिमि लङ्गाम लिसानिङ। 34 इन्डोकखेॽ तिरिङ्गा खिमबेॽ से़क्सिघे़ॽपॽआजिमि लङ्गाम लिसानिङ, टाङ्बामि याङ्सरावा ङाप्खे़ॽपेॽमाबेॽसो साप्थाक्सानिङ। इन्ढोङ्होङ हे़निङ्बेॽ चोप्पाङ नुबानुङ इन्डोक्पेॽसो रुक्खे़ॽनिये याङ्सरावा टुये लुनुङ हे़निङे़ॽ लेसानुम। 35 मोडोगे़ॽ हे़निङ्मि बिस्वास बोलियो युक्सानुमे। हे़निङ्मि लागि बेॽए इनाम टुये। 36 निवाहाङ्डे़ॽ नेन्जाबॽआ योम्बोक ले़ःॽमानुङ खोसे़ॽ हेन्ज्रुङ हे़म्बॽआ खा चुप्मामि लागि हे़निङ पक्का लिसानिङे। 37 धारमिक नेॽचिराबेॽ इडोॽ साप्पॽआ ले़ये, “हागो लेङ्घुबा चाहिँ चान्डोनोॽ लेम्बेये, खो ढिलो ले़ःॽनिबा।” 38 “तर के़हा धरमि याॽमिजि चाहिँ बिस्वासबाङ्नोॽ हिङ्इम्मे, तर बिस्वासबाङ टेघे़ॽखुबाजिनुङ का साप्थाङ्ङानिबा।” 39 तर कानिङ्गो बिस्वासबाङ टेघे़ॽखुबाजिनुङ नास लिघुबा याॽमिजि ने़ॽनि, तर निवाहाङ्बेॽ बिस्वास ले़ःॽनुङ हिङ्बॽआ याॽमिजि ले़न्डिङ्मे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.