हिब्रु 1 - याम्फु1 याक्लो याक्लो कानिङ्मि टुबालाबाजिनुङ अगमबक्ताजिमिलामबाङ बेॽलोखेॽ खाल खालहा पाराडे़ॽ निवाहाङ यामुसा। 2 तर इघा ए़क्साङ्ए याकपेॽ खो टाङ्बामि पसामिलामबाङ कानिङ्नुङ यामुटे़। निवाहाङ्डे़ॽ खिरिस्टबाङ्नोॽ चोप खा टोक्सु मोबा खोसे़ॽ टोङ्बॽआ चोप थोकमि अधिकार खिरिस्टनोॽ पिसु। 3 खोबाङ्नोॽ निवाहाङ्मि महिमानुङ्मा उज्यालो पोॽइये। खो निवाहाङ्मि चाइबमा नरिङ ले़ये। खोमि सक्तिनुङ्मा बचनडे़ॽनोॽ नान्द्रुङ्मानुङ मक्खाम्डेमबेॽहा चोप थोक टुन्डुङ्घे़हा। याॽमिजि पापबाङ छुट्कारा ले़ःॽसेॽनुङ खो चोप्पाङ मिन्डुनुङ निवाहाङ्मि चुप्थिङ्लाम पेङ्इटे़। खिरिस्ट चाहिँ थाङ्सिरिदुतजिबाङ्सो महान ले़ये 4 थाङ्सिरिदुतजिबाङ्सो निवाहाङ्मि पसा खिरिस्ट महान ले़ये, इन्ढोङ्होङ निवाहाङ्डे़ॽ “पसा” लुनुङ पिबॽआ निङ चाहिँ माहाजिबाङ महान निङ ले़ये। 5 निवाहाङ्डे़ॽ इन्डोक्पेॽसो इक्को थाङ्सिरिदुत इडोॽ मे़लुसु, “हे़न काङ्मि पसा ले़ये, के़ॽनोॽ हे़न टोॽइटुङे” अथबा खोसे़ॽ इडोक्सो मे़लुडिॽ, “का खोमि पाबा लिङेनुङ खो के़ए़ पसा लिये।” 6 निवाहाङ्मि याक्लो टोक्पॽआ पसा मक्खाम्डेमबेॽ पाङ्माबेॽ इडोॽ लुसु, “के़हा चोप थाङ्सिरिदुतजिडे़ॽ खो ओहाङ ले़टुजिरो।” 7 खोसे़ॽ थाङ्सिरि दुतजिमि टुम्बेॽ लुबॽआ ले़ये, “निवाहाङ्डे़ॽ खोमि थाङ्सिरिदुतजि हिॽवाबा टोङ्इन्डुजे, खोमि सेउतेजि मिमि राप्लवा टोङ्इन्डुजे।” 8 तर पसामि टुम्बेॽ चाहिँ निवाहाङ्डे़ॽ इडोॽ लुटुए, “हे निवाहाङ, हे़ने़ए़ राज्य सानिङ्मि लागि टुडुङ्घे़ये। हे़ने़ॽ न्यायनुङ्मा राज्य ले़न्डुए। 9 हे़ने़ॽ धारमिक खा नेन्जोन्डुएनुङ अधरमि खा सिॽचोन्डुए। मोडोगे़ॽ निवाहाङ, हे़ने़ए़ निवाहाङ्डे़ॽ हे़न खोमि लङ्गामजिबाङ्सो बेॽलो मिन्डु युक्सु, मोबा हाङ्हाङ्मा केवाडे़ॽ अभिसेक ले़ए़टे़।” 10 खोसे़ॽ फेरि लुन्डुए, “हे परमपरभु, हे़ने़ॽनोॽ याक्लो मक्खाम्डेममि चर टोक्सु। हे़ने़ए़ टाङ्बामिन्नोॽ हुगे़ॽ नान्द्रुङ्मा टोक्सु। 11 माहा चोप थोक चाहिँ नासि लिघे़म्मे। तर हे़न चाहिँ सानिङ टुडुङ्घे़ये। टोङ्बॽआ थोकको चोप पुरानो चेॽडोॽ थोत्रो लिघे़हा, 12 हे़ने़ॽ माहाजि ओप्ताङ्डोॽ हिङाबेॽ यिप्इन्डुहा, मोबा माहाजि चेॽडोक्नोॽ फेङ्घे़हा। तर हे़न सानिङ इक्कोनोॽ ले़ये, हे़न इन्डोक्पेॽसो रुक्खे़ॽनिबा।” 13 निवाहाङ्डे़ॽ हाम्बे थाङ्सिरिदुत, “के़ॽ हे़ने़हा सतुरजि हे़ने़ए़ सराङ्फे़क्माहोङ्बेॽ मे़युङ्रो हे़न के़ए़ चुप्थिङ्लाम पेने।” लुनुङ इन्डोक्पेॽ लुसुए ? 14 तर माहा थाङ्सिरिदुतजिगो निवाहाङ्डे़ॽ मुक्ति पिबॽआ याॽमिजिमि सेवा ले़ःॽसिॽ पाङ्बॽआ होङ्निवाजिरेॽ ले़म्मे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.