गलाति 6 - याम्फुचोपमि भलो ले़टानुमे 1 के़हा वावानिसानुङ नानुसाजि इक्को याॽमि अपराधबेॽ सिॽहोङ हे़निङ पबित्रा होङ्निवामि अधिनबेॽ हिङ्घुबाजिडे़ॽ ए़डेम्मा लिनुङ खोमि सुधार ले़टानुमे। खो सुधार ले़ःॽमाबेॽ हे़निङ्टाङ्बासो पाप योम्बोक मे़लिरो लुनुङ टाङ्बा होसियार ले़टानुमे। 2 इक्कोसे़ॽ हाइको सहायोग ले़ःॽखुसे़ॽचुसानिङे, इडोॽ हे़निङे़ॽ खिरिस्टमि नियम पुरा ले़ःॽहेन्डानुमे। 3 नम्नम मे़ॽनिङ्मा तर यहुदि धारमिक नियम पालना ले़ःॽखुबा याॽमिडे़ॽ टाङ्बा बेॽएम्मा मिॽइन्डुहोङ, मोसे़ॽ खोम्टाङ्बा धोका पिन्डुए। 4 चोबे़ॽ टाङ्बामि आनिबानि टाङ्बे़ॽ नुरोॽ खाक्सुजिरो। नुबा ले़ःॽहोङ साप्थाङ्रो, तर हाइखाजिबाङ के़ॽनोॽ नुबा ले़टुङ अथबा कानोॽ नुबा मिॽनुङ बेॽए मे़रे़ङ्रो। 5 इन्ढोङ्होङ चोबे़ॽ टाङ्बामि योम्बोक टाङ्बे़ॽनोॽ ले़ःॽमा खे़ये। 6 बचनमि सिक्छे चुप्खुबाजिडे़ॽ टाङ्बामि चोप नुबा खा खो इःॽखुबानुङ हामा खे़ये। 7 टाङ्बा धोका ए़ॽपिसानुमे; निवाहाङ्गो असे़ॽसो रेम्जाहेसुजिनिबा। इन्ढोङ्होङ याॽमिडे़ॽ इमाङ्मि खेति ले़न्डुए, खोसे़ॽ मोमिनोॽ बालि हे़ॽइन्डुए। 8 असे़ॽ टाङ्बामि हिङामि पापि आनिबानि रिॽइन्डुए, मोसे़ॽ हिङाबाङ सिमवामि बालि हे़ॽइन्डुए। असे़ॽ होङ्निवामि खा रिइन्डुए मोसे़ॽ होङ्निवाबाङ सिघे़ॽनिये हिङ्मवा सुम्इन्डुए। 9 भलाइमि योम्बोक ले़ःॽमामि लागि याःक्चाघे़ॽमा फे़न्निबा, इन्ढोङ्होङ भलाइ ले़टुङ्घे़ॽमाहोङ निवाहाङ्मि बेलाबेॽ आसिस चुप्मिये। 10 मोडोगे़ॽ भलाइमि योम्बोक ले़टोक्मा सोरोॽ कानिङे़ॽ चोप याॽमिजिमि लागि भलाइ ले़ःॽमा खे़ये, चोप्पाङ याक्लो चाहिँ खिरिस्टबेॽ बिस्वास ले़ःॽखुबा याॽमिजिमि भलाइ ले़ःॽमा खे़ये। ए़क्साङ्ए अरति 11 खाक्सानुमे, इघा खा चाहिँ बेॽहा बेॽहा अक्छेरबेॽ काङ्मिनोॽ हुगे़ॽ हे़निङ पत्राबेॽ साप्मिटुङे। 12 पाखे़ॽयुरेॽनोॽ धरमि खाङ्मुमा मिॽखुबाजिडे़ॽनोॽ येॽयेॽ हे़निङ खतना ले़ःॽमा खे़ये लुम्मे। इन्ढोङ्होङ खिरिस्ट काप्सिङ्बेॽ बलि लिबॽआ खाडे़ॽरेॽ छुट्कारा चुप्मिये लुमे टुम्बेॽ परचार ले़ःॽमाबेॽ खोजिडे़ॽ चुङ्जामा खेः आङ्मा मे़न्सिॽलो लुनुङ्रेॽ इडोॽ लुम्मे। 13 इन्ढोङ्होङ खतना लिबॽआजिडे़ॽनोक्सो यहुदि धारमिक नियम पालना ले़टुजिने, तर खोजि खतना ले़ःॽमेॽखुबाजि लिनुङ बेॽहा खा इःमामि लागिरेॽनोॽ हे़निङ खतना ले़ःॽमेम्मे। 14 तर काङ्मि लागि चाहिँ कानिङ्मि परभु येसुमि काप्सिङ्बाङ हाइखा खासोक्पेॽ बेॽहा खा इःसुङ्नि। खोमि काप्सिङ्डे़ॽ ले़ःॽमे़ॽ का मक्खाम्डेममि लागि मोबा मक्खाम्डेम चाहिँ के़ए़ लागि सिघे़टे़। 15 खतना लिमा, अथबा ए़लिमा इमाङ्सो ने़ॽनि, तर निवाहाङ्मि बचनबेॽ बिस्वास ले़ःॽनुङ चोङ सिरिस्टि लिमा चाहिँ बेॽए खा ले़ये। 16 हागो इगो नियम पालना ले़ःॽखुबाजिनुङ निवाहाङ्मि चोप पसाजिबेॽ सान्तिनुङ नम्नावा टुडुङ्घे़ॽरो। 17 हागोएम्बाङ ए़क्साङ असे़ॽसो का दुःख ए़ॽपिमिरो। इन्ढोङ्होङ का येसुमि सेउते ले़ङे लुनुङ लेमामि लागि काङ्मि हिङाबेॽ येसुमि खा इःमाबेॽ याॽमिजिडे़ॽ रोम्बॽआ डाम काप्मिनुङ्हा। 18 काङ्मि वावानिसानुङ नानुसाजि, कानिङ्मि परभु येसु खिरिस्टमि अनुग्रहा हे़निङ्मि होङ्निवानुङ सानिङ टुरो। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.