गलाति 4 - याम्फु1 के़ॽ लुमायोक्पॽआ खा चाहिँ, इक्को याॽमि खोम्बामि याङ्सरावामि हकवाला ले़ःॽहोङ्सो खो ओङे़क ले़ःॽमाबेॽ सेउतेजिडोॽरेॽ लिये। 2 खोमि उमेर मे़युरेॽलो टाङ्बामि पाबाडे़ॽ खो खाङ्मामि युङ्बॽआ याॽमिमि अधिनबेॽनोॽ पेङ्इये। 3 कानिङ्सो याक्लो मो ओङे़कडोक्नोॽ ले़टिङ्मा, मोबा मक्खाम्डेमबेॽहा मे़ॽनोक्हा सिक्छेमि अधिनबेॽ टुसिङ्मा। 4 तर बेला लिनुङ ए़क्साङ निवाहाङ्डे़ॽ खोमि पसा मक्खाम्डेमबेॽ पाक्सु। खो इक्को मेॽनामिॽबाङ यहुदि धारमिक नियममि अधिनबेॽ टोगा। 5 यहुदि धारमिक नियममि अधिनबेॽ टुघुबाजि मोबाङ छुट्कारा ले़ःॽनुङ निवाहाङ्मि पसाजि टोङ्मामिनोॽ खो मो नियममि अधिनबेॽ लिनुङ लेस्सा। 6 कानिङ निवाहाङ्मिनोॽ पसाजि ले़न्डिङ्मा लुनुङ खाङ्मुमामि खोसे़ॽ टाङ्बामि पसामि होङ्निवा कानिङ्मि निवाबेॽ युङ्बेॽटा। मो होङ्निवाडे़ॽ ले़ःॽमे़ॽ कानिङ्मि निवाडे़ॽ “हे अब्बा, हे पाबा” लुन्डुए। 7 मोडोगे़ॽ हागो हे़निङ सेउतेजि ने़ॽनि, निवाहाङ्मि पसाजि ले़न्डानिङे। पसाजि ले़न्डानिङ्होङ्गो निवाहाङ्डे़ॽ पिमामि पोरोक्पॽआ खामि हकवालाजिसो ले़न्डानिङ। पावलडे़ॽ गलातिजि ले़ख्खो ले़ःॽपॽआ 8 हे़निङे़ॽ निवाहाङ लेमा याक्लो मक्खाम्डेमबेॽहा चापजिमि सेउते ले़टानिङ, चइबानोॽ लुमाबेॽ माहाजि निवाहाङ्नोॽ ने़ॽनिहाजि। 9 तर हागोगो हे़निङे़ॽ निवाहाङ लेबेटानुम अथबा निवाहाङ्डे़ॽ हे़निङ लेन्डानिङ, फेरि हे़निङ इन्ढोङ माहा याक्लोहा निवाहाङ्नोॽ ने़ॽनिहाजिबेॽ टेघे़ॽमा मिङ्इन्डानिङे ? हे़निङ फेरि इन्ढोङ माहाजिमि सेउते लिमा मिङ्इन्डानिङे ? 10 हागोरोसो हे़निङ यहुदि धारमिक नियमडे़ॽ लुडिडोॽ याक, महिना, रितुनुङ निङ पबित्रा मिॽखुबा नियम पालना ले़न्डानुमे। 11 का इडोॽ मिङ्इङे, के़ॽ हे़निङ्मि लागि ले़ःॽपॽआ दुःख माङ माङ के़न्डिॽखडे़ ? 12 के़हा वावानिसानुङ नानुसाजि, हे़निङ बिन्ति ले़निम्ने़ हे़निङे़ॽसो हे़निङ्मि याक्लोहा चाल चलन लेॽपेनुङ काडोक्नोॽ फुक्का लिसानिङे, इन्ढोङ्होङ के़ॽसो कानिङ्हा यहुदि धारमिक नियम लेॽपेनुङ हे़निङ्डोक्नोॽ अयहुदि लिटिङे। मोडोक्पेॽ हे़निङे़ॽ का इमाङ्सो मङे़ॽमा मे़ले़टानिङ। 13 हे़निङे़ॽ नुरोॽ लेन्डानुम, चोप्पाङ याक्लो का हे़निङ्बेॽ सुसमाचार खेम्मेॽसिॽ लेम्माबेॽ टुक्मानुङ लेस्सिङे। 14 मोडोक्पेॽ का टुगिङेॽसे़ॽ हे़निङ सारो सिॽपॽआ ले़टानिङे तरसो हे़निङे़ॽको का चिक्चि मे़मिन्रेॽ निवाहाङ्मि दुतनुङ खिरिस्ट ले़टिडोॽ का स्वागत ले़टानिङ। 15 चइबानोॽ मोडोक्पेॽ हे़निङ इन्डोक बेॽलो हाङ्हाङ मिनानिङे, नुडाहोङ मोडोक्पेॽ हे़निङे़ॽ का हे़निङ्मि मिकनोॽ पिमा सिॽहोङ्सो पिमामि पोरोगानिङे। इगो खामि का साक्छि ले़ङे। तर आयु हे़निङ इमा पिॽखडानिङे हाँ ? 16 तर इन्ढोङ आयु चाइबमा खा इमाबेॽ का हे़निङ्मि सतुर लिसिङे ? 17 हे़निङ खोजिलाम से़ॽमामि माहा मे़ॽनोक्हा सिक्छे इःॽखुबाजिडे़ॽ सारोनोॽ पाङ्नुमा निम्मे, तर नुबा निवाडे़ॽ ले़ःॽपॽआ ने़ॽनिबा। हे़निङे़ॽ सारो साप्थाङ्मानुङ माहाजिमि खाबेॽ बिस्वास ले़ःॽमेॽमामि कानिङ्बाङ हे़निङ फक्खे़ॽमा योॽइम्मे। 18 नुबा योम्बोक ले़ःॽखुबा चोबे़ॽ का हे़निङ्नुङ टुमाबेॽरेॽ पाङ्नुमा नुबा ने़ॽनि, का हे़निङ्नुङ माॽआमाबेॽसो हेरो पाङ्नुमा चाहिँ नुबा ले़ये। 19 के़हा ओङे़कजि, हे़निङ खिरिस्टबेॽ परिपक्का मे़लिरो ओङे़क टोक्माबेॽ मेॽनामिॽचिडे़ॽ साबोक्मा खेः आङ्डिडोॽ के़ॽ फेरि हे़निङ्मि लागि खेः आङ्मे़ॽनिङ्सिनुङे। 20 आयुनोॽ आक्कोबेॽ हे़निङ्नुङ टुसिङाहोङ इगोबाङ्सो सारो नुरोॽ लुरेसुङे, ओःबाङ के़ॽ इमाङ ले़ःॽमे ? इन्ढोङ्होङ हे़निङ्मि खा खेम्नुङ का फाङ्सिघे़टिङे। हागारनुङ सारा 21 यहुदि धारमिक नियम पालना ले़ःॽमा मिॽखुबा चोपनुङ के़ॽ सिम्इनिम्ने़। इगो नियमडे़ॽ इमा इमा लुये हे़निङे़ॽ लेसानुम्ने ? 22 इन्ढोङ्होङ नियमडे़ॽ लुये, अब्राहाममि निप्पाङ पसाजि टुसाजे, इक्को सेउतेनिबाङ्ए हाइको चाहिँ सारा लुमे टाङ्बामिनोॽ बनिमाबाङ्ए। 23 सेउतेनिबाङ टोक्पॽआ चाहिँ याॽमिडे़ॽ मिॽपॽआसे़ॽ टोक्पॽआ ले़टा तर खोमि बनिमाबाङ टोक्पॽआ चाहिँ निवाहाङ्डे़ॽ हेन्ज्रुङ हे़न्नुङ टोक्पॽआ पसा ले़टे़। 24 इगो खानवाबाङ कानिङे़ॽ लेहेये, इगो निप्पाङ मेॽनामिॽचिमि टुम्बेॽहा खाबाङ निवाहाङ्मि निच्चि करार लुनुङ लेन्डुङ्मे़। सेउतेनि हागार लुबॽआ सिनै सुम्लाखा ले़ये। मोबेॽ निवाहाङ पाबाडे़ॽ याॽमिजि यहुदि धारमिक नियम पिसुजि, मोबा मो नियमडे़ॽ याॽमिजि सेउते टोक्सुजि। 25 सेउतेनि हागार लुबॽआ अराब देसमि सिनै सुम्लाखाडोॽ ले़ये। यहुदि धारमिक नियम पालना ले़ःॽखुबा हागोए यरुसलेमडोॽ ले़ये। मो नियमलाम खे़ॽखुबाजि सेउतेनिमि पसाजिडोक्नोॽ ले़म्मे। 26 तर हाइको मेॽनामिॽ सारा चाहिँ थाङ्सिरिमि यरुसलेम ले़ये, मोबा कानिङ सारामि पसाजि ले़न्डिङ्मे। 27 धारमिक नेॽचिराडे़ॽ लुये, “होउ, पसा मे़न्टोक्खुबा सारुक्माजि साप्थक्सानिङे, कुम्सुमा खेः मे़लेघुबाजि साप्थाङ्मानुङ वोसानिङे इन्ढोङ्होङ बनिबा काप्खुबामिबाङ्सो बेॽलो पसाजि बनिबाडे़ॽ लेॽपेबॽआमि लिम्मे।” 28 वावानिसानुङ नानुसाजि, कानिङ्सो इसहाकडोक्नोॽ निवाहाङ्डे़ॽ हे़न्ज्रुङ हे़म्बॽआ पसाजि ले़न्डिङ्मा। 29 हिङाडे़ॽ मिॽपॽआबाङ टोक्पॽआ पसा इस्माएलडे़ॽ पबित्रा होङ्निवामि सक्तिडे़ॽ टोक्पॽआ पसा इसहाक चुङ्जोसुए, मोडोक्नोॽ आयुरोसो मोडोक्नोॽ लिमे़ॽनिङ्सिये। 30 तर धारमिक नेॽचिराडे़ॽ इमा लुये ? “सेउतेनिनुङ खोमि पसा यिगानुमे, इन्ढोङ्होङ टाङ्बामि बनिमाबाङ टोक्पॽआ पसाडे़ॽ चुप्मे़ हक सेउतेनिमि पसाडे़ॽ चुप्टुनिबा।” 31 मोडोगे़ॽ के़हा वावानिसानुङ नानुसाजि, कानिङ सेउतेनिमि पसाजि ने़ॽनि, तर पाबामि टाङ्बामिनोॽ बनिमाबाङ्ए पसाजि ले़न्डिङ्मा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.