गलाति 3 - याम्फुयहुदि धारमिक नियमनुङ बिस्वास 1 होउ मे़लेसुम्बा उम्बरिङ गलातिजि, असे़ॽ हे़निङ मोहोनि टिनुङ हे़निङ्मि निवा इडोॽ लिसे़ ? हे़निङ्मि पोम्बेॽनोॽ येसु खिरिस्ट काप्सिङ्बेॽ सिबॽआ खा नुरोॽ हे़निङ लुबॽआ ले़टे़ ? 2 हे़निङ्बाङ इक्को खा खेम्मा मिॽनुङे, हे़निङे़ॽ पबित्रा होङ्निवा इन्डोॽ चुप्टानुमे ? यहुदि धारमिक नियम पालना ले़ःॽनुङ्डे, खेम्बॽआ सुसमाचारबेॽ बिस्वास ले़ःॽनुङ ? 3 हे़निङ इन्ढोङ इडोॽ उम्बरिङ लिटानिङे ? हे़निङ निवाहाङ्मि होङ्निवाबाङ हिङ्मा तरिक्पॽआजि, हागो टाङ्बामि हिङामि चाल चलनबेॽ रुक्खे़ॽमा मिङ्इन्डानिङे ? 4 इमा हे़निङे़ॽ माङ्माङ्नोॽ दुःख अक्सानुमे ? माङ्माङ ने़ॽनिबा। 5 निवाहाङ्डे़ॽ हे़निङ पबित्रा होङ्निवा पियेनुङ मोमि बोलडे़ॽ हे़निङ्मि रुम्बेॽ खरिहा योम्बोक ले़न्डुहा, इमा इघा चोप खा हे़निङे़ॽ यहुदि धारमिक नियम पालना ले़ःॽपॽआसे़ॽ लिबॽआडे, सुसमाचार खेम्नुङ बिस्वास ले़ःॽपॽआसे़ॽ लिबॽआ ? 6 अब्राहामनोॽ खाक्सानुमे, “अब्राहामडे़ॽ निवाहाङ्बेॽ बिस्वास ले़टु मो बिस्वासडे़ॽ खो धरमि ठहरबा लिसा।” 7 मोडोगे़ॽ हे़निङे़ॽ इगो खा लेसानुमे, असा असे़ॽ बिस्वास ले़न्डुजे, माहाजिनोॽ अब्राहाममि पसाजि लिम्मे। 8 अयहुदिजि बिस्वास ले़ःॽनुङ निवाहाङ्मि पोम्बेॽ धरमि ठरबा लिम्मे लुमे खा याक्लोएम्बाङ्नोॽ धारमिक नेॽचिराबेॽ साप्पॽआ ले़टे़। मोडोगे़ॽ याक्लोनोॽ अब्राहाम इडोॽ लुमे सुसमाचार खेम्मेॽपॽआ ले़टे़, “हे़नबाङ्नोॽ चोप जातिहा याॽमिजिडे़ॽ आसिस चुप्मिन्डुजे।” 9 अब्राहामडे़ॽ बिस्वास ले़ःॽनुङ आसिस चुप्टु, इडोक्नोॽ हाइखा याॽमिजिडे़ॽसो बिस्वास ले़ःॽनुङ अब्राहामनुङ सोरि आसिस चुप्मिन्डुजे। 10 यहुदि धारमिक नियम पालना ले़ःॽनुङ धरमि लिमा योक्खुबा चोप याॽमिजिडे़ॽ चापहिमा चुप्मिन्डुजे, इन्ढोङ्होङ धारमिक नेॽचिराडे़ॽ लुये, “यहुदि धारमिक नियमबेॽ साप्पॽआ चोप खा पालना मे़ले़ःॽखुबा याॽमिजिसोक्पेॽ निवाहाङ्मि चापहिमा सिॽइये।” 11 यहुदि धारमिक नियम पालना ले़ःॽनुङ असासो निवाहाङ्मि पोम्बेॽ धरमि ठरबा लिमिने लुमे खा छे़ङ्गै टुये “धरमि याॽमि चाहिँ निवाहाङ्बेॽ बिस्वास ले़ःॽनुङ हिङ्इये।” 12 असासो यहुदि धारमिक नियम पालना ले़ःॽमानुङ निवाहाङ्मि पोम्बेॽ धरमि ठरबा लिनिबा। बोरु धारमिक नेॽचिराडे़ॽ इडोॽ लुये, “यहुदि धारमिक नियम पालना ले़ःॽखुबा याॽमिजि मोबाङ्नोॽ हिङ्इम्मे।” 13 खिरिस्टडे़ॽ कानिङ्मि लागि चापहिमा खिघे़ॽनुङ काप्सिङ्बेॽ सिघडा, मोसे़ॽनोॽ कानिङ यहुदि धारमिक नियममि चापहिमाबाङ छुट्कारा ले़टा। इन्ढोङ्होङ धारमिक नेॽचिराडे़ॽ लुये “सिङ्बुबेॽ किङ्नेबॽआ चोपबेॽ चापहिमा सिॽइये।” 14 खिरिस्टडे़ॽ कानिङ्मि लागि मोल फोङ्नुङ कानिङ फक्पेसा। इन्ढोङ्होङ अब्राहाम पिबॽआ आसिस खिरिस्ट येसुबाङ अयहुदिजिडे़ॽसो चुप्टुजिरो लुनुङ मोबा निवाहाङ्डे़ॽ हेन्ज्रुङ हे़म्बॽआ पबित्रा होङ्निवा बिस्वासबाङ कानिङे़ॽ चुप्रो लुनुङ इडोॽ लिसा। 15 वावानिसानुङ नानुसाजि, नमुनामि लागि याॽमिजिबेॽ लिये खामि टुम्बेॽ इःमा। निप्पाङ याॽमिमि रुम्बेॽ इक्को खामि लागि हेन्ज्रुङ हे़म्बेयेबाङ ए़क्साङ मोजि असे़ॽसो मो हेन्ज्रुङ्मि इमासो फेङ्हेसुनिबा। 16 निवाहाङ्डे़ॽ अब्राहामनुङ खोमि पसाजि हेन्ज्रुङ हे़म्बॽआ ले़टे़। निवाहाङ्डे़ॽ बेॽलो पसाजिमि लागि ने़ॽनि, इक्कोरेॽ पसामि लागि “हे़ने़ए़ पसाजि” लुनुङ लुबॽआ ले़टे़। मो इक्कोरेॽ पसा लुबॽआ चाहिँ खिरिस्ट ले़ये। 17 के़ॽ लुमायोक्पॽआ खा चाहिँ इगोनोॽ ले़ये, निवाहाङ खोमटाङ्बे़ॽ पक्का ले़ःसेॽपॽआ हेन्ज्रुङ रिउम सये सुमबोङ निङ ए़क्साङ लेम्बॽआ यहुदि धारमिक नियमडे़ॽ फेङ्हेसुनिबा। मोडोॽ लिसाहोङ्गो निवाहाङ्मि हेन्ज्रुङ इनामा लिये। 18 इन्ढोङ्होङ निवाहाङ्डे़ॽ पिनिम्ने़ लुबेबॽआ हक यहुदि धारमिक नियम पालना ले़ःॽनुङ चुप्मियेहोङ्गो मो चाहिँ हेन्ज्रुङ्बाङ चुप्मे खानोॽ ने़ॽनिबा। तर इगोगो निवाहाङ्डे़ॽ हेन्ज्रुङ्बाङ अब्राहाम पिटुए। 19 मोडोक्होङ यहुदि धारमिक नियम इन्ढोङ पिबॽआ ले़टे़ ? मो चाहिँ हेन्ज्रुङ हे़म्बॽआ अब्राहाममि पसा मे़लेन्लो याॽमिजि पाप लेमेॽमामि लागि पिबॽआ ले़टे़। निवाहाङ्डे़ॽ खोमि यहुदि धारमिक नियम थाङ्सिरिदुतबाङ निवाहाङ्नुङ याॽमिजिमि रुम्बेॽ यामुखुबा मोसा पिसु। 20 याॽमिजिमि रुम्बेॽ हेन्ज्रुङ हे़म्माबेॽ इक्को रुम्बेॽ यामुखुबा पाप्मिये। तर निवाहाङ इक्कोमा ले़येन्से़ॽ खोमटाङ्बे़ॽ अब्राहामनुङ हेन्ज्रुङ हे़नु। यहुदि धारमिक नियममि योम्बोक 21 मोडोक्होङ इमा यहुदि धारमिक नियम निवाहाङ्मि हेन्ज्रुङ्मि टेडिघरिक ले़ये ? आक्टोॽ ने़ॽनिबा। यहुदि धारमिक नियमडे़ॽनोॽ याॽमि ए़स्सिमे हिङ्मवा पिसाहोङ्गो, इगोसे़ॽनोॽ याॽमिजि निवाहाङ्मि पोम्बेॽ धरमि टोक्से़न्डि। 22 तर धारमिक नेॽचिराडे़ॽ लुये, कानिङ चोप पापडे़ॽ कैदिडोक्नोॽ टोङ्इटे़। मोडोगे़ॽ निवाहाङ्डे़ॽ पिनिम्ने़ लुबॽआ हेन्ज्रुङ चाहिँ येसु खिरिस्टबेॽ बिस्वास ले़ःॽनुङ्रेॽ कानिङे़ॽ चुप्मिन्डुङ्मे़। 23 कानिङे़ॽ येसु खिरिस्टबेॽ बिस्वास ले़ःॽमा याक्लोनुङ निवाहाङ्डे़ॽ बिस्वास खाङ्मुमा याक्लो यहुदि धारमिक नियममि अधिनबेॽ कानिङ टुसिङ्मा। खो लेम्मा याक्लो कानिङ फुक्का मे़ले़टिङ्मा। 24 कानिङ बिस्वासबाङ धरमि लिहेसिरो लुनुङ यहुदि धारमिक नियमडे़ॽनोॽ खाङ्नुङ खिरिस्ट मे़लेङ्रो कानिङ कोसा। 25 तर हागो बिस्वास लेम्बेबॽआसे़ॽ कानिङ यहुदि धारमिक नियममि अधिनबेॽ पेम्मा पाप्निबा। 26 इन्ढोङ्होङ बिस्वास ले़ःॽपॽआसे़ॽनोॽ येसु खिरिस्टबेॽ हे़निङ चोप निवाहाङ्मि पसाजि लिटानिङे। 27 खिरिस्टमि निङ्बेॽ बप्तिस्मा लाबॽआ चोप याॽमिजि खिरिस्टडोॽ लिनुङ खोनुङ हिङ्इम्मे। 28 मोडोगे़ॽ येसु खिरिस्टबेॽ बिस्वास ले़ःॽखुबाजिमि रुम्बेॽ यहुदिनुङ गिरिक, सेउतेनुङ फुक्का मोबा वडाङ्पसानुङ मेॽनामिॽ चोप खिरिस्टबेॽ इक्कोनोॽ ले़न्डिङ्मा। 29 हे़निङ खिरिस्टमि याॽमिजि ले़न्डानिङ्होङ्गो अब्राहाममि पसाजि ले़न्डानिङ मोबा अब्राहामनुङ हे़म्बॽआ हेन्ज्रुङ्बाङ चुप्पॽआ आसिसमि हकवालाजि ले़न्डानिङ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.