गलाति 2 - याम्फुपावलनुङ हाइखा एप्पा चोङ्साजि 1 इक्पोङ रिउम निङ ए़क्साङ कानुङ बारनाबास फेरि यरुसलेम खडाजिङ मोडोक्पेॽ तितससो कानिङ्नुङ सोरि चिक्खे़ॽटुङ्मा। 2 निवाहाङ्डे़ॽ खडे लुनुङ का सेन्जिसेम्माङ्बेॽ लुबॽआसे़ॽ का मोबेॽ खडिङ। के़ॽ याक्लोएम्बाङ अयहुदिजि बेॽलोखेॽ सुसमाचार खेम्मेॽपेटुङ्हाजि मोडोॽ खेम्मेॽपॽआ सुसमाचार मे़ङ्के़न्डिॽखे़ॽलो लुनुङ के़ॽ मोमि टुम्बेॽ मोबेॽहा मन्डलिमि डायोङ्बाजिरेॽ चुप्नुङ इःबेॽटुङ्जि। 3 तर कानुङ्सोरि टुघुबा निसा तितस गिरिक जाति ले़टारोसो खतना ले़ःॽमा खे़ये लुनुङ असे़ॽसो कर मे़न्टिसुजि। 4 तरसो इन्डोक जना रेम्सिङ वावानिसाजि मन्डलिबेॽ खुस्रिङ्मु लेन्नुङ कानिङ खिरिस्टबाङ छुट्कारा चुप्पेबॽआजिसो यहुदि धारमिक नियम पालना ले़ःॽमेॽनुङ खोजिमि अधिनबेॽ युङ्मा योगामि। 5 तर सुसमाचारमि चाइबमा खा हे़निङ्नुङ सानिङ टुरो लुनुङ कानिङे़ॽ खोजिडे़ॽ लुबॽआ खामि ले़ख्खोनोॽ मे़ले़टुङ्मा। 6 माहाजि मन्डलिबेॽहा निङ मुक्पॽआ डायोङ्बाजि ले़टामि, तर के़ॽ खोजि बेॽहा मे़मिॽटुङ्जि। इन्ढोङ्होङ निवाहाङ्डे़ॽ चाहिँ याॽमिमि नजिक खाङ्नुङ योम्बोक ले़टुनिबा। माहा डायोङ्बाजिडे़ॽ का इमाङ सल्लाहसो मे़म्पिसामि। 7 बोरु निवाहाङ्डे़ॽ इस्राएलिजिमि रुम्बेॽ सुसमाचार परचार ले़ःॽसिॽ पत्रुस पाङ्बॽआडोॽ, कासो निवाहाङ्डे़ॽ अयहुदिजिमि रुम्बेॽ सुसमाचार परचार ले़ःॽसिॽ पाङ्बॽआ ले़ये लुनुङ खोजिडे़ॽ लेडोक्टुजि। 8 इन्ढोङ्होङ इस्राएलिजिमि रुम्बेॽ एप्पा चोङ्सा पत्रुस से़ङ्घुबा निवाहाङ्डे़ॽनोॽ कासो अयहुदिजिमि रुम्बेॽ खोमि योम्बोक ले़ःॽखुबा एप्पा चोङ्सा टोक्सा। 9 इगो काङ्मि लागि निवाहाङ्मि बेॽएम्मा अनुग्रहा ले़ये। इगो खा याकुब, पत्रुसनुङ युहन्नाडोॽहा मन्डलिबेॽहा डायोङ्बाजिडे़ॽसो लेन्डुजे। मोडोगे़ॽ खोजिडे़ॽ बारनाबासनुङ का खोजिनुङ योम्बोक ले़ःॽमामि लासामि। कानिङ चाहिँ अयहुदिजिमि रुम्बेॽ योम्बोक ले़टिङ्मा, मोबा खोजि चाहिँ यहुदिजिमि रुम्बेॽ योम्बोक ले़ःॽखुबाजि ले़म्मे। 10 इक्को खा चाहिँ खोजि चोबे़ॽ इःसुजि, खाँचोबेॽ सिॽखुबा गरिबजि नुरोॽ खाङ्मा खेम्मे। मोनोॽ के़ॽसो ले़ःॽमा मिॽपॽआ ले़टे़। एन्टिओखियाबेॽ पत्रुस इजाबॽआ 11 तर पत्रुस एन्टिओखियाबेॽ लेम्माबेॽ के़ॽ खो चोपमि पोम्बेॽ बिरोध ले़टुङ, इन्ढोङ्होङ खो आप्टिकनुङ्मा ले़टे़। 12 याकुबडे़ॽ पाङ्बॽआ याॽमिजि लेम्मा याक्लो पत्रुस अयहुदिजिनुङ सोरि पेन्नुङ चासे़। तर माहा याॽमिजि लेन्नुङ ए़क्साङ चाहिँ अयहुदि बिस्वासिजिबाङ खोरो पेम्बोगा, चाबोगा इन्ढोङ्होङ खो माहा खतना ले़ःॽमा खे़ये काघुबा याॽमिजिडे़ॽ इमाङ लुम्मेन्डे लुनुङ किस्सिसे़। 13 मोबा खोनुङ टुघुबा हाइखा यहुदि बिस्वासिजिडे़ॽसो पत्रुसडोक्नोॽ कप्टि योम्बोक ले़ःॽपुगामि। खोजिमि मोडोक्हा योम्बोक खाङ्नुङ बारनाबाससो किस्सिडा। 14 के़ॽ खोजि सुसमाचारमि चाइबमा खाबेॽ फाङ्सिघे़ॽपॽआ खाङ्नुङ पत्रुस चोपमि पोम्बेॽ योबुङ, “हे़न यहुदि लिनुङ्सो अयहुदिजिडोॽ ले़ये, हे़न आम टाङ्बानोॽ यहुदिडोॽ ले़ःॽनिबा। मोबा अयहुदिजि इन्डोक्टे यहुदिजिमिडोॽ हिङ्मा खे़ये लुन्डुजे ?” 15 कानिङ मामामि रुङ्माबेॽनोॽ यहुदि ले़न्डिङ्मेसे़ॽ, अयहुदिजिडोॽ पापि ने़ॽनिबा। 16 तर कानिङे़ॽ लेन्डुङ्मे़, असासो यहुदि धारमिक नियम पालना ले़ःॽनुङ धरमि लिहेनिबा। तर येसु खिरिस्टबेॽ बिस्वास ले़ःॽनुङ्रेॽ याॽमि धरमि लिये। मोडोगे़ॽ कानिङे़ॽसो यहुदि धारमिक नियम पालना ले़ःॽनुङ ने़ॽनि, येसु खिरिस्टबेॽ बिस्वास ले़ःॽनुङ धरमि लिमामि खोबेॽ बिस्वास ले़न्डुङ्मा। 17 कानिङ खिरिस्टबेॽ बिस्वास ले़ःॽनुङ आप्टिक मे़ॽनिङ्हा लिमायोक्माबेॽ कानिङ यहुदि ले़न्डिरोसो अयहुदिजिडोॽ पापि लिन्डिङ्माहोङ्गो इमा खिरिस्टडे़ॽ कानिङ पाप ले़ःॽमेॽपॽआडे ? मोडोॽको इन्डोक्पेॽसो लिहेनिबा। 18 इन्ढोङ्होङ टाङ्बे़ॽनोॽ योबेबॽआ यहुदि धारमिक नियम फेरि टोङ्इनुङ्होङ्गो, काङ्टाङ्बानोॽ निवाहाङ्मि पोम्बेॽ पापि लिङे। 19 मोडोगे़ॽ का निवाहाङ्मि लागि हिङ्मामि के़ए़ यहुदि धारमिक नियम पालना ले़ःॽमा लेॽएटुङे। 20 का खिरिस्टनुङ्नोॽ काप्सिङ्बेॽ सिटिङे, मोडोगे़ॽ हागोएम्बाङ ए़क्साङ हिङ्घुबा का ने़ॽनि, तर खिरिस्ट काबेॽ हिङ्इये। मो हिङ्मवा चाहिँ काङ्मि ने़ॽनि, निवाहाङ्मि पसाबेॽ बिस्वास ले़ःॽनुङ हागो हिङ्इङे। असे़ॽ का नम्नम ले़टिङ खोसे़ॽ काङ्मि लागि टाङ्बामि हिङ्मवानोॽ पिसा। 21 के़ॽ निवाहाङ्मि अनुग्रहा हेला ले़ःॽहेसुङ्नि। इन्ढोङ्होङ याॽमिजि यहुदि धारमिक नियम पालना ले़ःॽनुङ धरमि लिसामिहोङ्गो खिरिस्ट काप्सिङ्बेॽ सिबॽआ इनामा लिसा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.