गलाति 1 - याम्फुगलातिजि पावलडे़ॽ सेवा मुबॽआ 1 का पावल एप्पा चोङ्साबाङ गलातिबेॽहा मन्डलिमि लागि इगो पत्रा साप्मे़ॽनिङ्सिनुङे। का एप्पा चोङ्सा लिबॽआ चाहिँ याॽमिबाङ ने़ॽनि, याॽमिजिमि अधिकारबाङ्सो ने़ॽनि तर येसु खिरिस्टडे़ॽ मोबा खो सिबॽआबाङ हिङ्बोक्खुबा निवाहाङ पाबाडे़ॽनोॽ से़न्इटिङे। 2 इगोबेॽ कानुङ सोरि टुघुबा चोप वावानिसाजिमिराम्बाङ गलातिबेॽहा मन्डलिबेॽ टुघुबा चोप याॽमिजि कानिङ्मि सेवायो। 3 निवाहाङ पाबानुङ कानिङ्मि परभु येसु खिरिस्टडे़ॽ हे़निङ अनुग्रहानुङ सान्ति पिरो। 4 इगो पापि युगबाङ कानिङ हिङ्मेॽसिॽ निवाहाङ पाबामि खा खेम्नुङ कानिङ्मि पापमि साटो येसु खिरिस्ट बलि लिसा। 5 निवाहाङ्मि सानिङ ओहाङ लिरो। आमेन हाइको सुसमाचार माॽआये 6 गलाति ठाउँबेॽहा बिस्वासि वावानिसाजि आयु के़ॽ हे़निङ्मि रुम्बेॽ लिमे़ॽसिबॽआ खा खेम्नुङ का खरि मिङ्इटिङे, इन्ढोङ्होङ खिरिस्टमि अनुग्रहाबेॽ के़ःॽपॽआ हे़निङे़ॽ इडोक चान्डोनोॽ खोमि नुबा खा लेॽनुङ हाइखा खाबेॽ खे़ॽए़टानिङ। 7 चइबानोॽ खिरिस्टमि सुसमाचारबाङ हाइको सुसमाचार माॽआये, तर कोहि याॽमिजिडे़ॽ खिरिस्टमि सुसमाचार हाइकेलाम फेङ्घे़ॽमा योक्पॽआसे़ॽ इगो खा के़ॽ हे़निङ लुमे़ॽनिङ्सिनिम्ने़। 8 कानिङे़ॽ परचार ले़ःॽपॽआ सुसमाचारबाङ हाइकोनोॽ सुसमाचार टुउ लुनुङ परचार ले़टुजिहोङ थाङ्सिरिदुत अथबा कानिङ्नोॽ ले़टिङ्माहोङ्सो माहाजि खेःलोकबेॽ नासि लिमिरो। 9 कानिङे़ॽ याक्लोएबाङ लुडिडोक्नोॽ फेरिसो लुमे़ॽनिङ्सिनिम्ने़, हे़निङे़ॽ याक्लो हाम्बे सुसमाचारबेॽ बिस्वास ले़एटानुमे, मोमि टेडिगरिक्मा खा असे़ॽ परचार ले़न्डुएहोङ मो याॽमिडे़ॽ निवाहाङ्मि चापहिमा चुप्टुरो। 10 इडोॽ लुनुङ के़ॽ याॽमिजि साप्थाङ्मेॽमामि लागि लुबॽआ ने़ॽनि, के़ॽ निवाहाङ साप्थाङ्मेॽमा मिॽइनुङे, का याॽमिजिमि नेन्जामारोमा लिमामि लागि ने़ॽनि, इडोॽ ले़टुङ्होङ्गो का खिरिस्टमि सेउते ले़ःॽङानि। पावल इन्डोॽ एप्पा चोङ्सा लिसे़ 11 वावानिसानुङ नानुसाजि इगो खा लेसानुमे, के़ॽ परचार ले़ःॽपॽआ सुसमाचार चाहिँ याॽमिजिमि निवाबाङ्ए सुसमाचार ने़ॽनिबा। 12 इन्ढोङ्होङ इगो सुसमाचार के़ॽ याॽमिजिबाङ चुप्पॽआ ने़ॽनि, का हाइखा असे़ॽ इःॽपॽआसो ने़ॽनि, तर इगोगो येसु खिरिस्ट खोमटाङ्बे़ॽ का इःॽपॽआ ले़ये। 13 का याक्लो यहुदि धरमबेॽ टुमाबेॽ काङ्मि चाल चलनगो हे़निङे़ॽ नुरोॽ लेन्डानुमे, मोडोक्पेॽ का ए़डे़ॽवासो नम्नम मे़ॽनिङ्मा लिनुङ निवाहाङ्मि मन्डलिबेॽहा याॽमिजि चुङ्जासुङ्जि, मोबा माहाजि के़ॽ हेरो नासि ले़ःॽमा योगुङ। 14 मोबा याक्लो कानुङ सोरिहाजिबेॽ का बेॽलो नुरोॽ निवा टिनुङ योम्बोक ले़ःॽखुबा अगुवा ले़टिङे, मोडोक्पेॽ कानिङ्मि यहुदि टुबालाबाजिमि रितिथिति इक्को मे़लेॽलेॽ नुरोॽ पालना लेटुङे। 15 तर का टोक्मा याक्लोनोॽ निवाहाङ्डे़ॽ का से़न्नुङ खोमि अनुग्रहाबाङ खोमि योम्बोकमि लागि के़डिङ। 16 निवाहाङ्डे़ॽनोॽ काबाङ यहुदिजिमि रुम्बेॽ सुसमाचार परचार लिरो मिॽनुङ खोमि पसामि जोति खाङ्मुसु, मोडोक्पेॽ के़ॽ याॽमिजिनुङ सल्लहा मे़लासुङ। 17 काबाङ याक्लोनोॽ एप्पा चोङ्सा लिबेबॽआजिनुङ सल्लहा ङाःक्सिॽ यरुसलेम सहरबेॽ मे़ङ्खडिङ। तर कागो चान्डो ले़ःॽनुङ अराब देसबेॽ खडिङ मोबा दमसकस टेआबिङ। 18 सुम निङ ए़क्साङ्रेॽनोॽ का पत्रुस चुप्सिॽ यरुसलेम खडिङ। मोबेॽ का इक्पोङ ङाउम याक पेनिङा। 19 मोडोक्पेॽ का परभुमि निसा याकुबनुङ चुबिङ तर खोबाङ हाइखा एप्पा चोङ्साजि असासो मे़न्चुप्टोक। 20 इघा के़ॽ साप्पॽआ खा मे़ॽनोक्हा ने़ॽनि, निवाहाङ्मि पोम्बेॽ का रेम्डेॽङानि। 21 मोबा ए़क्साङ का सिरियानुङ किलिकियामि छेत्राबेॽ खडिङ। 22 मोडोक्रो यहुदियाबेॽहा मन्डलिबेॽहा वावानिसानुङ नानुसाजि के़ॽ मे़न्चुप्पॽआ ले़टामे। 23 खोजिडे़ॽ काङ्मि टुम्बेॽ इडोॽ चाहिँ खेम्बॽआ ले़टे़, याक्लो कानिङ चुङ्जाखुबा याॽमिडे़ॽ आइचेल खोमटाङ्बे़ॽ नासि ले़ःॽमा योक्पॽआ बिस्वासमि खा परचार ले़ःॽमे़ॽनिङ्सिन्डुरो। 24 खोजिडे़ॽ काङ्मि टुम्बेॽ खा खेम्नुङ निवाहाङ ओहाङ पिसुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.