एफिसि 6 - याम्फुपाबा मामानुङ पसाजि अरति 1 पसाजि, हे़निङ परभुमि याॽमि लिबॽआसे़ॽ आम्निमि पाबा मामामि आग्या पालना ले़टानुमे, इन्ढोङ्होङ इडोॽ ले़ःॽमा चाहिँ नुबा खा ले़ये। 2 धारमिक नेॽचिराबेॽ इडोॽ साप्पॽआ ले़ये, “ताङ्बामि पाबा मामामि आदर ले़टानुमे। 3 इडोॽ ले़ःॽमाबेॽ हे़निङ्मि लागि भलो लियेनुङ इगो मक्खाम्डेमबेॽ हे़निङ बेॽलो निङ हिङ्इन्डानिङे।” (इगो निवाहाङ्डे़ॽ हेन्ज्रुङ्नुङ ले़ःॽपॽआ याक्लोमा आग्या ले़ये) 4 पाबाजिओ, टाङ्बामि पसाजि सुरिक ए़ॽपुक्मेॽटानुमे, तर माहाजि परभुबेॽ नुरोॽ हिङ्मानुङ सिक्छेबेॽ तालिम पिसानुमे। मायोङ्बानुङ सेउतेजि अरति 5 सेउतेनुङ सेउतेनिजि, खिरिस्टमि आग्या हे़निङ्मि निवाबाङ्नोॽ पालना ले़टिडोॽ हे़निङ्मि मायोङ्बा आदर ले़ःॽसाङ आग्या पालना ले़टानुमे। 6 हे़निङे़ॽ योम्बोक ले़ःॽमाबेॽ हे़निङ्मि मायोङ्बामि पोम्बेॽ खाङ्मुमामि लागिरेॽ योम्बोक ए़ले़टानुमे, तर खिरिस्टमि सेउतेडोॽ लिनुङ निवा होङ्सिॽयुबाङ निवाहाङ्डे़ॽ नेन्जबॽआ योम्बोक ले़टानुमे। 7 याॽमिजिमि लागि ले़ःॽपॽआडोॽ ने़ॽनि, तर परभुमि लागि निवाबाङ ले़टिडोॽ सेवा ले़टानुमे। 8 इगो खा लेसानुमे, सेउतेडे़ॽहोङ्सो फुक्काडे़ॽहोङ्सो असे़ॽ नुबा योम्बोक ले़न्डुए मोसे़ॽ परभुबाङ नुबानोॽ इनाम चुप्मिन्डुए। 9 मायोङ्बाजेओ, हे़निङे़ॽसो टाङ्बामि सेउतेजि नुबा बेबहार ले़टानुमेनुङ खोजि किस्सिमा उक्मा लेडानुमे, इन्ढोङ्होङ हे़निङ्नुङ माहाजिमि मायोङ्बा थाङ्सिरबेॽ इक्कोनोॽ टुयेनुङ खोसे़ॽ असासो पक्छेपात ले़ःॽटुनिबा लुनुङ लेसानुमे। निवाहाङ्मि हतियार 10 हागो काङ्मि ए़क्साङ्ए खा लुनिम्ने़, खोमि बेॽए सक्तिडे़ॽ बोलियो लिसानिङे। 11 दियाबलसमि चेन्दुबा योम्बोकमि बिरोधबेॽ येःप्मामि निवाहाङ्डे़ॽ पिबॽआ चोप हतियार सिप्नुङ ङे ले़ःॽमाबेॽ चाङ्मे चेॽ चक्सानुमे। 12 इन्ढोङ्होङ कानिङ्मि ङे याॽमिजिनुङ ने़ॽनि, तर से़न्जुगुपबेॽहा सासकजि, अधिकारि, नान्दरुङ्बेॽहा मङे़हा चापजिनुङ सक्तिमि बिरोधबेॽ ले़ये। 13 मोडोगे़ॽ निवाहाङ्डे़ॽ पिबॽआ चोप हतियार सिबानुमे इडोॽ सिबानुमहोङ मङे़ॽमा याक लेम्माबेॽ हे़निङे़ॽ मङे़ॽमा चाप नास ले़ःॽहेन्डानुम, मोबा ए़क्साङ्ठोक मोनुङ काक्सेॽनुङ हे़निङ हागोसो बोलियो लिनुङ येःप्हेडानिङे। 14 हागो येःपुक्नुङ पोरोगानिङे। चाइबमा खा हे़निङ्मि सुमरिकपेॽ थोङ्माइडोॽ हिःगानुमे, मोबा धारमिक खा चाहिँ हे़निङ्मि रच्छेमि लागि हेप्सोक पाताडोॽ चाक्सानुमे। 15 सान्ति पिघुबा सुसमाचारमि राङ्सुपडोॽ चाङ्मानुङ खेम्मेॽमामि पोरोगानिङे। 16 हे़निङ्मि बिस्वास चाहिँ टाङ्बामि रच्छे ले़ःॽखुबा ढालडोॽ ले़ये। इघा चाहिँ सानिङ हे़निङ्नुङ सोरि युङ्मे। इगोबाङ सैतानमि मिडोॽमा ठुक्ला सेॽनेहेन्डानुम। 17 निन्डवाँमि रच्छेमि लागि टोपिडोॽ मुक्तिमि खा ओबानुमे, मोबा पबित्रा होङ्निवा तरवरडोॽ सिबानुमे, तरवर लुबॽआ निवाहाङ पाबामि बचन ले़ये। 18 सानिङ पारथना ले़टानिङे, निवाहाङ्नुङ बोल ङागानुमे। सानिङ पबित्रा होङ्निवाबेॽ लिनुङ पारथना ले़टानुमे। इघा खा निवाबेॽ युङ्नुङ सानिङ होसियार लिमानुङ खिरिस्टमि पबित्रा याॽमिजिमि लागि पारथना ले़टानुमे। 19 काङ्मि लागि पारथना ले़ःॽपेॽमाजे, मोबा के़ॽ सुसमाचार परचार ले़ःॽमाबेॽ निवाहाङ्मि बचन काङ्मि निवाबेॽ लेङ्रो, मोबा के़ॽ यामुमाबेॽ मे़ङकिस्सिरेॽ असे़ॽसो मे़लेबॽआ सुसमाचार हाइखाजि लुहेसुङ्रो। 20 इगो सुसमाचारमि लागिनोॽ येसु खिरिस्टमि एप्पा चोङ्सा लिटिङे। इगोमि लागि का तिरिङ्गा खिमबेॽ से़क्सिघे़टिङ्होङ्सो के़ॽ इःमा खे़ये खा मे़ङकिसिरेॽ इःहेमा लुनुङ काङ्मि लागि पारथना ले़ःॽपेॽमाजे। ए़क्साङ्ए सेवायो 21 कानिङे़ॽ नम्नम ले़ःॽपॽआ निसा मोबा परभुमि सेउते तुखिकस चइबानोॽ खो बिस्वास ले़ःॽहेमारोमा याॽमि ले़ये। का इन्डोॽ ले़ङेनुङ इमाङ ले़ःॽमे़ॽनिङ्सिङे लुमे चोप खा खोसे़ॽ हे़निङ लुबेॽये। 22 कानिङ इमाङ ले़ःॽमे़ॽसिनुङ्मे माहा चोप खा खेम्नुङ हे़निङे़ॽ बोल चुप्हेसानुमे लुनुङ के़ॽ खो पाङ्इटुङे। 23 चोप बिस्वासि वावानिसानुङ नानुसाजिडे़ॽ निवाहाङ पाबानुङ परभु येसु खिरिस्टबाङ सान्तिनुङ बिस्वासनुङ्मा नम्नम चुप्टानुमे। 24 कानिङ्मि परभु येसु खिरिस्ट नम्नम ले़ःॽखुबाजि चोपबेॽ खोमि अनुग्रहा टुडुङ्घे़ॽरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.