एफिसि 5 - याम्फुजोतिबेॽ राम्मे़ 1 हे़निङ निवाहाङ्डे़ॽ नम्नम ले़ःॽपॽआ पसाजि ले़न्डानिङ मोडोगे़ॽ खोडोक्नोॽ लिमा योगानिङे। 2 खिरिस्टडे़ॽ कानिङ नम्नम ले़टानुङ नाम्जानुये धुपा लिनुङ कानिङ्मि पापमि लागि खोमि हिङानोॽ निवाहाङ्बेॽ चेॽटिसु। मोडोक्नोॽ हे़निङ्सो नम्नम ले़ःॽखुबाजि लिसानिङे। 3 हे़निङ खिरिस्टमि पबित्रा याॽमिजि ले़ःॽपॽआसे़ॽ हे़निङ्मि रुम्बेॽ बेभिचार, चोप असुद्ध निवा अथबा योम्बोकनुङ खिक्तुबाङ निवा हे़निङे़ॽ खिमा खे़न्जोसुनिबा। 4 ङेसिमा टे़क्टे़क्हा खा, उम्बरिङ्नुङ मङे़हा खा हे़निङे़ॽ यामुमा खे़न्जानिबा। बोरु इगोमि साटो हे़निङे़ॽ सानिङ निवाहाङ ओहाक पिमा खे़ये। 5 इन्ढोङ्होङ हे़निङे़ॽ इगो खा लेमानोॽ खे़ये, बेभिचार ले़ःॽखुबा, असुद्ध निवा खिघुबानुङ खिक्तुबाङ्जिडे़ॽ निवाहाङ्मि राज्यबेॽ अधिकार चुप्टुजिने। 6 मे़ॽनोक्हा खा इःनुङ असे़ॽसो हे़निङ मे़रेम्हेमिरो। इडोक्हा खाडे़ॽनोॽ निवाहाङ्मि खा मे़ङ्खेम्खुबाजिबेॽ खोमि सुरिक सिॽइये। 7 मोडोगे़ॽ मे़ॽनोक्हा खा इःघुबा याॽमिजिनुङ लङ्गाम ए़ले़टानिङे। 8 याक्लो हे़निङ्सो सेन्जुगुप्पेॽ टुसानिङ, तर हागो हे़निङ परभुमि पसाजि लिनुङ खोमि जोतिबेॽ टुन्डानिङे। मोडोगे़ॽ खोमि जोतिबेॽ राम्खुबा याॽमि लिनुङ हिक्सानिङे। 9 इन्ढोङ्होङ जोतिमि चा चाहिँ चोप खालहा भलाइ, धारमिक खानुङ चाइबमा ले़ये। 10 मोबा परभुडे़ॽ इमा इमा खा नेन्जोन्डुए माहा खा लेमा योगानिङे। 11 इमाङ योम्बोक मे़ॽनिङ्हा से़न्जुगुपमि योम्बोक ले़ःॽखुबाजिनुङ हे़निङ ए़राप्सानिङे, बोरु माहा योम्बोक मङे़हा ले़ये लुनुङ याॽमिजि इःबेॽटानुमे। 12 सेन्जुगुपेॽ राम्खुबा याॽमिजिडे़ॽ कुम्नुङ ले़ःॽपॽआ योम्बोकमि टुम्बेॽ इःमासो ङेसिमा लुये। 13 तर माहाजिडे़ॽ ले़ःॽपॽआ योम्बोक इन्डोक मङे़ॽमा ले़ये लुमे़ खा जोतिबेॽ छे़ङ्गै खाङ्मुये। 14 धारमिक नेॽचिराबेॽ इडोॽ साप्पॽआ ले़ये, “होउ इम्डिघे़ॽपॽआजि पुकाडानिङे, सिघे़ॽपॽआजि हिङ्बोगानिङे, मोबा खिरिस्टमि जोति हे़निङ्बेॽ पोॽइये।” 15 मोडोगे़ॽ हे़निङ्मि चाल चलन इन्डोक्मा टुमा खे़ये, मो खा निवाबेॽ नुरोॽ युक्सानुमे, उम्बरिङ याॽमिडोॽ ने़ॽनि, निवादाङ्बा याॽमिडोॽ लिसानिङे। 16 इघा याकनुङ बेला मङे़ॽमा ले़ये, मोडोगे़ॽ हे़निङे़ॽ चुप्पॽआ चोप नुबा याकनुङ बेला नुबा योम्बोकपेॽ टिसानुमे। 17 मोडोगे़ॽ उम्बरिङ ए़ॽलिसानिङे, तर परभुडे़ॽ हे़निङे़ॽ इमा ले़ःॽपॽआ नेन्जोन्डुए मो खा नुरोॽ लेसानुमे। 18 अङ्गुरमि मद्यडे़ॽ ए़ॽसेॽखडानिङे, इन्ढोङ्होङ मोसे़ॽ हे़निङ नासि ले़ये। तर पबित्रा होङ्निवामि चालबेॽ राप्सानिङे। 19 हे़निङ्मि रुम्बेॽ सानिङ्नोॽ निवाहाङ्मि सेम, भजननुङ पबित्रा होङ्निवाडे़ॽ पिबॽआ सेम सेम्लुसानुमे, हे़निङ्मि निवाबाङ खेम्जानुये सेमडे़ॽ परभुमि महिमा ले़टानुमे। 20 सानिङ्नोॽ चोप खामि लागि कानिङ्मि परभु येसुमि निङ्बेॽ निवाहाङ पाबा ओहाक पिसानुमे। 21 हे़निङ खिरिस्टमि आदर ले़ःॽखुबा याॽमि ले़ःॽपॽआसे़ॽ सानिङ इक्कोसे़ॽ हाइकोमि अधिनबेॽ पेनानिङे। बनिमानुङ बनिबामि लागि अरति 22 बनिमाजि, निवाहाङ्मि अधिनबेॽ पेन्डिडोक्नोॽ टाङ्बामि बनिबामि अधिनबेॽ पेनानिङे। 23 इन्ढोङ्होङ खिरिस्ट मन्डलिमि निन्डवाँ ले़टिडोक्नोॽ बनिबासो खोमि बनिमामि निन्डवाँ ले़ये। मन्डलि चाहिँ खिरिस्टमि हिङा ले़ये, मो मुक्ति पिघुबा चाहिँ खोनोॽ ले़ये। 24 मोडोगे़ॽ मन्डलि खिरिस्टमि अधिनबेॽ टुडिडोक्नोॽ बनिमाजिसो बनिबाजिमि अधिनबेॽ पेम्मिरो। 25 बनिबाजिओ, खिरिस्टडे़ॽ मन्डलि नम्नम ले़ःॽमाबेॽ खोमि हिङा पिडिडोक्नोॽ टाङ्बामि बनिमाजि नम्नम ले़ःॽटानुमे। 26 खिरिस्टडे़ॽ मन्डलि पबित्रा टोङ्मामि लागि योङाडे़ॽ वासोक्नुङ खोमि बचनबाङ चोखो टोक्सु। 27 मोबा कानिङ बिस्वासिजि पबित्रा, आप्टिक मे़ॽनिङ्मा, खोट मे़ॽनिङ्मानुङ चोप खाबेॽ नुबा लिबॽआ खिरिस्टमि मन्डलि टोङ्मामि लागि इडोॽ ले़टु। 28 मोडोक्नोॽ बनिबाजिडे़ॽसो टाङ्बामि बनिमाजि टाङ्बामि हिङा नम्नम ले़टिडोक्नोॽ नम्नम ले़ःॽमा खे़ये। इन्ढोङ्होङ टाङ्बामि बनिमा नम्नम ले़ःॽखुबाडे़ॽ खोमटाङ्बा नम्नम ले़न्डुए। 29 असे़ॽसो टाङ्बामि हिङा सिॽचोसुनिबा, तर टाङ्बामि हिङा नम्नम ले़ःॽनुङ दुःख ले़न्डुए। मोडोक्नोॽ खिरिस्टडे़ॽसो खोमि मन्डलिमि लागि दुःख ले़न्डुए। 30 इन्ढोङ्होङ कानिङ खोमिनोॽ हिङामि अङ्ग ले़न्डिङ्मा। 31 धारमिक नेॽचिराबेॽ इडोॽ साप्पॽआ ले़हा, “मोडोगे़ॽ याॽमिडे़ॽ टाङ्बामि पाबा मामा याःॽयानुङ खो टाङ्बामिनोॽ बनिमानुङ पेङ्इये, मोबा खोजि इक्कोनोॽ हिङा लिन्जे।” 32 इगो लेमा छाॽये खा ले़ये। इगो नातानोॽ खिरिस्टनुङ मन्डलिमि नातानुङ्सो टोङ्इये। 33 इगो नियम हे़निङे़ॽसो पालना ले़ःॽमा खे़ये। मोडोगे़ॽ चोप बनिबाजिडे़ॽ आम्निमि बनिमाजि टाङ्बामि हिङाडोक्नोॽ नम्नम ले़ःॽमा खे़ये, मोबा चोप बनिमाजिडे़ॽसो आम्निमि बनिबाजि आदर ले़ःॽमा खे़ये। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.