एफिसि 4 - याम्फुखिरिस्टबेॽ इक्को लिमे सिक्छे 1 मोडोगे़ॽ परभुमि योम्बोकमि लागि तिरिङ्गा खिमबेॽ से़क्सिघे़ॽपॽआ का पावलडे़ॽ हे़निङ्नुङ बिन्ति ले़निम्ने़, निवाहाङ्डे़ॽ हे़निङ इमा योम्बोकमि लागि के़ए़टे़ मोमि लागिनोॽ हिक्सानिङे। 2 सानिङ्नोॽ ए़डेॽमा लिसानिङे, सुधोनुङ सहनसिल लिसानिङे। मोबा हे़निङ टाङ्बा इक्कोसे़ॽ हाइको नम्नम ले़ःॽसाङ सहबा ले़टानुमे। 3 पबित्रा होङ्निवाडे़ॽनोॽ हे़निङ सान्तिबेॽ इक्को निवानुङ्हा टोङ्इटे़। हे़निङ सानिङ इक्को निवा लिनुङ पेम्मामि बोल ले़टानिङे। 4 निवाहाङ्डे़ॽ हे़निङ इक्को खाबेॽ आसा पिडिडोॽ, बिस्वास ले़ःॽखुबाजि चोप खिरिस्टमि इक्को हिङा ले़ये। मोबा पबित्रा होङ्निवासो इक्कोनोॽ ले़ये। 5 इक्कोनोॽ परभु, इक्कोनोॽ बिस्वास मोबा इक्कोनोॽ बप्तिस्मा टुये। 6 चोपमि पाबा निवाहाङ इक्कोनोॽ ले़ये। खोनोॽ चोपमि परभु ले़ये। मोबा चोपबेॽ योम्बोक ले़ःॽखुबा खोनोॽ ले़येनुङ खो चोपनुङ टुये। 7 तर खिरिस्टडे़ॽ कानिङ खाल खालहा योम्बोक ले़ःॽमे बरदान खोमटाङ्बे़ॽ मिॽनुङ खोमि अनुग्रहाबाङ पिटे़। 8 धारमिक नेॽचिराबेॽ इडोॽ साप्पॽआ ले़ये, “खो मिॽटु साङ्माबेॽ तिरिङ्गा खिमबेॽ से़क्सिघे़ॽपॽआजि राःप्नुङ खोनुङ सोरि चिॽखे़ॽटुजि मोबा टाङ्बामि याॽमिजि बरदान पिसुजि।” 9 खो मिॽटु खडा लुबॽआ चाहिँ इमाङ्डे ? मो लुबॽआ याक्लो खोगो मक्खाम्डेमबाङ्सो मिॽमुठोक खडा लुबॽआ लुनुङ लेमा खे़ये। 10 मोबा खो मक्खाम्डेमबेॽ उक्सा। चोप थोक भरिपुरन टोङ्मामि खोनोॽ चोपबाङ मिॽटु, थाङ्सिरिबाङ्सो छना मिॽटु सक्सा। 11 खोसे़ॽ इन्डोक जना याॽमिजि खोमि एप्पा चोङ्साजि, अगमबक्ताजि, सुसमाचार खेम्मेॽखुबाजि, मन्डलि खाङ्खुबा अगुवाजि मोबा सिक्छे इःॽखुबाजि इडोॽ खाल खालहा बरदान पिसुजि। 12 खिरिस्टमि इघा पबित्रा याॽमिजि खोमि योम्बोक ले़ःॽखुबा टोङ्मामि लागि, मोबा खोमि हिङा मन्डलि बोलियो टोङ्मामि इडोॽ ले़टु। 13 कानिङ चोबे़ॽ खिरिस्टबेॽ ले़टिङ्बॽआ बिस्वासबेॽ इक्कोनोॽ लिमे, निवाहाङ्मि पसा चइबानोॽ लेमे, बिस्वासबेॽ बोलियो लिमेनुङ खिरिस्टडोक्नोॽ लिनुङ वाबुक्साङ खे़ॽए़न्डिङ्मा। 14 इडोॽ कानिङ पिच्छाजिडोॽ लिसिङ्मानि। मे़ॽनोक्हा सिक्छे इःॽखुबाजिमि सिक्छेमि हिॽवाबाडे़ॽ येप्खे़ॽहेनिबा। माहाजिमि रेम्सिङ सिक्छेडे़ॽ माङे़ॽमा रामलाम खे़ॽखुबा याॽमिडोॽ लिसिङ्मानि। 15 कानिङ नम्नमनुङ्मा चाइबमा खा यामुमानुङ खिरिस्टडोॽ लिघे़ॽमा। खिरिस्ट चाहिँ कानिङ्मि निन्डवाँ ले़ये। 16 खोबाङ्नोॽ हिङाबेॽहा चोप अङ्ग चोप जोरनिडे़ॽ चोक्नुङ ठिक ठिक योम्बोक ले़न्डुएनुङ बोलियो लिये, मोबा खिरिस्टमि नम्नमबेॽ वाबुक्साङ खे़ये। खिरिस्टबेॽ चोङ हिङ्मवा 17 हागो के़ॽ परभुबाङ्ए अधिकारबाङ नुरोॽ लुनिम्ने़, हे़निङ निवाहाङ्बेॽ बिस्वास मे़ले़ःॽखुबा याॽमिजिडोॽ ए़ले़टानिङे। खोजिडे़ॽको योम्बोक मे़ॽनिङ्हा निवा खिन्डुजे। 18 खोजिमि निवा रुङ्गोॽवाडोॽ छॽइयेन्से़ॽ खोजिडे़ॽ चाइबमा खामि टुम्बेॽ इमासो लेसुजिने, मोडोगे़ॽ निवाहाङ्बाङ चुप्मिये हिङ्मवाबाङ ओः लिटामे, खोजिबेॽ टुये नुबानुङ मङे़ॽमा लेमे निवा सेन्जुगुप्टे़ॽ टे़ॽइटुए। 19 खोजि खाल खालहा ङेसिमारोहा योम्बोक ले़म्मेनुङ माहाजि नेसिमिने। 20 तर हे़निङे़ॽ चाहिँ खिरिस्टमि सिक्छेबाङ मोडोक्हा मङे़हा खागो मे़न्चिन्डिॽटानुम। 21 चइबानोॽ हे़निङे़ॽ खोमि सिक्छे खेम्नुङ खोमि चोङ्सा लिबॽआसे़ॽ येसुमि चाइबमा खा चिङ्इटानुमे मिॽइटुङे। 22 याक्लोहा बानि बेबहारबेॽ हिङ्मा लेॽपेसानुमे। हे़निङ्मि मो याक्लोए रेम्सिङ लालचानुङ हिङ्मवामि मङे़हा बानिडे़ॽ ले़ःॽमे़ॽ हे़निङ नासि लिमे़ॽनिङ्सिडानिङ। 23 हे़निङ निवानुङ होङ्निवाबेॽ चोङ लिसानिङे। 24 मोबा निवाहाङ्डे़ॽ मिॽपॽआडोॽ चाइबमा धारमिकनुङ पबित्रा लिबॽआ चोङ आनि बानिनुङ्हा हिङ्मवा हिक्सानिङे। 25 मोडोगे़ॽ हागो रेम्डेॽमा खा चोबे़ॽ लेॽपेसानुमेनुङ हे़निङ इक्कोसे़ॽ हाइकोनुङ चाइबमा खा यामुसानुमे, इन्ढोङ्होङ कानिङ चोप खिरिस्टबेॽ इक्को हिङामि अङ्ग ले़न्डिङ्मा। 26 हे़निङ सुरिक पुःक्होङ्सो पाप चाहिँ ए़ले़टानुमे। नम आघे़ॽमा याक्लोनोॽ हे़निङ्मि सुरिक सेॽनेबेसानुमे, 27 मोबा हे़निङ्बेॽ सैतानडे़ॽ योम्बाक मे़ले़ःॽटोक्टुरो। 28 हागो खुसुबाङ्डे़ॽ खुमा लेॽनुङ नुबा योम्बोक ले़चारो। मोबा मोसे़ॽ खाँचोबेॽ सिॽपॽआजि पिहेसुरो। 29 हे़निङ्मि याबुकबाङ मङे़हा खा यामुमा लेडानुमे बोरु नुबानुङ भलाइ लिये खारेॽ यामुसानिङे, मो खा खेम्खुबाजिडे़ॽ आसिस चुप्टुजिरो। 30 निवाहाङ्मि पबित्रा होङ्निवा दुःखि ए़टोक्सानुमे, इन्ढोङ्होङ पबित्रा होङ्निवानोॽ हे़निङ इक्याक निवाहाङ्डे़ॽ छुट्कारा ले़ये लुनुङ पिबॽआ चिङ्ग ले़ये। 31 चोप मङे़हा खा, खिमा काक्मा, सुरके़ॽमा लेडानुमे, सिॽचामे योम्बोक ए़ले़टानुमे, चोप खालहा चेजेवा निवा लेॽपेसानुमे। 32 तर नम्नावा ले़ःॽनुङ इक्कोसे़ॽ हाइको अनुग्रहा ले़टानुमे। निवाहाङ्डे़ॽ हे़निङ आम्लाङ पिडिडोॽ हे़निङे़ॽसो इक्कोसे़ॽ हाइको आम्लाङ पिघुसे़ॽचुसानिङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.