एफिसि 3 - याम्फुपावलडे़ॽ अयहुदि जातिजि सुसमाचार खेम्मेॽपॽआ 1 मोडोगे़ॽ का पावलडे़ॽ हे़निङ अयहुदिजिमि लागि खिरिस्ट येसुमि योम्बोक ले़ःॽमाबेॽ का तिरिङ्गा खिमबेॽ से़क्सिघे़टिङे। 2 निवाहाङ्मि अनुग्रहा चुप्नुङ हे़निङ्मि लागि योम्बोक ले़ःॽमे़ जिम्मा के़ॽ चुप्मिटुङे लुमे़ खा हे़निङे़ॽ खे़म्इटानुमे। 3 लेमा छॽइये निवाहाङ्मि खा खोसे़ॽ का परकासबाङ खाङ्मुसा। इगोमि टुम्बेॽ के़ॽ याक्लोसो हे़निङ अदरे़ॽवागो साप्पेटुङे। 4 इन्डोक्पेॽ हे़निङे़ॽ के़ॽ साप्पॽआ खा नेॽएन्डानुमे मोबा लेमा छॽइये खिरिस्टमि होङ्सिॽयुए खामि टुम्बेॽ के़ॽ इन्डोक लेटुङेले़ लुनुङ हे़निङे़ॽसो लेहेन्डानुमे। 5 याक्लो इगो खा असासो मे़लुबॽआ ले़टा, तर हागो इगो लेमा छॽइये खा निवाहाङ पाबे़ॽ खोमि पबित्रा एप्पा चोङ्साजि मोबा अगमबक्ताजि पबित्रा होङ्निवामि सक्तिबाङ लेमाराप्मिटुजे। 6 मो लेमा छॽइये खा लुबॽआ चाहिँ इगो ले़ये, सुसमाचारबाङ्नोॽ अयहुदि जातिजिडे़ॽसो यहुदिजिडे़ॽ चुप्पॽआ आसिसमि अधिकार चुप्मिन्डुजे, मोबा अयहुदि जातिहा याॽमिजिसो इक्को हिङामि अङ्ग लिम्मे, मोबा खिरिस्ट येसुबाङ निवाहाङ पाबाडे़ॽ हे़म्बॽआ हे़न्ज्रुङ्मि हकदारसो लिम्मे। 7 निवाहाङ पाबामि महान अनुग्रहामि बरदानबाङ्नोॽ का सुसमाचार खेम्मेॽखुबा लिसिङ, इगो बरदान खोमिन्नोॽ सक्तिमि योम्बोकबाङ का पिसिङा। 8 खिरिस्टमि पबित्रा याॽमिजिबेॽ का इमा योम्बोक मे़ॽनिङ्मा ले़टिङ्रोसो सिःक्माबेॽ सिःक्हेनिबा खोमि याङ्सरावा सुसमाचार अयहुदि याॽमिजि खेम्मेॽमामि लागि का इगो अनुग्रहा पिसा। 9 मोबा चोप खा टोङ्खुबा निवाहाङ पाबाडे़ॽ याक्लोबाङ्नोॽ चुम्नुङ युङ्बॽआ लेमा छॽइये योजना इमाङ्डे ले़ये, माहा खा चोप याॽमिजि छे़ङ्गै टोङ्मे योम्बोक का पिसा। 10 इडोॽ पबित्रा मन्डलिबाङ पाबा निवाहाङ्मि खाल खालहा निवामि खा थाङ्सिरिबेॽहा सासकजिनुङ अधिकारदाङ्बाजिडे़ॽ लेजोसुजिरो लुनुङ माहा लेमा छॽइहा खा खाङ्मुसु। 11 इगो चाहिँ सिरिस्टि लिमा याक्लोनोॽ टोङ्बॽआ योजना ले़टे़नुङ खोमि मो योजनाडोॽ आयु कानिङ्मि खिरिस्ट येसु परभुबाङ पुरा ले़टु। 12 खिरिस्टबेॽ युङ्बॽआ बिस्वासबाङ्ए आँटनुङ भरोसाबेॽ कानिङ निवाहाङ्मि पोम्बेॽ आप्हेटिङ्मे़। 13 मोडोगे़ॽ के़ॽ हे़निङ बिन्ति ले़निम्ने़, हे़निङ्मि लागि के़ॽ आङ्बॽआ खेः खाङ्नुङ निरास ए़लिसानिङे। इगोगो हे़निङ्मि गरबमि लागिनोॽ लिबॽआ ले़ये। एफिससबेॽहा मन्डलिमि लागि पारथना 14 मोडोगे़ॽ के़ॽ निवाहाङ पाबामि पोम्बेॽ टुम्रुक ठोःक्नुङ पारथना ले़नुङे, 15 मोबा खोनोॽ थाङ्सिरिनुङ मक्खाम्डेमबेॽहा चोप बिस्वासिजिमि पाबा ले़ये। 16 खोमि इन्डोक्पेॽसो रुक्खे़ॽनिये आसिसनुङ खोमिन्नोॽ होङ्निवाबाङ हे़निङे़ॽ सक्ति चुप्टानुमे, मोबा मो सक्तिडे़ॽ हे़निङ निवाहोङ्सिॽयुबाङ्नोॽ बोलियो लिसानिङे लुनुङ के़ॽ हे़निङ्मि लागि पारथना ले़नुङे। 17 हे़निङ्मि बिस्वासबाङ खिरिस्ट हे़निङ्बेॽ पेङ्रो, मोबा निवाहाङ्मि नम्नमबेॽ हे़निङ नुरोॽ साम एम्बॽआनुङ बोलियो लिसानिङे। 18 इडोॽ ले़टानुमहोङ हे़निङे़ॽसो खिरिस्टमि पबित्रा याॽमिजिडे़ॽ चुप्टिडोक्नोॽ खिरिस्टमि नम्नम इन्डोक किएम्मा ले़ये, इन्डोक फेभेमा ले़ये, इन्डोक होङ्डुम्बा ले़ये, मोबा इन्डोक ए़ङ्इये लुनुङ नुरोॽ लेहेन्डानुमे। 19 मोबा याॽमिमि निवाडे़ॽ लेहेनिबा खिरिस्टमि नम्नम लेहेसानुमे, मोबा हे़निङ्मि चोप बेबहार निवाहाङ्डे़ॽ नेन्जामारोमा लिरो लुनुङ पारथना ले़नुङे। 20 कानिङ्होङ्सिॽयु योम्बोक ले़ःॽखुबा खोमि सक्तिडे़ॽ कानिङे़ॽ ङाःक्पॽआनुङ मिॽपॽआबाङ्सो बेॽलो पिहेखुबा, 21 निवाहाङ्मि निङ चोप युग युगठोक मन्डलिनुङ येसु खिरिस्टबाङ महिमा लिरो। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.