एफिसि 2 - याम्फुयाक्लोए हिङ्मवानुङ आइए चोङ हिङ्मवा 1 हे़निङे़ॽ पापि योम्बोक ले़ःॽपॽआसे़ॽनुङ निवाहाङ्मि टेडिघरिक ले़ःॽपॽआसे़ॽ हे़निङ्मि होङ्निवा सिबॽआ ले़टानिङे, मो बेलाबेॽ निवाहाङ्डे़ॽ हे़निङ हिङ्बोगा। 2 मोडोक्पेॽ हे़निङ मक्खाम्डेमबेॽहा पापि रितिथिति ले़ःॽसाङ मङे़हा सक्तिमि मायोङ्बा सैतानडे़ॽ लुबॽआ खा खेप्सानुम। मोसे़ॽ याॽमिजिमि होङ्निवाबेॽ निवाहाङ्मि टेडिघरिक योम्बोक ले़ःॽमे़ॽनिङ्सिन्डुए। 3 माहाजिडे़ॽ ले़टिडोक्नोॽ याक्लो कानिङे़ॽसो टाङ्बामि हिङानुङ निवाडे़ॽ मिॽपॽआ मङे़ॽमा योम्बोक ले़ःॽसाङ हिक्सिङ्मा। कानिङ्मि चोप आनिबानि हाइखा याॽमिजिमिडोक्नोॽ ले़ःॽपॽआसे़ॽ निवाहाङ्मि सुरिकपेॽ सिॽमारोमा ले़टिङ्मा। 4 तर निवाहाङ सारोनोॽ नम्नावादाङ्बा ले़येन्से़ॽ कानिङ बेॽलोनोॽ नम्नम ले़टा। 5 मोडोगे़ॽ कानिङे़ॽ पाप ले़ःॽनुङ सिबॽआहोङ्सो निवाहाङ्डे़ॽ कानिङ खिरिस्टनुङ्नोॽ हिङ्रिक टोक्सा। हे़निङ हिङ्रिक लिबॽआसो निवाहाङ्मि अनुग्रहाडे़ॽनोॽ ले़ये। 6 कानिङे़ॽ येसु खिरिस्टबेॽ बिस्वास ले़ःॽपॽआसे़ॽ निवाहाङ्डे़ॽ कानिङ्सो येसुनुङ हिङ्रिक टोक्सा, मोबा खोनुङ्नोॽ थाङ्सिरिमि राज्यबेॽ अधिकार ले़ःॽमेॽटा। 7 इगो चाहिँ सिःक्माबेॽ सिःक्हेनिबा खोमि अनुग्रहा लेङ्इहा चोप युगबेॽहा याॽमिजि खाङ्मुमामि लागि इडोॽ ले़टु। इगो अनुग्रहा निवाहाङ्डे़ॽ कानिङ येसु खिरिस्टबाङ खाङ्मुसु। 8 हे़निङे़ॽ बिस्वास ले़ःॽनुङ खोमि अनुग्रहाबाङ उद्धार चुप्मिटानुमे। इगो उद्धार चाहिँ हे़निङ्टाङ्बे़ॽ योम्बोक ले़ःॽनुङ चुप्पॽआ ने़ॽनि, इगोगो निवाहाङ्डे़ॽ पिबॽआ बरदान ले़ये। 9 याॽमिजिडे़ॽ योम्बोक ले़ःॽनुङ उद्धार चुप्पॽआ ने़ॽनि, मोडोगे़ॽ याॽमिजिडे़ॽ बेॽहा खा इमे खानोॽ माॽआहा। 10 कानिङ खोसे़ॽ टोङ्बॽआ खोमि सिरिस्टि ले़न्डिङ्मा। कानिङ्मि हिङ्मवाबाङ नुबा योम्बोक लिरो लुनुङ्नोॽ खिरिस्ट येसुबाङ निवाहाङ्डे़ॽ कानिङ टोक्सा। कानिङ्बाङ माहा नुबा योम्बोक ले़ःॽमामि लागि याक्लोनोॽ खोसे़ॽ पोरोइटे़। खिरिस्टबेॽ चोप इक्कोनोॽ 11 मिॽखाक्सानुमे, याक्लो हे़निङे़ॽ निवाहाङ लेमा याक्लो हिङाबेॽ याॽमिमि हुगे़ॽ “खतना लिबॽआ” इस्राएलिजिडे़ॽ हे़निङ “खतना मे़ले़ःॽखुबा” अयहुदि याॽमिजि लुसामे। 12 मोडोक्पेॽ हे़निङ खिरिस्टबाङ ओः ले़टानिङ, निवाहाङ्डे़ॽ से़न्बॽआ जाति इस्राएलि याॽमिजिडे़ॽ चुप्पॽआडोॽहा हक हे़निङ्नुङ माॽआड। निवाहाङ्डे़ॽ याॽमिजिनुङ हुॽपॽआ हेन्ज्रुङ मे़लेघुबा ले़टानिङ, मोबा आसा मे़ॽनिङ्हाजिनुङ इगो मक्खाम्डेमबेॽ निवाहाङ मे़ॽनिङ्हा याॽमिजि ले़टानिङ। 13 तर हे़निङ, मो याक खिरिस्टबाङ ओः टुघुबाजि हागो चाहिँ हे़निङ येसु खिरिस्टमि हरिडे़ॽ निवाहाङ्नुङ के़क्पेॽ लिटानिङे। 14 खिरिस्टबाङ्नोॽ कानिङे़ॽ सान्ति चुम्मिटुङ्मे। खो काप्सिङ्बेॽ बलि लिनुङ यहुदिनुङ अयहुदि याॽमिजि इक्को टोङ्इटे़, मोबा यहुदिनुङ अयहुदि इक्को ए़लिमेॽनुङ सतुर टोङ्घुबा परखाल योबेटुए। 15 मोबा खोसे़ॽ यहुदिनुङ अयहुदि निच्चि जातिमि रुम्बेॽ सान्ति लाप्नुङ टाङ्बामि इक्को चोङ जाति टोङ्मामि खो बलि लिसा। मोबा यहुदि धारमिक नियमनुङ रितिथिति योम्बोक मे़ॽनिङ्मा टोक्सु। 16 कानिङ यहुदिनुङ अयहुदि निप्पाङ्मि रुम्बेॽ सतुर टोङ्घुबा नियम नासि ले़ःॽनुङ निवाहाङ्नुङ चुप्मेॽमामि खो काप्सिङ्बेॽ बलि लिसा। 17 खिरिस्ट लेन्नुङ निवाहाङ्बाङ ओः लिबॽआ हे़निङ अयहुदिजिनुङ निवाहाङ्मि के़क्पेॽ टुघुबा यहुदिजिमि रुम्बेॽ टोङ्जामे सुसमाचार खेम्मेॽटा। 18 खोसे़ॽ ले़ःॽमे़ॽनोॽ यहुदिनुङ अयहुदि निप्पाङे़ॽ इक्को पबित्रा होङ्निवा चुप्नुङ निवाहाङ पाबामि पोम्बेॽ खे़ॽटोॽइटिङ्मे़। 19 मोडोगे़ॽ हागो हे़निङ हाइको देसबेॽहा याॽमिनुङ अयहुदि ने़ॽनि, तर हे़निङ्गो निवाहाङ पाबामि पबित्रा याॽमिजिनुङ खोमि राज्यमि अधिकार चुप्मिटानुमेनुङ खोमि खिमबेॽहा याॽमिजि लिटानिङे। 20 हे़निङ खिमडोॽ ले़न्डानिङ्नुङ मो खिममि जग चाहिँ एप्पा चोङ्साजिनुङ अगमबक्ताजिनोॽ ले़म्मे। येसु खिरिस्ट चाहिँ मो खिममि जगबेॽ युङ्ढाम सुर रुङ्गोॽवा ले़ये। 21 खोसे़ॽनोॽ चोप खिम योम्नुङ टोङ्इन्डुए, मोबा खोसे़ॽनोॽ इगो वाबुक्मेॽसाङ निवाहाङ पेन्ढाम पबित्रा मन्दिर टोङ्इन्डुए। 22 मोबा पबित्रा होङ्निवाबेॽ निवाहाङ पेन्ढाम खिम लिमामि हे़निङ्सो खोबेॽ इक्को खिम लिमे़ॽनिङ्सिन्डानिङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.