एफिसि 1 - याम्फुपावलडे़ॽ सेवा मुबॽआ 1 निवाहाङ्डे़ॽ मिॽपॽआबाङ खिरिस्ट येसुमि एप्पा चोङ्सा लिबॽआ का पावलबाङ, खिरिस्ट येसुबेॽ बिस्वास ले़ःॽखुबा एफिससबेॽहा पबित्रा याॽमिजिमि लागि इगो पत्रा साप्मे़ॽनिङ्सिनुङे। 2 कानिङ्मि निवाहाङ पाबानुङ परभु येसु खिरिस्टडे़ॽ हे़निङ अनुग्रहानुङ सान्ति पिरो। खिरिस्टबेॽ चुप्मिये आसिस 3 कानिङ्मि परभु येसु खिरिस्टमि पाबा निवाहाङ्मि महिमा लिरो। खोसे़ॽ येसु खिरिस्टराम्बाङ थाङ्सिरिबाङ्हा चोप आत्मिक आसिस कानिङ पिटे़। 4 निवाहाङ्डे़ॽ खोमि पोम्बेॽ पबित्रानुङ आप्टिक मे़ॽनिङ्हा लिमिरो लुनुङ मक्खाम्डेम सिरिस्टि लिमा याक्लोनोॽ खिरिस्टराम्बाङ कानिङ से़ङ्इटे़। 5 खोसे़ॽ कानिङ नम्नम ले़ःॽनुङ साप्थाङ्मानुङ खिरिस्टलामबाङ याक्लोएम्बाङ्नोॽ खोमि सन्तान टोङ्मामि मिॽपेबॽआ ले़टे़। 6 मोडोगे़ॽ इडोॽ बेॽलो अनुग्रहामि लागि निवाहाङ ओहाक पिमायो, इन्ढोङ्होङ खोसे़ॽ कानिङ खोमि नम्नम मिॽपॽआ पसा कानिङ्मि लागि मोडोक्नोॽ (सित्तैबेॽ) पिसा। 7 खिरिस्ट सिसा मोडोगे़ॽ खोमि हरिडे़ॽ कानिङे़ॽ पापबाङ आम्लाङ चुप्मिटुङ्मे़। खोसे़ॽ कानिङ्मि पापमि मोल फोङ्नुङ कानिङ छुट्कारा पिसा। चइबानोॽ निवाहाङ्मि अनुग्रहा महान ले़ये। 8 मो महान अनुग्रहा निवाहाङ्डे़ॽ कानिङ बेॽलो बेॽलो पिटे़। 9 मोडोक्नोॽ निवाहाङ्डे़ॽ खिरिस्टबाङ पुरा ले़ःॽमा योक्पॽआ टाङ्बामि गहिरो खा लेमेॽटा। 10 मो खा लुबॽआ चाहिँ थाङ्सिरिनुङ मक्खाम्डेमबेॽहा चोप सिरिस्टि खिरिस्टमि अधिनबेॽ लाप्मामि लागि ले़ये। मोबा निवाहाङ्डे़ॽ मो योम्बोक ठिक बेलाबेॽ पुरा ले़न्डुए। 11 इन्ढोङ्होङ चोप योम्बोक निवाहाङ्डे़ॽ ले़ःॽमा मिॽपॽआडोक्नोॽ लिटाहा। निवाहाङ खोमटाङ्बे़ॽ कानिङ से़ना। इगो खा चाहिँ याक्लोएम्बाङ ले़ःॽमा मिॽपॽआ ले़टे़। 12 याक्लोनोॽ खिरिस्टबेॽ भरोसा ले़ःॽखुबा कानिङ यहुदिजि निवाहाङ्डे़ॽ खोमि ओहाङ महिमा ले़ःॽमामि लागि से़ना। 13 मोडोक्नोॽ हे़निङे़ॽसो मुक्ति पिघुबा चाइबमा सुसमाचार खेम्नुङ खिरिस्टबेॽ बिस्वास ले़टानुम। निवाहाङ्डे़ॽ हेन्ज्रुङ हे़म्बॽआ पबित्रा होङ्निवामि छाप टिनुङ निवाहाङ्डे़ॽ हे़निङ खोमि याॽमिजि टोङ्बॽआ परमान पिसा। 14 निवाहाङ्डे़ॽ कानिङ पिनिम्ने़ लुनुङ हेन्ज्रुङ हे़म्बॽआ हक कानिङे़ॽ मे़न्चुप्लो पबित्रा होङ्निवा चाहिँ बैनाडोॽ कानिङ पिटे़। इगो खामि लागि खो महिमानुङ ओहाङ पिमायो। पावलमि पारथना 15 मोडोगे़ॽनोॽ परभु येसुबेॽ हे़निङे़ॽ ले़ःॽपॽआ बिस्वासनुङ खिरिस्टमि पबित्रा चोप याॽमिजिमि लागि हे़निङे़ॽ ले़ःॽपॽआ नम्नम खेम्नुङ, 16 सानिङ्मु निवाहाङ ओहाक पिनुङे़, मोबा हे़निङ्मि लागि सानिङ निवाहाङ्नुङ पारथना ले़नुङे। 17 कानिङ्मि परभु येसुमि निवाहाङ, आदर महिमा ले़ःॽमारोमा पाबाडे़ॽ हे़निङ पबित्रा होङ्निवाबाङ निवानुङ बुद्धि पिरो लुनुङ हे़निङ्मि लागि पारथना ले़नुङे। मो निवानुङ बुद्धि चुप्नुङ हे़निङे़ॽ निवाहाङ छना बेॽलो लेहेन्डानुमे। 18 के़ॽ इडोॽ लुनुङ्सो इगो पारथना ले़नुङे, हे़निङ्मि निवामि जोति उरो, हे़निङ हाम्बे आसामि लागि के़ए़टे़नुङ, पबित्रा याॽमिजिबेॽ खोमि महिमानुङ्मा हक अधिकारमि याङ्सरावा इमाङ ले़ये, मो हे़निङे़ॽ लेहेसानुमे। 19 मोबा हे़निङ खिरिस्टबेॽ बिस्वास ले़ःॽखुबाजिडे़ॽ खोमि महान सक्ति इन्डोक बेॽए ले़ये लुमे खा लेहेसानुमे लुनुङ पारथना ले़नुङे। 20 मो सक्तिबाङ्नोॽ निवाहाङ्डे़ॽ येसु सिबॽआबाङ हिङ्बोगु, मोबा थाङ्सिरिबेॽ खोमि चुप्थिङ्लाम येसु युक्सु। 21 खिरिस्टडे़ॽ नान्रुङ्माबेॽहा चोप चापसोक्पेॽ, चोप सासकजि सोक्पेॽ, चोप सक्तिसोक्पेॽ सासन ले़न्डुए, खो चोप परभुजिमिसो परभु ले़ये। इगो युगबेॽरेॽनोॽ ने़ॽनि ए़क्साङ लेङ्इये युगबेॽसो खोसे़ॽनोॽ सासन ले़न्डुए। 22 निवाहाङ्डे़ॽ चोप खा खिरिस्टमि सराङ्बेॽ युङ्बेॽटु, मोबा खो चोप मन्डलिमि निन्डवाँ लिसा। 23 मो मन्डलि खोमि हिङा ले़ये, खोबेॽ टुहा चोप खा बिस्वास ले़ःॽखुबाजिनुङ टुहा, खोसे़ॽ चोप थोक, चोपराजि खोमटाङ्बे़ॽ अधिन ले़न्डुए। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.