कलस्सि 4 - याम्फु1 मायोङ्बाजि, हे़निङे़ॽसो टाङ्बामि सेउतेजि पक्छेपात मे़ॽनिङ नुबा बेबहार ले़टानुमे। हे़निङे़ॽसो थाङ्सिरिॽटु टाङ्बामि मायोङ्बा टुये लुमे खा मिन्डेॽमा फे़न्निबा। हाइखा अरति 2 हे़निङे़ॽ सानिङ पारथना ले़ःॽमे। पारथना ले़ःॽमाबेॽ ओहाक पिसाङ निवाहाङ्बेॽ निवा टिनुङ पारथना ले़टानुमे। 3 के़ॽ सुसमाचार परचार ले़ःॽपॽआसे़ॽ का तिरिङ्गा खिमबेॽ से़क्सिघे़टिङे। हागो खिरिस्टमि टुम्बेॽए लेमा छॽइये खा याॽमिजि परचार ले़ःॽमामि निवाहाङ्डे़ॽ कानिङ राम हेम्बेॽलो लुनुङ कानिङ्मि लागि पारथना ले़टानुमे। 4 मोबा के़ॽ इःमा खे़ये बचन नुरोॽ इःहेमामि लागि पारथना ले़ःॽपेॽमाजे। 5 येसुबेॽ बिस्वास मे़ले़ःॽपॽआजिनुङ बेबहार ले़ःॽमाबेॽ होसियारि लिनुङ बेबहार ले़टानुमे। हे़निङे़ॽ इन्डोक्पेॽ परचार ले़टोक्इन्डानुम मोडोक्पेॽ निवा टिनुङ परचार ले़टानुमे। 6 युमडे़ॽ चामा खेङ चानुये टोङ्डिडोॽ हे़निङे़ॽसो सानिङ नम्नावानुङ्हा बोलि बचन ले़ःॽमे। हे़निङ चोप याॽमिजिनुङ चनुहा यामुसानुमे। बिदाइ 7 कानिङे़ॽ नम्नम ले़ःॽपॽआ बिस्वासि निसा तुखिकसडे़ॽ के़ए़ टुम्बेॽहा चोप खा हे़निङ लुबेॽये। खोसो कानिङ्नुङ्नोॽ सोरि परभुमि सेवा ले़ःॽखुबा याॽमि ले़ये। 8 खोसे़ॽ कानिङ्मि टुम्बेॽ इःबेॽपॽआ खाडे़ॽ हे़निङे़ॽ बोल चुप्टानुमे लुनुङ्नोॽ के़ॽ खो हे़निङ्बेॽ पाङ्मे़ॽनिङ्सिनुङे। 9 खो हे़निङ्डोक्नोॽ नम्नम मिॽपॽआ मोबा बिस्वासनुङ्मा निसा ओनेसिमसनुङ सोरि आप्मे़ॽनिङ्सिये। खो हे़निङ्बेॽए इक्को ले़ये। खोजिडे़ॽनोॽ इगोबेॽ लिबॽआ चोप खा हे़निङ इःबेम्मे। 10 कानुङ सोरि तिरिङ्गा खिमबेॽ से़क्सिघे़ॽखुबा अरिस्तारखसडे़ॽ हे़निङ सेवायो लुहाङ्इटे़। बारनाबासमि येस्सबा मरकुसडे़ॽसो सेवा पाङ्इटे़। खोमि टुम्बेॽ के़ॽ असिॽनोॽ हे़निङ लुबेनिम। खो हे़निङ्बेॽ लेङ्होङ नुरोॽ सेवा ले़ःॽमेयो। 11 युस्तस निङ्मा येसुडे़ॽसो हे़निङ सेवायो लुहाङ्इटे़। निवाहाङ्मि राज्यमि लागि कानुङ योम्बोक ले़ःॽखुबा यहुदि बिस्वासिबाङ इघा सुम्बाङ्रेॽ टुम्मे। इघाजिबाङ के़ॽ बेॽलोनोॽ बोल चुप्मिटुङे। 12 हे़निङ्मि इक्को लङ्गाम खिरिस्ट येसुमि सेउते इपाफरासडे़ॽसो हे़निङ सेवायो लुहाङ्इटे़। हे़निङ निवाहाङ्डे़ॽ मिॽपॽआडोक्नोॽ ले़ःॽखुबाजि, मोबा बिस्वासबेॽ पाको लिमिरो लुनुङ खोसे़ॽ सानिङ हे़निङ्मि लागि पारथना ले़न्डुए। 13 इपाफरासडे़ॽसो हे़निङ्मि लागि मोबा लाउडकियानुङ हिरापोलिसबेॽहा याॽमिजिमि लागि खोसे़ॽ बेॽलो दुःख ले़ए़टुए। खोमि इगो खामि लागि का साक्छि टुङे। 14 कानिङ्मि डाक्टर लुकानुङ डेमासडे़ॽसो हे़निङ सेवायो लुहाङ्इटामे। 15 मोबा लाउडिकियाबेॽहा निसाजिनुङ नुम्फासनुङ खोमि खिमबेॽ सुम्नुङ सङ्गति ले़ःॽखुबाजि चोप काङ्मि सेवायो लुबेॽमाहाजि। 16 इगो पत्रा हे़निङे़ॽ नेॽसेॽनुङ ए़क्साङ लाउडिकियाबेॽए मन्डलिबेॽहाजिसो नेॽमामि पिसानुमे। मोडोक्नोॽ लाउडिकियाबेॽहा पत्रासो हे़निङे़ॽ नेडानुमे। 17 मोबा परभुडे़ॽ अरखिप्पस पिबॽआ योम्बोक इन्डोॽहोङ्सो पुरा ले़ःॽसेॽमे लुनुङ लुबेॽटानुमे। 18 का पावलडे़ॽ, सेवायो लुनुङ काङ्मिनोॽ हुगे़ॽ हे़निङ्मि लागि साप्मिटुङे। का तिरिङ्गा खिमबेॽ से़क्सिघे़ॽपॽआ खा सानिङ हे़निङ्मि पारथनाबेॽ मिडानुमे। हे़निङ्नुङ सानिङ निवाहाङ्मि अनुग्रहा टुडुङ्घे़ॽरो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.