कलस्सि 3 - याम्फु1 हे़निङ खिरिस्टनुङ सोरि हिङ्बोक्पॽआसे़ॽ थाङ्सिरिॽटुहा खा योगानुमे, मोबेॽ खिरिस्ट टुयेनुङ खो निवाहाङ्मि चुप्थिङ्लाम पेङ्इटे़। 2 मक्खाम्डेमबेॽहा खाबेॽ निवा ए़ॽटिसानुमे, तर थाङ्सिरिॽटुहा खाबेॽ सानिङ निवा टिसानुमे। 3 इन्ढोङ्होङ हे़निङ सिघे़टानिङे, हे़निङ्मि हिङ्मवा निवाहाङ्बेॽ खिरिस्टनुङ चुम्युङ्बॽआ ले़हा। 4 खिरिस्ट कानिङ्मि हिङ्मवा ले़ये। खो खाङ्मुमाबेॽ हे़निङ्सो खोनुङ्नोॽ सोरि महिमाबेॽ खाङ्मुन्डानिङे। याक्लोएनुङ चोङ हिङ्मवा 5 मोडोगे़ॽ हे़निङ्मि हिङ्मवाबेॽ टुहा इडोक्हा पापि योम्बोक बेभिचार, असुद्ध खा, छाडा निवा, मङे़हा निवानुङ खिक्तुबाङ निवा इघा चोप मुरति पुजा निवाबाङ राप्पेसानुमे। 6 इडोक्हा खाडे़ॽ ले़ःॽमे़ॽनोॽ निवाहाङ्मि सुरिक खोमि खा मे़ङ्खेम्खुबाजिबेॽ सिॽइये। 7 हे़निङ्मिसो याक्लोमा हिङ्मवा इडोक्मानोॽ ले़टे़ मोबा इडोक्हा खाबेॽ राप्सानिङ। 8 तर हागोएम्बाङ इडोक्हा सुरिक, चेजेवा, सिःक्चामा, चिक्चिमिॽमारोमा खा इघा चोप खा हे़निङे़ॽ ले़ःॽमा लेडानुमे। 9 हे़निङे़ॽ इक्कोसे़ॽ हाइको ए़रेम्देडानुमे, इन्ढोङ्होङ हे़निङे़ॽ याक्लोमा हिङ्मवानुङ मोमि चोप मङे़हा आनिबानि लेप्पेटानुमे। 10 हागोगो हे़निङ चोङ लिनुङ मोमिनोॽ नुबा आनिबानि ले़ःॽखुबा लिटानिङे। हे़निङ टाङ्बामि सिरिस्टिदाङ्बामि नरिङ्डोॽ खोमिन्नोॽ निवाबेॽ चोङ लिमे़ॽनिङ्सिन्डानिङ। 11 मोडोगे़ॽ येसुमि पोम्बेॽ इस्राएलिनुङ गिरिकजि, खतना ले़ःॽखुबाजिनुङ मे़ले़ःॽखुबाजि, ओरे़कचि, मे़नेॽपॽआजि, सेउतेजि, फुक्का लिबॽआजि चोप याॽमि इक्कोनोॽ लिम्मे, मोबा चोपजिबेॽ खिरिस्टरेॽनोॽ टुये। 12 हे़निङ्नोॽ निवाहाङ्डे़ॽ नम्नम ले़ःॽपॽआनुङ से़म्बॽआ पबित्रा याॽमिजि ले़न्डानिङ। मोडोगे़ॽ हे़निङ सानिङ नम्नम ले़ःॽखुबा, नम्नावा ले़ःॽखुबा, ए़डे़म्मा लिघुबानुङ सोझो सहनसिल लिसानिङे। 13 इक्कोसे़ॽ हाइको आङ्साङ नम्नम ले़ःॽखुसे़ॽचुसानिङे। इक्कोसे़ॽ बिरोङ ले़टुहोङ्सो खो आम्लाङ पिघुसे़ॽचुसानिङे। परभुडे़ॽ कानिङ आम्लाङ पिडिडोक्नोॽ हे़निङे़ॽसो आम्लाङ पिघुसे़ॽचुमा खे़ये। 14 इघा चोप्पाङ बेॽलो हे़निङ्मि रुम्बेॽ नम्नम टुमा खे़ये, इन्ढोङ्होङ नम्नमडे़ॽ याॽमि इक्को टोङ्इये। 15 खिरिस्टबेॽ टुये सान्तिडे़ॽ हे़निङ्मि निवाबेॽ राज्य ले़टुरो। चइबानोॽ इगो सान्तिमि लागिनोॽ हे़निङ इक्को हिङाबेॽ के़ए़टानिङे। इगो खामि लागि हे़निङे़ॽ ओहाक पिसानुमे। 16 खिरिस्टमि बचन हे़निङ्मि निवा इॽठुप युक्सानुमे। टाङ्बामि चोप निवाडे़ॽ याॽमिजि इःडानुमेनुङ सल्लाह पिसानुमे। टाङ्बामि निवाबाङ सेमडे़ॽ ओहाङ पिसाङ खोमि महिमा ले़टानुमे। 17 हे़निङे़ॽ इमाङ ले़न्डानुमे, इमाङ इःन्डानुमे माहा चोप परभु येसुमि निङ्बेॽनोॽ ले़टानुमे, मोबा खोबाङ्नोॽ निवाहाङ पाबा ओहाङ पिसानुमे। चोङ हिङ्मवाबेॽ निवाहाङ्नुङ सङ्गति 18 बनिमाजि हे़निङ परभुमि पोम्बेॽ खेन्जानुरो टाङ्बामि बनिबाजिमि अधिनबेॽ पेनानिङे। 19 बनिबाजिओ, टाङ्बामि बनिमाजि नम्नम ले़टानुमेनुङ खोजिनुङ नम्नम मे़ॽनिङ्हा बेभार ए़ले़टानुमे। 20 पिच्छाजि, हे़निङे़ॽ सानिङ टाङ्बामि पाबा मामाजिडे़ॽ लुबॽआ खा निवा टिनुङ खेप्सानुमे, इन्ढोङ्होङ इडोॽ ले़ःॽमाबेॽनोॽ निवाहाङ साप्थाङ्इये। 21 पाबाजि टाङ्बामि पसाजि ए़सुरके़ॽमेॽटानुमे, सुरके़ॽमेॽटानुमहोङ खोजि निरास लिम्मे। 22 सेउतेजि, सानिङ हे़निङ्मि मायोङ्बाजिडे़ॽ लुबॽआ खा खेप्सानुमे। हे़निङ्मि मायोङ्बाजि साप्थाङ्मेॽमामि खोमि पोम्बेॽरेॽ नुबा योम्बोक ए़ले़टानुमे, तर हे़निङ्मि निवाबाङ परभुनुङ किस्सिमानुङ खोजिमि अधिनबेॽ पेनानिङे। 23 हे़निङे़ॽ इमाङ योम्बोक ले़ःॽमाबेॽसो निवा टिनुङ ले़टानुमे। माहा चोप योम्बोक याॽमिजिमि लागि ले़टिडोॽ ए़ले़टानुमे, तर परभुमि लागिनोॽ मिॽनुङ ले़टानुमे। 24 इन्ढोङ्होङ हे़निङ इनाम पिनिम्ने़ लुनुङ हेन्ज्रुङ हे़न्खुबा परभुनोॽ ले़ये लुनुङ हे़निङे़ॽ लेन्डानुमे। मोबा हे़निङे़ॽ सेवा ले़ःॽपॽआ खिरिस्टनोॽ हे़निङ्मि परभु ले़ये। 25 टाङ्बे़ॽ ले़ःॽपॽआ मङे़हा योम्बोकमि दन्डा खोसे़ॽनोॽ चुप्मिन्डुए, इगो खाबेॽ पक्छेपात लिनिबा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.