कलस्सि 2 - याम्फु1 चइबानोॽ हे़निङ्मि लागि के़ॽ निवा टिसाङ खेः आङ्मानुङ नुरोॽ योम्बोक ले़ए़टुङे। के़ॽको लाउडिकियाबेॽहा याॽमिजिनुङ के़ॽ मे़लेघुबाजिमि लागिसो मोडोक्नोॽ निवा टिनुङ योम्बोक ले़ए़टुङे लुनुङ हे़निङे़ॽ लेसानुमे मिॽइनिम्ने़। 2 खोजिडे़ॽ साहस चुप्नुङ मोबा खोजिटाङ्बामि रुम्बेॽ नम्नम ले़चामिरो लुनुङ्नोॽ के़ॽ इडोॽ ले़ए़टुङे। मोडोगे़ॽ खोजि नुबानुङ मङे़ॽमा निवाबेॽ पक्का लिनुङ निवाहाङ्मि लेमा छॽइये खा लेमे निवा अथबा खिरिस्ट नुरोॽ लेहेखुबाजि लिहेम्मे। 3 खिरिस्टबेॽनोॽ निवाहाङ्मि टुम्बेॽहा खा लेमे चोप निवा टुहा। 4 मोडोगे़ॽ हे़निङ लुनिम्ने़, हे़निङ इन्डोक्हा रेम्सिङ बचनडे़ॽसो मे़रेम्जाहेमिरो। 5 इन्ढोङ्होङ हिङाबेॽ हे़निङ्बाङ सारोनोॽ का ओः टुङे तरसो होङ्निवाबेॽको हे़निङ्नुङ सोरिनोॽ टुङे। हे़निङ नुरोॽ हिङ्बॽआ मोबा खिरिस्टबेॽ हे़निङ्मि बोलियो बिस्वास खाङ्नुङ का बेॽलो साप्थाङ्इङे। हिङ्मवामि पुरा भरोसा खिरिस्टबेॽ 6 इन्डोॽ हे़निङे़ॽ खिरिस्ट येसु परभु मिॽनुङ बिस्वास ले़ए़टानुमे, मोडोक्नोॽ हे़निङ खोबेॽ हिक्सानिङे। 7 सिङ्बु डाङ्डे़ॽ आक्खामाबेॽ साम ए़न्डिडोॽ खोबेॽ हे़निङ्मि बिस्वासमिसो साम ए़म्बॽआ लिनुङ हे़निङ नुरोॽ हिक्सानिङे। मोबा हे़निङ इःॽपॽआ सिक्छेडे़ॽ लुडिडोॽ बिस्वासबेॽ बोलियो लिनुङ सानिङ ओहाक पिघुबाजि लिसानिङे। 8 हे़निङ चङ्खो लिनुङ पेनानिङे, मे़म्पेनानिङ्होङ याॽमिजिमि निवामि योम्बोक मे़ॽनिङ्हा रेम्सिङ्जिमि खाडे़ॽ हे़निङ रेम्इम्मे। इडोक्हा खा खिरिस्टबाङ लेम्बॽआ ने़ॽनिहा तर याॽमिजिमिन्नोॽ चाल चलननुङ मक्खाम्डेमबेॽहा सिक्छेबाङ लेम्बॽआ खा ले़हा। 9 इन्ढोङ्होङ खिरिस्टमि हिङाबेॽनोॽ निवाहाङ्बेॽ टुहा चोप खा टुहा। 10 खिरिस्टनोॽ चोप सासननुङ अधिकारमि मायोङ्बा ले़ये। खोमिन्नोॽ हिङ्मवाबेॽ हे़निङ पुरा लिजाटानिङे। 11 हे़निङ्मि खतना हुगे़ॽ ने़ॽनि, तर चाइबमा खनता चाहिँ हे़निङे़ॽ टाङ्बामि पापनुङ्हा चोप योम्बोक लेप्पेनुङ खिरिस्ट काङ्मि मुक्तिदाङ्बा लुनुङ खोबेॽ बिस्वास ले़ःॽपॽआ खानोॽ हे़निङ्मि खतना ले़ये। 12 इन्ढोङ्होङ बप्तिस्मा लामाबेॽ हे़निङ्सो खोनुङ हुप्सानिङे। मोबा सिबॽआबाङ खिरिस्ट हिङ्बोक्खुबा निवाहाङ्मि सक्तिबेॽ बिस्वास ले़ःॽपॽआसे़ॽ हे़निङ्सो खिरिस्टनुङ्नोॽ हिङ्बोॽइटानिङे। 13 याक्लो हे़निङ टाङ्बामि अपराधनुङ हे़निङ्मि हिङाबेॽ खतना मे़ले़ःॽपॽआसे़ॽ सिबॽआ ले़टानिङ। तर निवाहाङ्डे़ॽ कानिङ्मि चोप अपराध आम्लाङ पिनुङ खोनुङ्नोॽ हिङ्बोॽइटे़। 14 मोबा कानिङ्मि बिरोधबेॽ साप्पॽआ चोप आप्टिक पत्रानुङ मोबेॽ साप्पॽआ नियम येसुडे़ॽ खोनुङ्नोॽ काप्सिङ्बेॽ किला ठाक्नुङ नासि ले़पेटुहा। 15 मोबा मो काप्सिङ्बेॽनोॽ खिरिस्टडे़ॽ परधानतानुङ मङे़हा सक्तिजि हेजोसुजि। मोबा माहाजि चोपमि पोम्बेॽ तमसा टोङ्नुङ ङेसिमारो टोक्सुजि। 16 मोडोगे़ॽ असे़ॽसो चामानुङ उङ्मामि, पबित्रा याक नेॽमे ए़नेॽमे, औँसि पुरने, नाजामे याक नेॽमे ए़नेॽमे खामि टुम्बेॽ नियम ए़ॽटोक्सानुमे। 17 इघा चोप खागो ए़क्साङ लेङ्इये खामि लावारेॽनोॽ ले़हा। चाइबमा खा चाहिँ खिरिस्टनोॽ ले़ये। 18 कानिङे़ॽ सेन्जिसेम्माङ चुप्मिटुङ्मे लुसाङ, मे़नोक्सो ए़डेम्मा रे़ङ्डिडोॽ ले़ःॽनुङ थाङ्सिरिदुतमि पुजा ले़ःॽसाङ खोजि टाङ्बा बेॽए रे़ङ्इम्मे। इडोक्हाजिमि रेम्सिङ खाडे़ॽ रेम्नुङ हे़निङे़ॽ चुप्मे इनाम मे़चोघुबाजि ए़लिसानिङे। इडोक्हा याॽमिजि इमाङ मे़ॽनिङ्सो माङ्माङ बेॽए कामानिम्मे। तर खोजि बेॽए लिमे खा इमाङ काप्टुजिने। 19 इडोक्हा याॽमिजि खिरिस्टमि अधिनबेॽ पेम्मिने। इन्ढोङ्होङ निन्डवाँमि अधिनबेॽ पेन्नुङ्रेॽ हिङामि चोप अङ्ग बोलियो लिडिडोॽ खिरिस्ट निन्डवाँ ले़ये, खोमि अधिनबेॽ पेन्नुङ्रेॽ माहाजि निवाहाङ्डे़ॽ मिॽपॽआडोक्नोॽ खिरिस्टबेॽ बेॽलो बेॽलो लिम्मे। खिरिस्टनुङ सिसिङ्मा, खिरिस्टनुङ हिक्सिङ्मा 20-21 हे़निङे़ॽको खिरिस्टनुङ सोरि सिनुङ इगो मक्खाम्डेमबेॽहा पापि निवाबाङ फुक्का चुप्मिटानुमे, इन्ढोङ हे़निङ इगो मक्खाम्डेमबेॽहा याॽमिजिडोक्नोॽ हिङ्इन्डानिङे ? इन्ढोङ हे़निङे़ॽ “इगो के़क्मा फे़न्निबा, इगो सेप्मा फे़न्निबा, इगो राःप्मा फे़न्निबा” लुमे नियम पालना ले़न्डानुमे ? मोबा हे़निङ छुट्कारा चुप्नुङ्सो इन्ढोङ “सुःप्मा फे़न्नि, सेप्मा फे़न्नि, राःप्मा फे़न्नि लुमे नियम पालना ले़न्डानुमे ?” 22 इघा चोप नियमगो ले़ःॽमारोनोॽ नासि लिघे़हा। इघा चोप नियमगो याॽमिजिडे़ॽ टोङ्बॽआ नियमनुङ आग्याबाङ लेम्बॽआ खा ले़हा। 23 इघा धरम करम ले़ःॽखुजि, ए़डे़म्मा लिखुबाजि मोबा जोगिडोॽ हिङ्नुङ सारो निवादाङ्बा खाङ्मुम्मे। तर इगोसे़ॽ खोजिटाङ्बामि हिङामि मङे़हा निवा चाहिँ अधिनबेॽ युङ्हेसुजिने। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.