कलस्सि 1 - याम्फु1 निवाहाङ्डे़ॽ मिॽपॽआबाङ खिरिस्ट येसुमि एप्पा चोङ्सा लिबॽआ का पावलनुङ कानिङ्मि निसा तिमोथिबाङ, 2 खिरिस्टबेॽ बिस्वास ले़ःॽखुबा कलस्सिबेॽहा पबित्रा याॽमिजिनुङ बिस्वासि वावानिसाजि इगो पत्रा साप्मे़ॽनिङ्सिनुङ्मे। कानिङ्मि निवाहाङ पाबाडे़ॽ अनुग्रहानुङ सान्ति पिसुजिरो। ओहाकमि पारथना 3 हे़निङ्मि लागि पारथना ले़ःॽमाबेॽ कानिङे़ॽ कानिङ्मि परभु येसु खिरिस्टमि पाबा निवाहाङ्नुङ सानिङ ओहाक पिन्डुङ्मे़। 4 इन्ढोङ्होङ खिरिस्ट येसुबेॽ हे़निङ्मि बिस्वासनुङ चोप पबित्रा याॽमिजिबेॽ हे़निङे़ॽ ले़ःॽपॽआ नम्नममि टुम्बेॽ कानिङे़ॽ खेम्इटुङ्मे। 5 इगो चाहिँ हे़निङ्मि लागि थाङ्सिरिबेॽ युङ्बॽआ आसाडे़ॽ ले़ःॽमे़ॽ इडोक्मा बिस्वासनुङ नम्नम ले़ए़टानुमे। इगो आसामि टुम्बेॽ याक्लोबाङ्नोॽ हे़निङे़ॽ चाइबानोक्मा बचन, अथबा सुसमाचारबेॽ खेम्इटानुमे। 6 इगो सुसमाचार हे़निङ्बेॽ लेङ्इटे़, मोबा चइबानोॽ इगो खा मक्खाम्डेमबेॽहा चोप याॽमिजिमि लागि बेॽलोनोॽ नुबा लिमे़ॽनिङ्सिये। मोडोक्नोॽ निवाहाङ्मि अनुग्रहामि टुम्बेॽ हे़निङे़ॽ चाइबमा खाबेॽ खेम्बॽआनुङ लेबॽआ याकबाङ सुसमाचारडे़ॽ हे़निङ्बेॽसो नुबा योम्बोक ले़ःॽमे़ॽनिङ्सिन्डुए। 7 इगो खानोॽ कानिङ्नुङ निवाहाङ्मि योम्बोक ले़ःॽखुबा निसा इपाफरसबाङ चिनानुम। खो कानिङ्मि साटो हे़निङ्मि रुम्बेॽ खिरिस्टमि लागि योम्बोक ले़ःॽखुबा इक्को नुबा बिस्वासनुङ्मा याॽमि ले़ये। 8 पबित्रा होङ्निवाडे़ॽ हे़निङ पिबॽआ नम्नममि टुम्बेॽ खोसे़ॽनोॽ कानिङ खेम्मेॽटा। 9 मोडोगे़ॽ कानिङे़ॽ मो खा खेम्बॽआ याकबाङ हे़निङ्मि लागि कानिङे़ॽ पारथना ले़ःॽमे़ॽनिङ्सिन्डुमे़। पबित्रा होङ्निवाडे़ॽ पिबॽआ निवानुङ निवाहाङ्डे़ॽ मिॽपॽआ नुबानुङ मङे़हा खा हे़निङे़ॽ चोप लेसानुमे लुनुङ कानिङ हे़निङ्मि लागि सानिङ पारथना ले़ःॽमे़ॽनिङ्सिन्डिङ्मे़। 10 मोडोॽ ले़ःॽमाहोङ निवाहाङ्डे़ॽ नेन्जामारोमा योम्बोक ले़ःॽनुङ खो साप्थाङ्मेन्डुङ्मे। चोप नुबा योम्बोकपेॽ हे़निङ आसिसित लिन्डानिङे, मोबा हे़निङ निवाहाङ्मि निवाबेॽ वाबोक्इन्डानिङे। 11 निवाहाङ्मि बेॽए सक्तिबाङ चुप्पॽआ सक्तिडे़ॽ हे़निङ बोलियो लिसानिङे लुनुङ कानिङे़ॽ पारथना ले़ए़टुङ्मे़। मोडोॽ ले़ःॽमाबेॽ हे़निङे़ॽ चोप खालहा खा आङ्हेन्डानुमे। 12 निवाहाङ्डे़ॽ जोतिमि राज्यबेॽ खिरिस्टमि पबित्रा याॽमिजिनुङ कानिङ सोरि अधिकार चुप्खुबाजि टोङ्इटे़। इगो खामि लागि साप्थाङ्मानुङ निवाहाङ ओहाक पिसानुमे। 13 खोसे़ॽनोॽ कानिङ सेन्जुगुप राज्यबाङ छुट्कारा ले़टानुङ खोमि नम्नम ले़ःॽपॽआ पसामि राज्यबेॽ सेङ्घे़ॽटा। 14 खोबेॽ कानिङ्मि उद्धार अथबा पापबाङ आम्लाङ टुये। खिरिस्टमि नरिङ्नुङ योम्बोक 15 खिरिस्टमि नरिङ्नोॽ, कानिङेॽ मे़ङ्खाङ्बॽआ निवाहाङ्मि नरिङ ले़ये। खो चोप सिरिस्टिबाङ्सो टुम्इये। 16 इन्ढोङ्होङ थाङ्सिरिनुङ मक्खाम्डेमबेॽ टुहा चोप थोक खोबाङ्नोॽ सिरिस्टि लिसा। खाङ्डोक्इहानुङ खाङ्डोक्निहा, मोबा माहानुङ सोरि होङ्निवामि सक्तिजि, मायोङ्बाजि, सासकजि, अधिकारिजि, इघा चोप थोक खिरिस्टबाङ्नोॽ खोमि लागिनोॽ सिरिस्टि लिसा। 17 इघा चोप खाबाङ्सो याक्लो खिरिस्ट टुसे़, मोबा चोप खा खोबेॽनोॽ टुहा। 18 मन्डलि चाहिँ खिरिस्टमि हिङा ले़ये, खो मन्डलिमि निन्डवाँ ले़ये। खोनोॽ याक्लोमा ले़ये, खोनोॽ चोप खासोक्पेॽ एप्पा लिरो लुनुङ सिबॽआजिबाङ हिङ्बोक्पॽआजिबेॽ चोप्पाङ खो टुम्इये। 19 इन्ढोङ्होङ निवाहाङ्मि चोप बानिबेहोरा खिरिस्टबेॽ युङ्मा मिॽटु। 20 मोबा निवाहाङ्डे़ॽ खोमि पसा येसु खिरिस्टडे़ॽ काप्सिङ्बेॽ पिबॽआ बलिदानबाङ खोमि चोप सिरिस्टि टाङ्बामि टोक्सु। मोबा खोमि पसामि हरिडे़ॽ थाङ्सिरिनुङ मक्खाम्डेमबेॽहा चोप निवाहाङ्नुङ चुप्मेॽटु। 21 याक्लो इक्खेॽ हे़निङ निवाहाङ्बाङ ओः टुसानिङ। मङे़हा निवा खिनुङ मङे़हानोॽ योम्बोक ले़ःॽपॽआसे़ॽ निवाहाङ्मि टेडिघरिक याॽमि ले़टानिङ। 22 तर हागो खोमि पसामि हिङामि बलिदानडे़ॽ हे़निङ निवाहाङ्डे़ॽ टाङ्बामि याॽमिजि टोङ्इटे़। मोबा खोसे़ॽ हे़निङ खोमटाङ्बामि पोम्बेॽ पबित्रा, चोखोनुङ आप्टिक मे़ॽनिङ्हाजि टोङ्इटे़। 23 चइबानोॽ हे़निङ टाङ्बामि बिस्वासबेॽ दिगोनुङ बोलियो लिसानिङे। हे़निङे़ॽ खेम्बॽआ सुसमाचारमि आसाबेॽ सानिङ पेनानिङे। इगो सुसमाचारनोॽ सिरिस्टिबेॽहा चोप याॽमिजि खेम्मेॽपॽआ ले़ये। इगो सुसमाचार खेम्मेॽमामि लागिनोॽ का पावल सेवाक लिटिङे। मन्डलिबेॽ पावलमि योम्बोक 24 हागो के़ॽ हे़निङ्मि लागि साप्थाङ्मानुङ दुःख आङ्इनुङे, इन्ढोङ्होङ खिरिस्टमि हिङा मन्डलिमि लागि, खोबाङ एम्बॽआ दुःखमि लागि काङ्मि हिङाबेॽ आङ्नुङ पुरा ले़नुङे। 25 निवाहाङ्डे़ॽनोॽ का मन्डलिबेॽ योम्बोक ले़ःॽखुबा टोक्सिङ मोबा हे़निङ्मिनोॽ भलोमि लागि खोमि सिक्छे नुरोॽ खेम्मेॽमे योम्बोकमि जिम्मा पिसा। 26 इगो सिक्छे याक्लो युग युगबाङ, पुस्ता पुस्ताबाङ असे़ॽसो मे़लेहेबॽआ चुम्युङ्बॽआ खा ले़टे़। हागो खोसे़ॽ खिरिस्टमि पबित्रा याॽमिजि इगोमि खा छे़ङ्गै टोङ्बेटे़। 27 इगो लेमा छॽइये खा हाइखा जातिजिबेॽ बेॽलो महान ले़ये। मो खा टाङ्बामि याॽमिजि खाङ्मुमामि निवाहाङ्डे़ॽ से़ङ्इटे़। इगो लेमा छॽइये खा चाहिँ खिरिस्ट हे़निङ्बेॽ टुये लुमे खा ले़ये, खो महिमामि आसा ले़ये। 28 मोडोगे़ॽ कानिङे़ॽ चोप याॽमिजि खिरिस्टमि टुम्बेॽ खेम्मेटुङ्मे। चोप याॽमिजि खिरिस्टबेॽ पक्का टोङ्नुङ निवाहाङ्बेॽ रुक्मेॽमामि कानिङ चोप निवाडे़ॽ चोप याॽमिजि होसियार ले़ःॽसाङ हे़निङ सिक्छे पिन्डुङ्मे। 29 खिरिस्टडे़ॽ पिबॽआ काहोङ्बेॽ टुये बेॽए सक्तिडे़ॽनोॽ के़ॽ इगो योम्बोक चोप निवा टिनुङ ले़नुङे। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.