एप्पा चोङ्सा 9 - याम्फुदमस्कसमि रामबेॽ सावलडे़ॽ येसु चुप्पॽआ 1-2 तर सावलडे़ॽ परभुमि चोङ्साजि चोप सेॽनेनुङ्हाजि लुनुङ किस्सिमा उक्मे़ॽसाङ राम्डुसे़। मोबा खो चोप्पा एप्पा याडाङ्बाबेॽ खे़ॽनुङ दमस्कस लुमे ठाउँमि यहुदिजि सुम्ढाम खिमबेॽ टुघुबा चोप एप्पाजि के़ए़ टुम्बेॽ इक्को पत्रा साप्पेॽमा लुनुङ बिन्ति ले़टु। परभुमि राम टिङ्खुबा मेॽनामिॽ, वडाङ्पसा राःप्नुङ यरुसलेमबेॽ लाजे़ॽनुङ सजाय पिमे अधिकार ङाःगु। 3 मोबा सावल दमस्कस सहरमि के़क्पेॽ खे़ॽमे़ॽनिङ्सिमाबेॽ हाजोक्टोॽ नान्द्रुङ्माबाङ पोॽइये उज्यालो खोमि किॽयु मिॽयु पोगा। 4 मोबा खो भुइबेॽ यिप्रिक्टोॽ कक्सा, मोडोक्पेॽ इडोॽ काबॽआ खेप्सु, “सावल! सावल! हे़ने़ॽ का इन्ढोङ्डे चुङ्जाङे ?” 5 सावलडे़ॽ सिप्सु, “हे परभु, हे़न असाडे ?” फेरि खोसे़ॽ लुसु। “का हे़ने़ॽ चुङ्जामे़ॽनिङ्सिबॽआ येसु ले़ङे। 6 हागो हे़न येपोक्नुङ सहरबेॽ खडे, मोबेॽ हे़ने़ॽ इमाङ ले़ःॽमा खे़ये मो के़ॽ हे़न लुन्ने़।” 7 सावलनुङ खे़ॽखुबा याॽमिजिडे़ॽ इक्को सेम्ला खेप्सुजि, तर कानुङ यामुखुबा असासो मे़ङ्खाङ्डोक्टुजि। मोडोगे़ॽ माहाजि या मे़ॽनिङ लिनुङ येबामि। 8 सावल येपोगा, तर खाङ्मायोक्माबेॽ इमाङ्सो मे़ङ्खाङ्हेसु। मोडोगे़ॽ खोमि लङ्गामजिडे़ॽ खो हुकपेॽ राःप्नुङ दमस्कसबेॽ चिॽखे़ॽटुजि। 9 मोबेॽ रुक्नुङ सुम याकठोक खोमि मिगे़ॽ इमाङ्सो मे़ङ्खाङ्हेसु मोबा इमाङ्सो मे़न्चोसु, मे़उक्सु। 10 दमस्कसबेॽ परभुमि चोङ्सा हननिया लुमे इक्को याॽमि टुसे़। मो सेन्जिसेम्माङ्बेॽ परभुडे़ॽ इडोॽ लुबॽआ खेप्सु, “होउ हननिया!” हननियाडे़ॽ लुसु, “हे परभु, लुङे!” 11 परभुडे़ॽ खो लुसु, “सिधा राम लुमे रामबेॽ यहुदामि खिमबेॽ खडे। मोबेॽ टारसस लुमे ठाउँबाङ लेम्बॽआ सावल निङ ले़ःॽखुबा याॽमि योगे। मोबेॽ खो पारथना ले़ःॽमे़ॽनिङ्सिये। 12 खोसे़ॽ सेन्जिसेम्माङ्बेॽ हननिया लेन्नुङ टाङ्बामि मिक ए़ःॽलो लुनुङ खोमि निन्डवाँबेॽ हुक युङ्बॽआ माॽइटुए।” 13 हननियाडे़ॽ लुसु, “हे परभु, मोसे़ॽको यरुसलेमबेॽ टुघुबा बिस्वासिजि सारोनोॽ चुङ्जोन्डुजे लुबॽआ के़ॽ बेॽलो याॽमिजिबाङ खेम्इटुङे। 14 हे़ने़हा निङ्बेॽ बिस्वास ले़ःॽखुबा याॽमिजि राःप्मामि एप्पा याडाङ्बाजिबाङ अधिकार टोक्नुङ खो इगोबेॽ लेङ्इटे़।” 15 तर परभुडे़ॽ हननिया लुसु, “हे़न खे़ॽमा खे़ये इन्ढोङ्होङ मो याॽमिडे़ॽनोॽ अयहुदि जातिजि, मोबा हाङ्बाजिनुङ, इस्राएलि याॽमिजिमि रुम्बेॽ के़ए़ टुम्बेॽ परचार ले़ःॽमामि के़ॽ आक्को से़न्इटुङे। 16 के़ए़ लागि आक्कोसे़ॽ इन्डोक खेः आङ्मा खे़ये मो के़ॽ खाङ्मुनुङे।” 17 मोबा हननिया मो खिमबेॽ खे़ॽनुङ सावलसोक्पेॽ खोमि हुक युङ्साङ इडोॽ लुसु, “होउ निसा सावल, हे़न आप्मे़ॽनिङ्सिमाबेॽ रामबेॽ हे़न्नुङ खाङ्मुबॽआ परभु येसुडे़ॽ हे़ने़ॽ फेरि खाङ्डोक्हेसे लुनुङ, मोबा हे़नबेॽ पबित्रा होङ्निवा लेङ्रो लुनुङ का पाङ्इटिङे।” 18 मोडोक्पेॽनोॽ सावलमि मिकबाङ ङामि कत्लाडोॽमा थोक हेॽओगा, मोबा खोसे़ॽ खाङ्डोक्हेसु। मोबा खो येपोक्नुङ हननियाबाङ बप्तिस्मा लासु। 19 मोबा खोसे़ॽ चामा चानुङ खोमि बोल लेस्सा। मोबा सावल परभु येसुमि चोङ्साजिनुङ्नोॽ दमसकसबेॽ इक्याक नियाक पेना। सावलडे़ॽ दमस्कसबेॽ सुसमाचार खेम्मेॽपॽआ 20 मोबा सावल खे़ॽनुङ यहुदिजि सुम्ढाम खिमराजि, “येसुनोॽ निवाहाङ्मि पसा ले़ये” लुनुङ परचार ले़ःॽसाङ राम्बुगा। 21 खोमि खा खेम्खुबाजि चोप खरि मिङ्साङ खोजिदाङ्बा इडोॽ कासामि, “यरुसलेमबेॽ येसुमि ओहाङ ले़ःॽखुबा याॽमिजि राःप्नुङ सेॽनेमा योक्खुबा याॽमि इगोनोॽ ने़ॽने ? इगोबेॽसो मोडोक्नोॽ याॽमिजि राःप्नुङ एप्पा याडाङ्बाजिबेॽ लाघे़ॽसिॽ लेङ्इटे़ ने़ॽनेन्डे ?” 22 तर सावलडे़ॽ छना सक्तिनुङ येसुनोॽ खिरिस्ट ले़ये लुनुङ पक्का ले़टु। मोडोगे़ॽ दमस्कसबेॽहा यहुदिजि इमाङ्सो मे़ङ्काहेसामि। 23 मोबा बेॽलो याक ए़क्साङ यहुदिजिडे़ॽ सावल सेॽनेमामि मोत्ता इःसुजि। 24 तर इगो खा सावलडे़ॽ लेडोक्टु। माहा यहुदि याॽमिजिडे़ॽ खो राःप्नुङ सेॽनेमामि सेन्डा लेन्डा खोमि राम योक्पोगुजि। 25 तर इक्सेङ सावलमि चोङ्साजिडे़ॽ खो चे़न्डाबेॽ एन्नुङ पडागे़ॽ परखालबाङ चिःॽखे़ॽमाराप्टुजि। सावल यरुसलेम सहरबेॽ 26 सावल यरुसलेम खे़ॽनुङ मोबेॽहा येसुमि चोङ्साजिनुङ लङ्गाम ले़ःॽमा योगु। तर माहाजि खोनुङ बेॽलो किस्सिडामि, खो चइबानोॽ परभुमि चोङ्सा लिटे़ लुनुङ बिस्वास मे़ले़ःॽहेसुजि। 27 तर बारनाबास चोङ्साडे़ॽ सावल एप्पा चोङ्साजिबेॽ सोरि चिॽखे़ॽटु। सावलडे़ॽ दमस्कस खे़ॽठाम रामबेॽ परभु चुप्नुङ, खोनुङ यामुबॽआ खा मोबा येसुमि टुम्बेॽहा खा मे़ङ्किस्सिरेॽ लुबॽआ चोप खा बारनाबासडे़ॽ माहाजि लुबेॽटुजि। 28 मोबा सावल माहा चोङ्साजिनुङ सोरि पेम्बुगा। मोबा मे़ङ्किस्सिरेॽ परभुमि टुम्बेॽहा खा यरुसलेमबेॽहा याॽमिजि खेम्मेॽसाङ राम्बोगा। 29 मोबा गिरिक खाप्ला यामुघुबा यहुदिजिनुङ काघुसे़ॽचुसा। मोडोगे़ॽ माहाजिडे़ॽ सावल सेॽनेमा योगुजि। 30 इगो खा येसुबेॽ बिस्वास ले़ःॽखुबाजिडे़ॽ लेडोक्टुजि। मोबा माहाजिडे़ॽ सावल कैसरिया सहरबेॽ लाघे़ॽटुजि मोबाङ्सो सावल टारसस ठाउँलाम पाङ्हाक्सुजि। 31 मोबा ए़क्साङ यहुदिया, गालिलिनुङ सामरिया ठाउँराजिबेॽहा मन्डलिबेॽ सान्ति लिसा। खोजिडे़ॽ परभुमि पबित्रा होङ्निवामि बोल चुप्नुङ, येसुबेॽ बिस्वास ले़ःॽखुबाजि मन्डलिबेॽ लिसामि। चोङ्साजिडे़ॽ निवाहाङ्मि आदर ले़टुजेनुङ हाइखा बिस्वासिजि बेॽलो लिसामि। पत्रुस लुड्डानुङ योप्पा सहरबेॽ 32 मोबा पत्रुस चोप ठाउराजि वाइडुसाङ, लुड्डा सहरबेॽ टुघुबा परभुमि याॽमिजिबेॽसो लेस्सा। 33 मोबेॽ खोसे़ॽ इक्को एनियास निङ ले़ःॽखुबा याॽमि चुप्टु। खो सोगुबा लिबॽआ आक्चि निङ याक्खे़ॽपॽआ ले़टे़। 34 पत्रुसडे़ॽ मो याॽमि लुसु, “होउ एनियास, येसु खिरिस्टडे़ॽ हे़न नुबोक्हेये। हे़न येपोक्नुङ हे़ने़ए़ रुङ्घाक इःगे” मोबा मोडोक्पेॽनोॽ मो सुवाक्टोॽ येःप्पोक्नुङ खो राम्बोगा। 35 मो याॽमि नुबुक्पॽआ खाङ्नुङ लुड्डा सहरनुङ सारोन डेम्माबेॽहा चोप याॽमिजिडे़ॽ परभु येसुबेॽ बिस्वास ले़टुजि। पत्रुसडे़ॽ तबिता नुबोक्पॽआ 36 योप्पा लुमे सहरबेॽ तबिता निङ ले़ःॽखुबा इक्को परभुबेॽ बिस्वास ले़ःॽखुबा मेॽनामिॽ टुसे़। खोमि निङ डोरकास ले़टे़। खोसे़ॽ सानिङ्नोॽ इमाङ मे़ङ्काप्खुबाजि सहायोग ले़ःॽमे योम्बोक ले़टुए। 37 पत्रुस लुड्डाबेॽ टुमाबेॽनोॽ खो टुक्पुगा मोबा खो सिघडा। मोबा खोमि सिग्रिक वासोक्नुङसो तलाबेॽ लाघे़ॽनुङ इक्को कोठाबेॽ युक्सुजि। 38 लुड्डा सहरबाङ योप्पा सहर के़क्पेॽनोॽ सिॽटे़न्से़ॽ चोङ्साजिडे़ॽ पत्रुस लुड्डाबेॽ टुये लुनुङ लेडोक्नुङ निप्पाङ याॽमिजि खोबेॽ इडोॽ लुसिॽ पाक्सुजि। “कानिङ्मि खिम्डेमबेॽ चान्डो आप्पिॽमना।” 39 मोबा पत्रुस येपोक्नुङ माहाजिबेॽ खडा। पत्रुस योप्पा लुमे ठाउँबेॽ रुक्नुङ माहाजिडे़ॽ खो सोङ्बेॽए तलाबेॽ चिॽखे़ॽटुजि। मोबेॽ राङ्मिॽमाजि हाःप्साङ्नुङ डोरकास लुमे़ मेॽनामिॽडे़ॽ आक्पॽआ चेॽनुङ हाइखा चेॽ खाङ्मुसाङ पत्रुसमि किॽयु मिॽयु येःबामि। 40 मोबा पत्रुसडे़ॽ माहा चोप याॽमिजि मो कोठाबाङ पाखे़ॽयु पाङ्नुङ खो टुम्रुक ठोःक्नुङ निवाहाङ्नुङ पारथना ले़ःॽपोगा। मोबा मो सिगुयाकलाम हिङ्घे़ॽनुङ लुसु, “नानि तबिता, पुकाडे!” मोबा मोसे़ॽ मिक उनुङ पत्रुस खाङ्डोक्टु मोबा पुके़ॽनुङ पेना। 41 पत्रुसडे़ॽ तबितामि हुकपेॽ राःप्नुङ येःपुक्माराप्टु। मोबा परभुमि याॽमिजिनुङ राङ्मिॽमाजि के़ःॽनुङ हिङ्रिक लिबॽआ तबिता खोजि जिम्मा पिसुजि। 42 मोबा इगो खा योप्पा सहरबेॽहा चोप याॽमिजिडे़ॽ लेडोक्नुङ बेॽलो याॽमिजिडे़ॽ परभुबेॽ बिस्वास ले़टुजि। 43 मोबा पत्रुस बेॽलो याक साउकमि योम्बोक ले़ःॽखुबा सिमोननुङ योप्पा सहरबेॽ पेना। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.