एप्पा चोङ्सा 8 - याम्फुसावलडे़ॽ बिस्वासिजि चुङ्जाबॽआ 1-2 मोबा स्तिफनसमि सिगुयाक बिस्वासि लङ्गामजिडे़ॽ लाघे़ॽनुङ येःॽमाबेॽ युङ्आनुङ खोजि सारोनोॽ हाःबामि। इडोॽ स्तिफनस सेॽमाबेॽ साउलसो मोबेॽ टुसे़। मो याकबाङ यरुसलेमबेॽहा मन्डलिबेॽ सारोनोॽ चुङ्जोबोगुजि। मोबा एप्पा चोङ्साजिबाङ हाइखा येसुबेॽ बिस्वास ले़ःॽखुबाजि चोप यहुदिया लुमे ठाउँनुङ सामरिया ठाउँराजि टुप्खडामि। 3 तर सावलडे़ॽ मन्डलिबेॽहा याॽमिजि नास ले़ःॽमे़ॽनिङ्सिडुए। खोसे़ॽ खिम-खिमबेॽ खे़ॽनुङ येसुबेॽ बिस्वास ले़ःॽखुबाजि वडाङ्पसा, मेॽनामिॽचि राःप्नुङ बेरेरे से़ॽखे़ॽनुङ तिरिङ्गा खिमबेॽ से़गुजि। सामरिया ठाउँबेॽ फिलिपडे़ॽ सुसमाचार खेम्मेॽपॽआ 4 येसुबेॽ बिस्वास ले़ःॽखुबाजि यरुसलेमबाङ फाक्खे़ॽनुङ हाम्बेॽ हाम्बेॽ रुक्टुजि माहा चोप ठाउँराजि सुसमाचार खेम्मेॽटुजि। 5 फिलिप चाहिँ सामरिया सहरबेॽ खे़ॽनुङ मोबेॽहा याॽमिजि मुक्ति पिघुबा हाङ्बा खिरिस्टमि टुम्बेॽ परचार ले़टुजि। 6 फिलिपडे़ॽ लुबॽआ खा खेम्नुङ, मोबा खोसे़ॽ ले़ःॽपॽआ खरिहा योम्बोक खाङ्नुङ माहा याॽमिजिडे़ॽ निवा टिनुङ खोमि खा नुरोॽ खेप्सुजि। 7 मोबेॽ बेॽलो याॽमिजिबाङ मङे़हा चापजि वोसाङ खडामि, मोबा बेॽलो सोगुबाजिनुङ ए़क्लोङ्ग्याजिसो नुबोगुजि। 8 मोडोगे़ॽ सामरिया सहरबेॽहा याॽमिजि बेॽलो साप्थाक्सामि। 9 मो सहरबेॽ सिमोन लुमे इक्को चटक ले़ःॽखुबा टुसे़। खोसे़ॽ सामरियाबेॽहा याॽमिजिमि पोम्बेॽ खरिहा योम्बोक ले़ःॽनुङ माहाजि खरि टोङ्बॽआ ले़टामे। मोसे़ॽ खोमटाङ्बा बेॽएम्मा याॽमि मिडुए। 10 मो सामरिया सहरबेॽ पेङ्घुबा ए़द्रिहानुङ बेॽहाजि चोबे़ॽ खोमि खा खेप्सुजे, “इगो याॽमिबेॽ निवाहाङ्मि बेॽए सक्ति टुये” लुनुङ माहाजिडे़ॽ मिडुजे। 11 मो याॽमिडे़ॽ बेॽलो निङ याक्लोएबाङ खोमि खरिहा योम्बोक ले़ःॽपॽआसे़ॽ खोजिडे़ॽ मोमि खा खेप्सुजे। 12 तर माहा याॽमिजि फिलिपडे़ॽ निवाहाङ्मि राज्यबेॽ येसुनोॽ खिरिस्ट ले़ये लुनुङ सुसमाचार इःबेॽटुजि। मोबा बेॽलो याॽमिजिडे़ॽ येसुबेॽ बिस्वास ले़टुजि। मोबा बेॽलो वडाङ्पसानुङ मेॽनामिॽचिडे़ॽ बप्तिस्मा लासुजि। 13 सिमोनडे़ॽसो येसुबेॽ बिस्वास ले़ःॽनुङ बप्तिस्मा लासु। मोबा खो फिलिपनुङ्नोॽ सोरि राम्बुगा। फिलिपडे़ॽ ले़ःॽपॽआ खरिहा योम्बोकनुङ चिङ्गा खाङ्नुङ खो खरि मिना। 14 सामरियामि याॽमिजिडे़ॽ निवाहाङ्मि टुम्बेॽहा खाबेॽ बिस्वास ले़टुजि लुमे खा खेम्नुङ यरुसलेमबेॽ टुघुबा एप्पा चोङ्साजिडे़ॽ पत्रुसनुङ युहन्ना मोबेॽ पाक्सुजि। 15 मोबा सामरियाबेॽ खोजि रुक्नुङ येसुबेॽ बिस्वास ले़ःॽखुबाजिडे़ॽ पबित्रा होङ्निवा चुप्टुजिरो लुनुङ पारथना ले़ःॽपेॽटुजि। 16 इन्ढोङ्होङ मोडोक्लो माहाजिबेॽ पबित्रा होङ्निवा मे़लेम्बॽआ ले़टे़। माहाजिडे़ॽ परभु येसुमि निङ्बेॽ बप्तिस्मारेॽ लाबॽआ ले़टे़। 17 मोबा पत्रुसनुङ युहन्नाडे़ॽ येसुबेॽ बिस्वास ले़ःॽखुबाजिसोक्पेॽ खोजिमि हुक युङ्माबेॽ माहाजिडे़ॽ पबित्रा होङ्निवा चुप्टुजि। 18 मो एप्पा चोङ्साजिडे़ॽ खोजिमि हुक याॽमिजिबेॽ युङ्माबेॽ पबित्रा होङ्निवा चुप्मियेले़ मिॽनुङ सिमोनडे़ॽ माहा एप्पा चोङ्साजि याङ पिसाङ लुसुजि, 19 “कासोङ इडोक्मा सक्ति पिमाना, मोबा के़ॽ असाबेॽहोङ्सो हुक युङ्माबेॽ मो याॽमिडे़ॽ पबित्रा होङ्निवा चुप्टुरो।” 20 तर पत्रुसडे़ॽ मो लुसु, “हे़ने़हा याङ हे़न्नुङ्नोॽ नासि लिरो। इन्ढोङ्होङ हे़ने़ॽको निवाहाङ्मि बरदानसो याङ्डे़ॽ इङ्हेनुङे मिॽटु। 21 हे़ने़ॽ इगो योम्बोक ले़टोक्टुनिबा। इगो योम्बोकपेॽ हे़ने़हा भागासो माये इन्ढोङ्होङ हे़ने़ए़ निवानोॽ निवाहाङ्मि पोम्बेॽ नुबा ले़ःॽनिबा। 22 मोडोगे़ॽ हे़ने़ॽ मिॽपॽआ मङे़हा खामि लागि निवाहाङ्बेॽ टेनुङ परभुमि पोम्बेॽ खडे। कतै निवाहाङ्डे़ॽ हे़न आम्लाङ पियेन्डे ? 23 इन्ढोङ्होङ हे़ने़ए़ निवा इॽठुप चेजेवा खिन्डुहा, मोबा हागोरोसो हे़ने़ए़ निवा इॽठुप पापरेॽनोॽ टुहा ले़ः।” 24 इघा खा खेम्नुङ सिमोनडे़ॽ पत्रुसनुङ युहन्ना लुसु, “हे़ने़ॽ लुबॽआ चोप खा काबेॽ मे़सिॽलो लुनुङ हे़निङे़ॽ के़ए़ लागि परभुनुङ बिन्ति ले़ःॽपेॽमाजे।” 25 मोबा साक्छिनुङ परभुमि खा खेम्मेॽसेॽनुङ युहन्नानुङ पत्रुस यरुसलेम टेघडाजि। खोजि टेमाबेॽ सामरियामि खिम्डेमराजि सुसमाचार खेम्मेॽटुजि। फिलिपनुङ इथियोपियामि सरकारि याॽमि 26 मोबा ए़क्साङ थाङ्सिरिदुतडे़ॽ फिलिप लुसु, “येपोक्नुङ लाङ्गेतलाम खे़ॽनुङ यरुसलेमबाङ गाजा लुमे ठाउँलाम खे़ॽठाम मराम रे़क्रे़क्मा ठाउँबेॽ सिॽइये मो मरामबेॽ खडे।” 27 मोबा फिलिप मोबेॽ खे़ॽमाबेॽ खोसे़ॽ इथोपियाबिॽए इक्को मेस्रेवा याॽमि चुप्टु। खो मो देसबेॽए कन्दाकि लुमे हाङ्मामि याङ्मि हिसाब युङ्खुबा एप्पा ले़टे़। खो यरुसलेमबेॽ निवाहाङ्मि ओहाङ ले़ःॽसिॽ खे़ॽपॽआ ले़टा। 28 खो टाङ्बामि रथबेॽ पेन्नुङ यसैया अगमबक्ताडे़ॽ साप्पॽआ नेॽचिरा नेॽमे़ॽनिङ्सिडा। 29 पबित्रा होङ्निवाडे़ॽ फिलिप लुसु, “मो रथमि के़क्पेॽ खडे।” 30 मोबा फिलिप पिन्साङ रथमि के़क्पेॽ खे़ॽनुङ मो याॽमिडे़ॽ यसैया अगमबक्तामि नेॽचिरा नेॽटिङ्बॽआ खेप्सु। मोबा फिलिपडे़ॽ मो सिप्सु, “होउ वावा, इगो हे़ने़ॽ नेॽपॽआ खा ले़ःॽमे़ॽनिङ्सिन्डुए ?” 31 मोबा मो याॽमिडे़ॽ लुसु, “का हाइखाजिडे़ॽ नुरोॽ मे़इःबेॽमाहोङ गो इन्डोक्टे के़ॽ लेमे़ ?” मोबा मोसे़ॽ फिलिप रथबेॽ के़ःॽनुङ सोरि पेम्मेॽटु। 32 मो मेस्रेॽवाडे़ॽ नेॽपॽआ धारमिक नेॽचिरामि भाग इगो ले़टे़- “खोगो सेॽनेसिॽ लाघे़ॽपॽआ सामुडोॽ ले़टा। खो उनि खोमाबेॽ योङ उःक्नुङ येःप्खुबा सामुडोॽ इमाङ मे़ङकारेॽ पेना। 33 मोबा खो चुरोक्नोॽ हेलानुङ अन्याय ले़टुजि। असे़ॽ खोमि पुस्तामि टुम्बेॽ इःहेन्डुजे ? असे़ॽसो इःहेसुजिनिबा। इन्ढोङ्होङ खो इगो मक्खाम्डेमबाङ पसाजि मे़लिरेॽनोॽ सेॽनेसुजि।” 34 मोबा मो मेस्रेॽवाडे़ॽ फिलिप सिप्सु, “का इःबेॽमाना, इगो अगमबक्ताडे़ॽ असामि टुम्बेॽ लुबॽआडे ? खोमटाङ्बामि टुम्बेॽटे ? हाइखा याॽमिमि टुम्बेॽ लुबॽआ ?” 35 मोबा फिलिपडे़ॽ धारमिक नेॽचिरामि इगो ठाउँबाङ्नोॽ येसुबेॽ बिस्वास ले़ःॽहोङ मुक्ति चुप्मिये लुनुङ सुसमाचार नुरोॽ खेम्मेॽटु। 36 मोबा खोजि मो मरामबेॽ राम्साङ खे़ॽमाबेॽ योङा टुढामबेॽ रुक्टाजु। मोबा मो मेस्रे़ॽवाडे़ॽ फिलिप सिप्सु, “खाक्से इगोबेॽ योङा टुउ हागो का बप्तिस्मा लामाबाङ असे़ॽ से़क्हेम्मे ?” 37 [फिलिपडे़ॽ मो लुसु, “हे़ने़ए़ निवाडे़ॽ येसुबेॽ बिस्वास ले़टुहोङ बप्तिस्मा लाहेन्डुए।” मो मेस्रे़ॽवाडे़ॽ लुसु, “येसु खिरिस्ट निवाहाङ्मि पसा ले़ये लुनुङ के़ॽ बिस्वास ले़पेटुङे।”] 38 मोबा मो रथ नानुङ खोजि मिम्मु योङा टुढामबेॽ खे़ॽनुङ फिलिपडे़ॽ मो याॽमि बप्तिस्मा पिसु। 39 मोजि योङाबाङ पाखे़ॽयु आबाजि मोबा, परभुमि पबित्रा होङ्निवाडे़ॽ फिलिप राःप्खे़ॽटु, मोबा मो मेस्रेॽवाडे़ॽ फिलिप मे़ङ्खाङ्डोक्टु, तर खो साप्थाक्साङ खोमि राम खडा। 40 तर फिलिप अस्दोद लुमे ठाउँबेॽ खाङ्मुसा। मोबाङ खोसे़ॽ कैसरिया लुमे सहर मे़रुक्टुरोठोक सहर सहरराजि सुसमाचार खेम्मेॽसाङ खडा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.