एप्पा चोङ्सा 7 - याम्फुस्तिफनसमि लम्बवाँ 1 मोबा चोप्पा एप्पा याडाङ्बाडे़ॽ स्तिफनस सिप्सु, “इमा इघाजिडे़ॽ टिबॽआ आप्टिक चाइबानोक्माडे ?” 2 मोबा स्तिफनसडे़ॽ माहाजि लुसुजि, “होउ, वावानिसानुङ पाबाजि के़हा खा खेप्सानुमे। कानिङ्मि टुबा अब्राहाम हारान लुमे ठाउँबेॽ खे़ॽमा, याक्लो खो मेसोपोटामियाबेॽ पेम्माबेॽ चोप्पाङ बेॽए निवाहाङ्डे़ॽ सेन्जिसेम्माङ पिसु। 3 निवाहाङ्डे़ॽ अब्राहाम इडोॽ लुसु, ‘इगो देसनुङ हे़ने़हा टाङ्बाङ्जि याःॽयानुङ के़ॽ लुबॽआ देसबेॽ हे़न खडे।’ 4 मोबा अब्राहाम कल्दिजिमि देसबाङ हारानबेॽ खे़ॽनुङ मोबेॽ पेना। मोबेॽ खोमि पाबा सिघडेबाङ निवाहाङ्डे़ॽ खो आयु हे़निङ पेम्बॽआ इगो देसबेॽ चिक्चे़डु। 5 मोडोक्पेॽ निवाहाङ्डे़ॽ अब्राहाम इगो देसबेॽ सराङ्फे़क्माडोक्मा ठाउँसो मे़म्पिसु। तर निवाहाङ्डे़ॽ ए़क्साङ्रेॽनोॽ इगो देस हे़ने़हा पसा याङ्मेनजि पिनुङ्हाजि लुनुङ हे़न्ज्रुङ हे़नु। इगो हे़न्ज्रुङ हे़म्माबेॽ अब्राहाममि पसाजिनोॽ माडामि। 6 निवाहाङ्डे़ॽ अब्राहाम इडोॽ लुसु, ‘हे़ने़हा पसाजि हाइखाजिमि देसबेॽ खे़ॽनुङ पेङ्इम्मे। मोबेॽहा याॽमिजिडे़ॽ खोजि रिक्पोङ सय निङ्ठोक बेॽलो चुङ्जोन्डुजे। 7 तर असे़ॽ माहाजि सेउते टोङ्इन्डुजे माहा याॽमिजि के़ॽ दन्डा पिनुङ्हाजि। मोबा ए़क्साङ मो देसबाङ माहाजि इगो देसबेॽ लेन्नुङ के़ए़ योम्बोक ले़न्डुजेनुङ का ओहाङ ले़म्मे’। 8 “मोबा निवाहाङ्डे़ॽ अब्राहामनुङ हे़न्ज्रुङ हे़म्बॽआ खा निवाबेॽ युक्सुजिरो लुनुङ खतना ले़ःॽमे आग्या पिसुजि। अब्राहामडे़ॽ खोमपसा इसहाक टोक्पॽआ आक्छि याक लिमाबेॽ खतना ले़ःॽपेॽटु। मोडोक्नोॽ इसहाकडे़ॽ याकुबमि, मोबा याकुबडे़ॽ खोमि बारो जना पसाजिमिसो खतना ले़ःॽपेॽटुजि। माहाजिनोॽ कानिङ्मि बारो जना टुबालाबाजि लिसामि। 9 “याकुबमि पसा योसेफ खोम वावाजिडे़ॽ बेॽलो चेजेवे़ॽ सिॽचोसुजे। खोम वावाजिडे़ॽ योसेफ मिस्रा देसबेॽहा बेपारि याॽमिजिनुङ इन्जोसुजि। तर निवाहाङ खोनुङ टुसे़। 10 निवाहाङ्डे़ॽ खोमि चोप खेःबाङ छुटाबा ले़टु। इन्डोक्पेॽ योसेफ मिस्रा देसबेॽए हाङ्बाबेॽ लेस्सा, मोडोक्पेॽ निवाहाङ्डे़ॽ खो निवा पिसु। मोडोगे़ॽ फारोडे़ॽ खो मिस्रा देसबेॽए मायोङ्बा टोक्सु। मोबा मो याकबाङ योसेफ हाङ्खिमबेॽए एप्पा मायोङ्बा लिसा। 11 “मोबा ए़क्साङ मिस्रा देसनुङ कनान देसबेॽ बेॽए सकआङ्सा लेस्सा। मोडोगे़ॽ चोप याॽमिजि साक्मेन्जा सिॽपॽआसे़ॽ कानिङ्मि टुबालाबाजिडे़ॽ अन्न हाम्बेॽसो मे़न्चुप्टुजि। 12 मोबा याकुबडे़ॽ मिस्राबेॽ अन्न टुहा लुमे खा खेम्नुङ बेसा खिसिॽ खोमि पसाजि याक्लोएखेॽ पाङ्हाक्सुजि। 13 फेरि ए़क्साङ्ए खेपसो अन्न इन्सिॽ खे़ॽमाबेॽ योसेफमि वावानिसाजिनुङ का योसेफ ले़ङे लुनुङ लुसुजि। मोडोक्पेॽनोॽ हाङ्बाडे़ॽसो योसेफमि वावानिसाजि लेसुजि। 14 मोबा योसेफडे़ॽ खोमि पाबा याकुबनुङ चोप जहानजि मिस्राबेॽ आबानिङे लुनुङ के़डुजि। माहाजि चोप पचत्तर जना टुसामे। 15 मोबा याकुब मिस्राबेॽ खडा। ए़क्साङ याकुबनुङ कानिङ्हा बारो टुबालाबाजि मोबेॽनोॽ सिघडामि। 16 मोबा खोजिमि सिगुयाक सकेम लुमे ठाउँबेॽ लाघे़ॽनुङ अब्राहामडे़ॽ हमोरमि पसाजिबाङ येःॽमाघामि लागि इम्बॽआ जग्गाबेॽ माहाजि हुप्सुजि।” 17 “निवाहाङ्डे़ॽ अब्राहामनुङ हे़न्ज्रुङ हे़म्बॽआ खा पुरा लिसिॽपोरोक्पॽआ ले़टे़। मोडोक्पेॽ मिस्राबेॽ इस्राएलिजि बेॽलो लिबेबॽआ ले़टामे। 18 मोबा बेॽलो निङ ए़क्साङ मिस्रा देसबेॽ हाइको याॽमि हाङ्बा लिसा, मोबाङ मोसे़ॽ मिस्राबेॽ राज्य ले़पोगु। मोसे़ॽ योसेफ मे़लेसु। 19 मो हाङ्बे़ॽ कानिङ्मि टुबालाबा इस्राएलिजि बेॽलो चुङ्जोबोगुजि। मोसे़ॽ माहाजिमि ओङे़कजि सिमिरो लुनुङ येॽयेॽ खिमबाङ पाखे़ॽयु राप्पेमेॽटुजि। 20 “मो बेलाबेॽनोॽ मोसा टोगा। खो निवाहाङ्डे़ॽ नेन्जाबॽआ ओङे़क ले़टा। खोम्बानुङ खोम्माडे़ॽ सुम महिनाडोॽ खिमबेॽनोॽ चुम्नुङ कुसाजु। 21 तर ए़क्साङ खोजिडे़ॽ मे़न्चुम्हेबॽआसे़ॽ मोसा खिमबाङ पाखे़ॽयु युङ्माबेॽ फारोमि हाङ्मा पसाडे़ॽ चुप्नुङ खोमि पसा टोङ्नुङ कुसु। 22 इडोॽ मोसाडे़ॽ मिस्रि याॽमिजिमि टुम्बेॽहा खा नुरोॽ नेॽटोक्टु। मोबा खो चोप खाबेॽनुङ योम्बोक ले़ःॽलेघुबा लिसा। 23 “मोबा मोसा रिक्पोङ निङ रुक्माबेॽ खोमि इस्राएलि टाङ्बाङ्जि चुप्मा मिॽटु। 24 मोबा इक्को मिस्रि याॽमिडे़ॽ इस्राएलि याॽमि मोःक्मे़ॽनिङ्सिबॽआ मोसाडे़ॽ खाङ्डोक्टु। मोबा मो इस्राएलि चाहिँ जोगबा ले़टु तर मो मिस्रि चाहिँ मोसाडे़ॽ सेॽनेसु। 25 निवाहाङ्डे़ॽ मोसाबाङ इस्राएलि याॽमिजि छुट्कारा पिन्डुजे लुनुङ खोजिडे़ॽ लेसुजिरो लुनुङ मिॽपॽआ ले़टे़। तर माहाजिडे़ॽ मो खा मे़लेसुजि। 26 “वागियाराम निप्पाङ इस्राएलिजिनोॽ टाङ्बा टाङ्बा काक्मे़ॽनिङ्सिबॽआ मोसाडे़ॽ खाङ्डोक्नुङ लुसुजि, ‘होउ लङ्गामजि, हे़न्जिङ गो सानुङ्उजिगोरे! इन्ढोङ काॽइन्जे ?’ 27 “तर मो बेॽए रे़ङ्घुबा इस्राएलिडे़ॽ मोसा चोक्साङ लुसु, ‘हे़न असे़ॽटे कानिङ्मि खा टोङ्खुबा टोक्से ? 28 हे़ने़ॽ असेॽङा मो मिस्रि याॽमि सेॽनेबॽआडोॽ कासो सेॽनेमा योॽइये ?’ 29 इगो खा खेम्नुङ मोसा किस्सिमे़ॽ मिस्रा देसबाङ चिःॽखेॽनुङ मिद्यान लुमे देसबेॽ पेम्बोगा। मोबेॽ खोसे़ॽ फुङ्सया ले़टु मोबा निप्पाङ पसाजिसो लिसामि। 30 “रिक्पोङ निङ ए़क्साङ सिनै लुमे सुम्लाखामि रे़क्रे़क्मा ठाउँबेॽ मि हाङ्मे़ॽनिङ्सिबॽआ सिङ्बु डाङ्बाङ थाङ्सिरिदुत मोसानुङ खाङ्मुसा। 31 इडोक्मा खाङ्नुङ मोसा खरि मिन्नुङ इगो इमाङ्डे लुनुङ मोमि के़क्पेॽ खे़ॽमाबेॽ खोसे़ॽ परमपरभुमि सेम्ला खेप्सु। 32 ‘का हे़ने़हा टुबालाबा अब्राहाम, इसहाकनुङ, याकुबमि निवाहाङ ले़ङे’। मो खेम्नुङ मोसा किस्सिमे़ॽ योङ्बोगा मोबा खोसे़ॽ खाङ्सो मे़ङ्खाङ्हेसु। 33 “मोबा परमपरभुडे़ॽ मोसा लुसु, ‘हे़ने़ए़ राङ्सुप हेम्बेसे, इन्ढोङ्होङ हे़न येःप्पॽआ ठाउँ पबित्रा ले़ये। 34 के़ए़ याॽमिजिडे़ॽ मिस्रा देसबेॽ आङ्बॽआ खेः के़ॽ खाङ्इटुङे। मोबा खोजि हाःप्साङ का के़ःॽपॽआसो के़ॽ खेम्इटुङे। मोडोगे़ॽ मिस्रिजिमि देसबाङ खोजि छुटबा ले़ॽसिॽ का उङ्इटिङे। हागो आबे के़ॽ हे़न मिस्रा देसबेॽ मो योम्बोक ले़ःॽसिॽ पाङ्इन्ने़’। 35 “इगो मोसानोॽ खोम जाति इस्राएलि वावानिसाजिडे़ॽ ‘हे़न कानिङ्मि हाङ्बानुङ खा टोङ्बेॽखुबा असे़ॽटे टोक्सुए लुबॽआ ले़टे़।’ निवाहाङ खोनुङ्नोॽ मि हाङ्मे़ॽनिङ्सिबॽआ पोथ्राबेॽ थाङ्सिरिदुतबाङ यामुसा मोबा मिस्राबाङ इस्राएलिजि छुटबा ले़ःॽसिॽ पाक्सु। 36 मोसाडे़ॽनोॽ इस्राएलिजि मिस्रा देसबाङ चिआप्टुजि। मोबा मिस्रा देसबेॽ, हररामा लुमे माहोङ्माबेॽनुङ रिक्पोङ निङ्रो, रे़क्रे़क्मा ठाउँबेॽ निवाहाङ्मि खरिहा योम्बोक ले़टु। 37 “इगो मोसाडे़ॽनोॽ इस्राएलिजि इडोॽ लुबॽआ ले़टे़, ‘निवाहाङ्डे़ॽ हे़निङ्मि रुम्बाङ काडोक्मा अगमबक्ता इक्को याॽमि पाङ्बेये।’ 38 मोसा इस्राएलिजि रे़क्रे़क्मा ठाउँबेॽ सुम्माबेॽ माहाजिनुङ टुसे़। खोनुङ सिनै लुमे सुम्लाखाबेॽ यामुखुबा थाङ्सिरिदुत टुसेनुङ मो थाङ्सिरिदुत कानिङ्मि टुबालाबाजिनुङ यामुबॽआ ले़टे़। मो मोसाबाङ्नोॽ कानिङ हिङ्रिक बचन पिबॽआ ले़टे़। 39 “तर कानिङ्मि टुबालाबाजिडे़ॽ मोसामि खा मे़ङ्खेप्सुजि। खोसे़ॽ लुबॽआडोॽ मे़ले़टुजि। खोजिडे़ॽ मोसानोॽ याःॽयानुङ मिस्रा देसनोॽ टेघे़ॽमा योगामि। 40 मोबा माहाजिडे़ॽ मोसामि वावा हारुन इडोॽ लुसुजि, ‘कानिङ पोम्बेॽ चिक्खे़ॽखुबा चापजि कानिङ टोङ्बेॽनुङ इगोबाङ पोम्बेॽ चिक्खे़ॽमा। मिस्राबाङ कानिङ चिॽआप्खुबा मोसा इमाङ पिॽखडे़, हाम्बेॽ खडे़ कानिङे़ॽ लेसुङ्मानि।’ 41 “मोडोगे़ॽ माहाजिडे़ॽ इक्को पिक पसामि मुरति टोङ्नुङ मोमि पोम्बेॽ भोग पिसुजि। खोजिटाङ्बे़ॽ टोङ्बॽआ मुरति पुजा ले़ःॽनुङ साप्थाक्सामि। 42 मोडोगे़ॽ निवाहाङ्डे़ॽ इस्राएलि याॽमिजि लेॽपेसुजि। खोजि नान्द्रुङ्माबेॽहा नम, साङ्गेजिनुङ लामि पुजा ले़टुजिरो लुनुङ माहाजि याःॽयोसुजि। इगो खामि टुम्बेॽ अगमबक्ताजिमि नेॽचिराबेॽ इडोॽ साप्पॽआ ले़ये। होउ इस्राएलिजि, हे़निङे़ॽ रे़क्रे़क्मा ठाउँबेॽ रिक्पोङ निङ्लो भोग पिसानुम तर माहा चोप काङ्मि लागि मे़ले़टा। 43 तर हे़निङे़ॽको मोलेक लुमे चापमि तम्बुनुङ रेफान लुमे चापमि मुरति साङ्गेमि मुरति मोबा हे़निङ टाङ्बे़ॽनोॽ टोङ्नुङ पुजा ले़टानुम। मोडोगे़ॽ के़ॽ हे़निङ दन्डा पिमामि बेबिलोनबाङ्सो मेए़रेङ पाङ्इनिम्ने़। 44 “माहाजि रे़क्रे़क्मा ठाउँबेॽ टुमाबेॽ कानिङ्मि टुबाजिनुङ निवाहाङ खाङ्मुढाम तम्बु टुसे़। निवाहाङ्डे़ॽ मोसा लुडिडोक्नोॽ खोसे़ॽ मो पाल टोङ्बॽआ ले़टे़। 45 निवाहाङ्मि बोलबाङ यहोसुडे़ॽ इगो देसबेॽहा याॽमिजि हेजानुङ इगो पबित्रा तम्बुसो खोजिनुङ्नोॽ लाजे़ॽटुजि। मोबा हाङ्बा दाउदमि मो तम्बु खोजिनुङ्नोॽ टुसे़। 46 हाङ्बा दाउदडे़ॽ निवाहाङ्बाङ नम्नावा चुप्पॽआसे़ॽ कानिङ्मि टुबा याकुबमि निवाहाङ्मि लागि ‘इक्को खिम टोङ्डोक्मा’ लुनुङ बिन्ति ले़टु। 47 ए़क्साङ खोमि पसा हाङ्बा सुलेमानडे़ॽ मन्दिर टोक्सु। 48 “तर महान निवाहाङ्गो याॽमिजिडे़ॽ टोङ्बॽआ खिमबेॽ पेन्निबा। लुनुङ अगमबक्ताडे़ॽ इडोॽ साप्पॽआ ले़ये- 49 निवाहाङ्डे़ॽ लुसु, ‘थाङ्सिरि के़ए़ हाङ पेन्ढाम मोबा मक्खाम्डेम के़ए़ सराङ युङ्ढाम ले़ये। मोबा हे़निङे़ॽ इन्डोक्मा खिमडे के़ए़ लागि टोङ्इन्डानुमे ? के़ए़ पेन्ढाम हाम्बेॽटे टोङ्इन्डानुमे ? 50 थाङ्सिरिबेॽहानुङ इगो मक्खाम्डेमबेॽहा चोप थोक गो के़ॽनोॽ टोङ्बॽआ ने़ॽनेन्डे ?’ 51 “होउ लुबॽआ मे़खेम्खुबा याॽमिजि हे़निङ्हा निवा रुङ्गोॽवाडोक्नोॽ छॽइये मोबा निवाहाङ्मि खा खेम्मा मिॽटानुम्नि। हे़निङ सानिङ्नोॽ आम्निमि टुबालाबाजिडोॽ पबित्रा होङ्निवामि बिरोध ले़न्डानुमे। 52 हे़निङ्मि टुबालाबाजिडे़ॽ चोप अगमबक्ताजिनोॽ चुङ्जोसुजि। निवाहाङ्डे़ॽ पाङ्बॽआ धारमिक याॽमिमि टुम्बेॽ इःघुबाजिसो माहाजिडे़ॽ सेॽनेसुजि। हागो हे़निङे़ॽ चाहिँ मो धारमिक याॽमि, लेॽपेघुबा हाङ्बा खिरिस्टनोॽ सेॽनेसानुम। 53 हे़निङे़ॽ निवाहाङ्मि नियममि खागो थाङ्सिरिदुतजिबाङ चुप्टानुम, तर हे़निङे़ॽ मो खा पालना मे़ले़टानुम।” स्तिफनस रुङ्गोॽवाडे़ॽ फेङ्नेबॽआ 54 स्तिफनसमि इडोक्मा खा खेम्नुङ महासभाबेॽ टुघुबा याॽमिजि बेॽलोनोॽ सुरके़ॽपॽआसे़ॽ के़ङ इःक्पोगामि। 55 तर स्तिफनसडे़ॽ चाहिँ पबित्रा होङ्निवामि सक्ति चुप्नुङ थाङ्सिरिॽटु खाक्सु। मोडोक्पेॽ खोसे़ॽ निवाहाङ्मि महिमानुङ चुप्थिङ्लामबेॽ येसु येःप्पॽआ खाङ्डोक्टु। 56 मोबा खोसे़ॽ इडोॽ लुसु, “खाक्सानुमे, के़ॽ थाङ्सिरि हेम्बुक्पॽआनुङ याॽमिमि पसा येसु निवाहाङ्मि चुप्थिङ्लाम येःप्पॽआ खाङ्मे़ॽनिङ्सिनुङे।” 57 मोडोक्पेॽनोॽ माहाजि बेॽलो वोसाङ खोजिमि ने़ए़क हुगे़ॽ टे़गुजि मोबा चोप स्तिफनसबेॽ पेडिखडामि। 58 मोबा माहाजिडे़ॽ स्तिफनस रुङ्गोॽवाडे़ॽ फे़ङ्नेमामि सहरबाङ पाखे़ॽयु पेरसेॽवा से़ॽखे़ॽटुजि। मोबा साक्छि पिघुबाजिडे़ॽ खोजिमि चेॽ सावल लुमे वेन्जा याॽमिमि सराङ के़क्पेॽ युङ्आनुङ स्तिफनस रुङ्गोॽवाडे़ॽ फे़ङ्पोगुजि। 59 माहाजिडे़ॽ रुङ्गोॽवाडे़ॽ फे़ङ्मे़ॽनिङ्सिमाबेॽ स्तिफनसडे़ॽ परभुनुङ इडोॽ लुसु, “हे परभु येसु, के़ए़ सोःक्मा हे़ने़ॽ लाघे़ॽटे।” 60 मोबा खो टुम्रुगे़ॽ ठोःक्नुङ बेॽए सेम्लाडे़ॽ इडोॽ वोसा, “हे परभु, इघाजिडे़ॽ ले़ःॽपॽआ पापमि दन्डा इघाजिबेॽ मे़सिॽलो!” खो इडोॽ कासाङ खोमि सोःक्मा खडा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.