एप्पा चोङ्सा 28 - याम्फुपावल योङेॽ यिजुम्बॽआ माल्टा लुमे पोङ्बोङ्माबेॽ 1 इडोॽ कानिङ मोबेॽ नुरोॽ लेन्नुङ मो पोङ्बोङ्मामि निङ माल्टा लुनुङ लेडोक्टुङ्मा। 2 मोबेॽ पेङ्खुबा याॽमिजि बेॽलो टोङ्जानुम्मेले़। मोडोक्पेॽ वारि लेम्बोक्पॽआसे़ॽ बेॽलो चुङ लुबुगा, मोबा मोबेॽहा याॽमिजिडे़ॽ मि टुप्नुङ हुङ्सिॽ के़डामि। 3 पावलडे़ॽ इक्को मुठा सिङ मिबेॽ ए़म्माबेॽ मिमि कुहाङ्डे़ॽ पुसे़ॽ सिङ्बाङ पे़आप्नुङ पावलमि हुकपेॽ खेडिखडा। 4 इडोॽ पावलमि हुकपेॽ पुसे़ॽ खेडिघे़ॽपॽआ खाङ्नुङ मोबेॽहा याॽमिजिडे़ॽ खोजि टाङ्बा इडोॽ काबोगामि, “इगो याॽमिगो चइबानोॽ याॽमि सेॽखुबानोॽ ले़ःॽमा खे़ये। इगो माहोङ्माबाङ हिङ्आबा, तर न्याय निङ ले़ःॽखुबा देबिडे़ॽ मे़लेडु।” 5 तर पावलडे़ॽ खोम हुक फाॽमाबेॽ मो पुसे़ॽ मिबेॽ हेॽयुसा। मोसे़ॽ पावल इमाङ्सो मे़ले़ःॽहेसु। 6 मोबेॽहा याॽमिजिडे़ॽ चाहिँ हागो “पावल पुसे़ॽमि सिक्चाडे़ॽ होम्बोक्नुङ सिघे़ये” मिॽनुङ खो खाङ्मे़ॽनिङ्सिडुजे। तर बेॽलो हुक्सुजि खो इमाङ्सो मे़लिसा। इगो खाङ्नुङ खोजिमि निवा फेङ्घे़ॽनुङ इडोॽ लुसुजि, “इगो याॽमिगो चइबानोॽ चापरे ले़ए़।” 7 मो योङाडे़ॽ यिजुम्बॽआ पोङ्बोङ्माबेॽए डायोङ्बा पब्लियसमि खिम जग्गा मो ठाउँबाङ के़क्पेॽनोॽ टुसाहा। पब्लियसडे़ॽ कानिङ खोमि खिमबेॽ चिॽखे़ॽनुङ स्वागत ले़ःॽसाङ सुम याकरो चाबाङ सत्कार ले़टा। 8 मोडोक्पेॽ पब्लियसमि पाबा ए़चेॽमेॽनुङ मासिडे़ॽ चुॽपॽआ ले़टे़। मोडोगे़ॽ पावल खो चुप्सिॽ खे़ॽनुङ पारथना ले़टु। मोबा ए़क्साङ हुक युङ्साङ खोमि लागि पारथना ले़ःॽपेॽनुङ मो एप्पामि पाबा नुबोगु। 9 इडोॽ नुबोक्पॽआ लेडोक्नुङ मो ठाउँबेॽहा चोप टुक्खुबा याॽमिजि लेस्सामि मोबा पावलडे़ॽ माहाजि चोप नुबोगुजि। 10 खोजिडे़ॽ कानिङ बेॽलो आदर ले़ःॽनुङ हुक्सोङ्सो पिसामि। ए़क्साङ कानिङ राम्बोक्माबेॽ कानिङ रामबेॽ पाप्मिहा थोकसो पिहाक्सामि। माल्टाबाङ रोम खे़ॽपॽआ 11 मोबा सुम महिना ए़क्साङ कानिङ योङा जहाजबेॽ साङ्नुङ खडिङ्मा, मो जहाज काप्साबा देबतामि छापनुङ्मा ले़टे़। मो योङा जहाज अलेक्जेन्ड्रिया सहरबाङ लेन्नुङ चुङ महिनारो इगो माल्टा ठाउँबेॽनोॽ टुसे़न्ले़। 12 मोबा कानिङ सुराकुसाइ लुमे सहरबेॽ रुक्नुङ सुम याकठोक मोबेॽ पेनिङ्मा। 13 मोबाङ राम्बोक्नुङ कानिङ रेगियाम लुमे सहरबेॽ रुक्टुङ्मा। वागियाराम लाङ्गेतलामबाङ हिॽवाबा लेस्सा, सिङ्आराम कानिङे़ॽ पटिओलि लुमे सहरबेॽ ले़न्डिङ्मा। 14 मोबेॽ कानिङे़ॽ परभु येसुबेॽ बिस्वास ले़ःॽखुबा वावानिसाजि चुप्टुङ्मा। माहाजिडे़ॽ इक साताडोॽ पेनानिङे लुनुङ कानिङ बिन्ति ले़टामि। कानिङ माहाजिनुङ इक्को साता पेन्नुङ रोम सहरलाम राम्बोगिङ्मा। 15 परभु येसुबेॽ बिस्वास ले़ःॽखुबा रोमबेॽ टुघुबा बिस्वासि वावानिसाजिडे़ॽ कानिङ आप्मे़ॽनिङ्सिबॽआ खा खेम्नुङ इन्डोक जना सुम पाटि लुमे ठाउँबेॽ मोबा इन्डोक जना चाहिँ अप्पियस लुमे हाटाबेॽ कानिङ चुप्सिॽ आबामि। पावलडे़ॽ माहाजि खाङ्डोक्मासोरोॽ साप्थाङ्मानुङ निवाहाङ ओहाक पिसु। पावल रोम सहरबेॽ 16 रोमबेॽ लेन्नुङ ए़क्साङ पावल खोमटाङ्बे़ॽ कोठा लानुङ पेन्डोगा मोबेॽ खो इक्को तिरिङ्गाडे़ॽ हुक्सुए। 17 सुम याक ए़क्साङ पावलडे़ॽ रोमबेॽ पेङ्खुबा यहुदि अगुवाजि के़डुजि। माहाजि सुप्सामि मोबा पावलडे़ॽ इडोॽ लुसुजि, “होउ वावानिसाजि, के़ॽ कानिङ्मि जातिनुङ कानिङ्मि टुबाजिडे़ॽ पिबॽआ रितिथितिमि बिरोधबेॽ इमाङ ए़ले़ःॽमाबेॽसो, यहुदि वावानिसाजिडे़ॽ का यरुसलेमबेॽ राःप्नुङ रोमिजिमि हुकपेॽ पिसामि। 18 रोमिजिडे़ॽ का बेॽलो खा सिम्सेॽनुङ लेॽहाङ्मा योगामि इन्ढोङ्होङ का सेॽनेमारोमा मङे़ॽमा योम्बोक के़ॽ ले़ःॽपॽआ खोजिडे़ॽ मे़न्चुप्टुजि। 19 तर कानिङ्मि यहुदि वावानिसाजिडे़ॽ येॽयेॽ का बिरोध ले़ःॽपॽआसे़ॽ के़ॽ रोमि बेॽए हाङ्बामि पोम्बेॽ बिन्ति ले़ःॽमा सिॽटा। तरसो के़हा यहुदि वावानिसाजि आप्टिक टिमा इमाङ्सो माॽआहा। 20 मोडोगे़ॽ इगो खा खेम्मेॽमामि लागि, मोबा हे़निङ्नुङ चुप्मामि लागि के़ॽ इगोबेॽ के़ॽपॽआ। कानिङ इस्राएलिजिडे़ॽ लेङ्इये लुनुङ आसा ले़ःॽपॽआ मुक्ति पिघुबा हाङ्बामि लागिनोॽ का आयु इगो चे़क्चिमि कोङ्बेॽ सिॽइटिङे।” 21 इगो खा खेम्नुङ माहाजिडे़ॽ इडोॽ लुसुजि, “हे़ने़ए़ टुम्बेॽ कानिङे़ॽ यहुदिया देसबाङ इमाङ्सो पत्रा मे़न्चुप्टिॽ मोबा हे़ने़ए़ बिरोधबेॽ इमाङ्सो मङे़ॽमा खा वावानिसाजिडे़ॽ कानिङ मे़ङ्खेम्मेॽटिॽमि। 22 तर कानिङ हे़ने़हा निवाबेॽहा खा खेम्मा मिङ्इन्डिङ्मे इन्ढोङ्होङ हे़ने़हा याॽमिजिमि बिरोधबेॽ लिबॽआ खा हाम्बेॽको हाम्बेॽ कानिङे़ॽ खेम्इटुङ्मे।” 23 मोडोगे़ॽ माहाजिडे़ॽ पावलमि खा खेम्मामि इक याक निधो ले़टुजि। मो याकपेॽ बेॽलो यहुदिजि सुम्नुङ पावलमि कोठाबेॽ लेस्सामि। मो याक पावलडे़ॽ माक्मिएबाङ युडाठोक निवाहाङ्मि राज्यमि टुम्बेॽ इःडुजि। मोसाडे़ॽ साप्पॽआ धारमिक नेॽचिरानुङ अगमबक्ताजिडे़ॽ साप्पॽआ खाबाङ खोसे़ॽ येसुमि टुम्बेॽहा खा नुरोॽ इःॽसाङ खोजि बिस्वासबेॽ लाःप्मा योगु। 24 इन्डोगे़ॽ चाहिँ पावलडे़ॽ लुबॽआ खा नुरोॽ लेनुङ बिस्वास ले़टुजि तर इन्डोगे़ॽ चाहिँ बिस्वास मे़ले़टुजि। 25 खोजिमि रुम्बेॽनोॽ खा मे़न्टोङ्बॽआसे़ॽ खोजि मोबाङ राम्बोक्सिॽ पोरोगामि। मोबा पावलडे़ॽ माहाजि इडोॽ लुसुजि, “पबित्रा होङ्निवाडे़ॽ हे़निङ्मि टुबालाबाजि लुबॽआ खा चइबानोॽ ले़ये इन्ढोङ्होङ अगमबक्ता यसैयाबाङ निवाहाङ्डे़ॽ इडोॽ लुसु, 26 इघा याॽमिजिबेॽ खे़ॽनुङ इडोॽ लुसाजे, ‘हे़निङे़ॽ खेम्मागो खेम्इन्डानुमे, तर लेसानुम्नि, खाङ्मागो हे़निङे़ॽ खाङ्इन्डानुमे तर खाङ्डोक्टानुम्नि!’ 27 इन्ढोङ्होङ इघा याॽमिजिमि निवा रुङ्गोॽवाडोक्नोॽ ले़हा। इघाजिमि ने़ए़क हिप्चुम्घे़टा, मोबा इघाजिडे़ॽ खोजिमि मिक टे़क्चुम्एटुजे! आक्टोॽ मे़ले़ःॽपॽआहोङ इघाजिडे़ॽ खाङ्हेसुजे, खेम्हेसुजे होला मोबा निवाडे़ॽ लेसुजे।” 28 मोबा ए़क्साङ पावलडे़ॽ लुसु, “मोडोगे़ॽ हागो हे़निङ लुनिम्ने़ निवाहाङ्मि मुक्तिमि सुसमाचार अयहुदि जातिहा याॽमिजिबेॽ खोसे़ॽ पाङ्इटुहा हागो माहाजिडे़ॽ खेम्इन्डुजे।” 29 [पावलडे़ॽ इगो खा लुसेॽनुङ ए़क्साङ माहाजि खोजिदाङ्बा लुघुसे़ॽ चुसाङ खडामि।] 30 पावल टाङ्बे़ॽनोॽ लाबॽआ कोठाबेॽ निनिङ्डोॽ पेना। मोबेॽनोॽ खो चुप्सिॽ लेङ्खुबा चोप याॽमिजि खोसे़ॽ स्वागत ले़टुजे। 31 पावलडे़ॽ मे़ङ्किस्सिरेॽ निवाहाङ्मि राज्यमि टुम्बेॽ याॽमिजि खेम्मेॽटुजेनुङ परभु येसु खिरिस्टमि टुम्बेॽहा खा इःडुजे। मोडोक्पेॽ असे़ॽसो खो मोडोॽ ले़ःॽमा मे़से़गुजि। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.