एप्पा चोङ्सा 27 - याम्फुपावल रोमबेॽ खे़ॽपॽआ 1 कानिङ इटालि देस खे़ॽमामि निधो ले़ःॽनुङ ए़क्साङ खोजिडे़ॽ पावल हाइखा कैदिजिनुङ सोरि मायोङ्बा अगस्टसमि तिरिङ्गाजिमि एप्पा तिरिङ्गा युलियसमि जिम्मा टिहाक्सु। 2 कानिङ एड्रामिटेनोस लुमे सहरबाङ आप्नुङ एसिया ठाउँमि योङेॽ यिजुम्बॽआ पोङ्बोङ्मा लिसाङ खे़ॽसिॽपोरोक्पॽआ योङा जहाजबेॽ साङ्नुङ राम्बोगिङ्मा। माकेडोनिया ठाउँबेॽ सिॽइये थेस्लोनिकि सहरबाङ आप्पॽआ अरिस्तारखससो कानिङ्नुङ्नोॽ टुसे़। 3 वागियाराम कानिङे़ॽ सिदोन सहरबेॽ रुक्टुङ्मा। मो ठाउँबेॽ एप्पा तिरिङ्गा युलियसडे़ॽ पावल नम्नम ले़ःॽनुङ खोमि लङ्गामजिनुङ चुप्सिॽ खे़ॽनुङ खो पाप्मिहा खा सहायता लाहेन्डुए लुसु। 4 मोबाङ कानिङ साङ्बॽआ योङा जहाज फेरि राम्बोगा। तर योङा जहाजमि पोम्लाम्बाङ हिॽवाबा लेम्बॽआसे़ॽ कानिङे़ॽ योङा जहाज साइपरस लुमे योङेॽ यिजुम्बॽआ पोङ्बोङ्मामि के़क्बाङ हिॽवाबा यिःप्साङ खडिङ्मा। 5 किलिकियानुङ पामफिलिया लुमे ठाउँमि के़क्पेॽ सिॽइये टोम्लिॽवा पाङ्घे़ॽनुङ लुकिया ठाउँबेॽ सिॽइये माइरा लुमे सहरबेॽ लेस्सिङ्मा। 6 मोबेॽ एप्पा तिरिङ्गा युलियसडे़ॽ अलेक्जेन्डरिया लुमे सहरबाङ इटालिया देसबेॽ खे़ॽए़ये योङा जहाज चुप्नुङ खोसे़ॽ मो योङा जहाजबेॽ कानिङ साङ्मेॽटा। 7 पोम्लाम्बाङ हिॽवाबा लेम्बॽआसे़ॽ कानिङ बेॽलो याकरो ताम ले़ःॽसाङ खे़ॽमाबेॽ याप्चे़ॽ क्निडस लुमे सहरमि के़क्पेॽ रुक्टुङ्मा। मोबेॽ रुक्माबेॽ हिॽवाबे़ॽ छना मोबाङ पोम्बेॽ मे़ङ्खे़ॽहेसिङ्मा। मोडोगे़ॽ कानिङ योङेॽ यिजुम्बॽआ केरेट लुमे पोङ्बोङ्माबाङ यिप्खे़ॽसाङ सालमोने लुमे ठाउँ लिसाङ खडिङ्मा। 8 बेॽलो खेः आङ्साङ कानिङ मो योङेॽ यिजुम्बॽआ पोङ्बोङ्मामि के़क्बाङ लासिया सहरमि के़क्पिए सुन्दर लुमे ठाउँबेॽ लेस्सिङ्मा। 9 मोबेॽ रुक्मा बेॽलो याक यागा। मे़न्चारेॽ पेम्मे याकसो रुक्खे़ॽपेबॽआ ले़टा, मो चुङ बेलाबेॽ सानिङ लेङ्इये वाडुमडे़ॽ ले़ःॽमे़ॽ मोबाङ योङा जहाज राम्बोक्मा सारो सिॽटा। मोडोगे़ॽ पावलडे़ॽ योङा जहाजबेॽ खो हुङ्खुबा याॽमिजि इडोॽ लुसुजि, 10 “होउ लङ्गामजि, हागो इन्डोॽहोङ्सो कानिङ इगोबाङ योङा जहाजबेॽ साङ्नुङ पोम्बेॽ खे़ॽमाहोङ योङा जहाजबेॽ टुहा कोक्नामरेॽनोॽ ने़ॽनि कानिङ्सो सिघे़न्डि होला के़ॽ मिॽइटुङे।” 11 तर एप्पा तिरिङ्गाडे़ॽ पावलडे़ॽ लुबॽआ खा चइबानोॽ लिये मे़मिॽटु। तर खोसे़ॽ योङा जहाजमि मायोङ्बानुङ योङा जहाज ठिघुबाडे़ॽ लुबॽआ चाहिँ बेॽलोनोॽ बिस्वास ले़टु। 12 चुङ याकपेॽ पेम्मामि लागि मो योङेॽ यिजुम्बॽआ पोङ्बोङ्मा नुबा मे़ले़टा। मोडोगे़ॽ बेॽलो याॽमिजि मोबाङ चान्डो चान्डो ले़ःॽनुङ फोनिक्स लुमे सहर रुक्मा बोल ले़टामे। मो फोनिक्स ठाउँ चाहिँ थाङ्गेत-नमथानुङ नाङ्गेत- नमथालाम हिङ्घे़ॽपॽआ ठाउँ ले़टे़। 13 लाङ्गेतलामबाङ ताम हिॽवाबा लेम्बोगा। चोप याॽमिजिडे़ॽ “हागो कानिङ खे़ॽहेन्डिङ्मा” मिनामि। माहाजिडे़ॽ हाप्युङ्बॽआ योङा जहाज हाप्ठाम खे़ॽवा हेन्नुङ खोजिमि योङा जहाज केरेट लुमे पोङ्बोङ्मामि के़क्बाङ ठिघे़ॽपोगुजि। 14 तर इॽछोॽ ए़क्साङ मो पोङ्बोङ्माबाङ बेॽए फुइक्सुमा यिआबा। मोमि निङ चाहिँ नमगेत थाङ्गेत लुमे फुइक्सुमा ले़टे़। 15 मो फुइक्सुमाडे़ॽ योङा जहाज टे़गु मोबा मोमि पोम्बेॽ इमाङ्सो मे़ले़ःॽहेसुङ्मा। मोबा मो फुइक्सुमाडे़ॽ हाम्बेॽ हाम्बेॽ लाघे़न्डुए मोबेॽनोॽ यिःॽखे़ॽमे़ॽटुङ्मा। 16 मोबा क्लौडा लुमे योङेॽ यिजुम्बॽआ पोङ्बोङ्मामि लाङ्गेतलाम रुक्नुङ ए़क्साङ पोङ्बोङ्माडे़ॽ फुइक्सुमा यिप्खडा। तर मोबेॽसो योङा जहाजमि ए़ङ्गुवाराम हिःक्नुङ युङ्बॽआ ए़डेॽमा योङा जहाज कानिङे़ॽ याप्चे़ॽनोॽ जोगाबा ले़टुङ्मा। 17 मो से़ॽके़ॽनुङ योङा जहाज होङ्सिॽयु युङ्नुङ योङा जहाज ठिघुबाजिडे़ॽ मो ए़डे़म्मा योङा जहाजबेॽहा बेॽहा पडागे़ॽ नुरोॽ हिःगुजि। हागो योङा जहाज लिबियामि सिरटिस ठाउँमि के़क्राजि बलाउटे डेम्माबेॽ हुम्सिघे़येन्डे लुनुङ किस्सिबोगिङ्मा। मोडोगे़ॽ योङा जहाज ठिघुबाजिडे़ॽ योङा जहाजमि ताम्बु हेओक्नुङ हिॽवाबामि बोलबेॽनोॽ योङा जहाज लेॽहाक्सुजि। 18 मो किस्सिमारोमा फुइक्सुमा लिडुङ्खडा मोबा वागियाराम माहाजिडे़ॽ योङा जहाजबेॽहा कोक्नाम टोम्लिॽवाबेॽ राःबुजि। 19 सिङ्आराम योङा जहाज टोङ्मामि लागि पाप्मिहा कोक्नाम खोजिटाङ्बे़ॽ टोम्लिॽवाबेॽ राप्हे़क्सुजि। 20 बेॽलो याकरो कानिङे़ॽ साङ्गेनुङ नम इमाङ्सो मे़ङ्खाङ्डोक्टुङ्मा। फुइक्सुमा बेॽए लेन्डुङ्घडा मोडोगे़ॽ कानिङ हिङ्इन्डिङ्मा लुमे आसासो मे़खे़ॽपेबॽआ ले़टा। 21 याॽमिजिडे़ॽ चामा मे़न्चाबॽआ बेॽलो याक लिघे़ॽपॽआ ले़टा। पावलडे़ॽ मोबेॽ टुघुबा चोप याॽमिजिमि पोम्बेॽ येःप्नुङ लुसु, “वावानिसाजि, हे़निङे़ॽ के़ॽ लुबॽआ खा खेम्नुङ, केरेटबाङ राम्बोक्मा मे़म्फे़ने़। मोडोॽ ले़ःॽपॽआहोङ इडोक्मा खेः आङ्मासो मे़सिॽटे़ इमाङ कोक्नामसो नासि मे़लिसा। 22 तर हागो बिन्ति ले़ःॽनिम्ने़, हरेस ए़ॽचासानिङे, हे़निङ असासो सिसानिङ्नि, इगो योङा जहाजरेॽनोॽ नासि लिये। 23 का निवाहाङ्मि याॽमि ले़ङेनुङ के़ॽ खोमिन्नोॽ सेवा ले़नुङे। आयु सेन्डा खोमिन्नोॽ इक्को थाङ्सिरिदुतडे़ॽ के़ए़ पोम्बेॽ येःप्नुङ लुसिङा। 24 ‘होउ पावल, ए़क्किसिने, न्यायमि लागि हे़ने़ॽ हाङ्बा रोमिमि पोम्बेॽ खे़ॽमानोॽ खे़येनुङ हे़ने़ॽ ले़ःॽमे हे़न्नुङ सोरि खे़ॽखुबा चोप याॽमिजि निवाहाङ्डे़ॽ रच्छे ले़ये।’ 25 मोडोगे़ॽ के़हा वावानिसाजि, ढुक्का लिसानिङे इन्ढोङ्होङ निवाहाङ्डे़ॽ लुबॽआ मो खा चइबानोॽ पुरा लिहा लुनुङ के़ॽ बिस्वास ले़ए़टुङे। 26 तर हागो योङेॽ यिजुम्बॽआ इक्को पोङ्बोङ्मामि के़क्पेॽ ठोःॽइन्डि होला।” योङा जहाज योघे़ॽपॽआ 27 कानिङ्मि योङा जहाज इडोॽ माहोङ्माबेॽ लेम्बॽआ फुइक्सुमामि रुम्बेॽ इगिॽयु मिॽयु वाइडुबॽआ इक्पोङ रियाक लिघे़ॽपॽआ ले़टे़। सेन्डाराजि मो योङा जहाज ठिघुबाजिडे़ॽ कानिङ्मि योङा जहाज इक्को देसमि के़क्पेॽ रुक्सिॽपोरोक्इटा लुनुङ मिॽटुजि। 28 मोडोगे़ॽ माहाजिडे़ॽ योङामि होङ्डुम्बा इन्डोक टुउ लुनुङ सिःक्पोगुजि। सिःक्माबेॽ रिक्पोङ मिटरडोक होङ्डुम्बा टुबॽआ लेडोक्टुजि। ए़डे़ॽ मेॽयोङ रुक्नुङ फेरि सिःक्माबेॽ सुम्बोङ मिटरडोक होङ्डुम्बा टुबॽआ लेडोक्टुजि। 29 माहोङ्मामि के़क्पेॽ ए़डे़ॽवा योङा टुबॽआसे़ॽ योङा जहाज रुङ्गोॽवाबेॽ रुक्सिघे़न्डे मिॽनुङ योङा जहाज ठिःघुबाजि किस्सिबुगामि। मोडोगे़ॽ माहाजिडे़ॽ योङा जहाजमि ए़ङ्गुवारामबाङ रिउम योङा जहाज हाप्ठाम चे़क्चिमि बेॽहा खे़ॽवा हेॽए़न्नुङ योङा जहाज हाप्मेॽटुजि। मोबा हागो इन्डोक्पेॽ नम टे़ये लुनुङ हुक्सुजि। 30 इडोॽ योङा जहाज ठिःघुबाजिडे़ॽ पोम्लामए योङा जहाज हाप्ठाम चे़क्चिमि बेॽहा खे़ॽवा हेॽएम्मे निहुबेॽ ए़द्रिहा नाउ हेॽएन्नुङ मोबेॽ साङ्नुङ चिःॽखे़ॽमा योगामि। 31 तर पावलडे़ॽ तिरिङ्गामि एप्पानुङ तिरिङ्गाजि लुसुजि, “इघा योङा जहाज ठिःघुबाजि इगोबाङ चिःॽखे़ॽमिहोङ हे़निङ असासो हिक्सानिङ्ने।” 32 इगो खा खेम्नुङ योङा जहाजबेॽ हिःक्नुङ युङ्बॽआ ए़द्रिहा नाउ हिःक्ठाम पडाक तिरिङ्गाजिडे़ॽ हे़क्नुङ मो ए़द्रिहा नाउ योङाबेॽ यिःॽहाक्सुजि। 33 नम टे़ःॽसिॽ पोरोक्माबेॽ पावलडे़ॽ माहाजि “इमाङ्होङ्सो चामानोॽ खे़ये” लुसाङ लुसुजि, “हे़निङे़ॽ किस्सिमावे़ॽ इमाङ्सो मे़न्चाबॽआ इक्पोङ रियाक लिघे़टे़। 34 हागो के़ॽ हे़निङ बिन्ति ले़ःॽनिम्ने़, इमाङ ना इमाङ्गो चासानिङे इन्ढोङ्होङ हिङ्मामि लागि चामानोॽ खे़ये। ए़स्किसिडानिङे, निवाहाङ्डे़ॽ लुडिडोक्नोॽ असासो इमाङ्सो लिसानिङ्नि।” 35 इडोॽ लुनुङ पावलडे़ॽ चरेपा कुःबु मोबा चोपमि पोम्बेॽ निवाहाङ ओहाङ पिनुङ चोबुगु। 36 मोबा ए़क्साङ हाइखाजि चोबे़ॽ मे़ङ्किस्सिरेॽ चोबुगुजि। 37 मो योङा जहाजबेॽ कानिङ निच्चि सये एच्चिबोङ नोक्चि जना याॽमिजि टुसिङ्मा। 38 चोबे़ॽ उक्खारो चामा चासेॽनुङ ए़क्साङ योङा जहाज सोप्याङ टोङ्मामि लागि मोबेॽ टुबॽआ गहुसो योङाबेॽ राप्ए़न्डुजि। 39 नम टे़ॽनुङ माहोङ्मामि इक्के़ङ खाङ्मुसा, तर योङा जहाज ठिःघुबाजिडे़ॽ मो ठाउँ मे़लेसुजि। के़क्पेॽ रुङ्गुवासे़ॽवारेॽनोॽ टुबॽआ ठाउँ खाङ्डोक्नुङ योङा जहाज मिॽयुनोॽ लाघे़ॽमा योगुजि। 40 माहाजिडे़ॽ योङा जहाज हाप्ठाम हिःक्पॽआ पडाक हे़क्नुङ योङा जहाज हाप्ठाम माहोङ्माबेॽनोॽ योङ्मेॽटुजि। योङा जहाज टोःक्ठाम हिःक्पॽआ पडाकसो हेम्बेसुजि मोबा पोम्लाम्मि पाल मिन्डु ठेॽपोगुजि मोबा हिॽवाबाडे़ॽ योङा जहाज येप्खे़ॽमाबेॽ के़क्पेॽ योङा जहाज ठिघे़ॽटुजि। 41 तर योङा जहाजमि पोम्लाम रुङ्गुवासे़ॽवाबेॽ हुम्घडा, मोबा ए़ङ्गुवालाम चाहिँ योङामि फे़ङ्ले़ॽवाडे़ॽ फे़ङ्नुङ पोक्खडा। 42 मोडोक्पेॽ कैदिजि वाफाक्साङ चिखे़म्मि मिॽनुङ सेॽनेमा योगुजि। 43 तर तिरिङ्गामि एप्पाडे़ॽ पावल हिङ्मेॽमा मिॽटुए। मोडोगे़ॽ खोसे़ॽ असासो मे़सेॽमेॽटुजि। खोसे़ॽनोॽ वाफाक्लेघुबाजि याक्लोनोॽ वाफाक्खडानिङे लुनुङ आग्या पिसुजि। 44 हाइखाजि चाहिँ योङा जहाजमि फले़क अथबा इमाङ इमाङ फे़क्खे़ॽपॽआ टुक्रा राःप्नुङ मेए़रेङ खडानिङे लुनुङ आग्या पिसुजि। इडोॽ कानिङ चोप इमाङ मे़लिरेॽ माहोङ्मामि के़क्पेॽ रुक्टुङ्मा। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.